Lʉkas 10
10
Yesʉs lé elomo ompʉn mowʉm tambɛl e l'oba
1Pie tɨ, Da ze pɛh bʉʉ bʉr, tɔɔ mowʉm tambɛl [e l'oba], ntɔʼ cen be zi dolo oba oba. Bé ntɔʼ to bɨnkana e bɨnkana byɛh, é bɨfum bibyɛh nye a be ó, nye kuma ɛ. 2No ó nye a lɛɛ e be ó: «Mode, mé mu ó si bul tɨ é bɨpeme. Sa gwar, bʉr o to é mɨngol ɨ, bé abuo. No ó, saʼ ga Mʉr peme mɨnjwɨʼla ó, nye loma osyɛl o mosa é buobuo, lé eto é mɨngol é peme ye. 3Toʼ ga. Paʼ bee: mɨ lomo bɨn mpʉ bwa o bɨntœme teme onkœœ. 4Anʉa ga mɨmpɨʼ bɨmɔn, nkʉ myah, nkʉ opia be osilpah oba. Abara ga e mʉr temezi.
5«Mbɛr wiwɛh bɨn bé óni ɨ, lɛŋɨ ga e bʉr o mbɛr waa ó: “Motala, mé swɨŋɨ é bɨn!” 6ǃƗ mʉr motala si nyin é mbɛr waa nɛʼɛ, motala mɨn, mé liʼɨ é sama yɔɔ é jɔʼ bɨn bé ólaa, to e. Yé be ó, yé abe e mʉr motala tɨʼ nɛʼɛ, motala mɨn maa, mé óbula ze kœb bɨn. 7É jɔʼ yiyɛh bɨn bé óniŋlɔ ɨ modwii mo nuu mʉr ɨ, diʼe ga tɨ. Dɨʼe de ga sa bʉr o tɨ, bé ódwe-dwe bɨn ɨ, ebe, syɛl mosa, nye ejala le edweŋɔ myɛna me. Ato le epomo ga mɨmbɛr e mɨmbɛr myɛh.
8«ǃBɨn si ni é nkana fih nkana kɛ̀l, kœb ó, bé egʉa bɨlan e bɨn nɛʼɛ, bɨn bé à de mɨmbi mode mɨmɛh mé ódweŋɔ bɨn tɨʼ ɨ. 9Tiʼɨ ga mɨsyoblʉ mɨ nkana yaa. Bɨn bé à lɛɛ bʉr o nkana yaa ó: “Jɔʼ Zyɛm ócyel jwɨ̀ʼa ye cyecye e, yé mu ó kunokuno le epyal ɔɔ!” 10ǃBɨn si pyal é yʉʉ nkana, bʉr o tɨʼ l'abɨlan e bɨn nɛʼɛ, toʼ ga é mɨmpaʼa mɨ tɨ. Bɨn bé à lɛɛ ó: 11“Mbe ga: é mpʉʼ ó bɨh lé etɨ koho dih ɨ! Gʉŋa ga yɛɛ ó, jɔʼ Zyɛm ócyel jwɨ̀ʼa ye cyecye e, yé mu ó kunokuno le epyal.” 12Ebe no ó me lé egʉa kʉ lɛɛ bɨn ó, é dobo laa, bʉr o Sodɔm, bé aŋa bul kabɔ bɨntɨʼa mpʉ bʉr o kwar waa. Me elɛɛ bɨn ó nɛɛ: é dobo le etiʼ e mɨlɔb, bɨntɨʼa byɔɔ, byé óbul bwaʼ, laa byaa bɨ bʉr o Sodɔm.»
Bʉr o ndɨ ebene Yesʉs ɨ
(Mataos 11.20)
13«A vwaʼ e bɨn, bʉr o Korazin. A vwaʼ e bɨn, bʉr o Betsɛda. Nkʉ mosima me a sa bɨn ye e, mé a be ó be, syɛɛ é bɨnkana bɨ Tir e Sidɔn nɛʼɛ, mpa bʉr o tɨ, bé a di ó si é bɨbwah, bé osi kʉba mɨnkura é monyʉl mɔɔ, le elama mofii lé elɛʼle ó, bɨ gwɨma mobebe mɔɔ, le edwir mɨleme. 14Ebe no ó me lé egʉa kʉ lɛɛ bɨn ó, é dobo le etiʼ e mɨlɔb, bʉr o Tir e Sidɔn, bé aŋa bul kabɔ bɨntɨʼa mpʉ bɨn.
15«A gwɔɔ, Kapernaʉm, zê go óbɨnɔ, to pyal pyala é jobo kʉ ɛ? Tɨtoʼo! Go ófilɔ si, to pyal kwar odwè!» 16Nye ze lɛɛ e l'ompʉn be ó: «Mʉr lé ejoʼo bɨn ɨ, nyi joʼo me. Waa lé ebene bɨn ɨ, nyi bene nteme me. Nteme, waa lé ebene me e, nyi bene mʉr a ntɨh me e.»
Mpula ompʉn mo Yesʉs
(Mataos 11.25)
17Ompʉn mowʉm tambɛl [e l'oba] baa, mpula bé a bula ɛ, bɨsʉhʉ, byé a be ó be é mɨleme lwɨŋla. Bé ó: «Da, dam pa be moleme, mé esa bɨh mojoʼo é jɔʼ bɨh lé edwih me é die lo e!» 18Yesʉs ntɔʼ lɛɛ e be ó: «Me a si bee Satan lé eduho é jobo kʉ, ze e kam kaʼ si é kum, kʉ be mpʉ ndweh mpie. 19Mbe ga: me a si dwe bɨn nkul mojwɨ̀ʼa é l'efu ó, bɨn tiba onyʉa ndwe e bɨkʉʼlɨl, le nkul ó, bɨn ntaŋa monkul mo Mʉr dɔm ga wina mɨmɛh. Sa ebebe, yé abe e nkul epyal bɨn. 20Sa gwar, abul soho ga ebe bɨbɨbla mɨsisim, byé esa bɨn mojoʼo. Kʉ bul soho ga yɛɛ njɨ, ebe, mie mɨn, mé mu ó mɨtila é jobo kʉ.»
21É jɔʼ gwar yaa, Mbɨambɨa Sisim ze loŋlo leme mo Yesʉs e bɨsʉhʉ. No ó nye a lɛɛ ó: «Da, me edwiibɨ go, gwɔɔ Njwɨɨ kʉ e si, ebe, go a be ó si lɛʼle bʉr o ndɨ mpʉ bwɔɔncyom ɨ, bɨsa go a fol mɨcɨcyoo e l'ogwɨa o si nwaʼ ɛ. Da, yé ó no! Me ekʉ dwiibɨ go, ebe, go a bɛa tiʼe é leme go ó, yé syɛŋɨ no.
22«Sɔŋ wam a si dwe me bɨsa bibyɛh. Abe e mʉr lé egʉa Mwan mo Zyɛm, pɛʼ njɨ Zyɛm Sɔŋ nye ome. Abe e mʉr ndɨ egʉa Zyɛm Sɔŋ, pɛʼ njɨ Mwan mo Zyɛm ndwe e baa Mwan lé ekpɛl lɛʼle e.» 23Yesʉs ntɔʼ lɛɛ e l'ompʉn be, bé mu bé ome ó: «Bɨn bɛɛ, mocyɛʼ mo mpom, mé e bɨn, ebe, mih mɨn, mé ebee bɨsa bɨn lé ebee bɨnɨ. 24Me elɛɛ bɨn ó nɛɛ, buobuo ogwiha o mɨlɔb ndwe e mɨnjwɨɨbʉr, bé a gwɨm-gwɨm ó, bé beŋɨ sa bɨn lé ebee e, sa gwar, abee, le ejoʼo sa bɨn lé ejoʼo e, sa gwar, ajoʼo ye.»
Etie lé elaa motie mɨmɛh ɛ
(Mataos 22.34; Markus 12.28)
25Nuu yeʼle motie ze mʉa si, ze boblo Yesʉs. Nye ze dî e nye ó: «Yeʼle, me saʼ wáa mbi sɔʼɔ é l'efu ó, me biʼe tiʼ molu mo mpoʼ mɨmɛh ɛ?» 26Yesʉs ze bɨha ó: «Yé tila é motie mo Moyiz nyá ɛ? Go ejoʼo yé tɨ?» 27Mʉr waa ntɔʼ bɨha ó: «Yé ó tila ó: “Kpɛlɨ Sɔŋ go Da Zyɛm e leme go wiwɛh, e sisim go wiwɛh, ndwe e nkul go nyiwɛh, le pɨʼ go nyiwɛh#10.27 Dwɛʼa Motie 6.5..” Yé ó tila nteme ó: “Kpɛlɨ mɨɔ go mʉr mpʉ go lé ekpɛl go mʉr tɨʼ ɨ#10.27 Dwɛʼa Mɨtiila 19.18..”»
28Yesʉs ntɔʼ lɛɛ ó: «Eee, gɨ kʉ gʉa bɨha. Saʼ no, go nkʉʼ bi tiʼ molu mo mpoʼ mɨmɛh!»
Kɨkɛna mʉr ncwɨncwɨa
29To kœb ó, yeʼle waa a be ó lé ejɨ lɛʼle mpʉ nye a be cɨcyel mʉr ɨ. Nye ntɔʼ dî e Yesʉs ó: «A mɨɔ wam mʉr, nye zé?» 30Yesʉs ntɔʼ lɛɛ ó: «Yé a ze be ó, mʉr ze mʉa Yerʉsalɛm, ze taare cyen lé eto Yeriko. Nye dina temezi nɛʼɛ, nyi ze kwɨa é l'eboʼo e bɨzilngan. Bɨzilngan nyaba nye é nyʉl, ferɔ nye mɨkan, bîŋɔ nye, é bîŋɔ bîŋɔ, liʼɔ nye tina si, nye mu tiʼ le efie. 31No ó, nuu para a be ó lé ecwɨɨ é zi ngwar waa é bɨfuuba, ka to kœb nye tɨʼ si. Mbea nye a bee mʉr nɨ ɨ, nye ntɔʼ syɛhle, ntaa é lʉʉ empàh e zi, acyɛb, lé elaa nye é pɨnʉ. 32Jwɨʼ gwar e gwar yaa, é jɔʼ mʉr eveh mo Levi a pyal tɨ, dwɛʼ mʉr waa ɛ, nye nteme a kʉ kpah ó kpah kpaha é lʉʉ empàh e zi. 33No ó, yé a ka ze be ó, nuu mʉr Samari a be ó lé ecwɨɨ é zi ngwar waa, nye nteme ze pyal é gumo yaa. Mbea nye a bee mʉr waa ɛ, nye kʉ ze jwɨʼ nye nkoo, 34dihle kunokuno e nye, sʉ nye monwoʼ mo rezɛŋ le mulo é mopɨɨ, jyɛl me e mɨmyɔʼ. Nye ze byɛɛre mʉr waa, kɛl nye é jakah nye mʉr tɨʼ a kable-kable e, ntɔʼ to e nye, to jyɛʼ nye é duo é guu mbɛr ojyoo. Bé e nɔɔ ntɔʼ di ba sama, mʉr Samari lé etʉŋ nye. 35Jaŋɔ si. É mɛn tɨ, nye ntɔʼ nʉa mɨsaŋ mɨ odenie mɨmba, dwe mʉr mbɛr. Nye e nye ó: “Gʉa tʉŋ nye é modila mam. É jɔʼ me óbula ɛ, me óbuulo go bim yé óbɛm kable kʉ é sa yiyɛh go ódimle lé etʉŋ nye e.”»
36Yesʉs ntɔʼ dî e yeʼle motie waa ó: «É bʉr olɛl bé a bee mʉr a kwɨa é l'eboʼo e bɨzilngan ɨ, waa wáa a lɛʼle ó, nye ó mɨɔ we mʉr ɨ? Go ebee é yé?» 37Yeʼle motie ntɔʼ lɛɛ ó: «Waa a jwɨʼ nye nkoo e.» Yesʉs ntɔʼ lɛɛ e nye ó: «Eee. Gwɔɔ toʼ, to sa jwɨʼ gwar yaa.»
Yesʉs lé eto bee Marta bé e Maaria
38É mpʉ Yesʉs bé e l'ompʉn be, bé a be lé ekœʼ é nuu zi ɨ, bé ze pyal é nuu kwar. Nuu mʉma a be ó tɨ, die le Marta. Nye ntɔʼ soho nye, bɨlan e nye. 39No ó, Marta waa a be nteme ó e ncyom we, die le Maaria. Mpʉ Da a be lé elwib ɨ, Maaria waa a be ó ndindil kunokuno e mokʉ me, lé ejoʼlo sa nye a lɛɛ-lɛɛ ɛ. 40Marta nyɛɛ a be ó lé eluhba e bɨsyɛɛ é buobuo. Nye ze pyal gumo Yesʉs a be e. Nye e nye ó: «Da! Zê go ayeʼbe ba syɛɛ me mu lé esa me ome é jɔʼ ncyomam lé entwiŋ me e ye e? Lɛŋɨ nye ó, nye ntaʼ, ze kœb me é syɛɛ.» 41Da ntɔʼ bɨha e nye ó: «Marta, Marta! Gwɔɔ, go eyeʼbe bɨsɔʼɔ é buobuo. Byé ebul pebre go é leme. 42Sa ndɨ ekʉ jala ɛ, yé ó mbɨambɨa nkɔb Maaria pɛh ɛ. Abe e mʉr ópɛʼ nye nya.»
Actualmente seleccionado:
Lʉkas 10: ozmBad
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2002, Wycliffe Bible Translators, Inc. All rights reserved.
Lʉkas 10
10
Yesʉs lé elomo ompʉn mowʉm tambɛl e l'oba
1Pie tɨ, Da ze pɛh bʉʉ bʉr, tɔɔ mowʉm tambɛl [e l'oba], ntɔʼ cen be zi dolo oba oba. Bé ntɔʼ to bɨnkana e bɨnkana byɛh, é bɨfum bibyɛh nye a be ó, nye kuma ɛ. 2No ó nye a lɛɛ e be ó: «Mode, mé mu ó si bul tɨ é bɨpeme. Sa gwar, bʉr o to é mɨngol ɨ, bé abuo. No ó, saʼ ga Mʉr peme mɨnjwɨʼla ó, nye loma osyɛl o mosa é buobuo, lé eto é mɨngol é peme ye. 3Toʼ ga. Paʼ bee: mɨ lomo bɨn mpʉ bwa o bɨntœme teme onkœœ. 4Anʉa ga mɨmpɨʼ bɨmɔn, nkʉ myah, nkʉ opia be osilpah oba. Abara ga e mʉr temezi.
5«Mbɛr wiwɛh bɨn bé óni ɨ, lɛŋɨ ga e bʉr o mbɛr waa ó: “Motala, mé swɨŋɨ é bɨn!” 6ǃƗ mʉr motala si nyin é mbɛr waa nɛʼɛ, motala mɨn, mé liʼɨ é sama yɔɔ é jɔʼ bɨn bé ólaa, to e. Yé be ó, yé abe e mʉr motala tɨʼ nɛʼɛ, motala mɨn maa, mé óbula ze kœb bɨn. 7É jɔʼ yiyɛh bɨn bé óniŋlɔ ɨ modwii mo nuu mʉr ɨ, diʼe ga tɨ. Dɨʼe de ga sa bʉr o tɨ, bé ódwe-dwe bɨn ɨ, ebe, syɛl mosa, nye ejala le edweŋɔ myɛna me. Ato le epomo ga mɨmbɛr e mɨmbɛr myɛh.
8«ǃBɨn si ni é nkana fih nkana kɛ̀l, kœb ó, bé egʉa bɨlan e bɨn nɛʼɛ, bɨn bé à de mɨmbi mode mɨmɛh mé ódweŋɔ bɨn tɨʼ ɨ. 9Tiʼɨ ga mɨsyoblʉ mɨ nkana yaa. Bɨn bé à lɛɛ bʉr o nkana yaa ó: “Jɔʼ Zyɛm ócyel jwɨ̀ʼa ye cyecye e, yé mu ó kunokuno le epyal ɔɔ!” 10ǃBɨn si pyal é yʉʉ nkana, bʉr o tɨʼ l'abɨlan e bɨn nɛʼɛ, toʼ ga é mɨmpaʼa mɨ tɨ. Bɨn bé à lɛɛ ó: 11“Mbe ga: é mpʉʼ ó bɨh lé etɨ koho dih ɨ! Gʉŋa ga yɛɛ ó, jɔʼ Zyɛm ócyel jwɨ̀ʼa ye cyecye e, yé mu ó kunokuno le epyal.” 12Ebe no ó me lé egʉa kʉ lɛɛ bɨn ó, é dobo laa, bʉr o Sodɔm, bé aŋa bul kabɔ bɨntɨʼa mpʉ bʉr o kwar waa. Me elɛɛ bɨn ó nɛɛ: é dobo le etiʼ e mɨlɔb, bɨntɨʼa byɔɔ, byé óbul bwaʼ, laa byaa bɨ bʉr o Sodɔm.»
Bʉr o ndɨ ebene Yesʉs ɨ
(Mataos 11.20)
13«A vwaʼ e bɨn, bʉr o Korazin. A vwaʼ e bɨn, bʉr o Betsɛda. Nkʉ mosima me a sa bɨn ye e, mé a be ó be, syɛɛ é bɨnkana bɨ Tir e Sidɔn nɛʼɛ, mpa bʉr o tɨ, bé a di ó si é bɨbwah, bé osi kʉba mɨnkura é monyʉl mɔɔ, le elama mofii lé elɛʼle ó, bɨ gwɨma mobebe mɔɔ, le edwir mɨleme. 14Ebe no ó me lé egʉa kʉ lɛɛ bɨn ó, é dobo le etiʼ e mɨlɔb, bʉr o Tir e Sidɔn, bé aŋa bul kabɔ bɨntɨʼa mpʉ bɨn.
15«A gwɔɔ, Kapernaʉm, zê go óbɨnɔ, to pyal pyala é jobo kʉ ɛ? Tɨtoʼo! Go ófilɔ si, to pyal kwar odwè!» 16Nye ze lɛɛ e l'ompʉn be ó: «Mʉr lé ejoʼo bɨn ɨ, nyi joʼo me. Waa lé ebene bɨn ɨ, nyi bene nteme me. Nteme, waa lé ebene me e, nyi bene mʉr a ntɨh me e.»
Mpula ompʉn mo Yesʉs
(Mataos 11.25)
17Ompʉn mowʉm tambɛl [e l'oba] baa, mpula bé a bula ɛ, bɨsʉhʉ, byé a be ó be é mɨleme lwɨŋla. Bé ó: «Da, dam pa be moleme, mé esa bɨh mojoʼo é jɔʼ bɨh lé edwih me é die lo e!» 18Yesʉs ntɔʼ lɛɛ e be ó: «Me a si bee Satan lé eduho é jobo kʉ, ze e kam kaʼ si é kum, kʉ be mpʉ ndweh mpie. 19Mbe ga: me a si dwe bɨn nkul mojwɨ̀ʼa é l'efu ó, bɨn tiba onyʉa ndwe e bɨkʉʼlɨl, le nkul ó, bɨn ntaŋa monkul mo Mʉr dɔm ga wina mɨmɛh. Sa ebebe, yé abe e nkul epyal bɨn. 20Sa gwar, abul soho ga ebe bɨbɨbla mɨsisim, byé esa bɨn mojoʼo. Kʉ bul soho ga yɛɛ njɨ, ebe, mie mɨn, mé mu ó mɨtila é jobo kʉ.»
21É jɔʼ gwar yaa, Mbɨambɨa Sisim ze loŋlo leme mo Yesʉs e bɨsʉhʉ. No ó nye a lɛɛ ó: «Da, me edwiibɨ go, gwɔɔ Njwɨɨ kʉ e si, ebe, go a be ó si lɛʼle bʉr o ndɨ mpʉ bwɔɔncyom ɨ, bɨsa go a fol mɨcɨcyoo e l'ogwɨa o si nwaʼ ɛ. Da, yé ó no! Me ekʉ dwiibɨ go, ebe, go a bɛa tiʼe é leme go ó, yé syɛŋɨ no.
22«Sɔŋ wam a si dwe me bɨsa bibyɛh. Abe e mʉr lé egʉa Mwan mo Zyɛm, pɛʼ njɨ Zyɛm Sɔŋ nye ome. Abe e mʉr ndɨ egʉa Zyɛm Sɔŋ, pɛʼ njɨ Mwan mo Zyɛm ndwe e baa Mwan lé ekpɛl lɛʼle e.» 23Yesʉs ntɔʼ lɛɛ e l'ompʉn be, bé mu bé ome ó: «Bɨn bɛɛ, mocyɛʼ mo mpom, mé e bɨn, ebe, mih mɨn, mé ebee bɨsa bɨn lé ebee bɨnɨ. 24Me elɛɛ bɨn ó nɛɛ, buobuo ogwiha o mɨlɔb ndwe e mɨnjwɨɨbʉr, bé a gwɨm-gwɨm ó, bé beŋɨ sa bɨn lé ebee e, sa gwar, abee, le ejoʼo sa bɨn lé ejoʼo e, sa gwar, ajoʼo ye.»
Etie lé elaa motie mɨmɛh ɛ
(Mataos 22.34; Markus 12.28)
25Nuu yeʼle motie ze mʉa si, ze boblo Yesʉs. Nye ze dî e nye ó: «Yeʼle, me saʼ wáa mbi sɔʼɔ é l'efu ó, me biʼe tiʼ molu mo mpoʼ mɨmɛh ɛ?» 26Yesʉs ze bɨha ó: «Yé tila é motie mo Moyiz nyá ɛ? Go ejoʼo yé tɨ?» 27Mʉr waa ntɔʼ bɨha ó: «Yé ó tila ó: “Kpɛlɨ Sɔŋ go Da Zyɛm e leme go wiwɛh, e sisim go wiwɛh, ndwe e nkul go nyiwɛh, le pɨʼ go nyiwɛh#10.27 Dwɛʼa Motie 6.5..” Yé ó tila nteme ó: “Kpɛlɨ mɨɔ go mʉr mpʉ go lé ekpɛl go mʉr tɨʼ ɨ#10.27 Dwɛʼa Mɨtiila 19.18..”»
28Yesʉs ntɔʼ lɛɛ ó: «Eee, gɨ kʉ gʉa bɨha. Saʼ no, go nkʉʼ bi tiʼ molu mo mpoʼ mɨmɛh!»
Kɨkɛna mʉr ncwɨncwɨa
29To kœb ó, yeʼle waa a be ó lé ejɨ lɛʼle mpʉ nye a be cɨcyel mʉr ɨ. Nye ntɔʼ dî e Yesʉs ó: «A mɨɔ wam mʉr, nye zé?» 30Yesʉs ntɔʼ lɛɛ ó: «Yé a ze be ó, mʉr ze mʉa Yerʉsalɛm, ze taare cyen lé eto Yeriko. Nye dina temezi nɛʼɛ, nyi ze kwɨa é l'eboʼo e bɨzilngan. Bɨzilngan nyaba nye é nyʉl, ferɔ nye mɨkan, bîŋɔ nye, é bîŋɔ bîŋɔ, liʼɔ nye tina si, nye mu tiʼ le efie. 31No ó, nuu para a be ó lé ecwɨɨ é zi ngwar waa é bɨfuuba, ka to kœb nye tɨʼ si. Mbea nye a bee mʉr nɨ ɨ, nye ntɔʼ syɛhle, ntaa é lʉʉ empàh e zi, acyɛb, lé elaa nye é pɨnʉ. 32Jwɨʼ gwar e gwar yaa, é jɔʼ mʉr eveh mo Levi a pyal tɨ, dwɛʼ mʉr waa ɛ, nye nteme a kʉ kpah ó kpah kpaha é lʉʉ empàh e zi. 33No ó, yé a ka ze be ó, nuu mʉr Samari a be ó lé ecwɨɨ é zi ngwar waa, nye nteme ze pyal é gumo yaa. Mbea nye a bee mʉr waa ɛ, nye kʉ ze jwɨʼ nye nkoo, 34dihle kunokuno e nye, sʉ nye monwoʼ mo rezɛŋ le mulo é mopɨɨ, jyɛl me e mɨmyɔʼ. Nye ze byɛɛre mʉr waa, kɛl nye é jakah nye mʉr tɨʼ a kable-kable e, ntɔʼ to e nye, to jyɛʼ nye é duo é guu mbɛr ojyoo. Bé e nɔɔ ntɔʼ di ba sama, mʉr Samari lé etʉŋ nye. 35Jaŋɔ si. É mɛn tɨ, nye ntɔʼ nʉa mɨsaŋ mɨ odenie mɨmba, dwe mʉr mbɛr. Nye e nye ó: “Gʉa tʉŋ nye é modila mam. É jɔʼ me óbula ɛ, me óbuulo go bim yé óbɛm kable kʉ é sa yiyɛh go ódimle lé etʉŋ nye e.”»
36Yesʉs ntɔʼ dî e yeʼle motie waa ó: «É bʉr olɛl bé a bee mʉr a kwɨa é l'eboʼo e bɨzilngan ɨ, waa wáa a lɛʼle ó, nye ó mɨɔ we mʉr ɨ? Go ebee é yé?» 37Yeʼle motie ntɔʼ lɛɛ ó: «Waa a jwɨʼ nye nkoo e.» Yesʉs ntɔʼ lɛɛ e nye ó: «Eee. Gwɔɔ toʼ, to sa jwɨʼ gwar yaa.»
Yesʉs lé eto bee Marta bé e Maaria
38É mpʉ Yesʉs bé e l'ompʉn be, bé a be lé ekœʼ é nuu zi ɨ, bé ze pyal é nuu kwar. Nuu mʉma a be ó tɨ, die le Marta. Nye ntɔʼ soho nye, bɨlan e nye. 39No ó, Marta waa a be nteme ó e ncyom we, die le Maaria. Mpʉ Da a be lé elwib ɨ, Maaria waa a be ó ndindil kunokuno e mokʉ me, lé ejoʼlo sa nye a lɛɛ-lɛɛ ɛ. 40Marta nyɛɛ a be ó lé eluhba e bɨsyɛɛ é buobuo. Nye ze pyal gumo Yesʉs a be e. Nye e nye ó: «Da! Zê go ayeʼbe ba syɛɛ me mu lé esa me ome é jɔʼ ncyomam lé entwiŋ me e ye e? Lɛŋɨ nye ó, nye ntaʼ, ze kœb me é syɛɛ.» 41Da ntɔʼ bɨha e nye ó: «Marta, Marta! Gwɔɔ, go eyeʼbe bɨsɔʼɔ é buobuo. Byé ebul pebre go é leme. 42Sa ndɨ ekʉ jala ɛ, yé ó mbɨambɨa nkɔb Maaria pɛh ɛ. Abe e mʉr ópɛʼ nye nya.»
Actualmente seleccionado:
:
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2002, Wycliffe Bible Translators, Inc. All rights reserved.