Mathiu 18
18
1Ka ȧŋlɔkɔ ŋati aŋkarande aŋ der ka Yisɔs, ka aŋ pa, Kanɛ mǝ tha yi ubana bɛ ka rȧbȧy ra ro riana-e? 2kɔ tela uwath ulɔl ro ŋɔŋ, ɔ tǝmǝr kɔ kǝtɔŋ ka ŋaŋ, 3kɔ pa, Tɛntɛnɛ i kanɛ nu, Thambe nǝ lȧfthi ɛmerȧ ɛ nu-e, nǝ sǝkɛ mɔ afɛth alɔl-e, nǝ gbǝli hɛ wɔŋ ka rȧbȧy ra ro riyana. 4Tiyȧŋ wuni o wuni ɔwe mǝ sanɛ mɔ ɔwath ulɔl ɔwe-e, kɔnɔ tha yi ubana ka rȧbȧy ra ro riyana. 5Ɔwa bepi wuni o wuni ɔ malanɛ uwath ulɔl ukin uwunɔŋ ka ȧŋes a mi-e, minɛ ɔ malanɛ. 6Kɛrɛ bepi wuni o wuni ɔ yɔ ukin ka aŋlɔl aŋe aŋa lanɛ mi ɔ pǝnthbǝla-e, pǝ tǝ yi kɔ fisa bepi a gbak kɔ ȧsar ȧgbɔlȧ ȧbana ka kalim kɔŋ, a mɔtas kɔ ka ɔbɔlɔŋ wa kȧbȧŋ.
7Mɔnɛ ka ȧdȧru ta mətȧy mǝpǝnthbǝla, kotȧy-e mȧtȧy mati mǝ ba kǝder; kɛrɛ mɔnɛ ka ɔwuni kati ɔwe mǝ kȧrȧ ma! 8Tiyȧŋ bepi kȧta ka mu thalɔm akatǝk ka mu kǝ yɔ mu mǝ pǝnthbǝla-e, gbǝk ki, mǝ fitha ki kȧmȧ kǝ bɔlȧnɛ mu. Pǝ tǝ yi mu fisa bepi mǝ wɔŋ ka aŋesǝm mun lopȧnɛ thalɔm mun tǝtkɛ pǝthasi kǝba mǝta mȧrǝŋ thalɔm tatǝk tǝrǝŋ, ɔwa a fitha mu ka anant nǝthǝbana. 9Ɔwa bepi rȧfɔr ra mu rǝ yɔ mu mǝ pǝnthbǝla-e, kothi ri, mǝ fitha ri kȧmȧ rǝ bɔlȧnɛ mu. Pǝ tǝ yi mu fisa bepi mǝ wɔŋ ka aŋesǝm yi rǝfɔr rin-e, pǝthasi kǝba ɛfɔr yɛrǝŋ ɔwa a fitha mu ka anant na ro yahanama.
10Botnɛ nu kȧmȧ nǝ te sai ukin ka aŋlɔl aŋe, kotȧy-e, i kanɛ nu kǝpa ro riyana aŋmȧleka ŋaŋ aŋ kǝli lɔkɔ o lɔkɔ ȧder ra ɔKas kȧmi ɔwe yi ro riyana. 11Ȧtesoma-e ɔWan ka wuni ɔ der tǝ kǝkisis aŋa po dinɛ. 12To nǝ nanɛ-e? Bepi wuni ɔ ba tǝlɔmɛ kɛmɛ kin, ɔwa ukin ka ŋaŋ ɔ sɔkar-e, ɔ tey hɛ antǝgba tanlɛ tɔfɔt tamthǝrɛŋanlɛ, ɔ kɔnɛ ka tȧteŋ tǝ kǝthɛns ɔwe sɔkar-i? 13Ɔwa bepi pǝ yi ɔ fir kɔ-e, i kanɛ nu tɛntɛnɛ ɔ tǝ selǝr kɔ mǝbɔnɛ pǝthasi ta antǝgba tanlɛ tɔfɔt tamthǝrɛŋanlɛ aŋa te sɔkar. 14Ya pǝ yi sɔ-e, pǝ yi hɛ mȧselɔ ma ɔKas ka nu ɔwe yi ro riyana kȧmȧ ukin ka aŋlɔl aŋe ɔ dinɛ.
15Ɔwa bepi ɔwɔnt mu ɔ yɔ mu ɔlǝs-e, kɔ tɔri kɔ ɔlǝs wɔŋ na ŋarǝŋ son; bepi ɔ sua mu ɛlǝns-e, mǝ po sɔthɔ ɔwɔnt mu, 16kɛrɛ bepi ɔ sua hɛ mu ɛlǝns-e, banȧnɛ wuni kin thalɔm ŋarǝŋ kȧmȧ ka tasǝŋ ta mǝseri ŋarǝŋ thalɔm asas-e, rim o rim rǝ tǝma. 17Ɔwa bepi ɔ kasi kǝsuwa ŋa ɛlǝns-e, kanɛ ti ka aŋchɔch. Bepi ɔ selɔ hɛ sua ɛlǝns ka aŋchɔch-e, ta ɔ yi ro mu mɔ wuni tel dɛ yi ugbasi ɛfȧk.
18Tǝ tɛntɛnɛ i kanɛ nu, rǝka o rǝka ara mǝ nǝ sek nɔru rǝ tǝ yi rǝsek ro riyana, ɔwa rǝka o rǝka ara mǝ nǝ sǝli ka ȧdȧru-e rǝ tǝ yi rǝsǝli ro riyana. 19I kanɛ nu sɔ, bepi ŋarǝŋ kǝtɔŋ ka nu aŋ ba dim din ka ȧdȧru ta tȧy o tȧy ȧtȧ mǝ nǝ yif-e, ɔKas kȧmi ɔwe yi ro riyana ɔ tǝ yɔna nu ti. 20kotȧy-e, ro ŋarǝŋ thalɔm asas-e mǝ aŋ gbanɛ dɛr rɔkin ka ȧŋes a mi-e, rǝ i yi kǝtɔŋ ka ŋaŋ.
21Ka Pitarȧŋ ɔ der ɔ pa ro ŋɔŋ, Mariki, amɔlɔ ɔwɔnt mi mǝ ɔ yɔ mi ɔlǝs, ɔwa i tera kɔ-a? Haŋ kǝtǝma tamthǝdɛrǝŋ-a? 22Ka Yisɔsȧŋ ɔ wosa ɔ pa ro ŋɔŋ, I pa hɛ ro mu haŋ tamthǝdɛrǝŋ, kɛrɛ haŋ ɛlɔkɔ tǝgba tǝsas tɔfɔt kǝtǝma tamthǝdɛrǝŋ. 23Tiyȧŋ rȧbȧy ra ro riyana rǝ bȧlȧnɛ mɔ ubȧy ulɔm ɔwe yema lɔmǝsnɛ yi ɛbɔy yɔŋ. 24Ma ɔ tǝp kǝlɔmǝs-e, a kȧrȧ ukin ro ŋɔŋ ɔwe ba kǝram kɔ ɛtalent ɛwul tɔfɔt. 25Kɛrɛ ma ɔ te ba rǝka tǝ kǝrȧm-e, ɔmarki kɔŋ ɔ yamari kȧmȧ a thila kɔ, ɔrani kɔŋ-o, aŋwuth ŋɔŋ-o yi ara ɔ ba bɛ kȧmȧ ȧŋrȧm aŋ wur. 26Tiyȧŋ ȧŋbɔy ɔ gbǝpsa, kɔ nɛmthɛnɛ kɔ, ɔ pa, Pa, muyu mi ɔwa i ti po ram mu bɛ. 27Ka ȧney aŋ wop ɔmarki ka ȧŋbɔy ŋati, kɔ ter kɔ, ɔ tera kɔ sɔ rabei. 28Kɛrɛ ȧŋbɔy ukin kati ɔ wur, kɔ fir ɔkos kɔŋ ȧbɔy ɔwe ba kǝram kɔ ɛsiliŋ kɛmɛ kin. Kɔ wop kɔ, ɔ tɔker kɔ ro bolo, ɔ pa, Ram mi ara mǝ ba kǝram mi. 29Ka ɔkos kɔŋ ȧbɔy ɔ gbǝpsa ɔ nɛmthɛnɛ, kɔ pa, Muyu mi, ɔwa i ti ram mu. 30Kɛrɛ ɔ selɔ hɛ, ɔ kɔ bot kɔ ka ȧŋseth ŋa tǝrǝŋka haŋ ɔ ram rabei rɔŋ. 31Ma aŋkos ŋɔŋ ɛbɔy aŋ nənk ȧte po yɔnɛ-e, ȧney ȧbana aŋ wop ŋa, kaŋ der aŋ der aŋ tɔri ɔmarki ka ŋaŋ ȧte yɔnɛ bɛ. 32Ka ɔmarki kɔŋ ɔ tela kɔ ro ŋɔŋ, ɔ pa, Munɔ, mun ȧbɔy ulǝs, i tera mu rȧbȧy araŋ bɛ, pǝkasifɛ mɔ nɛmthɛnɛ mi. 33Munɔ, mǝ gbǝli hɛ sɔ ba ȧney ta ɔkos mu ȧbɔy-i, mɔ minɛȧŋ i ba mu ȧney-i? 34Ka ɔmarki kɔŋ ɔ bansȧ, kɔ lȧnki kɔ kia aŋa mǝ thalǝr afǝm haŋ ɔ po ram bɛ ara ɔ ba tǝ kǝram. 35Ya ɔKas kȧmi ro riyana mǝ ɔ yɔ nu sɔ bepi naŋ bɛ nǝ tera hɛ wuni o wuni ɔwɔnt kɔŋ ka ɛmerȧ ɛ nu.
Actualmente seleccionado:
Mathiu 18: TMNNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Themne New Testament © The Bible Society of Sierra Leone, 2009.