Mɑtʉ̈ɔ Mɛtú-nu
Mɛtú-nu
Mɑtʉ̈ɔ kɑ pɔ́ ŋu nǔu ɡɑŋku-Yɛ́su tsɔ̌ppɑ́ nɛ́ nɛɡɛ́m. Mɑtʉ̈ɔ kɑ pɔ́ ńtsuŋ ŋ́ŋwɑꞋnɛ mɛnu mbíꞋ pɔ pɑyúdɑ. Yɛ́tɛ́ kɑ ɡɛnɛ lɑ ɑ pɛn ḿbɛn nǔu mɛnu mi ɛ́ tsɛt ndwɛn kɑɑ, ńdɔk ńnyɛt pɑ́Ꞌ pɛ́ kɑ lɛɛnɛ tɛ ḿbí Yɛ́su, mîmɑ́ mɛnu puutɛ. Nu nɛfɔɔ-Sɛ́ tsɛt ŋwɑꞋnɛ ɛ̂yɑ́ ḿbɔ́ yúu tʉʉndɛn tɛꞋ. Yɛ́su Fɔɔ ɛ̂wɑ́ wi pɛ́ kɑ pɔ́ ńzẅíꞋlɛ. Pɛ́ fúŋ wɛ́ ŋɡɔ ŋu nǔu njẅɛt-fɔɔ Ndɑvît. Mɑtʉ̈ɔ piitɛ ńcú nu nǔu pɑ́Ꞌ pɛ́ kɑ pínɛ Yɛ́su, ḿbɛn ńdɛꞋlɛ pɑ́Ꞌ Yɛ́su kɑ pɔ́nɛ mɔ́ɔ. Ḿbɑ́ɑtɛ ḿbɛn ńnyɛt ŋɡɔ ɑ Fɔɔ wi ɑ kɑ tɔ́nɛ ŋ́ɡɑ́ luk-pʉɔmɛsɔŋ (Mɑtʉ̈ɔ 1–2) Mɑtʉ̈ɔ kɑ pɛn ńnyɛt pɑ́Ꞌ Jɑ̂ŋ Bɑptíshi kɑ níꞋnɛ ŋki tú-Yɛ́su, Sɑ́ttɑ pɛn ŋ́kwɑꞋnɛ wɛ́ (pɑk 3.1–4.11). Ɛ́ lɛɛ pɔ́Ꞌɔ Mɑtʉ̈ɔ nyɛt yúu mi Yɛ́su kɑ ɡɛnɛ tsɛt pɑk-ŋɡɔŋ-Ŋɡɑlilɛ́ɛ, ɑ sɑ́Ꞌ Ŋkʉʉ Sʉ́Ꞌnɛ-Sɛ́, ńzíꞋ pʉɔ nǔu pɑ́Ꞌ nu-nɛfɔɔ-Sɛ́ pɔ́nɛ, ŋ́ɡɛ ɡɑŋɡɔɔ fíitɛ (pɑk 4.12–18.35). Mɑtʉ̈ɔ pɛn ńnyɛt pɑ́Ꞌ Yɛ́su kɑ ɡʉnɛ Yɛlúsɑlɛm ńzíꞋ yúu pɔ́Ꞌɔ (pɑk 19–25) ŋ́ɡɔ́ ḿmɛkŋɛ ńcú pɑ́Ꞌ pɑsɑ́Ꞌlɑ́Ꞌ-pɑyúdɑ kɑ ɡẅɛɛnɛ Yɛ́su pɔ́Ꞌɔ mbɑ pɑ́Ꞌ pɔ́p kɑ fɛnnɛ wɛ́ mbɔ̌ ŋɡɔmnɑɑ-Pɑlɔ́mɑ pɛ́ ŋɑk wɛ́. Ḿbɛn ńnyɛt pɑ́Ꞌ pɛ́ kɑ kẅiinɛ wɛ́ nǔu tʉ́ mbɑ́ŋtɛ pɑ́ŋtɛ́nɛ mbɑ pɑ́Ꞌ ɑ kɑ zẅíimɛ́nɛ nǔu nɛvú. Ɛ́ tsɛt ŋwɑꞋnɛ-Mɑtʉ̈ɔ mbɔ ɑ cúꞋlɛ mɛnu mi Yɛ́su kɑ zíꞋnɛ nǔu pɑk pɛ́tɑɑ:
1. Ńnyɛt pɑ́Ꞌ pʉɔ pi pɔ́p ɡʉ ŋ́kúu nǔu nɛfɔɔ-Sɛ́ ɡẅɛɛnɛ nɛnɛn pɔ́Ꞌɔ (pɑk 5–7).
2. A ɡɑ́ ntík mbɔ̌ pʉɔ pi pɔ́p ɡʉ ɛ́sɑ́Ꞌ nu-nɛfɔɔ-Sɛ́ (pɑk 10).
3. A lɔk mɛnu sɑɑmbɑ́ ńdɔk ńzíꞋ pʉɔ pɑ́Ꞌ nu-nɛfɔɔ-Sɛ́ yi ɛ́ kɑ pɔ́ yi lʉɔmɛ́nɛ tɔ́ mɔ́ tɛ pɛ́ pɔ́ ńdɔk mík ńjʉ́ɔ (pɑk 13).
4. Ńnyɛt pɑ́Ꞌ pʉɔ pɔ́p ɡẅɛɛnɛ nu nǔu nu-nɛfɔɔ-Sɛ́ ɡʉ ńnɛn pɔ́Ꞌɔ. (Pɑk 18).
5. Ńnyɛt wɛkŋɛ nɛsʉk ńzẅíꞋlɛ ŋkɑ́ yi nu-nɛfɔɔ-Sɛ́ ńdɑ́Ꞌ sɑ́ɑnɛ sɑ́ɑnɛ́nɛ ńcẅɛt mɑ́ntɑ́ɑ, pɑ́Ꞌ Yɛ́su ńdɑ́Ꞌ ńtɔ́ ŋ́ŋɑk pʉɔ (pɑk 24–25).
Actualmente seleccionado:
Mɑtʉ̈ɔ Mɛtú-nu: JGO
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
CABTAL, 2017