Baɗitari 2
2
1Apani antə mdə ku kuri namtə vəi na amtazi ka duniya, ka shanga suayeri na dlama dlama na akwa.
2Akəmata vir na murfəkur Hyel ku kuri kəthlər arni,
antə tsa zhar kəthlər akwa vir na murfəkur.
3Tsuwa Hyel ku vədzə barka aka vir na murfəkur ni,
ka namtə ni tə tsa ndzi ɓɗakkarkara,
kamnyar vir nda antə Hyel zhar kəthlər ar alaktə su.
4Ngəni an labar ata ata ar laku tə vəi na amtazi ka duniya ku alaktədzi akwa.
Mda Akwa Gadina Eden
Sakatə MTHLAKU na Hyel alaktə vəi na amtazi ka duniya, 5su ptsəptsa wala thlali aɗi ptsa akwa mtaku katagu wa, kamnyar MTHLAKU na Hyel aɗi vu ka yimi təra ata di katagu wa, tsuwa mda aɗi na ata kəthlər tsuhwa ata di ni wa. 6Amma yimi ana səɓəla akira di ka tsa ləɓantə shanga kəra di. 7Antə MTHLAKU na Hyel ku kətsə bərbər ata di ka namtə mdə sal kəgari, ka fiu shambar ar mpika akwa kucirari, antə mdə ni ku ndzi ka mpika. 8Antə MTHLAKU na Hyel ku thləkamta hwulfər nfwayeri akwa gadina laga abwar raghəi na ka thləmari Eden, ka vu mdə natə tsa namtə ni akwa gadina ni. 9Antə MTHLAKU na Hyel ku vu tə shanga nfwayeri na ɓɗakɓɗaku aka nca, ka na ɓɗakɓɗaku kamnyar susəma, ata kəma duku ka nfu laga ar vu ka mdə səndə su na ɓɗaku ka su na ɗimi, ku ptsi akwa di ka kəla. 10Tsuwa thlyagha laga aɗi na thlata akwa gadinar Eden ni, na akwa hamta yimi aka gadina ni, anda antə tsa ndəkəidzi ka ndzi thlyagha nfwar. 11Thləma thlyagha na ntangkəma ni an Pishon, tsa an kalaktə shanga tsəɗi Havila, tsəɗi tə mda ana wutə dinar akwa. 12Tsuwa dinar ar tsəɗi ngəni an dinar na ɓɗakari. Tsuwa mda ana wutə sur shiwura na msəra tə mda ana kəga bdelliyum ka pelayeri ar dəɓa tə mda ana kəga oniks anda. 13Thləma thlyagha na suɗkur an Gihon, tsa an kalaktə shanga tsəɗi Kush. 14Thləma thlyagha na makərkur ni an Tigris, tsa an akwa hwi təbwar raghəi ar tsəɗi Assiriya. Tsuwa thləma thlyagha na nfwarkur ni an Yufiretis.
15MTHLAKU na Hyel ku kətə mdə ni ka vu ni akwa Gadinar Eden ka tsa tsuhwa akwa, ka tsuwa ka tsa wulwula ni. 16Antə MTHLAKU na Hyel tsawa aka mdə ni abbər, “Ga ata mzhi səm kəlara yar nfwa na akwa gadina ni. 17Amma nfur səndə su na ɓɗaku ka su na ɗimi ni, ga aɗiya səm wa, kamnyar ma vir tə ga ku səm yarni ni, ga ata mta.”
18Antə MTHLAKU na Hyel pəla abbər, “Aɗi kalkal ka mdə ni ndzi shini wa, I ata namta alari mdər dlara na ata ndzi kalkal alari.” 19Apani antə MTHLAKU na Hyel ku kətsə bərbər ata di ka namtə shanga mwaɓiyayeri na akwa mtaku ka shanga ɗikayeri na ata kutahyel kəgari. Antə tsa səntə ɗa aka mdə ni ka tsa wutə jili thləm tə mdə ni ata hamtari aka kəlara akwa nca ɗa. Tsuwa kəlara thləm tə mdə ni ku kəga kəlara su na ka mpikə ni kəgari, apani antə thləma su ni ata ndzəndzi. 20Antə mdə ni ku vətə thləm aka shanga mwaɓiyayeri ar kəi, ka shanga ɗikayeri na ata kutahyel, ka shanga mwaɓiyayeri na akwa mtaku. Amma ar mdə ni, tsa aɗi wutə mdər dlara na kalkal alari wa. 21Antə MTHLAKU na Hyel ku vu tə henər mta ku famta mdə ni. Sakatə tsa akwa heni antə Hyel ku kəɓəla pal akwa nca ɗethlayeri ar thlimbəlari, ka dzəɓtə vəyari ka kum. 22Antə ɗethlər thlimbəl tə tsa kəɓəla ni, tsa namtə mdə mwala kəgari, ka səntə ni aka mdə ni. 23Antə mdə ni pəla,
“Yauwa! Kulini ja antə dludzərna ku wutədzi,
tsa an ɗethlu na səɓəla akwa ɗethlər dzi,
ka tsuwa kum na səɓəla akwa kumər dzi!
Antə mda ata kəga ni mwala,
kamnyar akwa dza mdə sal antə mdə kəɓəla ni.”
24Kamnyar ngəni antə mdə sal ata zhar baba'ni ka mama'ni, ka tsa bartə mwalankiɗa antə da ata ndzi su duku.
25Antə sal ni ka mwalankiɗa japwa ɗa dura, amma da aɗi akwa səli nvwadzi wa.
Actualmente seleccionado:
Baɗitari 2: KNB
Destacar
Compartir
Copiar
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fes-ES.png&w=128&q=75)
¿Quieres tener guardados todos tus destacados en todos tus dispositivos? Regístrate o inicia sesión
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.