Xhun 21
21
Uvaʼs ikʼutxht tibʼ quBʼaal Jesuus te juqvaʼl inqʼa nikich itxhus tibʼ s-kʼatza
1Xamtichetz txhan veteʼ, tul ikʼutxh tibʼ Jesuus inpaqte te inqʼa nikich itxhus tibʼ s-kʼatza. Tul aʼ ikʼutxhvat tibʼ Jesuus tziʼ u mam aʼ Tiveerias. Echetz ibʼan s-eche. 2Kʼulich tibʼ jolol inqʼa nikich itxhus tibʼ kʼatz Jesuus, tul ant Simoon Luʼ tuchʼ Maxh, uvaʼ nikich talax s-Xuʼm, tuchʼ Natanaeel, u aj tenam Kanaa uvaʼ at tuulbʼal Galileea, atich s-xoʼl. Tul atich kaʼvaʼl inqʼa ikʼaol Sevedeeo, tuchʼ kaʼvaʼt inqʼa nikich itxhus tibʼ kʼatz Jesuus.
3Yaʼne ech tal Simoon Luʼ s-eche: —Maʼt intxey txay, —xeʼte.
Tul ech tal jolt inqʼa nikich itxhus tibʼ kʼatz Jesuus s-eche: —Maʼtatetz oʼ seʼe, —xeʼtaqe.
Bʼenaqetz veteʼ, tul motx ok vet bʼen tuul val u vaarko. Poro mij invaʼq txay itxeyaq tuulbʼal u aqʼbʼal uvaʼe.
4Aʼetz vet saʼich isaqbʼeʼ, tul txaklich vet Jesuus tziʼ u mam aʼ. Poro tira yeʼ bʼen te inqʼa nikich itxhus tibʼ kʼatz Jesuus uvaʼ Jesuusiche. 5Tul ech tal okaʼp Jesuus s-eche: —Txa qumol, ¿yeʼx kol etxeyeʼt kaʼvoʼq qutxay, tul laʼ qetxhbʼu? —xeʼt Jesuus.
Tul echaq motx tal s-eche: —Yeʼle, —xeʼtaqe.
6Yaʼne ech tal Jesuus s-eche: —Een ekʼonivat bʼen u kʼatxh tisebʼal u vaarko. Tul toq eleq jolol txay, —xeʼt Jesuus.
Yaʼne ikʼoniaq vet bʼen u kʼatxh tisebʼal u vaarko. Taʼnetz kuxh motx ibʼana, tul yeʼ nikich toleʼvaq vet tiʼ tiqʼol jaʼul u kʼatxh tu mam aʼ, taʼn mamala txay.
7Tul ech val vet te Luʼ, in, uvaʼ nikich intxhus vibʼ kʼatz Jesuus, atz in, uvaʼ atichxh taanima Jesuus s-viʼ, s-eche: —¡Aʼ bʼak u quBʼaal Jesuuse! —xeʼt in te Luʼ.
Taʼnetzxh tabʼi Luʼ uvaʼ Jesuusiche, tul nal kuxh iqitzoʼk Luʼ vaʼt u toksaʼm s-tiʼ. Tan eesamich toksaʼm Luʼ tiʼ itxeyex txay. Tul ikʼoni vet bʼen tibʼ Luʼ xeʼ u mam aʼ tiʼ inuʼx eluʼl. Tul el vet ul Luʼ tiʼ tilix Jesuus.
8Petetz jolt inqʼa nikich itxhus tibʼ kʼatz Jesuus, tan ataqich ok tuul u vaarko. Tul juxumich tel vet ul u kʼatxh motx ibʼana, tan tira nojnaʼqichxh vet u kʼatxh taʼn txay. Tul jit niimich koq ataqich okaʼp viʼ u mam aʼ tuchʼ u vaarko. Pet kamal kajvaʼl kuxh kʼaʼaj ataqich okaʼpun.
9Elaqetz vet ul tziʼ u mam aʼ, tul tilaq veteʼ uvaʼ kejlichxh vet aqʼtxhaʼl. Tul atich vet jaʼ val u txay viʼ u aqʼtxhaʼl tuchʼ paan. 10Tul ech tal Jesuus s-eche: —Iqʼovaq vet tzaan joloq inqʼa txay uvaʼ yaʼnxh etxeylaʼ, —xeʼt Jesuus.
11Yaʼne pal vet ok Simoon Luʼ tuul u vaarko tuchʼ jolt imol. Tul ex ijuxu vet eluʼl Luʼ u kʼatxh tziʼ eluʼl u mam aʼ. Tul nojnaʼqichxh vet u kʼatxh taʼn nimla txhaq txay. Tan vaʼl 153 txay atich vet tuul u kʼatxh. Poro yeʼl u kʼatxh rinpi, kʼuxh nojnaʼqichxh vet taʼn mamala txay.
12Yaʼne ech tal Jesuus te inqʼa nikich itxhus tibʼ s-kʼatza s-eche: —Etulvaq. Tul txʼaʼonoq ex, —xeʼt Jesuus.
Poro yeʼxhabʼilxh invaʼq inqʼa nikich itxhus tibʼ kʼatz Jesuus txʼolon tabʼileʼ uvaʼ: —¿Jaʼl axhe? —xeʼt koq te Jesuus. Tan tootzaqlaqiche uvaʼ Jesuusiche. 13Yaʼne tiqʼo tzaan Jesuus u paan tuchʼ u txay. Tul taqʼ Jesuus te inqʼa nikich itxhus tibʼ s-kʼatza.
14Aʼetz uvaʼe ibʼan Jesuus uvaʼs ikʼutxht tibʼ Jesuus itoxpaq xoʼl inqʼa nikich itxhus tibʼ s-kʼatza uvaʼs maʼtich vet titzʼeʼv Jesuus inpaqte.
Uvaʼs tabʼit quBʼaal Jesuus te Luʼ oq nikichxh isaʼax Jesuus taʼn Luʼ, yaʼne ibʼekʼ ka quBʼaal Jesuus ixeel inqʼa niman tetz te Luʼ
15Yaʼetz kuxh vet itxʼaʼon Jesuus tuchʼ inqʼa nikich itxhus tibʼ s-kʼatza, tul ech tal Jesuus te Simoon Luʼ s-eche: —Simoon, axh vikʼaol Xhun, ¿palnaʼq nik asaʼt in viʼ naq inqʼae? —xeʼt Jesuus.
Tul ech tal Luʼ s-eche: —Ootzaqle, inBʼaal, uvaʼ tira nik insaʼ axh, —xeʼt Luʼ.
Tul ech tal Jesuus s-eche: —Kʼuula inqʼa niman vetz uvaʼ ech tatin, eche chelem karneʼl, —xeʼt Jesuus.
16Yaʼne ech tal Jesuus tikaʼpaq te Luʼ s-eche: —Simoon, axh vikʼaol Xhun, ¿nik kolxh asaʼ in? —xeʼt Jesuus.
Tul ech tal Luʼ s-eche: —Ootzaqle, inBʼaal, uvaʼ tira nik insaʼ axh, —xeʼt Luʼ.
Tul ech tal Jesuus s-eche: —Xee inqʼa niman vetz, eche ixeel karneʼl, —xeʼt Jesuus.
17Yaʼne tal Jesuus titoxpaq. Tul ech tal Jesuus te Luʼ s-eche: —Simoon, axh vikʼaol Xhun, ¿nik kol asaʼ in? —xeʼt Jesuus.
Tul yekichxh txumun vet Luʼ, tiʼ uvaʼ itoxpaqich vet tabʼit Jesuus u yol te Luʼ uvaʼ: —¿Nik asaʼ in? —xeʼt Jesuus.
Yaʼne ech tal vet Luʼ s-eche: —Yeʼl invaʼq yol uvaʼ yeʼ koq ootzaqle, inBʼaal. Pet at sakʼuul uvaʼ nik insaʼ axh, —xeʼt Luʼ.
Tul ech tal Jesuus s-eche: —Kʼuula inqʼa niman vetz, eche vaʼq u xeen karneʼl uvaʼ nik taqʼ titza vikarneʼl. 18Tul tira toq val see: Tuulbʼal uvaʼs txulich axh, tul junt nikich aqitzoʼk avoksaʼm seʼe. Tul maʼt axh tal uvaʼ nik isaʼ see. Pet toqetz qʼesbʼoq vet axh, tul laʼ aaqʼ vet el inqʼa aqʼabʼ. Tul vaʼlen vet laʼ qitzon axh s-iqvil. Tul laʼ iqʼol vet axh tal uvaʼ yeʼ laʼ asaʼvat abʼenaʼ, —xeʼt Jesuus te Luʼ.
19Taletz Jesuus u yol tiʼ ibʼen te Luʼ uvaʼ kam kamchil laʼich palk Luʼ, tul laʼich toksa Luʼ iqʼij quBʼaal Tiuxh s-tuchʼ.
Yaʼetz kuxh Jesuus tiʼ talax u yol uvaʼe, tul ech tal Jesuus te Luʼ s-eche: —Txhʼuyeʼven s-viʼ, —xeʼt Jesuus.{*}#21.19 ¿Kam talax u yol uvaʼ?: —Txhʼuyeʼven s-viʼ, —chich u versiikulo uvaʼa. Aʼetz talaxe uvaʼ yeʼ laʼ itanbʼa Luʼ vinimal quBʼaal Jesuus, kʼuxh laʼ pal Luʼ t-vitzaʼlal tiʼ u kamchil, eche uvaʼ palk quBʼaal Jesuus. Tan ech uvaʼe nik tal tu versiikulo vajxaqlaval tiʼ taqʼteʼl Luʼ inqʼa iqʼabʼ, eche taqʼteʼl quBʼaal Jesuus inqʼa iqʼabʼ vatz kurus.
Aʼ inqʼa yole tiʼ Xhun, uvaʼ atxh taanima quBʼaal Jesuus s-tiʼ
20Taʼnetz kuxh tal Jesuus inqʼa yol te Luʼ, tul sutxhqʼ Luʼ tiʼ iqul. Tul til Luʼ uvaʼ il in, txhʼuyich tzaan in, in, uvaʼ nikich intxhus vibʼ kʼatz Jesuus, in, uvaʼ atxh taanima Jesuus s-viʼ, atz in, uvaʼ anlich ok in vatz itxhelebʼ Jesuus uvaʼs qutxʼaʼon tiʼ inimal u nimla qʼij Ipal Aanxel. Atz in, uvaʼ ech val te Jesuus s-eche: —QuBʼaal, ¿jaʼletz naqe uvaʼ toq oksan axh tiqʼabʼ inqʼa iqʼesal uqʼeʼybʼal? —xeʼt in.#Xhun 13.23-25
21Tiletz vet Luʼ vaqʼbʼeʼ, tul ech tal Luʼ te Jesuus s-viʼ s-eche: —InBʼaal, ¿keʼchetz naq uvaʼe? —xeʼt Luʼ.
22Tul ech tal Jesuus s-eche: —¡Yeʼl avokebʼal tiʼ tootzaqileʼ! Tan oq in laʼ saʼon uvaʼ ant atil naq uvaʼs laʼ vul inpaqte, tul inetz laʼ bʼanon. Pet taʼn kuxh nik val see uvaʼ yeʼ laʼ atanbʼa innimaleʼ, —xeʼt Jesuus te Luʼ.
23Echetz kuxh isutxhqʼ vet talaxe inqʼa yol s-viʼ xoʼl inqʼa niman tetz Jesuus, tul aʼ ex paxinoq veteʼ uvaʼ yeʼl in laʼich kam in. Poro yeʼxhkam tal Jesuus s-viʼ, uvaʼ yeʼl koq in laʼich kam in. Pet ech kuxh tal Jesuus s-eche: —¡Yeʼl avokebʼal tiʼ tootzaqileʼ! Oq in laʼ saʼon uvaʼ ant atil naq uvaʼs laʼ vul inpaqte, —xeʼt kuxh Jesuus.
24—Antetzxh ine, in Xhun, uvaʼ nikich intxhus vibʼ kʼatz Jesuus, nik alon inuqul inqʼa kam. Tul ile nik intzʼibʼa ka, —xeʼt Xhun.
—Tul qootzaql veteʼ uvaʼ inuqulxh uvaʼ tzʼibʼamal ka taʼn Xhun, —xeʼt inqʼa iqʼon iviʼ.{*}#21.24 ¿Jaʼl nik alon u yol uvaʼ?: —...qootzaql veteʼ, —chiche. Aʼ nik talaxeʼ uvaʼ, aʼ inqʼa iqʼon iviʼ xoʼl inqʼa niman tetz Jesuus nikich alon u yol uvaʼe, inqʼa atich tu tenam Eefeso. Tan aʼ atilich vet Xhun tzitzi tuulbʼal uvaʼs iqʼesbʼ veteʼ.
25Tul mamala telxh motx ibʼan Jesuus. Echetze uvaʼ motx koq tzʼibʼal jankʼal inqʼa ibʼan Jesuus, tul mamalaebʼ uʼ laʼ ibʼana. Aʼetz nik vitzʼa uvaʼ yeʼ laʼ tzʼeq u vatz txʼavaʼ tiʼ ikolox inqʼa uʼ tiʼ kam uvaʼ ibʼan Jesuus.
[Tul echxh laʼ ibʼane.]
Actualmente seleccionado:
Xhun 21: ixlC
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2016, Wycliffe Bible Translators, Inc. All rights reserved.
Xhun 21
21
Uvaʼs ikʼutxht tibʼ quBʼaal Jesuus te juqvaʼl inqʼa nikich itxhus tibʼ s-kʼatza
1Xamtichetz txhan veteʼ, tul ikʼutxh tibʼ Jesuus inpaqte te inqʼa nikich itxhus tibʼ s-kʼatza. Tul aʼ ikʼutxhvat tibʼ Jesuus tziʼ u mam aʼ Tiveerias. Echetz ibʼan s-eche. 2Kʼulich tibʼ jolol inqʼa nikich itxhus tibʼ kʼatz Jesuus, tul ant Simoon Luʼ tuchʼ Maxh, uvaʼ nikich talax s-Xuʼm, tuchʼ Natanaeel, u aj tenam Kanaa uvaʼ at tuulbʼal Galileea, atich s-xoʼl. Tul atich kaʼvaʼl inqʼa ikʼaol Sevedeeo, tuchʼ kaʼvaʼt inqʼa nikich itxhus tibʼ kʼatz Jesuus.
3Yaʼne ech tal Simoon Luʼ s-eche: —Maʼt intxey txay, —xeʼte.
Tul ech tal jolt inqʼa nikich itxhus tibʼ kʼatz Jesuus s-eche: —Maʼtatetz oʼ seʼe, —xeʼtaqe.
Bʼenaqetz veteʼ, tul motx ok vet bʼen tuul val u vaarko. Poro mij invaʼq txay itxeyaq tuulbʼal u aqʼbʼal uvaʼe.
4Aʼetz vet saʼich isaqbʼeʼ, tul txaklich vet Jesuus tziʼ u mam aʼ. Poro tira yeʼ bʼen te inqʼa nikich itxhus tibʼ kʼatz Jesuus uvaʼ Jesuusiche. 5Tul ech tal okaʼp Jesuus s-eche: —Txa qumol, ¿yeʼx kol etxeyeʼt kaʼvoʼq qutxay, tul laʼ qetxhbʼu? —xeʼt Jesuus.
Tul echaq motx tal s-eche: —Yeʼle, —xeʼtaqe.
6Yaʼne ech tal Jesuus s-eche: —Een ekʼonivat bʼen u kʼatxh tisebʼal u vaarko. Tul toq eleq jolol txay, —xeʼt Jesuus.
Yaʼne ikʼoniaq vet bʼen u kʼatxh tisebʼal u vaarko. Taʼnetz kuxh motx ibʼana, tul yeʼ nikich toleʼvaq vet tiʼ tiqʼol jaʼul u kʼatxh tu mam aʼ, taʼn mamala txay.
7Tul ech val vet te Luʼ, in, uvaʼ nikich intxhus vibʼ kʼatz Jesuus, atz in, uvaʼ atichxh taanima Jesuus s-viʼ, s-eche: —¡Aʼ bʼak u quBʼaal Jesuuse! —xeʼt in te Luʼ.
Taʼnetzxh tabʼi Luʼ uvaʼ Jesuusiche, tul nal kuxh iqitzoʼk Luʼ vaʼt u toksaʼm s-tiʼ. Tan eesamich toksaʼm Luʼ tiʼ itxeyex txay. Tul ikʼoni vet bʼen tibʼ Luʼ xeʼ u mam aʼ tiʼ inuʼx eluʼl. Tul el vet ul Luʼ tiʼ tilix Jesuus.
8Petetz jolt inqʼa nikich itxhus tibʼ kʼatz Jesuus, tan ataqich ok tuul u vaarko. Tul juxumich tel vet ul u kʼatxh motx ibʼana, tan tira nojnaʼqichxh vet u kʼatxh taʼn txay. Tul jit niimich koq ataqich okaʼp viʼ u mam aʼ tuchʼ u vaarko. Pet kamal kajvaʼl kuxh kʼaʼaj ataqich okaʼpun.
9Elaqetz vet ul tziʼ u mam aʼ, tul tilaq veteʼ uvaʼ kejlichxh vet aqʼtxhaʼl. Tul atich vet jaʼ val u txay viʼ u aqʼtxhaʼl tuchʼ paan. 10Tul ech tal Jesuus s-eche: —Iqʼovaq vet tzaan joloq inqʼa txay uvaʼ yaʼnxh etxeylaʼ, —xeʼt Jesuus.
11Yaʼne pal vet ok Simoon Luʼ tuul u vaarko tuchʼ jolt imol. Tul ex ijuxu vet eluʼl Luʼ u kʼatxh tziʼ eluʼl u mam aʼ. Tul nojnaʼqichxh vet u kʼatxh taʼn nimla txhaq txay. Tan vaʼl 153 txay atich vet tuul u kʼatxh. Poro yeʼl u kʼatxh rinpi, kʼuxh nojnaʼqichxh vet taʼn mamala txay.
12Yaʼne ech tal Jesuus te inqʼa nikich itxhus tibʼ s-kʼatza s-eche: —Etulvaq. Tul txʼaʼonoq ex, —xeʼt Jesuus.
Poro yeʼxhabʼilxh invaʼq inqʼa nikich itxhus tibʼ kʼatz Jesuus txʼolon tabʼileʼ uvaʼ: —¿Jaʼl axhe? —xeʼt koq te Jesuus. Tan tootzaqlaqiche uvaʼ Jesuusiche. 13Yaʼne tiqʼo tzaan Jesuus u paan tuchʼ u txay. Tul taqʼ Jesuus te inqʼa nikich itxhus tibʼ s-kʼatza.
14Aʼetz uvaʼe ibʼan Jesuus uvaʼs ikʼutxht tibʼ Jesuus itoxpaq xoʼl inqʼa nikich itxhus tibʼ s-kʼatza uvaʼs maʼtich vet titzʼeʼv Jesuus inpaqte.
Uvaʼs tabʼit quBʼaal Jesuus te Luʼ oq nikichxh isaʼax Jesuus taʼn Luʼ, yaʼne ibʼekʼ ka quBʼaal Jesuus ixeel inqʼa niman tetz te Luʼ
15Yaʼetz kuxh vet itxʼaʼon Jesuus tuchʼ inqʼa nikich itxhus tibʼ s-kʼatza, tul ech tal Jesuus te Simoon Luʼ s-eche: —Simoon, axh vikʼaol Xhun, ¿palnaʼq nik asaʼt in viʼ naq inqʼae? —xeʼt Jesuus.
Tul ech tal Luʼ s-eche: —Ootzaqle, inBʼaal, uvaʼ tira nik insaʼ axh, —xeʼt Luʼ.
Tul ech tal Jesuus s-eche: —Kʼuula inqʼa niman vetz uvaʼ ech tatin, eche chelem karneʼl, —xeʼt Jesuus.
16Yaʼne ech tal Jesuus tikaʼpaq te Luʼ s-eche: —Simoon, axh vikʼaol Xhun, ¿nik kolxh asaʼ in? —xeʼt Jesuus.
Tul ech tal Luʼ s-eche: —Ootzaqle, inBʼaal, uvaʼ tira nik insaʼ axh, —xeʼt Luʼ.
Tul ech tal Jesuus s-eche: —Xee inqʼa niman vetz, eche ixeel karneʼl, —xeʼt Jesuus.
17Yaʼne tal Jesuus titoxpaq. Tul ech tal Jesuus te Luʼ s-eche: —Simoon, axh vikʼaol Xhun, ¿nik kol asaʼ in? —xeʼt Jesuus.
Tul yekichxh txumun vet Luʼ, tiʼ uvaʼ itoxpaqich vet tabʼit Jesuus u yol te Luʼ uvaʼ: —¿Nik asaʼ in? —xeʼt Jesuus.
Yaʼne ech tal vet Luʼ s-eche: —Yeʼl invaʼq yol uvaʼ yeʼ koq ootzaqle, inBʼaal. Pet at sakʼuul uvaʼ nik insaʼ axh, —xeʼt Luʼ.
Tul ech tal Jesuus s-eche: —Kʼuula inqʼa niman vetz, eche vaʼq u xeen karneʼl uvaʼ nik taqʼ titza vikarneʼl. 18Tul tira toq val see: Tuulbʼal uvaʼs txulich axh, tul junt nikich aqitzoʼk avoksaʼm seʼe. Tul maʼt axh tal uvaʼ nik isaʼ see. Pet toqetz qʼesbʼoq vet axh, tul laʼ aaqʼ vet el inqʼa aqʼabʼ. Tul vaʼlen vet laʼ qitzon axh s-iqvil. Tul laʼ iqʼol vet axh tal uvaʼ yeʼ laʼ asaʼvat abʼenaʼ, —xeʼt Jesuus te Luʼ.
19Taletz Jesuus u yol tiʼ ibʼen te Luʼ uvaʼ kam kamchil laʼich palk Luʼ, tul laʼich toksa Luʼ iqʼij quBʼaal Tiuxh s-tuchʼ.
Yaʼetz kuxh Jesuus tiʼ talax u yol uvaʼe, tul ech tal Jesuus te Luʼ s-eche: —Txhʼuyeʼven s-viʼ, —xeʼt Jesuus.{*}#21.19 ¿Kam talax u yol uvaʼ?: —Txhʼuyeʼven s-viʼ, —chich u versiikulo uvaʼa. Aʼetz talaxe uvaʼ yeʼ laʼ itanbʼa Luʼ vinimal quBʼaal Jesuus, kʼuxh laʼ pal Luʼ t-vitzaʼlal tiʼ u kamchil, eche uvaʼ palk quBʼaal Jesuus. Tan ech uvaʼe nik tal tu versiikulo vajxaqlaval tiʼ taqʼteʼl Luʼ inqʼa iqʼabʼ, eche taqʼteʼl quBʼaal Jesuus inqʼa iqʼabʼ vatz kurus.
Aʼ inqʼa yole tiʼ Xhun, uvaʼ atxh taanima quBʼaal Jesuus s-tiʼ
20Taʼnetz kuxh tal Jesuus inqʼa yol te Luʼ, tul sutxhqʼ Luʼ tiʼ iqul. Tul til Luʼ uvaʼ il in, txhʼuyich tzaan in, in, uvaʼ nikich intxhus vibʼ kʼatz Jesuus, in, uvaʼ atxh taanima Jesuus s-viʼ, atz in, uvaʼ anlich ok in vatz itxhelebʼ Jesuus uvaʼs qutxʼaʼon tiʼ inimal u nimla qʼij Ipal Aanxel. Atz in, uvaʼ ech val te Jesuus s-eche: —QuBʼaal, ¿jaʼletz naqe uvaʼ toq oksan axh tiqʼabʼ inqʼa iqʼesal uqʼeʼybʼal? —xeʼt in.#Xhun 13.23-25
21Tiletz vet Luʼ vaqʼbʼeʼ, tul ech tal Luʼ te Jesuus s-viʼ s-eche: —InBʼaal, ¿keʼchetz naq uvaʼe? —xeʼt Luʼ.
22Tul ech tal Jesuus s-eche: —¡Yeʼl avokebʼal tiʼ tootzaqileʼ! Tan oq in laʼ saʼon uvaʼ ant atil naq uvaʼs laʼ vul inpaqte, tul inetz laʼ bʼanon. Pet taʼn kuxh nik val see uvaʼ yeʼ laʼ atanbʼa innimaleʼ, —xeʼt Jesuus te Luʼ.
23Echetz kuxh isutxhqʼ vet talaxe inqʼa yol s-viʼ xoʼl inqʼa niman tetz Jesuus, tul aʼ ex paxinoq veteʼ uvaʼ yeʼl in laʼich kam in. Poro yeʼxhkam tal Jesuus s-viʼ, uvaʼ yeʼl koq in laʼich kam in. Pet ech kuxh tal Jesuus s-eche: —¡Yeʼl avokebʼal tiʼ tootzaqileʼ! Oq in laʼ saʼon uvaʼ ant atil naq uvaʼs laʼ vul inpaqte, —xeʼt kuxh Jesuus.
24—Antetzxh ine, in Xhun, uvaʼ nikich intxhus vibʼ kʼatz Jesuus, nik alon inuqul inqʼa kam. Tul ile nik intzʼibʼa ka, —xeʼt Xhun.
—Tul qootzaql veteʼ uvaʼ inuqulxh uvaʼ tzʼibʼamal ka taʼn Xhun, —xeʼt inqʼa iqʼon iviʼ.{*}#21.24 ¿Jaʼl nik alon u yol uvaʼ?: —...qootzaql veteʼ, —chiche. Aʼ nik talaxeʼ uvaʼ, aʼ inqʼa iqʼon iviʼ xoʼl inqʼa niman tetz Jesuus nikich alon u yol uvaʼe, inqʼa atich tu tenam Eefeso. Tan aʼ atilich vet Xhun tzitzi tuulbʼal uvaʼs iqʼesbʼ veteʼ.
25Tul mamala telxh motx ibʼan Jesuus. Echetze uvaʼ motx koq tzʼibʼal jankʼal inqʼa ibʼan Jesuus, tul mamalaebʼ uʼ laʼ ibʼana. Aʼetz nik vitzʼa uvaʼ yeʼ laʼ tzʼeq u vatz txʼavaʼ tiʼ ikolox inqʼa uʼ tiʼ kam uvaʼ ibʼan Jesuus.
[Tul echxh laʼ ibʼane.]
Actualmente seleccionado:
:
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2016, Wycliffe Bible Translators, Inc. All rights reserved.