San Mateo 11
11
1Dan me se quisíj nana̱ yoꞌ nana̱ cataj xnaꞌanj Jesús rihaan chuvi̱j nij síí tucuꞌyón snana̱ soꞌ, ne̱ curiha̱nj Jesús rej yoꞌ, ne̱ caꞌanj soꞌ nij chumanꞌ ya̱nj nij yuvii̱ israelitá tu̱cuꞌyón soꞌ rihaan nij soꞌ ne̱ caꞌmi̱i̱ natáj soꞌ rihaan nij soꞌ a.
Caꞌmii Jesús cheꞌé Juan Síí Cutaꞌ Ne man yuvii̱ a
2Dan me se ꞌni̱j síí cuꞌna̱j Juan Síí Cutaꞌ Ne man yuvii̱ tagaꞌ, ne̱ cuchiꞌ nana̱ rihaan soꞌ cheꞌé nu̱ꞌ se vaa quiꞌyaj Síí Caꞌnéé Yaꞌanj Ti̱nanii man Yuvii̱ rihaan Sayuun a. Cheꞌé dan caꞌnéé soꞌ vi̱j nij síí tucuꞌyón snana̱ soꞌ rihaan Jesús a. 3Ne̱ nana̱ nihánj roꞌ, xnáꞌanj ro̱j soꞌ man Jesús, quiꞌyaj síí cuꞌna̱j Juan a:
―So̱ꞌ me Síí Caꞌna̱ꞌ Ti̱nanii man Yuvii̱ rihaan Sayuun naꞌ. Ase na̱ꞌvi̱j níꞌ caꞌna̱ꞌ ꞌó soꞌ xa̱ꞌ ―taj ro̱j soꞌ a.
4Ga̱a ne̱ cataj xnaꞌanj Jesús rihaan ro̱j soꞌ a:
―Cavi̱i̱ ro̱j so̱j cuchi̱ꞌ uún ro̱j so̱j rihaan Juan, ne̱ cata̱j xnaꞌanj ro̱j so̱j rihaan soꞌ nu̱ꞌ nana̱ uno ro̱j so̱j do̱ꞌ, nu̱ꞌ se vaa neꞌen ro̱j so̱j do̱ꞌ á. 5Dan me se nij síí tuchri̱i roꞌ, naxraꞌ rihaan, ne̱ nij síí naꞌvee cache̱e̱ roꞌ, chéé nij soꞌ, ne̱ nij síí ranꞌ luj riꞌyuj roꞌ, nahuun sa̱ꞌ, ne̱ nij síí soꞌo̱ roꞌ, nachuguu̱n xréé nij soꞌ, ne̱ nij síí caviꞌ roꞌ, nuu iꞌna̱ꞌ uún, ne̱ nij síí nique̱ roꞌ, uno nij soꞌ snana̱ Yaꞌanj nana̱ sa̱ꞌ a. Nu̱ꞌ nihánj cata̱j xnaꞌanj ro̱j so̱j rihaan Juan á. 6Ne̱ cata̱j uún ro̱j so̱j rihaan Juan se vaa, sese se̱ guun naꞌa̱j me maꞌa̱n yuvii̱ ni̱ꞌyaj soꞌ manj, ne̱ cavi̱i̱ sa̱ꞌ soꞌ quiꞌya̱j Yaꞌanj a. Da̱nj cata̱j ro̱j so̱j rihaan Juan á ―taj Jesús rihaan ro̱j síí tucuꞌyón snana̱ Juan yoꞌ a.
7Dan me se caꞌanj ro̱j soꞌ, ga̱a ne̱ guun cheꞌe̱ Jesús caꞌmii soꞌ rihaan cunuda̱nj nij yuvii̱ cheꞌé Juan Síí Cutaꞌ Ne man yuvii̱ a:
―Ga̱a caꞌanj soj rej tacaan queneꞌe̱n soj man Juan roꞌ, ne̱ da̱j ga̱a̱ soꞌ queneꞌe̱n soj, rá soj ga̱. Ase vaa ꞌo̱ rcoo̱ naa̱n ndoꞌo ꞌyaj nana̱ vaa soꞌ, rá soj naꞌ. Guun vi̱j nimán soꞌ cheꞌé tucuáán noco̱ꞌ soꞌ, rá soj naꞌ. Taj maꞌ. 8ꞌO̱ se da̱j ga̱a̱ soꞌ rá soj, ga̱a caꞌanj soj queneꞌe̱n soj man soꞌ ga̱. Si̱j nu̱u̱ yatzíj laru̱u ndoꞌo me soꞌ, rá soj naꞌ. Taj maꞌ. ꞌO̱ se nij síí nu̱u̱ yatzíj laru̱u roꞌ, ya̱nj rá veꞌ tucuá síí nica̱j suun rey ado̱nj. 9ꞌO̱ se da̱j ga̱a̱ Juan rá soj, ga̱a caꞌanj soj queneꞌe̱n soj man soꞌ ga̱. Si̱j nataꞌ snana̱ Yaꞌanj me soꞌ, rá soj naꞌ. Ya̱ uxrá ado̱nj. Ne̱ cata̱j xnaꞌanj ꞌu̱nj rihaan soj se vaa sa̱ꞌ doj vaa soꞌ rihaan cunuda̱nj nij síí nataꞌ snana̱ Yaꞌanj ado̱nj. 10ꞌO̱ se nana̱ nihánj nana̱ no̱ rihaan Danj Yaꞌanj roꞌ, taj xnaꞌanj cheꞌé Juan a:
Ni̱ꞌyaj soj á.
Vaa síí caꞌa̱nj suun cheꞌé ꞌu̱nj,
ne̱ caꞌne̱j ꞌu̱nj man soꞌ quita̱j ya̱a̱n soꞌ rihaan so̱ꞌ,
ne̱ nuchra̱nꞌ nimán yuvii̱ veꞌé caꞌmi̱i̱ yuvii̱ ga̱ so̱ꞌ, quiꞌya̱j soꞌ a.
Da̱nj taj Danj Yaꞌanj cheꞌé Juan ado̱nj. 11Ya̱ ya̱ cata̱j xnaꞌanj ꞌu̱nj rihaan soj cuano̱ se vaa taj va̱j a̱ ꞌó yuvii̱ me síí noco̱o doj rihaan Juan Síí Utaꞌ Ne man yuvii̱ maꞌ. Tza̱j ne̱ cuano̱ roꞌ, síí noco̱ꞌ doj rej uun chij Yaꞌanj me síí noco̱o doj rihaan Juan a.
12’Dan me se asi̱j tucuꞌyón Juan rihaan yuvii̱ nda̱a cuano̱ me se naquiꞌyaj ino̱ ndoꞌo yuvii̱ snana̱ Yaꞌanj da̱j vaa uun chij Yaꞌanj, ne̱ vaa síí sca̱ꞌ ndoꞌo nimán síí me ina̱nj rá cata̱j da̱j vaa uun chij Yaꞌanj ado̱nj. 13ꞌO̱ se ta̱ranꞌ nij síí nataꞌ snana̱ Yaꞌanj rihaan yuvii̱ ga̱a naá do̱ꞌ, nu̱ꞌ stucua̱nj Moisés do̱ꞌ, nda̱a maꞌa̱n Juan do̱ꞌ, cataj xnaꞌanj ndoꞌo nij soꞌ cheꞌé güii gu̱un chij Yaꞌanj nimán yuvii̱ na̱nj á. 14Dan me se a̱j neꞌen soj se vaa síí cuꞌna̱j Elías síí nataꞌ snana̱ Yaꞌanj rihaan yuvii̱ ga̱a naá roꞌ, caꞌna̱ꞌ uún soꞌ rihaan chumii̱ nihánj, taj Danj Yaꞌanj a. Dan me se sese me rá soj gu̱un ya̱ rá soj cuno̱ soj nana̱ nihánj, ne̱ cata̱j xnaꞌanj ꞌu̱nj rihaan soj se vaa Juan me síí ata̱ se‑su̱u̱n Elías síí cayáán ga̱a naá yoꞌ na̱nj ado̱nj. 15Sese ta̱j yuꞌuj xréé soj, ne̱ cuno̱ soj nana̱ nihánj á.
16’Ne̱ da̱j vaa yuvii̱ ma̱n rihaan chumii̱ nihánj cuano̱, rá soj ga̱. Dan me se cata̱j xnaꞌanj ꞌu̱nj rihaan soj á. Ase vaa xnii caꞌanj rihaan yuꞌvee ne̱ tico ga̱ tuviꞌ roꞌ, vaa nij yuvii̱ ma̱n rihaan chumii̱ nihánj ado̱nj. Dan me se yáán nij xnii yoꞌ rihaan yuꞌvee, 17ne̱ aguáj nij xnii rihaan tuviꞌ xnii, taj nij xnii a: “Nica̱j núj se‑rihu̱u̱ núj, caꞌyánj núj chraꞌ choco̱ꞌ, tza̱j ne̱ me cheꞌé ne raꞌa̱nj soj ga̱. Ne̱ caꞌyánj núj chraꞌ xnangá, tza̱j ne̱ me cheꞌé ne taꞌve̱e soj ga̱”, taj nij xnii rihaan tuviꞌ nij soꞌ a. 18ꞌO̱ se caꞌnaꞌ síí cuꞌna̱j Juan Síí Cutaꞌ Ne man yuvii̱, ga̱a ne̱ ne cha̱ ndoꞌo soꞌ do̱ꞌ, ne coꞌo̱ soꞌ na vinó do̱ꞌ maꞌ. Ne̱ cheꞌé dan taj nij yuvii̱ se vaa nu̱u̱ nana̱ chre̱e nimán soꞌ a. 19Ne̱ caꞌnáꞌ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱, ga̱a ne̱ niha̱ꞌ rá ꞌu̱nj chá ꞌu̱nj do̱ꞌ, coꞌo ꞌu̱nj do̱ꞌ, ga̱a ne̱ cheꞌé dan taj uún nij yuvii̱ se vaa síí cachén chá do̱ꞌ, síí cachén coꞌo do̱ꞌ, mé ꞌu̱nj a. Ne̱ taj uún nij soꞌ se vaa tuvíꞌ ꞌu̱nj me síí aꞌnéj impuestó man yuvii̱ do̱ꞌ, ꞌó nij síí tumé cacunꞌ do̱ꞌ, taj nii a. Da̱nj tuꞌva nij soꞌ, tza̱j ne̱ ne neꞌen uxrá nij soꞌ maꞌ. Sese xca̱j yuvii̱ cuentá da̱j vaa ꞌyaj rój, ne̱ gu̱un ya̱ rá nij yuvii̱ se vaa si̱j cu̱u raa̱ me rój ga̱ síí cuꞌna̱j Juan yoꞌ ado̱nj ―taj Jesús rihaan nij yuvii̱ a.
Caꞌmii Jesús cheꞌé sayuun quira̱nꞌ yuvii̱ ma̱n vaꞌnu̱j chumanꞌ ne caꞌve̱j rá cuno̱ snana̱ Jesús a
20Síj, ga̱a ne̱ guun cheꞌe̱ Jesús cutaꞌ Jesús cacunꞌ xráá nij yuvii̱ ma̱n vaꞌnu̱j chumanꞌ cheꞌé se nichra̱j nimán nij soꞌ a. Dan me se nda̱ꞌ se doj a̱ vaa suun sa̱ꞌ noco̱o quiꞌyaj soꞌ chiháán nij soꞌ queneꞌen nij soꞌ rihaan suun sa̱ꞌ noco̱o quiꞌyaj soꞌ ꞌó nij chumanꞌ, tza̱j ne̱ ne nuchra̱nꞌ nimán nij soꞌ ta̱náj nij soꞌ chrej chiꞌi̱i̱ a̱ maꞌ, taj Jesús a. 21Ne̱ nihánj me nana̱ caꞌmii Jesús cheꞌé nij yuvii̱ ma̱n nij chumanꞌ yoꞌ a:
―Nique̱ soj si̱j ma̱n chumanꞌ Corazín a. Nique̱ soj si̱j ma̱n chumanꞌ Betsaida a. ꞌO̱ se quira̱nꞌ uxrá soj sayuun na̱nj á. Ga̱a naá me se nij síí ma̱n chumanꞌ Tiro do̱ꞌ, nij síí ma̱n chumanꞌ Sidón do̱ꞌ, me síí chiꞌi̱i̱ nimán na̱nj á. Tza̱j ne̱ sese caꞌanj ꞌu̱nj chiháán nij soꞌ quiꞌyáj nij suun sa̱ꞌ noco̱o niꞌya̱j nij soꞌ, ga̱a ne̱ guun ya̱ rá nij soꞌ se vaa tumé nij soꞌ cacunꞌ tza̱j ado̱nj. Ne̱ nuchranꞌ nimán nij soꞌ, ne̱ nda̱a yatzíj nij niha̱nj cunuû nij soꞌ, nda̱a yaj chruun acaa ruvaj caraa nij soꞌ raa̱ nij soꞌ, cheꞌé se quinanó rá nij soꞌ cheꞌé cacunꞌ tumé nij soꞌ asuun tza̱j ado̱nj. 22Dan me se ya̱j cata̱j xnaꞌanj ꞌu̱nj rihaan soj se vaa güii caꞌne̱ꞌ ꞌu̱nj cacunꞌ cheꞌé nij yuvii̱ roꞌ, doj a̱ ga̱a̱ sayuun quira̱nꞌ soj rihaan sayuun quira̱nꞌ nij síí chiꞌi̱i̱ cumán chumanꞌ Tiro do̱ꞌ, ma̱n chumanꞌ Sidón do̱ꞌ ado̱nj.
23’Ne̱ vaa soj si̱j ma̱n chumanꞌ Capernaum uún á. Síí sa̱ꞌ ina̱nj me maꞌa̱n soj, rá soj naꞌ. Taj maꞌ. Ta̱güéj Yaꞌanj man soj nda̱a rej ma̱n nimán nij síí caviꞌ ado̱nj. Dan me se nij síí ma̱n chumanꞌ Sodoma roꞌ, me síí chiꞌi̱i̱ nimán a. Tza̱j ne̱ sese caꞌanj ꞌu̱nj chiháán nij soꞌ quiꞌyáj nij suun sa̱ꞌ noco̱o niꞌya̱j nij soꞌ, ne̱ cuno nij soꞌ snana̱j, ne̱ guun ya̱ rá nij soꞌ se vaa tumé nij soꞌ cacunꞌ, ne̱ nuchranꞌ nimán nij soꞌ, ne̱ ne caca̱a̱ chiháán nij soꞌ tza̱j maꞌ. Ne̱ na̱j chiháán nij soꞌ nda̱a cuano̱ asuun tza̱j a. 24Dan me se cata̱j xnaꞌanj ꞌu̱nj rihaan soj se vaa güii caꞌne̱ꞌ ꞌu̱nj cacunꞌ cheꞌé nij yuvii̱ roꞌ, doj a̱ ga̱a̱ sayuun quira̱nꞌ soj rihaan sayuun quira̱nꞌ nij síí chiꞌi̱i̱ cumán chumanꞌ Sodoma yoꞌ ado̱nj ―taj Jesús cheꞌé nij yuvii̱ ne caꞌve̱j rá cuno̱ snana̱ soꞌ a.
Cataj Jesús me síí nariꞌ sa̱ꞌ snana̱ soꞌ a
25Dan me se güii yoꞌ cachíín niꞌya̱j Jesús rihaan Yaꞌanj, cataj soꞌ a:
―Síí ꞌNi̱j Raꞌa xta̱ꞌ do̱ꞌ, Síí ꞌNi̱j Raꞌa chumii̱ do̱ꞌ, mé so̱ꞌ, Ata̱j. Ne̱ sa̱ꞌ uxrá quiꞌyáá so̱ꞌ caráán so̱ꞌ rihaan nij síí avii raa̱ do̱ꞌ, rihaan nij síí acaj cuentá do̱ꞌ, se vaa se̱ cuno nij soꞌ snana̱j maꞌ. Ma̱an nij síí vaa nica̱ꞌ nimán roꞌ, veꞌé cuno nij soꞌ, quiꞌyáá so̱ꞌ ado̱nj. 26Da̱nj ina̱nj quiꞌyáá so̱ꞌ, cheꞌé yan da̱nj me rá so̱ꞌ qui̱ꞌyáá so̱ꞌ, Ata̱j ―taj Jesús rihaan Rej soꞌ Yaꞌanj a.
27Canica̱j Jesús caꞌmii soꞌ rihaan nij yuvii̱, cataj soꞌ a:
―A̱j rqué Réé ꞌu̱nj Yaꞌanj cunuda̱nj rasu̱u̱n rihanj ado̱nj. Ne̱ a̱ ꞌó síí ne neꞌen da̱j vaa ꞌu̱nj; ma̱an o̱rúnꞌ Réj neꞌen a. ꞌO̱ se Taꞌníí soꞌ mej ado̱nj. Ne̱ a̱ ꞌó yuvii̱ ne neꞌen da̱j vaa Réj maꞌ. Ma̱an o̱rúnꞌ ꞌu̱nj neꞌen da̱j vaa soꞌ ado̱nj. Ne̱ sese me rá ꞌu̱nj cata̱j xnaꞌanj ꞌu̱nj rihaan ꞌó nij yuvii̱ da̱j vaa Réj, ne̱ queneꞌe̱n ꞌó nij soꞌ uún ado̱nj. 28Ne̱ sese vaa síí navij ndoꞌo rá cheꞌé yan nanoꞌ uxrá soꞌ tucuáán sa̱ꞌ do̱ꞌ, sese vaa síí nanó ndoꞌo rá cheꞌé yan ne gu̱un nucua̱j soꞌ quiꞌya̱j soꞌ nu̱ꞌ tucuáán sa̱ꞌ tucuáán noco̱ꞌ soꞌ do̱ꞌ, ne̱ caꞌna̱ꞌ nij síí vaa da̱nj rihanj á. ꞌO̱ se nara̱a̱n rá nij síí vaa da̱nj, qui̱ꞌyáj na̱nj ado̱nj. 29Dan me se canoco̱ꞌ soj manj, ne̱ quiꞌya̱j soj tucuáán tu̱cuꞌyón ꞌu̱nj man soj á. ꞌO̱ se síí vaa nica̱ꞌ nimán mej, ne̱ nari̱ꞌ soj chrej nara̱a̱n rá nimán soj ado̱nj. 30ꞌO̱ se ne sayu̱u̱n vaa tucuáán cuchruj ꞌu̱nj canoco̱ꞌ soj maꞌ. ꞌO̱ se gu̱un nucua̱j soj quiꞌya̱j soj cunuda̱nj ado̱nj ―taj Jesús a.
Currently Selected:
San Mateo 11: trc
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. 2024 segunda versión electrónica