Yoane 10
10
Yes angwar mpake nsek
1Barabara, barabara, minyi rik birori, muot ntshu wara rek unyingin u mper u kat a mpuru mameme, di ya ibant u irak rekra, ya angwak muempo, muot me.
2Di ya ntshu nyingn u mper angwa mpake ntshu mame-me.
3Mpake ntshu ikuik imarips ya, mameme ake muok rutot rante, ya iur mameme mante, kompua sia manta, ya imatuey u busuebe ruera manta makima.
4Nter aman ya umatuey, ya ikitr u buso bua manta, keka mameme murabs ante, isin ayeb manta rutot rante.
5Di manta urabs nto a mueyampang bo, manta muntin, isina manta uyeb rutot ra beyampang bo.
6Yes amabaror nkonta mune, di banta uok bo mey mama- baror yante.
7Yes kukabaror yampe : Barabara, barabara, minyi rik birori, minyi rungwa ru mper ntshi mameme.
8Bene bakima bungwik buso buami bungwak biempo, bat babe, di mameme mak uok rutot ra ba bo.
9Minyi rungwak ru mper, muot ntshu nyingn ngwa minyi, ya apabant; ya apanyingn nto ake ya apakato, ipamon nenke.
10Muempo angwik isina kuwempr, nto ake isina kudjak, nto ake isin kupantsh ; di minyi rawiy isina keka mameme muwar a mony, manta mumon mony mua buiki.
11Minyi rungwak ru mpake ntshu mameme ntshu nsek, mpake ntshu nsek ntshu uwus mameme mante.
12Di nker ngun ntshu ngwak ka mpake mameme, mameme ake ka mameme mante bo, nter atar ya kuey amawiy, ya isabompr mameme, ya itin ; kuey isawat mameme nto ake isamapantshi.
13Nker ngun antin isina awar yante nker ngun, ya ka isuer ri mameme bo.
14Minyi ru mpake nsek, ramayeb mameme mami, mameme mami ake mamantshyeb.
15Nko amantshyeb Tata, nko ayeb minyi ake Tata, minyi uwek mony muami isin mameme mami.
16Mameme mami mekra munkawar, manta rek matowar u kat a mpur ine, busek minyi ruwimatshuari, manta mapaok rutot rami, manta yemuwar tong imwetsh, nto ake mpake mwetsh.
17Tata amapont isin kankos, isin iwek minyi mony muami isin kukamurab.
18Rek a muot utampr a munta, minyi rimuwek, minyi rungwar i bunono bumutuey nto ake i bunono bukamurab ; ruey rine ra rab ngwa Tata.
19Basi Yuda bamakapamps isin mey mene.
20Ba buiki u kat a ba bampe : Ya angwa insong mua Satan u kat ante, angwa i buwar bu marar; binu bukungokm isin ye ?
21Bana bekra bampe : Mey mene rek mawar mey ma muot ntshu ngwak i nsong mua Satan muamayeb udipr mis ma mun a mis mabama ?
Nter atot Yes ampe : Minyi ru Ntsampe
22Rusu ru nianko mupong mpur a Ntsampe muawar u Yerusarem, rawar ibur ra piu.
23Nter aukurerm Yes u mpuru a Ntsampe, u ipuer ra bora Saromon.
24Basi Yuda kunong, ba kunor bampe : Wene utshuser pantshi nter ye iwengs wene puing sia bitu? Mpe wene ungwar Kristo, tshusueng irengene irengene.
25Yes kubasaks yampe : Minyi ramabisuengs, di binu uyes bo. Mayemp munkerk minyi irukompua ra Tata, manta munkerk bukentshi isin minyi.
26Di binu uyes bo, isin binu rek bawar mameme mami nko imabiror minyi.
27Mameme mami muok rutot rami, minyi ramamayeb, manta ake murabs ami.
28Minyi rumawek mony usir bo, manta yekumuwa bo ; rek a muot utampr a manta u rou rami bo.
29Tata ntshu amapek a manta, amarek bakima bunene, rek a muot uyeb utampr u rou ra Tata bo.
30Minyi nto a Tata tshungwak a mwetsh.
31Basi Yuda kukarab mamanya isin kunkuet.
32Yes kubaror yampe : Minyi ramaker u buso bua binu mayemp mamasek ma buiki ma Tata, binu bukuet mamanya isin ru nake ?
33Basi Yuda kunsaks bampe : Tshuak ikuet mamanya isina iyemp rusek raker we bo, di isina misinku mikuto wene Ntsampe, nto ake isina wene u muot, di wene wampe u Ntsampe.
34Yes kubasaks yampe : Kemungwak mapunta u kate ibo ra binu : Minyi ramaror ampe : Binu bungwak tshuntsampe ?
35Mpe ibo raur bene batoms ya rueye ampe, tshuntsampe, mey matot mukanta mua Ntsampe makaka bo.
36Isin ye ik rori binu, minyi nywe ntshu ayempes Ntsampe ntshu atom ya u kat a bat ba man ampe : Wene ukuto Ntsampe misinku isin intot minyi ampe : Minyi ru Muan a Ntsampe.
37Mpe minyi kurunkerk mayemp ma Tata, rek ana buntshyes bo.
38Di mpe minyi rumpak maker, binu uwont untshyes bo, mayes ana manta, isina keka binu bayeb nto ake bayes ampe, Tata angwak u kat ami, minyi ake rungwak u kat a Tata.
39Ba kukasot ungwat, di ya kusopu u biar bia banta.
40Ya kukakaru u muin mua Yordani u kate irak ratetshiye Yoane uwek batis, ya awar ona.
41Bat ba buiki kuwiy ngwa ya bampe : Yoane keataker isana rumwetsh bo ; di mey makima maror Yoane isin muot nywe, mawar ma barabara.
42Bat ba buiki na kunyes.
Actualmente seleccionado:
Yoane 10: EJK2012
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Copyright © 2012, ASAREB, Suisse MiDi BIBLE