Jenadik Bukuk Kitab doh tentang ilok?
Bukuk Kitab doh tentang ilok?
Udoh bukuk Kitab rik mulak. Èn kelòj bukuk Jenadik doh naꞌoglèkh cherite bumi doh: gerèk lok kenèmbek eh hòj najadik nòm mulak eh tòp.
Allah napèrhéj bumi, langid, ròb kenèmbek ilok rik mok. Rik Nak napèrhéj sènꞌòy, bok najadik ma kenèmbek sènꞌòy gerèk rik ma rik Eh. Kenèmbek perènhéj Eh nak Allah nadéh méj, dak Rik Nak naꞌog kenèmbek bumi doh ma sènꞌòy untok mujagak bok mugos bema-méj samak Rik Eh Nak. Tapik sènꞌòy rik mulak nak tok wèhèh-hoh ma nèrꞌor Allah, dak sebab nak dose namòj ma kenèmbek sènꞌòy dak Allah napantakh ma bumi doh, sampéy èk tok dapad èmgos wèl samak Allah bok haros èkebes. Nòm kerek nak, sènꞌòy umbetabeh lèrhir dose ròb jènhad umnak, sampéy Allah natèrꞌèn bègꞌag rik rayak bok natèrhõy ma kenèmbek rik gès-gos èn bumi doh. Tapik Allah natèrgos ma Nuh ròb kewarge eh, dak nòm umnak sènꞌòy umbetabeh umchëy wèl èn bumi doh. Dak Allah naꞌor ma sènꞌòy mujog bok mutèrbikh ma lok-lok tèk èn bumi, tapik umnak umjèk tok umhèh-hoh ma nèrꞌor Allah nak, had umchèn muteꞌèl néy kote rik rayak supaye mugel néy tempad. Sebab nak Allah natèrhék ma kuy chenarak umnak bok napèrmòy kenèmbek kaum èn bumi, dak nòm nak umjog ma lok-lok tèk.
Nòm kerek nak, Allah napili néy kewarge untok muhoh ma Rik Nak. Allah nakòw ma Abraham bok nateꞌèl perènhod rik has ma rik nak: Allah napèrhod namteꞌèl méj bok namꞌog tèk Kanaꞌan ma Abraham ròb mèn waris eh. Dak nòm waris Abraham nak Allah napèrhod namteꞌèl méj ma kenèmbek kaum èn bumi, sampéy èk kenèmbek dapad èmlos èmbema-méj wèl samak Allah. Jadik èn bukuk doh èk èbache tentang nèsgos Abraham, dak pas nak nèsgos kuwòt eh Isak, dak pas nak wèl chachok eh Yakob. Allah natèrjal kenëh pay Yakob nak Israꞌèl, dak mèn waris eh umjadik kaum Israꞌèl. Nòm kerek nak mok cherite Yusop, kuwòt Yakob. Mèn kelok bèhbeh eh umjuwal ma rik nak namjadik kuli èn tèk sènꞌòy Mesir. Tapik èn Mesir nak Allah natulong ma Yusop bok natèrꞌòj eh namjadik menterik rayak, sampéy natèrgos ma jajéh sènꞌòy ròb kenèmbek kewarge Israꞌèl nòm musim chènrok.
Jadik ma sèj-sòj bukuk doh, kaum Israꞌèl nak hòj umjog ma tèk Mesir. Dak èn anak umbetabeh umjadik kaum rik rayak, gerèk Allah hòj napèrhod. Tapik umnak tik jerok nòm tèk Kanaꞌan rik Allah napèrhod namꞌog ma umnak. Dak akal cherite umnak nasèrjèkh èn bukuk Kitab rik gèhnih, bok ènéh gerèk lok Allah nateꞌèl ilok rik napèrhod nak.
Ilok rik nabelakuk èn Bukuk Jenadik
Allah napèrhéj ma langid, bumi, ròb sènꞌòy rik mulak. 1:1—2:25
Adam ròb Hawa wèteꞌèl dose rik mulak 3:1-24
Sènꞌòy umbetabeh lèrhir dose um wèl, nòm Adam sampéy ma Nuh 4:1—5:32
Nuh ròb òng bègꞌag rayak 6:1—10:32
Allah napèrmòy mèn kaum ma kenèmbek bumi. 11:1-32
Abraham, Isak, ròb Yakob: yak dòt bej kaum Israꞌèl 12:1—36:43
Allah nakòw ma Abram dak nateꞌèl perènhod ma rik nak 12:1—17:27
Allah natèrhõy ma kote Sòdom ròb Gomora, dak naꞌog kuwòt ma Abraham 18:1—21:34
Abraham ròb kuwòt eh, Isak 22:1—24:67
Yakob nasèꞌlok ma kelok eh Èsaw 25:1—27:46
Allah nateꞌèl perènhod Eh ma Yakob, dak naꞌog kewarge ròb harte rik ibuk. 28:1—36:43
Cherite Yusop 37:1—50:26
Currently Selected:
Jenadik Bukuk Kitab doh tentang ilok?: KKT
Highlight
Share
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.