Jan 21
21
Jeju tɔju rɔɛ̂ arə njê-njaje goe tə̂ siri
1Goe tə̂ a, Jeju təl tɔju rɔɛ̂ arə njê-njaje goe tə̂ kar ba-katə tə̂ kə̂ Tiberiyadə. Ddəw kə̂ n̂-tɔju nɛ̂n rɔɛ̂ tokə be: 2Simɔn Piyɛr kə Toma kə̂ daw bbarɛ̂ nan Ndunga, Natanayɛl dəw kə̂ Kana, nangə tə̂ kə̂ Galile, ngann lə Jebede kə marə njê-njaje go Jeju tə̂ joo, dede tɔyn disije dɔ naan tə̂. 3Simɔn Piyɛr pa arə njê-marɛ̂je le nan: «Maw ta sangə kanji.» N̂-paje darɛ̂je nan: «Jeje kara ja kaw səi tɔ.» Yeenn ngaâ, dawje daw daalje tɔkə to. A tile tə̂ənn duwaje kanji kâra ang. 4Lo aw arɛ a, Jeju ar ta kongo tə̂. A njê-njaje goe tə̂ le gəreje ang. 5Jeju dujude nan: «Ngannje, uwaje kanji ang wa?» Dilɛ̂je tə̂ nan: «Juwa nɛ̂n kâra ang.» 6N̂-pa narəde nan: «Ilaje ddəngə le mbɔr tɔkə to tə̂, ər kɔl a, â kingaje kanji.» Dilaje ddəngə le a, dumanje ta ndɔru tee nɛ̂n ddaka pin mba kanji bayanje ddəngə tə̂ le nya. 7Yeenn ngaâ nje-nja go Jeju tə̂ kə̂ Jeju ndike nya le pa arə Piyɛr nan: «Əbbə-dəwje â nəənn.» Simɔn Piyɛr oo nan «Əbbə-dəwje â nəənn» a, nunn kubbu laa kə̂ ngal nula mba nar rɔɛ̂ baa ngaâ naal nuru maânn. 8Kəsə njê-njaje go Jeju tə̂ le ndɔruje ddəngə kə̂ kanji ddusu le kə tɔkə to le baa təlje nɛ̂n kə ta kongo tə̂. Mba deeje ngɔsi kə ta kongo asə metere dɔdɔku baa. 9Kar kə̂ duruje nangə̂ a, dooje kanji dɔ yəl-puru tə̂ kə mapa lo tə̂ənn. 10Jeju pa arəde nan: «Ə-ddeeje kə marə kanji kə̂ uwaje le.» 11Simɔn Piyɛr aal tɔkə to le ngaâ ndɔru ddəngə kə̂ tɔkə kanjije ddusu le ila nangə̂. Tɔkə kanjije eeje dɔdɔku kə dɔmin gire mota. Kanji le banyaje uta dɔɛ̂ njaa, a ddəngə le tiir ang. 12Jeju pa arəde nan: «Ə-ddee usaje nɛ̂n.» A dəw kâra horo njê-njaje goe tə̂ le tay duje se n̂-to nân wa ang, mba n̂-gərəje to n̂-to Əbbə-dəwje. 13Jeju ngəsə kə kete, unn mapa le ngaâ kaynde. Narəde kanji le tɔ. 14Yeenn to gɔl mota laa ngaa kə̂ Jeju tɔju rɔɛ̂ arə njê-njaje goe tə̂, go ndol tə̂ kə̂ noy a, n̂-ndol le.
Jeju de kə Piyɛr
15Go nɛ̂n-kusa tə̂ le a, Jeju duju Piyɛr nan: «Simɔn ngonn lə Jan, ə-ndikim uta dəwje nəənn tɔyn wa?» Piyɛr ilɛ̂ tə̂ nan: «Ye njaa, Əbbə-dəwje, ə-gərə to m-ndikii.» Jeju pa arɛ̂ nan: «Ə-ngəm ngann batəje ləm.» 16Goe tə̂ a, n̂-duje kə̂ gɔl joo laa nan: «Simɔn ngonn lə Jan, ə-ndikim wa?» Nilɛ̂ tə̂ nan: «Ye njaa, Əbbə-dəwje, ə-gərə to m-ndikii.» Jeju pa arɛ̂ nan: «Ə-ngəm batəje ləm.» 17Goe tə̂ a, n̂-duje kə̂ gɔl mota laa nan: «Simɔn ngonn lə Jan, ə-ndikim wa?» Yeenn ngaâ rɔ Piyɛr le nəəle ang mba tar kə̂ n̂-duje to gɔl mota laa nan: «Ə-ndikim wa?» le. Ngaâ nilɛ̂ tə̂ nan: «Əbbə-dəwje, ə-gərə nɛ̂n tɔyn. Ə-gərə to m-ndikii.» Jeju pa arɛ̂ nan: «Ə-ngəm batəje ləm. 18Tɔkɔrɔ njaa m-pa mari, kar kə̂ ə-nayn ngonn le, əi njaa uwa kubbu ləi kə əndaar ngaâ aw aw lo tə̂ kə̂ məi ndiki. A kar kə̂ ə-bbuka a, â kula jii ngaâ dəw kə̂ dang â, a kuwa kubbu ləi kə əndaar ngaâ lo kə̂ məi ndiki ang â, nâ kaw səi kə tə̂.» 19Jeju pa tar nəənn le ta tɔju nɛ̂n gar yo kə̂ Piyɛr a koy kə̂ a karə piti Lubba. Goe tə̂ a, Jeju le pa arɛ̂ nan: «Unn gom.»
Jeju de kə nje-nja goe tə̂ kə̂ n̂-ndike nya
20Piyɛr turu rɔɛ̂ a, oo nje-nja go Jeju tə̂ kə̂ Jeju ndike nya le aw ddee. Ne â nula dɔɛ̂ kə rɔ Jeju tə̂ kar nɛ̂n-kusa tə̂ ngaâ n̂-duje nan: «Əbbə-dəwje, nân â to nje-kunn dɔi wa?» le. 21Piyɛr le ooe a, duju Jeju nan: «Əbbə-dəwje, a ne, ddi bba a kingɛ̂ wa?» 22Jeju ilɛ̂ tə̂ nan: «Bbo m-ndiki karə n̂-nayn kəm baa ndərəng m-təl m-ddee a, ddi â osoi tə̂ wa? Əi, unn gom.» 23Dɔ tar tə̂ nəənn â tar nja horo njê-mə-kunnje tə̂ nan nje-nja go Jeju tə̂ kə̂ Jeju ndike nya le a koy ang. A Jeju pa arə Piyɛr baann ang. N̂-pa nan: «Bbo m-ndiki karə n̂-nayn kəm baa ndərəng m-təl m-ddee a, ddi â osoi tə̂ wa?»
24 Nje-nja go Jeju tə̂ nəənn le njaa oo nɛ̂njeenn le kə kəmɛ̂ ngaâ dda tarɛ̂ makəturu tə̂ nəənn. N-gərə to tar-naji laa le to tar kə̂ tɔkɔrɔ.
Dɔbɔyn tar
25 Jeju dda marə nɛ̂nje nya bbay. Bbo n̂-dda nɛ̂njeenn tɔyn kə goe goe Makəturu tə̂ a, məjə to dɔ nangə tə̂ nəənn tɔyn njaa lo a kasə ta kungu makəturuje le tə̂ ang.
Currently Selected:
Jan 21: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA