YUNIRÜBO RHIMO 8
8
1Tüsho api shekhi ju Saulnü mülüjih-a lakheah.
Saulnü Borü Thsümüchikhi
Tüsho ju nimung Jirusalem ching borü azhihde thsümüchi ato akhiuk; tüsho amüsüh-thsangyurübo kheak hode, arü alala Judea tüsho Samaria lomibo ching müzütabah. 2Shuhmülanga jihkhi mihtsürübonü Stephen kiuyukabah, tüsho api dünkheak khide tüzho. 3#Yunir 22.4,5; 26.9-11Tüsho Saulnü borü thsümünimpü tankih. Athrürü tüsho aliberübo thüyam chingnü yankhita rihyam ching jih.
Samaria ching Thsangyuthsangrakhi
4Kheakü sherü hiumüzüta lakheanü thiyusheak thsangyuthsangrade yü. 5Philipnü Samaria kiuto ching yüki, tüsho Khrista dünkheak zhiyukjih. 6Apinü athakhi sochoki tüsho amüyinsahbe rhimokhi ngüchoki botonü arihbah Philip ki ani. 7Tümüde amünean me yüzah-a lakhibo düsheak achangnü zhide ahihkhüh chingnü akhiuk; tüsho thripshe thsürü yungsho kikzükikdorü ahihkhüh thsüngu. 8Jumonü ju kiuto asühachihkhi ato lakheah.
9Mihtsürü khülang müngühlim kiuto ching wurük huhde tüsho api ato kamde Samariarü müyinsahshihkhi amung Simon lakheah. 10Arü aninibenü atobe khiungde api ki anide tha, “Ha mihtsürü a Thrünpuh wu ato lah.” 11Arünü api ki ani, tümütüsho kim ashang apinü anihbuh wurüknü arü müyinsahshih. 12Tüshe küyimki Thrünpuh kiulongthsü yusheak atsü tüsho Jisu Khrista mung thsangyuthsangrakhi hode arünü Philip kheak akin lakhea, arü athrürü tüsho aliberübo chido bapti. 13Simon she kin, tüsho bapti dunglim Philip yande tsah, tüsho amüyinsahbe le khinthiyinbebo ngübah api müyinsah.
14Küyimki Samaria mihtsürübonü Thrünpuh yu leangkhido de Jirusalem ching amüsüh-thsangyurübonü asokhea, arünü Peter tüsho Johan arü kilim yüshih. 15Küyimki arü akhiungkhea, arübo Amüsüh Me leangkhipü thsüde arü thsungkheak tamkhüntamnüjih, 16tümütüsho arü she kheak she ju müyükihyi, tüshe Atungpuh Jisu mung chingnü khülang lang baptia lakheah. 17Jushu arünü arü kheak khahbo nimkih tüsho Amüsüh Me leangkhi. 18Küyimki amüsüh-thsangyurü khahbo nimbah Me jihkhi Simonnü angükhea, apinü arü kilim sho jih 19tüsho tha, “Inü khürü kheak I khahbo nimsho Amüsüh Me leangkhipü thsüde I kilim she ha wu jihang.” 20Tüshe Peternü api ki tha, “Nü yo shotoyinchi nü lung dükheakshang, tümütüsho shonü Thrünpuh thsambah ngübah de nünü lümdo! 21Nü ha ching bepü yungsho shihcham müla, tümüde nü mulong ju Thrünpuh miki alungki yung. 22Jumonü nü mihbukmuyukkhi müthriang, tüsho Atungpuh ki tamkhüntamnüang, khükia nü mulong ching ha lümkhi hode apinü nü neak bahjihbah. 23Tümüde nü a akhühnü mide tüsho neak bukkhüp azhorü lakhi inü ngüchoh.” 24Tüsho Simonnü alo, “Nünü athakhi tümü she I kheak marüpü I thsungkheak Atungpuh ki tamkhüntamnüjang.”
25Küyimki arünü thiyumütsan jihde Atungpuh yu asukkhea, arünü Samariarü kiulongbo ahihdo ching thiyusheak-atsü thsangyuthsangrade Jirusalem lim alode yü.
Philip tüsho Ethiopia Torü
26Tüshe Atungpuh yunirünü Philip ki tha, “Asürang tüsho Jirusalem chingnü Gaza lim yüki limro düjinglim thrip yüang.” Ha sunglo limro ah. 27Apinü asürübah tso. Tüsho kheahang, Ethiopia kiulongthsüberü Kandas rahpung alala kurungkheak atorü dukha ju kingaünpü Jirusalem ching arü 28tüsho yülode alakheah; khoralolungbe kheak binbah apinü Isaia wukihbuh hüm chingnü khede alakheah. 29Tüsho Menü Philip ki tha, “Khora-lolungbe ju yanphuhde yüang.” 30Jumonü Philipnü api kilim alihde yü tüsho Isaia wukihbuh hüm chingnü khede sobah keokhi, “Nünü tümü khechonü anikhitnah?” 31Tüsho apinü tha, “Khürünü müthanaksho inü küde thsah anikhitpü?” Tüsho apinü Philip ju akihbah api lung binpü tha. 32Kheakü khede alakhi amüsühyu ju ha lakheah:
“Namfimihnu alaksahpü bede ayükhi yungsho namfimihnununü anam-rhiprü miki zhikde alakhi nangde,
apinü amün mükhimshuh.
33Api junokhi ching anihbuh kheak thiyuro khenoabah.
Shepünü api tsühsoniusobo thakhukba?
Tümütüsho api rhangdung alomi chingnü bede yükihdo.”
34Tüsho dukhanü Philip ki tha, “Wukihbuh hanü anihbuh dünkheak a shi khürü dünkheak thachonü I ki thaang?” 35Judüki Philipnü api mün khimshuh, tüsho ha amüsühyu tankihde api ki Jisu yusheak atsü tha. 36Ane limro ching yüde alachoki ke ki arü, tüsho dukhanü tha, “Kheahang, ha kheak ke lah! Tümü thsüde I mübaptipü?” 37Philipnü tha, “Nü mulong athrünkhinü kinsho nü baptipü kuklah.” 38Jumonü apinü khora-lolungbe ju tukloa zhipshih. Tüsho Philip le dukha ane chido ke ching yüzahbah api baptijih. 39Tüsho küyimki ane ke chingnü akhiukkhea, Atungpuh Menü Philip ram; dukhanü api müngüde kam, tüsho asühde api limro ching yü. 40Tüshe Philip ju Azota ching ngü, tüsho apinü tsahhode kiutobo alala ching Kaesarea khiungde thiyusheakatsü thsangyuthsangrade arü.
Actualmente seleccionado:
YUNIRÜBO RHIMO 8: YIMCBSI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.