Jenadik 2
2
1Jadik gerèk nak lah Allah napèrhéj langid, bumi, ròb kenèmbek ilok rik mok. 2Allah hòj natèrsòj perènhéj Eh nak, jadik bil is tenujoh Rik Nak nabetarak nòm kenèmbek kèrjak Eh.#Ibr 4:4,10.#Her 20:11. 3Dak sebab hòj sòj perènhéj Eh bok nabetarak èn is tenujoh nak, Allah napèrmòy is tenujoh nak nòm arik rik gèhnih, najadik arik rik méj bok has untok tenarak.
Allah napèrhéj sènꞌòy rik mulak
4Gerèk doh lah nabelakuk bil Allah napèrhéj langid, bumi, ròb kenèmbek ilok rik mok. Bil mase TUHAN Allah naperèjhéj hatòp nak, 5-8Rik Nak tik tok naberèwtaw tèhteh, bok tik tok mèk-mok lènlut ilok-ilok pon èn bumi doh. Tapik mok òng nahuwòl nòm tèk bumi dak nakèrꞌãj ma tèk.
Dak TUHAN Allah napèrhéj èn bumi doh néy selay èn apah sòy is, èn tempad rik bekenëh Èden. Tapik bil nak tèk-tik tok mèk-mok sènꞌòy rik namjagak ma tèk nak.
Jadik TUHAN Allah nateꞌèl esik néy sènꞌòy babeh nòm tèk, dak nahũb ma kelòj mëh sènꞌòy nak henèmhum Eh rik naꞌog nèsgos; dak nagos lah sènꞌòy nak. Dak Allah natèrgel sènꞌòy nak èn selay Èden nak. #1 Kor 15:45.
9Èn selay nak TUHAN Allah natèrhin kenèmbek jehuk rik lèhwah, bok rik bekèꞌbek kebek rik sèbdeb. Èn gagid selay nak Allah natèrhin keꞌjèk nar jehuk: naꞌnéy jehuk nak kebek eh naꞌog nèsgos rik jalꞌéng, dak jehuk rik naꞌnéy wèl rik naꞌog nènglèkh tentang rik méj bok rik jèdhad.#Per 2:7; 22:2,14.
10Mok néy òng tibok rik nawid nòm Èden nakèrꞌãj ma selay nak, dak nòm nak òng tibok nak nawid nabechabang bok najadik empad. 11Òng tibok rik mulak nak kenëh eh Pison; òng nak nawid ma kenèmbek tèk Hawilah. Èn tèk nak mok mas rik ibuk. 12Mas èn anak méj geb, dak mok keꞌjèk ubad chèsngẽs ròb batuk rik behèrgak èn tèk Hawilah nak. 13Òng tibok rik kedua nak kenëh eh Gihon, dak nawid ma kenèmbek tèk Kus. 14Òng tibok rik tenigak nak kenëh eh Tigris; òng nak nawid ènlẽng kote Asur, èn sòy is. Dak òng tibok rik keꞌempad nak kenëh eh Èprat.
15TUHAN Allah natèrgel sènꞌòy nak èn Selay Èden naꞌtèk untok namkèrjak bok namjagak èn selay nak. 16Dak TUHAN Allah nachal ma sènꞌòy nak, “Hãk boléh hagéy bébas kebek nòm kenèmbek jehuk rik mok èn selay doh, 17had tok boléh hagéy kebek nòm jehuk rik èg-og nènglèkh tentang rik méj bok rik jèdhad nak. Sebab bil èn arik hãk hagéy kebek eh nak, pastik lah hakebes.”
18Dak pas nak TUHAN Allah nachal, “Tok méj lah sènꞌòy doh namgos dèꞌrik eh. Yék akal iteꞌèl ruwòb rik ngam untok nambetulong ma rik eh nak.” 19Hatòp nak TUHAN Allah hòj napèrhéj nòm tèk kenèmbek lawok bok kenèmbek chèp. Dak Allah naꞌéd kenèmbek lawok nak ma babeh nak untok namlèkh rèk lok babeh nak namtèrjal kenëh mèn lawok nak. Gerèk nak lah kenèmbek lawok ròb chèp nak mok kenëh um. 20Babeh nak natèrjal kenëh kenèmbek lawok: mèn chok bènleh, mèn chèp èn langid, ròb mèn lawok kèjlaj. Tapik tik tok mèk-mok ruwòb rik ngam untok namtulong ma babeh nak.
21Jadik TUHAN Allah naꞌuy ma babeh nak naselòg nawel, dak asòh babeh nak nasèglòg Allah nakod néy jeꞌẽng nòm cheres babeh nak, dak natèrsib wèl séj cheres eh nak. 22Nòm jeꞌẽng cheres nak TUHAN Allah napèrhéj néy sènꞌòy babok, dak naꞌéd ma babeh nak. 23Dak babeh nak nachal,
“Nak, pay doh bok mok sènꞌòy rik kemën-kemën ngam ma yék!
Jeꞌẽng eh nòm jeꞌẽng yék,
bok séj eh nòm séj yék.
Yék itèrjal ma rik nak babok,
sebab TUHAN nakod eh nòm babeh.”#2:23 Yék itèrjal ma rik nak babok, sebab TUHAN nakod eh nòm babeh. Èn kuy sènꞌòy Ibrani nak, umnak umkòw babeh nak ʾiš, bok babok nak umkòw ʾiššah. Jadik nar wèh nak mirip (gerèk “babeh” ròb “babok” èn kuy sènꞌòy Temiar.)
24 #
Mat 19:5; Mrk 10:7,8; 1 Kor 6:16; Èp 5:31. Sebab nak lah bil babeh naselòg ma léh eh, naperak ma apak ròb amèk eh dak nagel samak léh eh, dak wènar nak wèjadik néy.
25Bil nak babeh ròb léh eh nak wèsèglèg, tapik wènar nak tok wèsènyngẽny.
Currently Selected:
Jenadik 2: KKT
Highlight
Share
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.