LUKE 14
14
Kakazā Mi akhali Raikhami
1 #
Lk 7.36; 11.37; Mk 3.2. Sabbaththang Jishuna Phariseebingwui kathāna akhawui shimli aphazā khavai khavā tharan mibingna ali yangpama. 2Yanglu, suichung kakazā mayarnao akha awui mangāli leisai. 3#Mat 12.10; Mk 3.4; Lk 6.9. Chieina Jishuna ain kathembing eina Phariseebingli ngahāna, “Sabbaththang kakazā raikhami hi ainwui athishurda sāpaikā, masāpaimakhala?” 4Kha athumna khikha mangahānkāmana. Chieina Jishuna ali singkhuida raimihaowa kala shiunhaowa. 5#Mat 12.11; Lk 13.15. Ana athumli hānga, “Nathumwui ngachaili kachikathāna naomayara lah mukvā leilaga khorjopli tāzanghaiakha sabbaththang ngalāngda makhuishokmarala?” 6Kha hiwui pongli athumna mangahānkārarthuwa.
Kha̱mi kala Shimva̱li Tamkachithei
7Khaleilaga phakazāli kharā mi kaikhana mathāmeikap kaji pam kakapang Jishuna thei. Chiwui vang chānjam hi athum saikorali hānga, 8#Chān 25.6-7; Lk 11.43; 20.46. “Nali kachikathā mi akhana shakazāwui phanitli kaho tharan khangam khareipamli mapamalu, kaja nali ngamkhamei mili ana hohaisāpai; 9kala nani khaninili kahopā china nali, ‘Mipa hili pam chikāmihaolu’ da rākahāng eina nala zakshikhamei apamli apamkida khayakhaora. 10Kha nali kaho tharan zakkashi apamli apamlu, chithākha kaho akhavā china kharā tharan nali ‘Itao, mathākhamei pamvāk apamsa’ da rāhāngpai. Chitharan nali ngasoda phazākharumbingwui mangāli nali maiyā ngasaka. 11#Mat 23.12; Lk 18.14; Mat 18.4; 1 Pet 5.6. Kaja khalatta hakkakhuiya mi chili teongasakra kala khalatta teoda kaphaninga mi chili khayā kāngasakra.”
12 #
Jam 2.2-4. Chiwui thili Jishuna shimva̱ chilila hānga, “Nana ngathor phazātli nilala, ngazin phazātli nilala, phāchizātka jiakha nawui ngasotnaobingli nilala, nachināngarāli nilala, athei-asābingli nilala, kashānga khongnainaobingli nilala mahoalu, kaja athumnala nali hokhuida nana sāmi kahai chi runhaipai. 13#Lk 14.21. Kha nana phākachizāt tharan kathai kachāmbing, khangazanbing, pheikatekbing, khangapeobingli holu. 14Chithākha nali somira; khiwui vangkhala kaja athumna nali marunrarmara. Kha mashunkasā mibingna ringshokthanghon nali Varena runmira.”
Kahaka Zatkhānwui Chānjam
(Mat 22.1-10)
15 #
Phon 19.9. Phazākharumbingwui ngachaili akhana tui hi kashā tharan Jishuli hānga, “Vare wungramli phazārumki kaji mi chi sokhami ngasāranu!” 16#Mat 22.1-10. Kha Jishuna ali hānga, “Atam akhali mi akhana zātkhān kahaka akha sāda mi kachungkhali hoi. 17Phazāranhaira kaji eina ana hokahaibing chili ‘Rālu, saikora ngarānkupserhaira’ da aho khavai awui raoli chihovai. 18Kha athum akhala, akhala marā khavai apong phāhaowa. Kharepana ali hānga, ‘I lui akha lohaida lei, chieina chi mavākhayang masāpaimarali, kashi masāmilu’ da poi. 19Khangatei akhana hānga, ‘Ina mukvā churā phangā lohaida lei, chi arāk khavai kazatna, chieina kashi masāmilu!’ 20#Khal 24.5; 1 Cor 7.33. Khangatei akhanala hānga, ‘I ngalā shakzākhuichamda lei, chiwui vang eina I marārarmarali.’ 21#Lk 14.13.“Chieina rao china latungda ali kahāng saikora chi awui akhavāli unghāngsera. Pao kashā eina shimva̱ malungvātlakhaowa. Chieina araoli hānga, ‘Thakta keinungwui shongrei-shongrāli vāda kachāmbing, khangazanbing, khangapeobing kala katekabingli ahokhuilu.’ 22Rao china hānga, ‘Amei, nana kaso kahai chi sāserhaira, kha aruila mi kachungkha zangpaifarali.’ 23Chieina akhavā china raopā chili hānglui, ‘Shongkhar kala khoreipam kachiva̱li vālu kala chili leikasāsā mibingli tandi eina rāngasaklu, chithākha iwui shim hi chipempaira. 24Ina kahāngna kaja hokahaibingwui ngachaili mi khipānakha iwui zātkhān hili khamazap masamphangluimara.’”
Sākhangatha̱ Kasāwui Kasak
(Mat 10.37-38)
25Atam akhali Jishuli mi kachungkha shurkazat tharan ana ngareiungda athumli hānga, 26#Mat 10.37-38.“Ili kharā mi kachiva̱na ava̱ avā, preiva̱, naongarā, achināngarā, azarva̱ ngara kala khalattawui mirinli mahorhairarakha, a iwui sākhangatha̱ masāpaimana. 27#Mat 16.24; Mk 8.34; Lk 9.23. Kachikathāna akhalattawui krush maphungla ithi shurraakha a iwui sākhangatha̱ masāpaimana. 28“Nathumwui ngachaili kachikathā akhana shim khamathā akha sākhuira da phaningakha rimeikapta aman kayākha sha̱kha zangra kala shim chi sākhuishap lupā kayākha leili da mangachākmarala? 29Chi maningakha shim chi shimphungmāng sāhunhailaga makupkhuikharar tharan mibingna chi theida ali mana̱shida hāngra, 30‘Mipa hiya shim sāphokkhaninghailaga makupkhuitheithura.’ 31Lha awunga khipana raimi thingtharā thānlaga raimi thingmaga̱ kathāna awungali kathada ngasungsikhala da pamzangda mamachukmarakhala? 32Mararmara jiakha akhapā chi katāva̱li leilakha ana paophunga chihovāda mashit khavai ahāng ngasakra. 33#Lk 18.29-30; Phil 3.7.Chithada sāda kachikathāna awui khalalei saikora mahorhairarakha iwui sākhangatha̱ masāpaimana.
Makankhanā Machi
(Mat 5.13; Mk 9.50)
34 #
Mat 5.13; Mk 9.49-50; Mat 11.15. “Machi hi phālaka; kha machiwui katum shimānhaiakha, kathada tumngasakluipairakhala? 35Chikathā machi chi ngaleiwui vangla hār sādala shikachin makannāthuda thada horhaowa. Khanā kakaa mi china shākhuiranu!”
Actualmente seleccionado:
LUKE 14: TANGBSI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.