Mataayo 22
22
Eghetuubhaani ke bhaghëni bha riirugha
(Ruuka 14:15–24)
1Yesu akabheeghi wiiki Amabharisaayo na abhakoro bha bhachaama gho ghetuubhaani ekende arabhugha, 2“Obhutëmi bho Mwishaaro mbotuubhiine no omutëmi umu uno asëëmiri eriirugha re moona waache. 3Omutëmi uyo akabhatoma abhasësë bhaache kobhabherekera bhano are araghiini kubha bhaache mwirugha, amare ibho bhakaanga kuucha.
4“Niho akabhatoma wiiki abhasësë abhande, akabhabhoorera akabhugha, ‘Moghi mobhabhoorere bhaare neere niraghiini kubha, “Nimariri ghusëëmi ebheghiro bhyose bhe riirugha. Nesinchiri changʼömbë cheene chino chenoriri na chaatugho echende chaanoru. Gho ghayo, muuche mwirugha!”’ 5Amare bhano bharaghiinu bhatatereeriri. Bhaaghaye mo‑meremo gheebho, umu aghaye mo‑moghondo waache, owonde aghaye ghuköra obhosorocha. 6Abhande bhakabhaghööta abhasësë bhaache bhayo, bhakabhatëma chwee na kobhiita. 7Mbe, hano omutëmi wuure oghwire ghano ghaköruru ighoro e bhasësë bhaache, aghakarara chwee. Akabhatoma abhaashirikare bhaache, bhaaghaye kobhiita abhiiti bhayo na ghweki omoghya waabho.
8“Niho omutëmi uyo akabhabhoorera abhasësë bhaache akabhugha, ‘Ebheghiro bhe riirugha mbimariri ghusëëmibhu, amare bhaare niraghiini bhataare bharëngʼaaniire. 9Mbe, ibheere moghi mo‑chanchëra hano cheghutëmëëranera, mobhabhoorere bhoose bhano moghutëmëërana nabho kubha bhaache mwirugha.’ 10Abhasësë bhayo bhaaghaye hano chanchëra cheghutëmëëranera. Bhakaacha na abhaato bhoose bhano bhatëmëriine nabho, abhabhe na abhahëënë. Niho abhaghëni bhaghiichora mo‑nyumba e riirugha.
11“Amare hano omutëmi uyo asöhiri mo‑nyumba yiire kubha arighi abhaghëni bhaache, akarighi‑mu omooto umu uno atabheekiri erighööti re riirugha. 12Akamobhoori akabhugha, ‘Oo musaani, nibhu uköriri oghasöha muno ino otabheekiri erighööti re mwirugha?’ Amare omooto uyo tabhwine re komugharokeri. 13Mbe, omutëmi uyo akabhabhoorera abhatamishi bhaache akabhugha, ‘Momubhöhë omooto uno amaghoro na amabhökö na momurëkërë anche mo‑kengʼuuri, iyo niho abhaato bhaakubha bhararera na ghukararaati amiino gho ghiri e bhuhëmbërëra bhuhaari.’”
14Yesu akamareereri gho kobhugha, “Eryobha ndekobhabherekera abhaato bhaaru ghusöha mo‑bhutëmi bhooche, amare m‑bhasuuhu bhano bhaahwiru ghusöha.”
Eribhoori re komutëgha Yesu ighoro e koruusi righööti
(Maariko 12:13–17; Ruuka 20:20–26)
15Mbe, Amabharisaayo bhaghatanura hayo, bhaaghaye korwacha kinya bhakomughööti Yesu kwo mangʼana ghaache. 16Niho bhakabhatoma o‑Yesu abhaanabheegha bhaabho haghirohamu na abhaato bhano bhaghöötiine na abhaato bha mutëmi Herote, bhaaghaye, bhakamobhoori bhakabhugha, “Oo Omweghi, ntweche kubha iye n‑omooto o hëënë na kubha nokweghi ghano ghaanyi gha Ryobha kwo bhuhëënë. Wiiki, tooghotiina koru omooto uno anyi no omweya wi ighoro. 17Mbe, notobhoorere kebhuno okorighi. Kana, emeghiro ngeghotwisherereri koreha righööti gho Kayisaari#22:17 Kayisaari naare omutëmi o Bharuumi, wiiki naare arakangata chaase chaaru gho nchëra e bhukorooni. Kwo riibhagha riire, niwe akangatiri ase e Bhiisiraeri. Omutëmi Herote Antibha ꞉naahwiru na Kayisaari ghukangata. ghasi tiyaanyi?”
18Amare Yesu ꞉naamënyiri amiihëëbhö ghaabho amabhe, akabhagharokeri akabhugha, “Inyu n‑chaghughuuti moonyi, ngwake mokwënda ghuntëgha? 19Mönyëërëki orobhiiri runo mohaarehera erighööti.” Ibho bhakaacha ghokooche no orobhiiri ro tinaari. 20Niho Yesu akabhabhoori akabhugha, “Abhicha ino, ne eriina rino, m‑bhyawe?”
21Ibho bhaghagharokeri bhakabhugha, “M‑bhe Kayisaari.”
Yesu akabhabhoorera akabhugha, “Mbe, momuhë Kayisaari bhino bheenyi bhe Kayisaari, wiiki morihë Eryobha bhino bheenyi bhe Ryobha.”
22Hano bhooghwire amagharokeri gha Yesu, bhakaroghoora chwee. Niho bhakamotigha hayo, bhaghatanura.
Eribhoori ighoro e koryoka kwo bhaato
(Maariko 12:18–27; Ruuka 20:27–40)
23Orosiko ruyo ruyo, Amasatukaayo abhamu bhaaghaye o‑Yesu. Amasatukaayo mbaheeghi kubha Eryobha retaakobharyoki abhaato koru mo‑bhaku. Niho bhakamobhoori Yesu bhakabhugha, 24“Omweghi, Musa ꞉naaturagheriiri mo‑meghiro gheeche kubha aribha omooto araku na komotigha omukari atiibhwire, nekwëndëru ömööbhö amughabhe omosino uyo kubha amwibhorere abhaana abhooki aka e mosiri uyo.#22:24 Mööhi Kohiita kwo Meghiro 25:5–6. 25Mbe, tobhughe mbaare‑ho abhabhureni mohungate bha nda imu. O mumbërë aghakwira omukari, aghaku atiibhwire. Mbe, omonyi waache akamughabha omosino uyo. 26Omonyi waache woose aghaku atiibhwire. ꞉Niibheere hangʼu hangʼu na kwo uno o ghatato mbagha o mohungate. 27Antenero omukari omosino uyo woose aghaku. 28Mbe, notobhoorere, mo‑rosiko runo roghughambu kubha abhaato bhoose mbakoryoka, omukari omosino uyo naakubha muka we? Ntokobhoori hangʼu gho kubha, bhoose ꞉mbaamokwiriri!”
29Yesu akabhagharokeri akabhugha, “Morumeeriri gho kubha moteeche ghano ghaandëkuru mo‑Mandëkö Amatööbhiyu, wiiki moteeche obhotoro bho Ryobha kebhuno bhoonyi. 30Eriibhagha rino abhaku bhakoryoka, mbaakubha kinya bhamarayika bha Ryobha bhano bhaanyi Mwishaaro, bhataaghokwira koru ghokwiru. 31Amare, mahëënë abhaku mbakoryoka. Mbe, motaamara ghusöma kebhuno Eryobha ꞉reebhabhooriire? Rekabhabhoorera rekabhugha, 32‘Eni n‑Eryobha re Abhurahamu, na Isaka na Yakobho.’#22:32 Mööhi Kohoroka 3:6.” Yesu akëëndërëra kobhabhoorera, “Eryobha retaanyi Eryobha re bhano bhakuure, amare ne Eryobha re bhano bhaanyi abhahöru!” 33Hano amakinda gha bhaato ghooghwire ghayo, bhakaroghoora chwee kwo meeghi ghaache.
Omoghiro omokoro ghokera eghende ghyose
(Maariko 12:28–34; Ruuka 10:25–28)
34Hano Amabharisaayo bhooghwire kubha Yesu ˆakabhatangaari Amasatukaayo gho ghosiikëra, bhaghiikomana haghirohamu na ghuye o‑Yesu. 35Umu o Amabharisaayo bhayo uno are omweghi o meghiro, aghasaki komutëgha Yesu, akamobhoori akabhugha, 36“Oo Omweghi, n‑omoghiro ke omokoro ghokera emeghiro eghende ghyose ghe Ryobha?”
37Yesu akamugharokeri akabhugha, “‘Omosiighe Omutëmi Waryobha waacho gho körö yaacho yoose, na kwo riimanya reecho ryose na kwo bhongo bhoocho bhoose.’#22:37 Mööhi Kohiita kwo Meghiro 6:5. 38Omoghiro uno niwe omokoro ghokera emeghiro eghende ghyose, wiiki niwe onyi no obhwëra ghokera ghyose. 39Omoghiro o kabhere notuubhiine no o mumbërë, nawe nokobhugha, ‘Omosiighe omwatani waacho, kinya bhuno wisiighiri iye omwene.’#22:39 Mööhi Abharaawi 19:18. 40Emeghiro ghyose ghe Musa na ameeghi gha bharööti ngeghwitëngʼëra emeghiro ghino ebhere.”
Kirisito n‑Omoona o Tawuti no Omutëmi o bhaato bhoose
(Maariko 12:35–37; Ruuka 20:41–44)
41Hano Amabharisaayo ꞉bhaare bhakeere bhiikomiine haghirohamu hayo, Yesu akabhabhoori akabhugha, 42“Mokwihëëbha bhu ighoro e Kirisito? N‑omoona waawe?”
Bhaghagharokeri bhakabhugha, “N‑Omoona o mutëmi Tawuti.”
43Yesu akabhabhoori akabhugha, “Aribha ghayo n‑gha mahëënë, ngwake kana Tawuti gho ghukangatu na Akörö e Ryobha, nakomobherekera Kirisito, Omutëmi? Gho kubha Tawuti ꞉naabhughiri,
44‘Omutëmi Waryobha ꞉naamobhooriire Omutëmi waane,
Wiikare eribhaara re kubhökö koone gho kwiro,
mbagha neghukörë okinde abhabhisa bhaacho,
na kobhakangata.’#22:44 Mööhi Sabhuri 110:1.
45“Aribha Tawuti nakomobherekera Kirisito arabhugha Omutëmi waache, ibheere, Kirisito nibhu aghotora abhe omoona waache wiiki?”
46Taanyi‑ho omooto uno atoriri komugharokeri Yesu ghyokyose. Korwera orosiko ruyo taanyi‑ho omooto uno asakiri komobhoori Yesu amabhoori aghande wiiki.
Currently Selected:
Mataayo 22: ntk
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved