Lukka 17
17
Ring'eeda
(Mat 18:6-7, 21-22; Mark 9:42)
1Ng'atta gwayeeshsha ginealangaaschi “Simsimda jea gweadu riing'eeda mayghwashiy hinnooda ak ea dashaageada siidida jea ghwanung' ghwahidu! 2Gwachchi gayghang'wana siisi geerassa gheatta lagheaneeda sing'ealliida ak geejaksa jeeda basooda, mayghwasam gideaba gayghwanung' goodiiy siyagi aba jeedeaba suu manang'iin. 3Afra geat; iyadiiy oorjeeda geamadu, gireekusi, idukkuuna gisamsi; 4ama adiiyseey niba ispwa aba jeemba askwarjaanjagi, ak gabiikseey niba ispwa nea gwayi, ‘Neadukkuuni,’ Abeeda gisamsi.”
Masaweega
5Gwayeeshsha Giijasoodiga Ng'uttamiida, “Aheaneasa masaweega.” 6Gwayeeshsha Ng'uttamiida, “Inyeeda goondeawi masaweega deenna gheang'nyeanda geetta suguura haradaali, abeeda gajoammuusa ayeeshshiina meagheayeanda, ‘Loadaana ak geng'eapseey jeeda basooda,’ ak gayghoawal gheang'deang'wa.”
Gidamiisa soomjeanda
7“Heappi gajea ng'eaha gil aba jeedeang'wa mideawa soomjeanda bwar ng'eanyi ghana ghoahaghwa gisilga, jea gwayeeshsha niny ibiikna madamnyeanda, ‘Lamwajaana beenni apteada agiischeena?’ 8Heappi maygwayeeshsha, ‘Sinnean gichcheadaak, radiischeena ak gigadiyeesean ea daahiit, agiischooda ea leeshooda, ak abeeda giyeagiischi nea gileeshi?’ 9Gaygabadiischeesa soomjeandida aba gideaba nisin gissiruksa? 10Eara agooga gidowuurjeewi gil, iyoasinnyi gidasiyeeshshineegwa asna, gooyeeshshi geat, ‘Aseasa geewoschi soomjooga marachchi gil, geesinnyi gidamiseasa sinooda.’”
Yeesu ghoahaap fii damanamughuush
11Iiduw nea gwanda naweeda gawa Yerusaleemu gwasik dageascheeda ng'eanyiida Samariya ea Galilaaya. 12Geeyi bwak ama hitta jeemba gharang'agi gwaroonnyi sea fii damanamughuush beardooschi udamusuura, ak ghaminaada nea sheagi 13Goojuur nea gwayi, “Yeesu, Siida haw, eaniyean bwaydaneasa.” 14Daa saawa gwayeeshsha, “Aweayeena ohhiimsiina geat ashoohoodiga diineeda Yahuudi.” Damandida beawaan geammiidu. 15Daa siiyagi aba jeannyaawa gideaba nihaap, gabiigu nea ghoaghambiit Aseetta aba ghuutta haw; 16gobeedeaysa Siidida geeshanga Yeesu ak gabadischeesa. Nea siidida gaba emeeda Samariya. 17Hean gwayi Yeesu, “Fuga gwachchi sihhaap adamanamughuush? Gea ashshageash gwandayeenu?. 18Manda dea nibiigu ghoaghambiit Aseetta geaghuus rabascheanji?” 19Ak gwayeeshsha niny, “Ng'eada una; gidahaapnyi masaweagaagu.”
Hinnoda gheambalmeeda
(Mat 24:23-28, 37-41)
20Ng'atta ghoanyaash Farisayajeega nea gwayeeshsha, “Sugoochcheandumeeda Aseetta gayghwahidu eeju?” Ghwasha nea gwayeeshsha saawa, “Sugoochcheandumeeda Aseetta mayghwahidu nea geadahaan. 21Ea manda siichchea gwayi, ‘Gwanda hiji!’ ghana ‘Hoowa!’ Aba gideaba ng'ulla sugoochcheandumeeda Aseetta gwanda jeesingeagwa.” 22Hean gwayeeshsha ginealanga, “Gayghwahidu eawoojiga jea agasseena adaahana eaweechcheanjagi aba eawoojiga Balleanda Siida, ak ea mwajadaaha. 23Ak gajeeyeeshshineegwa, ‘Ang'ulla gwanda hoowa!’ ghana ‘Ang'ulla gwanda hiji!’ Adooweayi, nea adooyaachchi geeshta nyaawa. 24Aba gideaba gaygawuurji dadamandeeda aboong'na meatkweanagi bea humng'eeda ea ghwahitta meatkweeda niirja bea humng'eeda, ea gichchea gawuurji Balleanda Siida gil aba aweadaannyi. 25Ak gayghanyi ghwanyas hang'weanidooda ammadeeda aba haleanjeessaang'a, nea gayghaheawa fiisu bea jeachcheeng'suun. 26Ak gidaghayi uurji aba eawoojiga Nuhu, ea gichchea gawuurji gil aba eawoojiga Balleanda Siida. 27Geeyeagiischi, nea geeleeshi, geegeeshshi, nea geegeena, ea ghwahiitta eaweeda weewa Nuuhu jeeda maleambooda, ghwahiing'aan roopta haw ak ghwalas uhudeaba sean. 28Gaygawuurji gidaghayi uurji aba eawoojiga Luuttu, abeeda geyeagiischi nea geeleeshi, geasha nea geashayda, geehista, nea geedeekshi, 29muchchu eaweeda ritteawa Luuttu Sodomean ghoaptu beasta wunda roopta leabu humng'eeda ak ghwalas uhuudeaba sean. 30Nii gichchea gawuurji gil aba eaweeda jea eattaajiida Balleanda Siida.
31“Eaweedida siida mida uhuuda gheeda nea gwanda haleanjeedaannyi jeeda gheeda, adaghwararang'aan gageanda; ak eara dea mida madamnyeanda ea adagabiikta bwadaw. 32Oapkaada gatmooda Luuttu. 33Siida wassean gasa ghoaghu aweagaaschi gaygahutta, nea dea hutteawi aweagaaschi gayghoaghu. 34Geayeeshshineegwa eaweedida, gaygwandeayi fii iyyeenya aba bulaliida, ak gajeegeanda siyagi ak geenung'usa heeda nirja. 35Gaygang'ealshi gadeem iyyeenya aba hijagi, gegeanda agi ak geenung'usa heeda niirja.” [ 36Gaygwanda fii iyyeenya madamnyeanda, ak gajegenda akkalealla, ak genung'usa heeda akkalealla.] 37Ak geeyeeshsha niny “Eenu gil Ng'uttamiida?” Gwayeeshsha saawa, “Heeda mida guumeeda heeda jea gooweameesa madoonyaakka.”
Actualmente seleccionado:
Lukka 17: DTGANT09
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Datooga New Testament © Bible Society of Tanzania, 2009.