Juan 3
3
Jesús ets Nicodemo
1Jam ijty tu'uk ja fariseë ja'ay, Nicodemo'ajtp, mëj'äämpy ijty y'ity ma ja jutiis ja'ayëtyën. 2Yë'ë ojts ninëjkxy ja Jesús koots ets t'ënëmaay:
Wintsën, nija'awëtyëpës ko mijts Tios të mkexyë ets ëëts xyaj'ijxpëktëty, jä'ä ko ka'ap tjëkyepy pën tunëty ja mëj'ajtën ijxtëm mijts xytyunyën pën ka'ap ja Tios tmëëtëty.
3Ënät ja Jesús y'ënëmaayë:
Tëy mijts t'ënëëmë, pën ka'ap jatëkok ja ja'ay myëxu'unk'aty, ka'ap tjëkyepy t'ixëty ja Tios ja kyutujkën.
4Tä ja Nicodemo tyajtëëy:
¿Wi'ix tëy ja'ay jatëkok myëxu'unk'ajnëty? ¿Wä'än jëtää tu'uk ja'ay mëjja'aypyë tyëkëty tyaak jyootjoty ets jatëkok myëxu'unk'ajtwinpitëtyë?
5Ënät ja Jesús y'ëtsoowë:
Tëy mijts t'ënëëmë, pën ka'ap myëxu'unk'aty mëët ja nëë ets ja Tios ja Myëjaaw myëk'ajtën, ka'ap tjëkyepy tyëkëty ma ja Tios ja kyutujktaknën. 6Ja ja'ay jëtu'un myëxu'unk'atë ijxtëm yaa naaxwiinyëtën, ni'kx kopkën je'eyë; pën jatëkok mëxu'unjk'ajtp mëët ja Tios ja Myëjaaw myëk'ajtën, ka'ap ja kyëxë'ëky. 7Këtii nëkoo xymyëkjawë ko t'ënëëmën: Ko kopkpëky ko ja'ay jatëkok myëxu'unk'atëty. 8Yë poj, pojp oymyaajëty, ets oy jyayajmëtoy ko y'amu'uy; ka'ap yajnijawë maa tsyoony ets maa nyijkx; näjyëtu'un yë'ëjëty mëti'ipë mëxu'unk'ajtëpën jatëkok ka'ap yaj'ixtë.
9Tääts ja Nicodemo ojts tyajtëëwkojnëpë:
¿Wi'ix ya'atë jëtu'unpë tyunëtëty jyatëtëty?
10Ets ja Jesús y'ëtsoowë:
Israel ja'ay yaj'ijxpëjkpë mijts, ¿ets ka'ap ya'atë xynyijawë? 11Tëy mijts t'ënëëmë ko nija'awëtyëpës mëti'ipës nnikajpxtëpën, ets nija'awëtyëp ëëtsëty mëti'ipës të n'ixtën; je'eyëp ko miitsëty ka'ap xymyëpëktë mëti'ipë njatukmëmëtyaktëpën. 12Pën ka'ap miits xymyëpëktë ko ntukmëmatya'aktë mëti'ipë yaa naaxwiinyëtën, ¿wi'ix xymyëpëka'antë ko ntukmëmëtya'aktëty mëti'ipë tsajpjotmën?
13Ni pën tsajpjotm të kya'otsy, yi'iyë mëti'ipë jam të tsyoonyën ets yaa naaxwiiny të kyëtä'äky, yë'ë jëtu'un ja naaxwiinyëtë ja'ay ja y'U'unk. 14Jëtu'un ijxtëm ja Moisés ojts ja tsa'any tyajpëtë'ëkyën jam të'ëts'itjotm, näjyëtu'un ja naaxwiinyëtë ja'ay ja y'U'unk pyëtë'ëka'any; 15ets jëtu'un, pën mëpëjktëp ma yë'ëjën pyaatantëp ja juukyajtën xëmëkyëjxmëpë.
Tios tsyojkpy ja naaxwiinyëtë ja'ay
16Yë'ë ko Tios ni'ik ja naaxwiinyëtë ja'ay tsoky, paaty tkejxy ja y'U'unk tu'kpajkpë. Pën myëpëjkpy ka'ap y'ookëty, yë'ë myëët'atëp ja juukyajtën xëmëkyëjxmëpë. 17Jä'ä ko yë Tios ka'ap yë'ëkyëjxmëty tkejxy ja y'U'unk naaxwiiny ets tyajnitukëja'any ja naaxwiinyëtë ja'ay, yë'ëkyëjxm të tkexy ets tyaj'ëwaatsëpëtsëmëty ja ja'ay.
18Pën myëpëjkpy ja Tios ja y'U'unk; ka'ap nyitukëja'any; e mëti'ipë ka'ap myëpëkyën tëë nyitukë jä'äkyëjxm ko ka'ap të tmëpëky ja Tios ja y'U'unk tu'kpajkpë. 19Mëti'ipë ka'ap myëpëktën tëë nyitukëtë, jä'ä ko, yi'iyë ja ëxëëkpë tyuuntëp paaty ja kujaj kutë'kxën ka'ap të tsoktë ko të jyaminy yaa naaxwiiny. 20Pën tyuuntëp ja ëxëëkpë, y'ëxëëk ijxtëp ja të'kxën jajën, këtiipë yajnijawëty mëti'ipë tyuuntëpën. 21E ja mëti'ipë juuky'ajtëpën mëtëy, myëwinkoontëp ja kujaj kutë'kxën ets yaj'ix yajnijawëty tu'kë'ëyë mëti'ipë tyuuntëpën ijxtëm ja Tios tsokyën.
Ko Juan tnikäjpxy ja Jesús
22Ko jëtu'un tyuunë jyajtë, tääts ja Jesús ojts nyijkx mëët ja y'ijxpëjkpëtëjk Judea y'itjotm, ma ojts wäänë y'ityën ets tyajnëëpejty ja ja'ay. 23Näyjyëtu'un ja Juan ënäty yajnëëpety jam Enón, winkon ma tu'uk ja kajpn txëëwatyën Salim, jä'ä ko ko ënäty jam ja nëë; jamts ja ja'ay ijty nyëjkxtë ets nyëëpätë. 24Jëtu'un tyuunë jyajtë ka'anëm ënäty ja Juan yajtsumnyëm.
25Ojts jënaakën ja Juan ja y'ijxpëjkpë tyajkäjpxykyojtë mëët tu'uk ja jutiis ja'ay wi'ix ja ja'ay nyäyajwa'atsëtëtyën, 26ets ojts tuk'ëwaanëtë ja Juan, ets t'ënëmaaytyë:
Wintsën, ja ja'ay mëti'ipë ënäty mijts jam mëëtën, jam Jordán, mëti'ipë të xynyimëtyä'äkyën tam tyam yajnëëpety ets nimay ja ja'ay jyänty nyiminyë.
27Ets ja Juan y'ënëmaayëtë:
Ka'ap pën tii tmëëtëty pën ka'ap ja Tios të myo'oyë. 28Ojts miits kë'ëm xy'ixtë ko ojts n'ëna'anyës koos ka'ap ëjts nKristëty, je'eyës jëyëjp të nyajkexy. 29Ma ja pëjkën ukën y'ityën, ja ye'etyëjk yë'ë kyë'ë'am'ajtyp ja to'oxytyëjk; ets xoontakp ja pëjkpë ye'etyëjk ja myëku'uk mëti'ipë mëët oy nyämyäyën ko tmëtoy kyäjpxy myëtyä'äky ja pëjkpë ye'etyëjk. Näjyëtu'unës tyam, xoontakpës nyajpaaty ko Jesús ja y'aaw y'ayuk nmëtoowës. 30Yë'ë, ni'ik wyimpäta'any, e ëjts ni'ikyës naxymyëja'any.
Mëti'ipë tso'onpën jam këjxm
31Mëti'ipë tso'onpën jam këjxm, yë'ë tu'kë'ëyë winë nyikopk'ajtääpy. Mëti'ipë naaxwiinyën, naaxwiiny je'eyë tyuny, ets yi'iyë nyimëtyäkpy yaapë naaxwiinyën. E mëti'ipë tso'onpën tsajpjotm, yë'ë tu'kë'ëyë winë nyikopk'ajtääpy, 32yë'ë myëtyäkpy mëti'ipë të t'ixy të tmëtoyën, je'eyëp ko ka'ap pën të tkupëky ja tëyajtën mëti'ipë jyanikäjpxypën. 33E pën kyupëjkpy, yë'ë nyikäjpxyp ko Tios tyiyëty jyääntyëty. 34Pën ja Tios të kyexyë, Tios ja y'aaw y'ayuk myëtyäkpy, jä'ä ko Tios ja Jya'awën të tyäky ëmuumtu'ukjot. 35Ja Tios Teety tsyojkpy ja y'u'unk ets tëë tukkë'ëtëjkëtyä'äy mëti'ipë myëët'ajtypyën. 36Pën ja Tios U'unk myëpëjkpy, yë'ë myëët'ajtyp ja juukyajtën xëmëkyëjxmëpë; e mëti'ipë ka'ap tmëpëkyën Tios U'unk, ka'ap tmëët'ata'any ja juukyajtën xëmëkyëjxmëpë, yë'ë y'ëxajëjäämpy ja Tios ja tyiytyu'unën.
Actualmente seleccionado:
Juan 3: QUETZMIXE
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process