Johannes 3
3
1Wicaśta wan Pharisee etanhan Nikodemos eciyapi, Juda oyate itancanpi kin he wanji ee;
2Hanyetu wan Jesus yanke cin en i qa heciya; Itancan, waonspekiye Wakantanka eciyatanhan u kin henica sdonunniyanpi; taku wapetokeca ecanon ece kin tuwedan hecen okihi śni, Wakantanka kici un śni kinhan.
3Unkan Jesus ayupte c̣a heciya; Wowicake, wowicake eciyatanhan heciciya, Wicaśta kin wankantanhan teca nien tonpi śni kinhan Wakantanka tokiconze kin wanyaka okihi kte śni.
4Wicaśta kin kan ehantanhan token ecin teca ni en tonpi kta he. Ake hunku tezi kin mahen kihde c̣a ake teca ni en tonpi kta he token okihi kta he, Nikodemos eciya.
5Unkan Jesus ayupte; Wowicake, wowicake eciyatanhan heciciya, Wicaśta kin mini qa Woniya kin on tonpi śni kinhan Wakantanka tokiconze kin en tin iyaya okihi kte śni ce, eya.
6Tuwe wicaceḣpi on tonpi kin he wicaceḣpi, qa tuwe Woniya kin eciyatanhan tonpi kin he woniya.
7Wankantanhan nitonpi kta ce, eciciye cin heon ihnuhan niyuśinyaye cin.
8Tateyanpa kin tokiyatanhan cin eca eciyatanhan ipogan ece, qa oqo kin he nayahon, tuku tokiyatanhan u, qa tokiya ye cin he sdonyaye śni. Wicaśta Woniya kin eciyatanhan tonpi kin owasin hecetu.
9Nikodemos ayupte c̣a heciya; Hena token okihipica he.
10Jesus ayupte c̣a heciya; Israel en waonspekiye cin henica, tuka dena oyakaḣnige śni he.
11Wowicake, wowicake eciyatanhan heciciya; Taku sdonunyanpi kin hena unkeyapi ece, qa taku wanunyakapi kin dena unkoyataninpi, tuka wounyataninpi kin ayaktapi śni.
12Taku maka kin detanhan ociciyakapi kin wicayadapi śni ehantanhan, maḣpiya kin ekta taku ociciyakapi kinhan hee token wicayadapi kta he.
13Nahaḣin tuwedan maḣpiya kin ekta i śni, tuwe maḣpiya kin eciyatanhan kuntkiya u, qa hi kin he Wicaśta Cinhintku kin hee, nahaḣin nakun maḣpiya kin ekta yanka.
14Nakun ḣewoskan wanmduśka Moses wankan ehde qon he iyecen Wicaśta Cinhintku kin wankan ehdepi kta.
15Heon tuwe awacin kinhan owihanke kte śni, qa owihanke wanin wiconi yuhe kta.
16Wakantanka oyate kin cantewicakiya, heon Cinhintku iśnana icage cin wicaqu, qa tuwe awacin kinhan owihanke kte śni, tuka owihanke wanin wiconi yuhe kta.
17Wakantanka Cinhintku kin wicoicage kin en u śi kin, heon oyate kin wicayaco kta e hecon śni; tuka iye on oyate kin nipi kta e hecon.
18Tuwe he wacinye cinhan he yacopi kte śni; tuka tuwe wacinye śni kinhan he wanna yacopi; Wakantanka Cinhintku iśnana icage cin he caje kin wacinye śni kin heon etanhan.
19Wicayacopi kin he kaketu; Oyate kin iyoyanpa en wicahiyohi, tuka wicaśta kin otpaza e waśtedakapi, qa iyoyanpa e cinpi śni, wicoḣan śicapi kin heon.
20Tuwe taku śica econ kin he iyoyanpa śice daka, qa iyoyanpa ikiyedan u śni, oḣan iyopeyapi kto cin heon.
21Tuka tuwe wowicake eciyatanhan oḣanye cin he iyoyanpa kin en u, oḣan yuotaninpi kta, Wakantanka eciyatanhan oḣanye cin heon.
22Hena iyohakam Jesus waonspewicakiye cin om Juda makoce kin en i; qa en om un, qa baptem wicaqu.
23Unkan he icunhan Johannes iś eya Enon Salim ikiyedan baptem wicaqu, hen mini ota kin he etanhan. Unkan baptem wicaqupi kta e etkiya aye.
24Hehanyan hinyahin Johannes kaśkapi śni.
25Hehan taku hdokinicapi, Johannes waonspewicakiye cin wanjikji qa Juda wicaśta om, wicayujajapi kin he icaḣtagya.
26Unkan Johannes ekta ipi qa heciyapi; Itancan, Jordan wakpa akasanpa tanhan tuwe kici yaun qa daotanin qon he, iho, wanna baptem wicaqu, unkan owasin en ece iyoptapi.
27Unkan Johannes waayupte c̣a heya; Wicaśta kin maḣpiya eciyatanhan taku qupi śni ehantanhan takudan iye cinka icu okihi kte śni ece.
28Messiya kin he miye śni, tuka itokam u maśipi ce, epe ciqon he niye sdonyayapi.
29Tuwe tawicu ton kin he hihna yanpi kin hee, tuka hihna yanpi takodaku kin en taninyan anagoptan najin, qa hihna yanpi ho kin naḣon kin heon iyuśkin ece. Heon etanhan wowiyuśkin mitawa kin wanna yuecetupi ce.
30Iye kin nina sanpa icage kta, tuka miye yuhukun amaye kta.
31Tuwe wankan tanhan hi kin he taku owasin iwankam ounye. Tuwe maka etanhan hi kin he maka etanhan, qa maka kin iyecenya oie kiton. Tuwe maḣpiya kin eciyatanhan hi kin he taku owasin on iyotan.
32Qa taku wanyake c̣a taku naḣon kin he owasin yaotonin ece; tuka taku yaotanin kin tuwedan wicada śni.
33Taku yaotanin kin he tuwe wicada kinhan Wakantanka wicake cin he yutanin ece.
34Wakantanka tuwe u śi kin he Wakantanka oie oyaka; Wakantanka Taniya kin iyuta qu śni, ocowasin qu.
35Atkuku kin Cinhintku waśtekidake c̣a, taku owasin iye nape kin en qu:
36Hecen tuwe Cinhintkuyapi kin wacinye cinhao owihanke wanin wiconi kin wanna yuha; tuka tuwe wacinye śni kinhan, he wiconi wanyake kte śni, tuka Wakantanka tocanniye kin wanna akan un.
Currently Selected:
Johannes 3: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.