Roma 7
7
1Mihunkawanji, (tona woope sdonyapi kin hena owicawakiya); woope kin wicaśta kin wowidag ya, toḣanyan ni un kin hehanyan, he sdonyayapi śni he.
2Winoḣinca kin tuwe hihna ton kinhan, hihnaku ni un kin hehanyan, toope kin on kaśkapi; tuka hihnaku kin wanna ṭe cinhan hehan hihnaku toope kin etanhan kiyuśkapi.
3Hecen hihnaku ni un kin icunhan, wicaśta tokeca hihnaye cinhan, wawiciḣaḣapi econ eciyapi kta; tuka hihnaku ṭe cinhan hehan woope qon etanhan kiyuśkapi qa wicaśta tokeca hihnayan eśta he wawiciḣaḣapi econ śni.
4Heon etanhan, mihunkawanji, niś eya Messiya tancan kin eciyatanhan woope kin ekta niṭapi kin; hecen tuwe tokeca hihnayayapi kta, tuwe wicaṭe cin etanhan ekicetuyapi qon he hee; hecen Wakantanka on waskuyeca icaḣunyanpi kta.
5Wicaceḣpi kin en unyakonpi qehan, woaḣtani wocantiheye kin, woope kin eciyatanhan un kin, hena waskuyeca wiconṭe icaḣkiciciye kta e heon unhuhapi kin en oḣanyan.
6Tuka nakaha woope kin etanhan unkiyuśkapi, taku on unkaśkapi qon he ekta unṭapi kin; hecen oowa tanina kin en wowidag unyanpi kte śni, tuka woniya teca kin en.
7Hecece cinhan token unkeyapi kta he: Woope kin he woaḣtani kin ee he: Hiya, hecetu śni; woope eciyatanhan śni unkanś, woaḣtani sdonwakiye kte śni tuka qon. Woope kin, Tokan tawa yacin kte śni ce, eye śni unkanś, wocantiheye śice cin sdonwaye kte śni tuka.
8Hehan woaḣtani woahope kin wowinyunye c̣a, miye mahen wocantiheye śice cin owasin micaga. Woope codan woaḣtani ṭa wanka.
9Ehanna woope codan ni waun; tuka woahope kin he hi qehan, woaḣtani kini, qa miye maṭa.
10Qa woahope kin wiconi kta e on yuśtanpi qon he wiconṭe kin ee imicicaga ce.
11Woaḣtani woahope kin wowinyunyan, hecen mahnaye c̣a, on makte.
12Hecen woope kin he wakan; qa woahope kin he nakun wakan, owotanna qa waśte.
13Hecen taku waśte kin he wiconṭe imicicaga he. Hiya hecetu śni. Tuka woaḣtani kin he woaḣtani hee e tanin kta, heon taku waśte on etanhan wiconṭe icaḣ miciciya; hecen woahope kin eciyatanhan woaḣtani kin iyotan śice kta.
14Woope kin he wakan sdonunyanpi; tuka miye qe wicaceḣpi kin hemaca, qa woaḣtani ihukuya wiyopemayunpi.
15Taku ecamon ece kin he iyowinwakiye śni. Taku wacin kin he ecen ecamon śni; tuka taku śice wadake cin ho ecen ecamon ece.
16Taku wacin śni kin he ecen ecamon kinhan, woope kin he waśte e induotanin.
17Qa hecen tuwe hecon kin he miye śni, tuka woaḣtani miye mahen un kin hee.
18Miye en, miceḣpi kin he waka, taku waśte en maun śni e sdonwakiya Ic̣iconzapi kin he iyemicihantu, tuka token taku waśte ecamon kte cin iyewakiye śni.
19Taku waśte wacin kin he ecen ecamon śni; tuka taku śica wacin śni kin hee ecen ecamon ece.
20Hecen taku wacin śni kin he ecen ecamon kinhan, tuwe hecon kin he miye śni, tuka woaḣtani miye mahen un kin he hecon.
21Hecen woope wanji iyewakiya, taku waśte ecamon wacin eca, taku śica miye en miciun ece.
22Wicaśta mahentu kin eciyatanhan Wakan tanka toope kin on imduśkin:
23Tuka mihuha kin en woope tokeca wan wanmdaka, he mitawacin toope kin kici kicize c̣a, woaḣtani woope mihuha kin en un kin he en wayaka amahda.
24Wicaśta nina iyokiśice cin he miye; tuwe wiconṭe tancan kin de etanhan emahdaku kta he.
25Wakantanka wopida ewakiya ece, Jesus Messiya Itancan unkiyapi kin hee on etanhan. Hecen miye mitawacin kin on Wakantanka toope kin wowidag may an, tuka wicaceḣpi eciyatanhan woaḣtani woope kin he imadaka.
Currently Selected:
Roma 7: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.