Jan 20
20
Buwa-yo Jeju to baa
1Ndɔ-kuwa-rɔ tə̂ kə əndɔɔ baa kə̂ lo nayn uja ang bbay a, Mari kə̂ Magədala aw ta buwa-yo tə̂ le. Naa lo a, ər kə̂ dutu nɛ̂n ta buwa-yo le tokə kɔru. 2Yeenn ngaâ nayn naw ninga Simɔn Piyɛr de kə marə nje-nja go Jeju tə̂ kə̂ Jeju ndike nya le, n̂-pa narəde nan: «Dɔru Əbbə-dəwje buwa-yo tə̂ le, a n-gərə lo kə̂ dilɛ̂ tə̂ ang.» 3Piyɛr de kə nje-nja go Jeju tə̂ le n̂-teeje ngaâ dawje kə buwa-yo tə̂ le. 4Daw daynje ngɔru dede joo kəm. A nje-nja go Jeju tə̂ kə̂ kâra le ayn ngɔru uta Piyɛr le ngaâ aw tee ta buwa-yo tə̂ le dɔngɔr. 5Nula dɔɛ̂ a, noo ta-kubbu lɛɛn le mə buwa tə̂ le. A nandə tə̂ ang. 6Simɔn Piyɛr kə̂ aw ddee goe tə̂ le ddee tee ngaâ andə mə buwa-yo tə̂ le. Naa ta-kubbu kə̂ ngal kə̂ to lo tə̂ənn le, 7kə kubbu kə̂ n̂-kə nɛ̂n dɔ Jeju le. Kubbu le kə ta-kubbu lɛɛn le toje lo kâra baa ang. Kubbu le n̂-kə dila dang. 8Yeenn ngaâ nje-nja go Jeju tə̂ kə̂ ddee tee buwa-yo tə̂ dɔngɔr le andə buwa-yo tə̂ le tɔ. Noo ngaâ noo məɛ̂ tə̂. 9Mba njê-njaje go Jeju tə̂ le nayn gərəje mə tar kə̂ Makəturu pa le ang bbay. Tar kə̂ nan: «Jeju kə̂ oy a ndol njaa» le. 10Goe tə̂ a, njê-njaje go Jeju tə̂ kə̂ joo le təlje awje lo tə̂ ləde.
Jeju tɔju rɔɛ̂ arə Mari kə̂ Magədala
11Karɛ̂ tə̂ənn, Mari ar ddaka ngɔsi kə buwa-yo le ngaâ aw nɔn. Naw nɔn le ngaâ nula dɔɛ̂ ta kaa lo mə buwa-yo tə̂ le a, 12noo anjəje joo ulaje kubbuje kə̂ nda ngaâ isije lo tə̂ kə̂ dila niinn Jeju tə̂ le. Ne kə̂ kâra nisi ər dɔ tə̂, a ne kə̂ kâra nisi ər gɔl tə̂. 13Anjəje le dujeje nan: «Aw nɔn mba ddi wa?» Nilade tə̂ nan: «Dɔru Əbbəmje dɔtu nɛ̂n, a m-gərə lo kə̂ dilɛ̂ tə̂ ang.» 14Kar kə̂ naw pa tar bbay ngaâ n̂-kəl a, noo Jeju le ar tə̂ənn, a n̂-gərə to ne ang. 15Jeju le duje nan: «Dɛnɛ̂n, aw nɔn mba ddi wa? Nân bba aw sangɛ̂ wa?» A dɛnɛ̂n le əjə to nje-ndɔɔ nəənn le ngaâ pa arɛ̂ nan: «Bɔy, bbo əi â ɔrɛ̂ a, ə-tɔjum lo kə̂ ilɛ̂ tə̂ arə maw munnɛ̂.» 16Jeju bbarɛ̂ nan: «Mari.» Mari le turu rɔɛ̂ kə rɔ Jeju tə̂ le ngaâ pa arɛ̂ kə tar ebərə nan: «Rabuni.» Gəle nan: «Nje-nɛ̂n-tɔju.»
17 Jeju pa arɛ̂ nan: «Ɔrum kə jii ang, mba m-nayn maw rɔ Bɔy tə̂ ang bbay. A aw pa arə ngakɔnʼmje ə-pa nan maw maw kə rɔ Bɔy tə̂ kə rɔ Bɔmje tə̂ kə̂ to Bɔsese ddəm rɔ Lubba tə̂ ləm kə̂ to Lubba ləse ddəm.» 18Mari kə̂ Magədala le aw pa arə njê-njaje go Jeju tə̂ nan: «Moo Əbbə-dəwje.» N̂-pa tar kə̂ Jeju pa arɛ̂ le narəde.
Jeju tɔju rɔɛ̂ arə njê-njaje goe tə̂
19Ndɔ-kuwa-rɔ tə̂ le njaa, njê-njaje go Jeju tə̂ isije mə kəy tə̂ lo-kul tə̂. Dutuje ta-kəy le kə kele dɔde tə̂, mba n̂-bbəəlje njê-kɔnje dɔ Jiipije. A Jeju tee ar horode tə̂ pa nan: «Mə-wul-lɔm ee kə se.» 20Go tar tə̂ kə̂ n̂-pa baann a, n̂-tɔjude jiaje ddəm karɛ̂ ddəm. Njê-njaje go Əbbə-dəwje tə̂ le ooeje a, rɔde nəəlde nya. 21Jeju təl pa arəde bbay nan: «Mə-wul-lɔm ee kə se. Ddəw kâra baa tokə Bɔy ulam le, əman kara mulase tɔ.» 22Go tarje tə̂ənn a, n̂-to ləl tɛɛ̂ dɔde tə̂ ngaâ n̂-pa narəde nan: «Ingaje Ndil-mə-nda! 23Dəw kə̂ ɔruje tar majang laa dɔɛ̂ tə̂ a, Lubba a ɔru tar majang laa tɔ. Dəw kə̂ ɔruje tar majang laa ang a, tar majang laa a nayn dɔɛ̂ tə̂.»
Jeju tɔju rɔɛ̂ arə Toma
24Kar kə̂ Jeju tee inga njê-njaje goe tə̂ kə̂ dɔku gire joo le, marɛ̂ kâra kə ria nan Toma kə̂ daw bbarɛ̂ nan Ndunga goto horode tə̂. 25Kəsə njê-njaje go Jeju tə̂ le paje arə Toma le nan: «Joo Əbbə-dəwje.» A nilade tə̂ nan: «Bbo moo turu pɔndeje kə̂ mə jia tə̂ ang, bbo mɔru turu pɔndeje le kə jim ang ngaâ mula jim do tə̂ kə̂ karɛ̂ tə̂ le ang a, mâ koo nɛ̂n məm tə̂ ang.»
26Ndɔ siri goe tə̂ a, njê-njaje go Jeju tə̂ mbɔnje naan mə kəy tə̂, a Toma ee horode tə̂. Dutuje ta-kəy dɔde tə̂ kə kele. A Jeju tee ar horode tə̂ ngaâ pa nan: «Mə-wul-lɔm ee kə se.» 27Ngaâ, n̂-pa narə Toma nan: «Ula ngaw jii kə nəənn, aa jimje nəənn oo, ta ula jii karəm tə̂ le. Ə-mayn tar ang ngaa, koo njaa oo məi tə̂.»
28Toma le ilɛ̂ tə̂ nan: «Əbbəmje, Lubba ləm!» 29Jeju pa arɛ̂ nan: «Oo məi tə̂ mba koo kə̂ oom le wa? Maji nya arə dəwje kə̂ oomje ang ddəm, a ooje məde tə̂.»
Jan dda makəturu nəənn mba ddi wa?
30 Jeju dda marə nɛ̂n-mɔrije nya bbay kəm njê-njaje goe tə̂ kə̂ n̂-dda tarɛ̂ makəturu tə̂ nəənn ang. 31A n̂-dda nɛ̂nje nəənn makəturu tə̂ karə ooje nɛ̂n məse tə̂ to Jeju to Kristə, Ngonn lə Lubba. A bbo ooje məse tə̂ a, â kisije kə təbbə ddəw tə̂ laa.
Currently Selected:
Jan 20: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA