Yohani 2
2
Isendwa mukaya aka Kana
1Bo ghachilapo amasiku mabili kukabako isendwa mukaya aka Kana muchigaba icha Galileya. Wepe nu nyina uwa Yesu akabako, 2po u Yesu wepe poka na bamanyili bache bakitiziwa kusendwa yila. 3Bo uvinyo amala, unyina uwa Yesu akamubuzya akati, “Uvinyo amala.” 4U Yesu akamwamula akati, “Mayi, utakambuzyanje izyakubomba. Akabalilo kane kachili katakwanite.” 5Unyina uwa Yesu akababuzya abambombo bala akati, “Bomba bulo chosi chicho akubabuzya.”
6Pakabapo isonta inkulu sikisi izya mizi, zizyo aba Yuda bakabombelagha pakusukusulilamo ukuyana ni nyiho zyabo izyakwiswefya. Isonta yosi yikayana bulo ni ndobo fayivi pamo sikisi. 7U Yesu akababuzya abambombo bala akati, “Izuzya isonta izi na mizi.” Bakizuzya mupaka nukwanda pakukupuka, 8po akababuzya akati, “Losi ulu semba amizi nukumupa usongo uwa lusekelo.” Po bakasemba amizi nukumupa usongo yula. 9Usongo uwa lusekelo akaghonja amizi, ghagho ghakanduka we vinyo. Atakamanya kuko akafuma, loli ababombi babo bakasembelelagha amizi bakamanya. Usongo uwa lusekelo yula akamwitizya umwenesendwa, 10nukumubuzya ukuti, “Umuntu wesi pakwanda akubapa abantu uvinyo umwiza, po nanti abantu bikuta, akubapa uvinyo umubibi. Loli awe wafisite uvinyo umwiza mupaka ulu.”
11U Yesu akabomba ichimanyilo chache ichakwanda ichi mukaya aka Kana muchigaba icha Galileya, mulamula momumo akalanjizya ubuchindamu bwache, sona abamanyili bache bakamusubila.
12 #
Mat. 4.13
Pisinda pache u Yesu akabuka mu Kapelinahumu, poka nu nyina, na bawamwabo, sona na bamanyili bache nukwikala kulakula amasiku amanandi bulo.
U Yesu akuyiswefya Inyumba iya Chala
(Mat. 21.12-13; Mlko. 11.15-17; Luk. 19.45-46)
13 #
Ukf. 12.1-27
Bo Ulusekelo ulwa Pasa uwa ba Yuda lwapalamila, u Yesu akabuka ku Yelusalemu. 14Kulakula akinjila mu Nyumba iya Chala nukubagha abantu bakughulizannya ing'ombe, ni ng'ozi ni nkunda. Mulamula mukaba sona abaghulizannya indalama bikaye pa matebulo. 15Po u Yesu akapota ulukusa pakuba chikoti, akabachimbizyamo bosi mu Nyumba iya Chala, poka ni ng'ozi ni ng'ombe zyabo. Akaghalabulannya ututalati utwa baghulizannya indalama bala. 16Po akabalamula babo bakaghulizyanga inkunda ukuti, “Muzifumye kuzi. Mutakayipelaye Inyumba iya Tata pakuba munalo.” 17#Mas. 69.9Abamanyili bache bakakumbuka Amasimbo aghakuti, “Ichililizi chane pa Nyumba yako chikwaka mumwane ngati gho moto.”
18Abalaghili aba Chiyuda bakamwamula ni laluzyo bakati, “Chimanyilo choni chicho ungabomba ukutulanjizya ukuti uli nu bulaghili ubwakubombela zinizi?”
19 #
Mat. 26.61, 27.40; Mlko. 14.58, 15.29 U Yesu akabamula akati, “Mongolannya Inyumba iya Chala iyi, po inkwiza pakuyizenga sona mumasiku matatu.”
20Bakamulalusya bakati, “Inyumba iya Chala yasendite amaka 46 pakuyizenga, loli awe ungayizenga sona buli-buli mumasiku matatu bulo?”
21Loli Inyumba yiyo u Yesu akayinenagha, ghukaba mubili wache. 22Po bo azyuka kubufwe, abamanyili bache bakakumbuka ukuti akanena zinizi, sona bakasubila Amasimbo na vivyo u Yesu akanena.
U Yesu azimenye inyinong'ono izya bantu
23Bo u Yesu achili ali mu Yelusalemu pakabalilo aka Ulusekelo ulwa Pasa, abinji bakamusubila bo bennya ivyika vivyo akabomba. 24Loli u Yesu atakabasubila pakuti akazimanya inyinong'ono zyabo. 25Patakalondiwa ukuti yumo amubuzye nizya bantu pakuti umwenecho akazimanya inyinong'ono zyabo.
Actualmente seleccionado:
Yohani 2: LMBNT2016
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Aprende más sobre Ulufingo Ulupya