Saint Matthieu 11
11
1Da baï mi gui mahana ka on, ko̱ Jésus mi sa bi njaka njou‐séna bong nèli botoulè‐séré o̱tou, kè ourou an ndourou baï to̱ko̱nafèn da sa mboura an bil pou klili.
2Da ko̱ Jean mi pane bil jo̱jo̱ kè la baï toul bong pina a Christ, kè pi njou‐séna bong nèli, 3ka sa hi nè: Mo mini ko̱ mi gui, maléba name voro njoukou aféké lé? 4Da Jésus mi féré sa, ka sa hi kli: Oui sé fèn baï ka sa hi Jean fènli on bon ko̱ ouime la da ko̱: 5njou‐foukoura nondi mi ko̱ guèl, da njou‐komoron ka bo̱ko̱ kli mi sé siya, mona njou‐ndo̱wèli mi gui tang ta, da njou‐chomna soukouli mi la baï, da houli mi tome, kli sa mboura bèlabaï hi foïna njoukouli. 6Jangnandaï ba baï a kè on ko̱ mè tane ti ba fèn bèna jing nè ya.
7Da ko̱ klime yé tana, Jésus tissaon sana baï toula Jean hi ro̱kè njoukouli. Oui sé woropa baï ko̱na ba fèn lé? Kona pakala ko̱ koukouna mi lang rou lé? 8Da oui sé baï ko̱na ba fèn lé? Baï ko̱na njoukou on ko̱ mi bou bèla la lé? Oui ko̱ kli ko̱ mi bou bèla lali makaou ba voula a nanjoukaouli. 9Oui sé baï ko̱na ba fèn lé? Baï ko̱na prophète lé? Babaï, mi mè sa hi oui, kè ta toula prophète nyèta. 10Kè mini on, mahana ko̱ mi dé baï toulè:
Oui ko̱, mè pi njou‐mboro‐pina ni ti dambèl an mono,
Ko̱ ma mosso domboro no dambèl hi mo.
11Babaï, mi mè sa hi oui, an woro kli on bon ko̱ waïnli mi mboung, hana mbéo tane ga ta toula Jean‐Baptiste ya. Da kè on ko̱ ba bètèrè goune an bilkaou a nonkala mi ta nè. 12Da ka name a Jean‐Baptiste bo̱l tèn kassénaï kli ba bilkaou a nonkala ndo̱t, da kli ko̱ njèrèn ta sé rou ka njèran. 13Baï ko prophèteli bon da guingna to̱ko̱ bong njaka Ouone bi kala bo̱l tèn Jean. 14Da tokoré ouime ji lana baï on, kè on ba Élie ko̱ ma gui o̱. 15Kè on ko̱ soukè mi outa dadaon an kème la.
16Da mono, mè ma to̱ko̱ mborokè ko̱ mèran njoukouli ka sakanaï on mi mahana ka fèn lé? Kli mahana ka goundi on ko̱ kaou guèl zénacho̱ko̱, da di ndo̱ko̱ba klili, 17ka sa: Na oul tèou hi oui, da oui tane ga ndandaï ya; da na di sing léou da oui tane ga di sing léou ya. 18Baï ko̱ Jean mi ti gui dambèl, kè son fèn ka njo fèn ya, da kli sa: Zabolo mana bilè. 19Da Goune a njoukou mi gui kè son fèn ka njo, da kli sa: Oui ko̱ njoukou aïn ko̱ son laka ta, da njo vin ta, ka ba bako̱la jing njou‐mangna l’impôtli da njou‐bèkèfènli. Pina a cho̱kna bon sa baï toul cho̱kna ko̱ mi na guédék.
20Da on, kè tissaon baï bana baï hi njou‐pouli, guèl ko̱ kème nding njèran pinali an ndourou, baï ko̱ klime tane ga hèkè békéfèn akli ya. 21Go̱ro̱ séta mi ba baï no pou Chorazin! go̱ro̱ séta mi ba baï no pou Bethsaïda! baï ko̱, tokoré njèran pina mi nding an bil Tyr da Sidon mahana ko̱ mi nding an bil baï, kli hèkè békéfèn akli jinguèl soko, ka bou la saki da kaou bil choukou. 22Da ami, mè sa hi oui, mono yé barabaï ma lé toul baï nyèta ta toul barabaï a pou Tyr da Sidon, ka name walabaï. 23Da mo Capernaüm, ling‐o̱ ma ti bo̱l tèn nonkala lé? Haï, yé mome diri sé guè tiya guè guèl kaouna a houlkèli; baï ko̱, tokoré njèran pinali mi nding an bil pou Sodome mahana ko̱ mi nding an bilo̱, yé on kaou bo̱l tèn kassénaï. 24Da ami, mè sa hi oui, yé barabaï ma lé toulo̱ nyèta ta toul barabaï a koukoula a Sodome, ka name walabaï.
25Ka name o̱kèo̱ Jésus mi féré sa, ka sa: Mè jone mo, O Baba, Nanjou an nonkala da an koukoula, ko̱ mo mou fèn aïnli jing cho̱kna njoukouli tèn kli on ko̱ tou fèn ta, da mo to̱ko̱ saonkè hi ba joï goundi. 26Babaï, Baba, mè jone mo toul fèn on ko̱ mome ko̱ bèl mono ta. 27Baba ni hi fènli bon bi ndo̱ko̱ ni tou, da njoukouna mbéo mi tane tou Goune ya bo̱l ba Baba fènè, maléba tane ga tou Baba ya bo̱l ba Goune fènè, da kè on ko̱ Goune fènè mi ji baï to̱ko̱na nè hi nè.
28Oui gui moni, oui bon ko̱ tan ta jing pina abaï, da ko̱ hola abaï mi ta toul baï, da mè ma hi yanatana hi oui. 29Oui bi hola gnana bi hana ni bi toul baï, da ya sanamboura ni, baï ko̱ mè nding fèn vomboï, da go̱ro̱ ni kaou lome; da laou baï ma nza mborokè baï yana tana nè. 30Baï ko̱ hola gnana bi hana ni tane laï ya, da hola ni mi tane ji ya.
Actualmente seleccionado:
Saint Matthieu 11: KBN1947
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Published by the British and Foreign Bible Society in 1947.