John 9
9
Jisü no Apunu lono Anhethi Iche kemi lakhi Shipivi
1Pa no wuche kelo anhethi iche no punú kemi lakhi ithulu. 2Pa khopemiqo no pa vilo iniju, “Rabbi! Khuu no axiné shive no pa ye anhethi iche püzü punú kea, pa no keo pa pù-aza no kea?”
3Jisü no khochile, “Timi hipau xiné momu pa pù-aza xiné ghenguno kumoe! Ikemu hi shive keu ye pa vechewo akughushu Lhou kümlà pephe-piye niye ke. 4Atsala vüqai ake kutólo ningu ye khuu I puwu keno pa kümlàqo shiamase. Putho tsalà wochea, eno tiye khunomu akümlà shimla nani. 5I no ayeghi lo ake dolo, ni ye ayeghilomi küvü ke.”
6Hi pive kethiu pa no ayeghi lo müsü puku püzü pa mití pe aniba kunú no anhethi kighicheu nhethi lo nù tsü. 7Jisü no pa vilo pi, “Wulo eno Siloam zükhe lono mitheve lo!” (Siloam kiqi ye puwu keu). Ikehu timi hu no wu püzü pa gi phave, eno aki lo ideighi kelo pa ye ithuluve.
8Pa kisüghümiqo eno püzüu pa no khuchu che kelo ithi akeqo no ishi iniju, “Timi hipau ye iqa püzü khuchu chekeu ke kumo keshea?” 9Khami no pa ye timi tipau ke ipie.
Kütamiqo no, “Kumoe! Pa ye hupau kimihi ke,” ipie.
Ikemu pa likhi pa no pikichichi ghi pi, “Timi tipau hu ye ni ke.”
10“Tishiaye kíshi no O nhethi tsükholuvea kea?” ipi panoqo no iniju.
11Pa no khochile, “Panongu no Jisü ipi ku chekeu timi hu no aniba hami kunú pesü I nhethi lo nù tsüe. Pa no I vilo Siloam lo wu no mitheve lo ipi. Ike I no wu no mitheve kethiu ni ye ithuluvae.”
12Panongu no iniju, “Timi hipau khila ani kea?”
“Ni ye mthae,” ipi pa no khochile.
Phariseemiqo no Shikipivi Vehu lo Phukuju shikeu
13Panongu no anhethi iche no punú keu hu Phariseemiqo lau süghi. 14Ike Jisü no aniba kunú pesü timi tipau nhethi khaqhi tsü keu ye Sabbath tsalà ke. 15Tighenguno Phariseemiqo ghí pa vilo kíshi no pa ye ithuluve keno iniju. Timi hu no khochile, “Pa no I nhethi lo aniba sǘtsü eno I no azü pesü mitheve kelo ni ye itehi ye ithuluvae.”
16Phariseemiqo khami no pi, “Timi hipau ye Alhou lau no ighi kemi kumoe, kughengu pa ye Sabbath tsalà ikhilu amoe.”
Ikemu kütamiqo no iniju, “Kíshi no axinemi lakhi ye amichipu kümlà hitoi keqo shilu nani kea?” Ikehu panongu dolo kijethave.
17Tisheno panongu no itaghi anhethi kighicheu lau tsüghǜ ighino pi, “Pa no O nhethi khaqhi tsüke, no ye pa ghili kiu pi kepu ani kea?”
Timi hu no pi, “Pa ye Tungkupumi lakhie.”
18Panongu ye anhethi kighicheu pù-aza ku süghimo ke kutólo pa ye anhethi iche ache no ithuluve kepi pülü müla no ake. 19Panongu no iniju, “Hiye nokujo pú keshea? Anhethi iche no punú ipi nokujo no pikeu ye hi keshea? Pa ye kíshi no itehi ye ithuluvea kea?”
20Anhethi kighicheu pù-aza no ishi khochile, “Pa ye ni pú kepi nino ithi ani eno pa ye anhethi iche no punú kepi nino ithi anie. 21Ikemu pa ye itehi ye kíshi no ithuluvea momu khuu no pa nhethi khaqhive tsü keno nikujo ye mthae. Pa vilo iniju lo. Pa ye kichimi shivae eno pa ye pa likhi pa ghenguno pilu nanie.” 22Anhethi kighicheu pù-aza ye Jewmi sakiphemiqo kümsà lau no hi pike, kughengu Jewmi sakiphemiqo ye azüu no khukhumu Jisü ye Messiah kepi ikhilu kemi ye synagog lono hapheve nikeu shi xakütha shipepüa ke. 23Tighenguno pa pù-aza ye, “Pa ye kichimi shivea ke; pa vilo iniju lo,” ipi ke.
24Panongu no ghuthu akiniù anhethi iche no achekeu hu kusü püzü pa vilo ishi pi, “Amikucho tsa pikeu vechewo Alhou juküvü shitsülo. Ningu no ithi akeu no timi hipau ye axinemi ke.”
25Pa no khochile, “Pa ye axinemi keo kumo keno ni ye mthae. Ikemu I no thime lakhi ithi anie. Ike tiye, ni ye anhethi iche no ache ikemu itehi ye ni ye ithuluvae!”
26Ikelo panongu no pa vilo iniju, “Pa ye O lau kiu shi kea? Pa ye kíshi no O nhethi khaqhi tsü kea?”
27Pa no khochile, “I no nongu vilo pivae ikemu nongu no inimo ke. Nongu ye kushiye itaghi chilu nishi ani kea? Nongu ghí pa khopemi shinishi ani keshea?”
28Ikelo panongu no timi hu shikukujoqhi no pi, “No ye timi hipau khopemi ke! Ningu ye Moses khopemiqo ke! 29Ningu ye Alhou no Moses pütsa keu ithi anie, ikemu ningu ye timi hipau ye khilau no ighi keno ti ghí mthae.”
30Timi hu no khochile, “Ya tiye akichiqhie na! Nongu ye pa ye khilau no ighi keno mtha keghi pa no I nhethi khaqhi tsüke. 31Ningu no ithi akeu no Alhou ye axinemiqo kighini chilutsü chemoe. Pa ye khuno no Alhou sümsa no pa gholu cheni keno tipaqo kighini chilutsü chenie. 32Khunomu anhethi iche no punú kemi lakhi nhethi khaqhi tsü keu ghili chilu mphie. 33Tsalá timi hipau no Alhou lau no ighimo kemi shi aghí aye, pa ye kiumu shimlae.”
34Hipau lo panongu no khochile, “No ye apunu lonomu axiné lo thonhei acheke; no ye kíshi püzü ningu kütsü ani kea!” Tisheno panongu no synagog lono khalau pa hapheve.
Aghungu lo Anhethi Kighichemi
35Phariseemiqo no anhethi iche no achekeu hu hapheve ipikeu Jisü no chilu, eno kughou Jisü no pa ithulu keno pa vilo iniju, “No ye Timi Nu shou pülü anima?”
36Timi hu no iniju, “Akijeu, pa ye khuu kea? I no pa pülü nike pa ye khuu keno I vilo pilo.”
37Jisü no pi, “No ye itehi pa ithuluvae; kuchou lo ye O pütsa akeu hu no pa ke.”
38Ikelo timi hu no, “Ampeu, I no pülü ani,” ipi püzü pa no Jisü müláe.
39Jisü no pi, “Küghatha nike ghenguno ni ye ayeghi hipau lo ighike, tishianguno anhethi kighichemi pelo ithulu pe eno ithulu akemi pelo anhethi kighichemi shive peniye ke.”
40Phariseemiqo hami pa gholo ngo akemiqo no hi pikeu chilu püzü pa vilo iniju, “Kíshie pia? Ningu ghí anhethi kighichemi ya?”
41Jisü no pi, “Nongu no anhethi kighichemi shi aghí ke aye, nongu ye axiné kipimí aghimoni cheke, ikemu itehi ye nongu no ithulu ani ipi pükha ani kehu nongu xiné kipimí ye aniae.”
Actualmente seleccionado:
John 9: STB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.