John 4
4
Jisü no Samariami Totimi Lakhi Sasü Küptsa Keu
1John nguno alau shi Jisü no akhopemi hekütsülu eno baptiz shitsü ani ipi Phariseemiqo ye chiluva ipikeu Jisü no ithive— 2tishimu kuchou lo ye Jisü no kumo püzü pa khopemiqo no baptiz shitsü ake. 3Ikehu Jisü ye Judea qhive no itaghi ghuthu lakhi Galilee lo idewove.
4Pa ye Samaria kathasü wu kepu shive. 5Tighenguno pa ye Samaria lo Sychar ipikeu mishiphu lakhi lo ighi, tiye Jacob no ayeghido kitila pesü panu Joseph tsü keu phivilo ke. 6Jacob zükikhi tile ae, eno Jisü ye kicheghüzü shiche kehu akulhoshive no azükikhi phivilo iqa ngo ae. Tiye puchomghü ghuloki shi ake.
7Kughou Samariami totimi lakhi no azü peniye ighi keno, Jisü no li vilo pi, “O shikimthi azü I piyé nima?” 8(Pa khopemiqo ye mishiphu lo achuqupu qhü niye wuve ke.)
9Samariami totimi hu no Jisü vilo pi, “No ye Jewmi lakhi eno ni ye Samariami totimi lakhi ke. No ye kíshi no I vilo azü khu ani kea?” (Kughengu Jewmiqo ye Samariamiqo sasü kühali chemo ke.)
10Jisü no li khochile, “Tsalá nono Alhou no tsü keu ghò ithi aghí eno khuu no O vilo azü khu ani keno pa ithi aghí ke aye, no ye pa vilo aküxüpu zü khuni cheke eno pano ti O tsüní cheke.”
11Totimi hu no pi, “Akijeu, no ye azü shophe kepu kiumu küha eno azükikhi ye thonhei anike. No ye khile no aküxüpu zü hipau ithulu nani kea? 12Ningu papù Jacob no azükikhi ningu tsü eno pa ampi no hile no azü ye, eno pa nuliqo ngò paw atsǘ-aquqo ghí hile no azü ye ke. No ye pa nguno akijeu keshea?”
13Jisü no khochile, “Azü hipau yelu kemi kümtsü tüghüthi kitheve nani, 14ikemu khukhumu I no tsü keu zü ye kemi ye tüghüthi kithemo nani. I no azü panongu tsü keu hu no panongu lolo lhokta küxü zü qò ipeghi anani.”
15Totimi hu no pa vilo pi, “Akijeu, ni ye tüghüthi kithemove püzü azü penike ghenguno hilehi ighi keu shimove nike azü hipau I tsülo.”
16Pa no li vilo pi, “Wolo, eno O kimi ku püzü ideghilo.”
17“Ni ye akimi kühae,” ipi li no khochile.
Jisü no li vilo pi, “Nono akimi küha ipi akeu ye achipi shi ani. 18Kuchou lo ye no ye akimi pungu acheke, eno itehi nono sasü akeu kipitimi hu ye O kimi kumoe. Nono itehi kiu pi keno tiye kuchou ke.”
19Totimi hu no pi, “Akijeu, no ye tungkupumi lakhi kepi I no ithivae. 20Ningu pù-asüqo ye naghuto hipau lono mülá cheke, ikemu nongu Jewmiqo no ningu ye Jerusalem lono Alhou mülá moayesa ipi pükha cheni ke.”
21Jisü no khochile, “Totimio, I pülülo, kughengu nongu ye naghuto hipau lo ke kumo no Jerusalem lomu Apù mülámove nikeu do wo chenie. 22Nongu Samariamiqo ye nongu no mtha keu mülá achenie; ikemu ningu ye ningu no ithi akeu mülá acheni, kughengu xakulu ye Jewmiqo lau no ighike. 23Tishiaghimu ado lakhi cheni eno tiye ighivae, tiye kuchou no mülá chekemiqo no Aghungu eno kuchou lono Apù mülá nani, kughengu panongu ye Apù no phu chekeu kümlamíqo ke. 24Alhou ye Aghungu ke, eno pa mülá chekemiqo ye Aghungu eno kuchou lono mülá moayesa ke.”
25Totimi hu no pi, “Ni ye Messiah (Khristo ipi ku chekeu) ighi nani ipikeu ithi anie. Kughou pa no ighini keno, pa no thowkha ningu vilo hepho-piye nanie.”
26Jisü no asheshu, “Ni, O pütsa akeu hu ye pa ke.”
Akhopemiqo no Jisü gholo Ideighi
27Tishi akelo pa khopemiqo ye ideghive eno pa no totimi lakhi sasü küptsa aghí keu ithulu no shishe akichiqhive. Ikemu khunomu, “No ye kiu avehupu shi ani kea?” momu “No ye kushiye li pütsa ani kea?” ipi inijumoe.
28Tile no li no azü’w alikoli pe chekeu qhive püzü mishiphu lo idewove no timiqo vilo pi, 29“Ighilo, I no mülàpüa keu kümtsü I vilo pivetsü keu timi julo. Hino Messiah shi aghí nani keshea?” 30Panongu no mishiphu lono ipeghino Jisü lau wu.
31Tishi akelo Jisü khopemiqo no pa vilo, “Rabbi, kiula chulo,” ipi qhüiniju ke.
32Ikemu Jisü no panongu vilo pi, “Ni ye nongu mtha keu chuqu chu kepu anie.”
33Ikelo pa khopemiqo dolo ishi iniju kilé, “Timi khami no achuqupu süghi no pa tsüke o?”
34Jisü no pi, “I puwu keu pulou shikeu eno pa kümlà shiqhiveni keu no I chuqu ke. 35Nongu ye aholetsa lakhi ishi anike kumo keshea, ‘Ghile hu nikeu aqhi bidí likhivae’? I no nongu vilo pìní, nongu nhethi tsükho no aluqo julo! Tipaqo ye nivea eno ghile do tovae. 36Itehimu timi khuu no ghile hu keno ajume lu cheni eno lhokta küxü ghenguno athì pekütsü cheni, tishianguno vesü keu ngò ghile hu keu pama alovi küqha niye ke. 37Ikehu aholetsa, ‘Lakhi no vesü eno kütami no ghile hu cheni,’ ipikeu ye kuchou ke. 38Nongu no mülàmo keu lo ghile hu peniye I no nongu puwu ke. Kütamiqo no aghime shimlave keu lo nongu no panongu ghime xathi xoluve no alá shiluvae.”
Samariami Kutomo no Pülüluve
39Totimi hu no, “I no mülàpüa keu kümtsü pa no I vilo pive ke,” ipi ashepe shikeu ghenguno mishiphu tipau lo akemi Samariamiqo kutomo no Jisü pülüluve. 40Ike kughou Samariamiqo no Jisü lau ighi keno, panongu no Jisü vilo panongu gholo ngove tsülo ipi auve, ikehu Jisü no panongu gholo atsala kini ngove. 41Eno pa kükütsü tsa ghenguno timi kutomo no küpülümi shiluve.
42Panongu no totimi vilo pi, “Ningu ye nono kiu pi keno tipau ghengu likhi no pa pülü keu shimovae; itehi ye ningu ampi no pa tsa chiluvae, eno ningu no timi hipau ye kuchou no ayeghilomi’w Xakuluu kepi ithivae.”
Jisü no Hiyampemi Lakhi Nopu Shipivi
43Atsala kini thiu Jisü ye Galilee lo wuve. 44(Ike Jisü ampi no tungkupumi lakhi ye pa likhi pa punugha lo agigihu küha ipi ke.) 45Pa no Galilee lo ighi kelo Galileemiqo no alokivishi pa sasü. Panongu ye Jisü no Jerusalem lo Hechekulu ghulhu Tiqhitini ghuloki lo müla keu kümtsü ithulu ke, kughengu panongu ghí tilehi wuke.
46Jisü ye itaghi Galilee lo mishiphu Cana xujue, tiye pano azü pe atsaizü kughulhove keu-a ke. Tilehi akükau nobolomi hiyampemi lakhi nopu sǘve no Capernaum lo ae. 47Kughou timi hipau no Jisü ye Judea lono Galilee lo ighi ani pi chilu keno, pa no Jisü lau wu püzü pa vilo ighino panu akithí kumlho shi sǜ akeu shipivi tsülo ipi qhüiniju.
48Jisü no pa vilo pi, “Nongu ye amichipu ngò akümzapuqo ithulumo kelo ye khilemu pülümo nani ke.”
49Akükau nobolomi hiyampeu no pi, “Akijeu, I nu thi mphi züu no iqighi tsülo.”
50Jisü no khochile, “Wolo, O nu ye xü nanie.”
Timi hu no Jisü no pikeu tsa pülüve püzü wuve. 51Pa no alà lo chephi lono pa qemiqo no panu ye xünia ipikeu sütsa pesü pa sasü kushoe. 52Panu no viluve keu do pa no iniju kelo, panongu no pa vilo, “Ighina puchou ayì lakhi kihe lono aghakimiki kühave ke,” ipi.
53Ikelo apù ye Jisü no pa vilo, “O nu ye xü nanie,” ipikeu do mtsa lono panu ye viluve kepi kümsüchilelu. Ike pa eno pa kibolomiqo kümtsü no Jisü pülüluve.
54Hiye Jisü no Judea lono Galilee lo ighive kethiu amichipu kümlà shikeu akiniù ke.
Actualmente seleccionado:
John 4: STB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.