Johannes 10
10
1Wowicake, wowicake eciyatanhan heciciyapi; Tuwe taḣinca tipi tiyopa ohna tin iyaye śni, tiyopa icunonpa tanhan ti iyoḣpaye cin he wabotice c̣a wamanon kin heca.
2Tuka tuwe e tiyopa eciyatanhan tin iyaye cin nee taḣinca tawa wicaye cin ee.
3Qa iye tiyopa awanyake cin tiyopa kiciyugan ece, unkan taḣinca kin he ho kin naḣonpi ece; taḣinca tawa kin otoiyohi cajeyan wicakico, qa tankan wicahdoya ece.
4Unkan taḣinca tawa kin tankan awicau eca, wicitokam ya ece; unkan taḣinca kin iś ihakam yapi ece, ho kin iyekiyapi nakaeś.
5Qa tuwe tokeca kinhan he ihakam yapi kte śni, tuka nakicipapi kta; tuwe tokeca ho kin iyekiyapi śni, heon etanhan.
6Wiyacinpi kin de Jesus ecen ewicakiya; tuka taku owicakiyake cin hena okaḣnigapi śni.
7Hehan ake Jesus hewicakiya; Wowicake, wowicake on heciciyapi, Taḣinca tipi tiyopa kin he miye ce.
8Tona mitokam hipi kin hena owasin waboticapi qa wamanonpi kin hecapi; tuka taḣinca kin anawicagoptanpi śni.
9Tiyopa kin he miye; tuwe miye eciyatanhan ti iyoḣpaye cinhan ni kta; qa mahen ye c̣a tankata inanpa eca wato tanyan iyeye kta.
10Wabotice cin he wamanonpi, tin wicaktepi, waihangyapi henakiya on hi ece; tuka wiconi yuhapi kta, qa takudan icakije śni unpi kta e heon miye wahi.
11Waawanhdake waśte kin he miye. Waawanhdake waśte kin he taḣinca kin on wiconi tawa eḣpekiya.
12Tuka tuwe odotapi un, qa waawanhdake kin ee śni, qa taḣinca tawa śni kin he śunktokeca an u wanyaka eca, taḣinca kin eḣpewicaye c̣a najica ece; unkan śunktokeca iyawicaḣpaye c̣a ihangwicaya ece.
13Odotapi un kin he wodetapi un, qa taḣinca kin ihawicakta śni, heon etanhan napa ece.
14Waawanhdake waśte kin he miye, qa taḣinca mitawa kin hena sdonwicawakiya, qa mitawa kin iś nakun sdonmakiyapi ece.
15Ate token sdonmakiye cin he iyecen miś Ate sdonwakiya; qa taḣinca kin hena on wiconi mitawa kin eḣpewakiya.
16Qa taḣinca toktokeca nakun wicamduha, taḣinca tipi kin den un śni: hena nakun awicawahi kta, hecen miho kin naḣonpi kta; hetanhan taḣinca tipi wanjidan kta, qa waawanhdake wanjidan kta.
17Wiconi mitawa eḣpewakiye c̣a, ake ewehdaku kte cin heon Ate waśte makidaka.
18Tuwedan he maki kte śni; qa miye cinka he wicawaqu; he amduśtan kte cin owakihi, qa ewehdaku kte cin nakun owakihi; Ate hecen econ maśi ce, eya.
19Akeś wicoie kin dona on Juda oyate kin akipam tawacinpi.
20De taku wakan śica yuha, qa he ihnaśkinyan, tokeca e nayaḣonpi he, wicota eyapi.
21Tuka apa iś, Tuwe wakan śica yuhe cin decen oieye śni ece; taku wakan śice cin he iśta gongapi iśta wicakiyukawa okihi kta he, eyapi.
22Wanna Jerusalem en yuwohduze tonpi omniciye kagapi ece qon hehantu; unkan waniyetu.
23Unkan icunhan tipi wakan ohna, Solomon ohanzi hdepi, tawa qon he en Jesus omani.
24Hehan Juda oyate itan ihdukśan himniciyapi qa heciyapi; Tohanyan wacin akipam yusunyakiyapi he; Messiya kin he niye hecinhan taninyan unkokiyaka po.
25Jesus awicayupta; Wanna ociciyakapi tuka wieamayadapi śni qon; Ate caje kin eciyatanhan wicoḣan ecamon kin hena omayake cin ee.
26Taḣinca tawa wicawaye cin he oyapapi śni, he etanhan wicamayadapi śni, eciciyapi qon he iyececa.
27Taḣinca mitawa kin miho kin naḣonpi, qa hena sdonwicawakiya, qa mihakam unpi.
28Qa owihanke wanin wiconi wicawaqu; qa icimana owihankepi kte śni, qa minape kin etanhan tuwedan wicayuśpe kte śni.
29Ate hena maqu kin he taku owasin sam iyeya tanka; qa Ate nape kin etanhan tuwedan wicayuśpa okihi śni.
30Miye, qa Atewaye cin unwanjipidan, eya.
31Hehan Juda oyate ake inyan icupi, on kininpi kta e heconpi.
32Unkan Jesus awicayupta; Ate eciyatanhan wicoḣan waśte ota cicipazopi; hena tukte wanji on nakaha inyan on mayakininpi kta he, eya.
33Juda oyate ayuptapi qa heyapi; Wicoḣan waśte on unnicininpi kte śni, tuka iapi śica on, qa winicaśta tuka Wakantanka nic̣icage cin heon etanhan.
34Jesus awicayupta; Taku wakan kin henicapi, eciciyapi ce, he woope nitawapi kin en hecen kagapi śni he.
35Hecen tona Wakantanka oie kin en wicahiyohi kin hena taku wakanpi ewicakiya hecinhan, qa wowapi wakan kin he yujujupica śni;
36Hecen tuwe Ateyapi kin hdnwakan qa makata u śi kin he, Wakantanka Cinhintku kin he miye ce, epe ciqon, heon, Taku śica eha ce, token eyakiyapi kta he.
37Ate oḣan kin hena ecen ecamon śni kinhan, wicamadapi śni po.
38Tuka hecen ecamon kinhan, miye wicamayadapi śni eśta, wicoḣan kin hena wicada po; hecen Atewaye cin micica, qa miye he weeica, heciyatanhan sdonyayapi qa wicayadapi kta ce, eya.
39Heon etanhan nakun ake ṭinsa yuze wacinpi; tuka napepi kin etanhan ihduśpa.
40Qa ake hetanhan Jordan wakpa kin he en, Johannes baptem wicaqu ece qon he en i, qa en ounyan.
41Unkan wicota en hipi qa heyapi; Johannes takudan wapetogya ecen econ śni, tuka Johannes wicaśta kin de etanhan tona oyake cin owasin wowicake.
42Unkan hen wicota wicadapi.
Currently Selected:
Johannes 10: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.