Mataayo 25
25
Eghetuubhaani ke bhaakë ikomi
1Niho Yesu akabhabhoorera abhaanabheegha bhaache akabhugha, “Kwo riibhagha riyo, obhutëmi bho Mwishaaro mboghotuubhaana na abhaakë ikomi bhano ꞉bhiimokiri chaatara cheebho na ghuye komoturungʼanera omokwiri. 2Bhataano mo‑bhayo ikomi, mbaare na amangʼiini na abhande bhataano mbaare abhaghëëghë. 3Abhaghëëghë bhayo bhataano, ꞉mbiimokiri ebhemore bheebho amare bhatiimokiri amaghuta aghande gha kwëngërëërëri. 4Amare bhaare bhataano bhano bhaanyi na amangʼiini ꞉mbiimokiri ebhemore bheebho haghirohamu na amaghuta gha kwëngërëërëri mo‑bheghiro bheebho. 5Hano omokwiri akechiire kuucha, abhaakë bhayo bhoose bhaghasundaghera bhakamisi chandöörö. 6Amare obhotiko bho ghate, bhakooghu chandiryato, abhaato bharabhugha, ‘Mööhi, uno aghokwira akaacha! Mohoroke, tughëndë komoturungʼanera.’ 7Hayo hayo abhaakë bhayo bhoose bhakabhooka na ghusëëmi ebhemore bheebho.
8“Abhaakë bhaare bhataano abhaghëëghë bhakabhabhoorera bha mangʼiini bhakabhugha, ‘Ntoghoghusabha motusakeri amaghuta nangabha masuuhu gho ghiri e bhemore bhiito ˆbhekarima.’ 9Amare bhano bhaanyi na amangʼiini bhakabhagharokeri bhakabhugha, ‘Tiyaanyi! Totaaghotora kobhatoori gho kubha amaghuta ghano toonyi nagho, ghataaghotwisha koru hasuuhu itu haghirohamu na niinyu. Neghabheere bhoheene mughëndë mwighorere, kubha mubhe na amamba yaanyu inyu bheene.’
10“Mbe, abhaghëëghë bhayo bhaghatanura ghuye ghoghora amaghuta. Hano bhaghiire, omokwiri akaacha. Abhaakë bhano bhaanyi na amangʼiini bhano ꞉bhaare bhiisëëmiri bhoheene, bhaghasöha haghirohamu nawe mo‑nyumba ino eriirugha reere rerakörëru. Akamara omooto umu aghiighara orwighe. 11Hano rehetiri eriibhagha isuuhu, abhaghëëghë bhayo bhaghagharuka na kubhöna orwighe rwigheere. Niho bhakiimeerera anche na kobherekera bharabhugha, ‘Oo omutëmi! Oo omutëmi! Ntoghoghusabha otwighorere!’ 12Amare omokwiri akabhagharokeri akabhugha, ‘Mahëënë ˆnekabhabhoorera, ntebheeche inyu!’”
13Yesu akëëndërëra kobhabhoorera abhaanabheegha bhaache arabhugha, “Mbe, mubhe amiisho gho kubha moteeche orosiko, koru eriibhagha rino eni neghugharuka.”
Abhasësë abhahëënë na bhano bhataanyi abhahëënë
(Ruuka 19:11–27)
14Yesu akëëndërëra ghosiikëra arabhugha, “Wiiki, obhutëmi bho Mwishaaro mboghotuubhaana no omooto uno aköriri orughëndö. Hano are akeere ghuköra orughëndö, akabhabherekera abhasësë bhaache na kobhaha ebheghiro bheeche bhyose kubha bhabhiimeererere. 15Akamuha kira omusësë kurëngʼaana no obhotoro bhooche. Akamuha o mumbërë chataranta ishaano, no o kabhere chataranta ibhere no o ghatato ataranta imu,#25:15 Ataranta imu neere irëngʼiine na amareho gha mooto kwo meeka miröngö ebhere hamu ghokera hayo. akamara aghaköra orughëndö.
16“Hayo hayo, omusësë uno ahaabhuru chataranta ishaano, aghaye nacho mo‑bhosorocha na kubhöna obhwëra bho chende ishaano. 17Hangʼu hangʼu, omusësë uno ahaabhuru chataranta ibhere, aghaye nacho mo‑bhosorocha na kubhöna obhwëra bho chende ibhere. 18Amare omusësë uno ahaabhuru ataranta imu, aghaye aghatuka eriiribha na akayebhisa ataranta yiire e mutëmi waache.
19“Hano eriibhagha irë rehetiri, omutëmi waabho aghagharuka koru mo‑rughëndö rooche. Akamara akabhabherekera abhasësë bhaache bhaare kubha, bhamobhoorere kebhuno bhahökiiri ebheghiro bheeche. 20Omusësë uno ahaabhuru chataranta ishaano, akaacha na chataranta echende ishaano na komobhoorera omutëmi waache arabhugha, ‘Oo omutëmi, ꞉nooheere chataranta ishaano kubha nechikörërë emeremo. Mööhi, nebhwine obhwëra bho chataranta echende ishaano ghachino hano.’
21“Omutëmi waache akamobhoorera akabhugha, ‘Nuköriri bhoheene chwee. Iye n‑omusësë omughareeya onyi, wiiki omuhëënë! Noore omuhëënë kwo bhesuuhu bhino ꞉neekoheere, ibheere neghoghotoora kubha omwimeerereri o bheghiro bhyaru. Nuuche uchömëru haghirohamu na neeni.’
22“Omusësë uno ahaabhuru chataranta ibhere, woose akaacha na chataranta echende ibhere na komobhoorera omutëmi waache arabhugha, ‘Oo omutëmi, ꞉nooheere chataranta ibhere kubha nechikörërë emeremo. Mööhi, nebhwine obhwëra bho chataranta echende ibhere ghachino hano.’
23“Omutëmi waache akamobhoorera akabhugha, ‘Nuköriri bhoheene chwee. Iye n‑omusësë omughareeya onyi, wiiki omuhëënë! Noore omuhëënë kwo bhesuuhu bhino ꞉neekoheere, ibheere neghoghotoora kubha omwimeerereri o bheghiro bhyaru. Nuuche uchömëru haghirohamu na neeni.’
24“Amare omusësë uno ahaabhuru ataranta imu, akaacha na komobhoorera omutëmi waache arabhugha, ‘Oo omutëmi, ꞉niimënyiri kubha iye m‑muköngʼu chwee onyi. Iye noonyi kinya omooto uno ahaaghësa omunöghö uno ꞉atëëmiri na ghokoma bhino atasanchiri. 25꞉Neetiiniri kobhori ataranta yaacho, neeghaye nekayebhisa mo‑maröbhë. Ibheere, imoki ataranta yaacho ino.’
26“Omutëmi waache akamugharokeri akabhugha, ‘Iye n‑omusësë omobhe onyi no omutöbhu! Aribha umënyiri kubha eni nehaaghësa omunöghö uno ntëëmiri na ghokoma bhino ntasanchiri, 27ngwake otantooriire ataranta yaane bhenki kubha hano neghugharuka niiche niimoki ataranta yaane haghirohamu no obhwëra bhooche?’ 28Niho omutëmi waache akahatëka abhasësë abhande akabhugha, ‘Momuhökë ataranta iyo, momuhë uno anyi na chataranta ikomi.’
29“Gho ghayo, mooto wowoose uno anyi ne egheghiro nakuhaabhu, na kwëngëru bhyaru. Amare uno ataanyi ne egheghiro nakuhöku koru kiire are ararighi kubha naanyi nakyo. 30Omusësë uno, taanyi no obhwëra bhobhoose. Momurëkërë anche mo‑kengʼuuri hano akorera na ghukararaati amiino gho ghiri e bhuhëmbërëra bhuhaari.”
Ghoteneru ekiina mo‑rosiko ro ntenero
31Yesu akëëndërëra kobhabhoorera abhaanabheegha bhaache akabhugha, “Hano eni uno neenyi Omoona o Mooto nekuucha mo‑bhokumi bhoone obhokoro haghirohamu na bhamarayika bhoose, niho neghwikara mo‑ghetumbe keene ke bhutëmi. 32Abhaato bha matöngö ghoose mbaghwikomana ambërë yaane.#25:32 Mööhi Isaaya 66:18; Yoweri 3:2. Na neeni nekobhaahura kinya bhuno omoriishi ahaahura changʼöndu koru mo‑chambërëtë. 33Kinya bhuno omoriishi ahatoora changʼöndu okubhökö kooche gho kwiro na chambërëtë okubhökö kooche gho kumosi. Hangʼu hangʼu, na neeni neghotoora abhaato abhande okubhökö koone gho kwiro na abhande okubhökö koone gho kumosi.
34“Niho eni uno neenyi Omutëmi nekobhabhoorera abhaato bhaare bhaanyi okubhökö koone gho kwiro nebhughe, ‘Muuche, inyu bhano Taata waane abhitabhiiri. Musöhë mo‑bhutëmi bhuno Eryobha rebhasëëmiire korwera ghutëëmu gho se ino. 35Muuche, gho kubha hano neere inchëra, moheere ebhiinyakurë. Hano neere na anyööta, moheere amanche. Wiiki hano neere omughëni, mungënëhiri mo‑chaaka cheenyu. 36Hano neere kingʼaabhi, mombeekiri changibho. Hano neere omubhabharu, mwichiri kondighi. Hano neere nibhöhuru, mwichiri ghuntaarera.’
37“Niho abhaato abhahëënë bhaghugharokeri bhabhughe, ‘Oo Omutëmi, n‑eriibhagha ke hano tokorooche onyi inchëra toghakuha ebhiinyakurë? Hamu onyi na anyööta, na niitu toghakuha amanche gha kunyo? 38Wiiki, n‑eriibhagha ke tokorooche onyi omughëni toghaghughënëhi mo‑chaaka chiito? Hamu onyi kingʼaabhi toghakobheeki changibho? 39Wiiki, n‑eriibhagha ke tokorooche onyi omubhabharu tokaacha ghokorighi? Hamu onyi mo‑kibhöhu tokaacha ghoghutaarera?’ 40Niho eni uno neenyi Omutëmi nekobhagharokeri nebhughe, ‘Mahëënë ˆnekabhabhoorera, ghyokyose kino muköriire umu mo‑bhakumi bhano bhakorighibhu bhataanyi no obhwëra, mbe, neeni muköriire.’
41“Niho nekobhabhoorera bhaare bhaanyi okubhökö koone gho kumosi nebhughe, ‘Mondwere hano inyu bhano Eryobha riihiimiri! Moghi mo‑mororo o miishe ghyose uno Eryobha riisëëmiri gho ghiri e Rishambu na bhamarayika bhaache. 42Mondwere hano gho kubha hano neere inchëra, motaheere ebhiinyakurë. Hano neere na anyööta, motaheere amanche. 43Hano neere omughëni, motangënëhiri mo‑chaaka cheenyu. Hano neere kingʼaabhi, motambeekiri changibho. Wiiki, hano neere omubhabharu, motiichiri kondighi, hamu hano neere nibhöhuru, motiichiri ghuntaarera.’
44“Niho bhano bhaanyi mo‑kubhökö koone gho kumosi bhaghugharokeri bhabhughe, ‘Oo Omutëmi, n‑eriibhagha ke tokorooche onyi inchëra, hamu onyi na anyööta, hamu onyi mughëni, hamu onyi kingʼaabhi, hamu onyi mubhabharu, hamu onyi mo‑kibhöhö, na niitu totaghotooriri?’ 45Na eni nekobhagharokeri nebhughe, ‘Mahëënë ˆnekabhabhoorera, ghyokyose kino motaköriire umu mo‑bhakumi bhano bhakorighibhu bhataanyi no obhwëra, mbe, motanköriire na neeni.’
46“Niho abhaköri bha masari bhaare bhaghutanura na ghuye ghoteneru ekiina ke miishe ghyose. Amare bhaare abhahëënë, mbaghusöha mo‑bhuhöru bho miishe ghyose.”
Currently Selected:
Mataayo 25: ntk
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved