Versículos bíblicos populares de Xhun 19

Compartir

Inatxhetz vet Jesuus u vinaagre, tul ech tal Jesuus s-eche: —Oleʼvyetz vet in s-tiʼ, —xeʼt Jesuus. Tul viqʼel ikuʼ iviʼ Jesuus. Tul toksa vet Jesuus u taanxelal tiqʼabʼ quBʼaal Tiuxh. Tul el vet ikʼuul.

Taletz kuxh vet Jesuus u yol uvaʼe, tan tootzaqich vet Jesuus uvaʼ maʼtich toleʼv vet Jesuus tiʼ ibʼanax kam uvaʼ txhaqax tzaan s-tiʼ. Echetz talt vet Jesuuse u yol s-eche: —Kamxh in t-tzaqa tziʼil, —xeʼt Jesuus. Tiʼetz kuxh talt Jesuus u yol uvaʼe, tul elaʼpun vet u yol uvaʼ tzʼibʼamich ka s-tiʼ t-viyolbʼal quBʼaal Tiuxh.

Tiletz vet Jesuus vitxutx, atz til vet Jesuus uvaʼ atich in tzitzi, tul ech tal Jesuus te vitxutx s-eche: —Intxutx, aʼ vet naq aval uvaʼe toq ibʼaneʼ, —xeʼt Jesuus s-viʼ, in, uvaʼ nikich intxhus vibʼ s-kʼatza, atz in, uvaʼ atichxh taanima Jesuus s-viʼ. Yaʼne ech tal Jesuus s-ve s-eche: —Txa, nik val see, atxutx vet vintxutx toq ibʼaneʼ, —xeʼt Jesuus. Tul yekich viqʼo vet vitxutx Jesuus s-viʼ t-votzotz.

Aqʼbʼetz vet inqʼa sol tiʼ itxʼaqax vatz taqan Jesuus, tul motx tila uvaʼ maʼtich ikam vet Jesuus. Echetz yeʼl vet vatz taqan Jesuus itxʼaq inqʼa sol. Pet chʼetex kuxh vet txala tuul Jesuus s-laansa taʼn val u sol. Tul yekich eluʼl kaq tuchʼ aʼ titxhiʼoʼl Jesuus.

Qatetz ibʼan inqʼa yol inqʼae, tiʼ uvaʼ laʼ elaʼp val u yol uvaʼ tzʼibʼamal ka t-viyolbʼal quBʼaal Tiuxh, uvaʼ ech nik tal s-eche: —Yeʼl ibʼaqil u vinaq laʼ txʼaqaxi, —chich u yol. Atz ech nik tal vaʼt u yol uvaʼ tzʼibʼamal ka t-viyolbʼal quBʼaal Tiuxh s-eche: —Laʼ saqil u vinaq taʼn inqʼa xaol, inqʼa chʼeʼon u txala tuul, —chich u yol.

Yaʼne aqʼax vet tiqa Jesuus val u kurus. Tul yekich vet Jesuus t-val u atibʼal uvaʼ ‹Bʼaqil Viʼ,› chich eʼli. ‹Goolgota,› chich telaʼp u yol Bʼaqil Viʼ tiyolbʼal inqʼa tij imam Israeel.

Yaʼne ibʼit vet inqʼa sol val u kokos uvaʼ chʼiʼxunyichxhtuʼ, eche koroona tetz mam iqʼesal. Tul taqʼaq vet jaʼ tiviʼ Jesuus. Tul toksaaq vet val u oksaʼm tiʼ Jesuus uvaʼ kaqko ikaʼyeʼ tetz mam iqʼesal tiʼ imaxubʼel Jesuus.