Versículos bíblicos populares de João 15

Compartir

Wata' co Iri' Panaji Uva. Wahu' co taparain nana ma' quem. Wari' co win cwere napa' ma', wari' co win cwere ta' ma' quem, ac ca wina tamana ca tara pain ca xut xo' ca pain ca an hwet pe cain ca howa nucun. Je ca tomi' xuhu' ca': Mo ta om xuhu', om ca ara ac hwein ca awi wa ta.

Win cwere cara xine, win cwere cara ac xuhu' tara quem. Win ne ca wina e' ne taparain pana pain ca win cwere cara nein panaji ma'. Ac i ma' hwe quem. Mo ta om win cwere mahu', om ac ne tara ca xuruxut xo' hwe pain ca om an hwet pe hwein ca howa nuhu' quem.

Mo ta win cwere cara mahu', mo ta to ho' cara cuhu' oro ca tomi' ne quem, na ac cuhu' tara pain ca tomi' hun Te ma', pain ca mi' xut hun pain oro carawa ca param hwe ma'. Mi' mi' pi' pin ac cuhu' pain tara quem.

Om ca wahu' ne co tora' pan napa' pain ca taxipa' xun mahu' ma', om na. Wata' pan co tora' nuhu'. Mi' inuhu' pain ca taramaja wa quem. Wawaran mama' je, pijim' mi' jujun pain capija oro wari' ta inuhu'. Howa cara ac caca tara co howa nanapa' pahu' inuhu' quem. Mo ta tomi' ha' mahu' pain ca mi' xuhu' pain ca taramaja wa ca'. Mo ta tomi' ca' hun Te ma': Mi' naparut pain ca tomi' urut pum Panxima Jeju ta, mo ta tomi' ac i ma' hun pata', ha' ac cuhu' tara pain carawa ca mi' xut pain hun ma'. Mi' mi' pi' pin turuhu' pain.

Wari' co mi' pin caho' nonon oro win ma' ca ma', querec pin' ac tocwa na pain ca om noc camain' cocon. Om na xucun wari' co an xiho' non pain ca om noc cocon ma'.

Wari' co querec wet nain panaji uva ma', ton tapiripit taxipa' nain taparain ca om wina. Taparain ca wina ma', wawac wijimain pin ac cain na. Ma' ta wina tamana ne nain.

Tomi' ha' xine pain ca tomi' ca' xuhu' ca': Ta noc camain' xujuhu' me. Win ne ca om noc camain' xuhu' ca', ac i ma' tara ca om noc camain' xujuhu' ta.

Mo ta ara hwein oro ca hohot non Te ma', querec pin' ac cocon tara oro wari' pain ca hwara' opa nucun pain ca awi tamana nucun. Ac i ma' tara ca an hwet pe hwein ca taxipa' mahu' ma' quem na ca tomi' caparut.

Wata' co Iri' Panaji Uva ta ac caparut na. Te iri na ne, wirico co querec wet nain panaji uva.

Wari' co om win cwere napa' ma', ac taparain panaji uva ca om wina ma', ca xin pin wa ma', ca mi' pin ma'. Oro taparain panaji uva ca cono' ac i ma' ma', cut in ac xine na, wixicaracao' mi' ac xine na pain xe ma', wiran mao ac ne na quem.

Tomi' ac i ma' inuhu', ma' ta tomi' querec te hwe inuhu'. Win ne ca tomi' querec te ta' ca', ac i ma' tara ca tomi' querec te nuhu' quem. Tomi' querec te tamana ac hwe tara ta.

Mo ta tomi' ha' mahu' pain oro ca ara je xuhu' ca', om ac ne tara ca noc xuhu' ta. Win ta' con Te cwa', tomi' ha' inon pain oro ca ara ra capa', om ac ne na ca noc capa' quem.

Tomi' ha' xine pain ca tomi' ca' xuhu' ca' quem: Ta noc camain' xujuhu' me. Ac i ma' na ca tomi' caparut ma'.

Mo xi win ma' ne huhun oro wari' co om howa nanapa' ma', om ac ne xira ca noc cucuhu' pain ca win ma' ne cucuhu' ma'. Ane tora' ca' xuhu' cocon ne. Om ca win ma' ne mami' huhun. Je ca noc cucuhu' ma' quem.