MATIUS 9
9
Yesus nen ap ambi inggi iyok warekma ma pano ekige wene
(Mrk. 2:1-12; Luk. 5:17-26)
1Ar Yesus perahu paga dagaluk uma edo paga iyok paga arar lagage. 2Ap ambi, inggi iyok warek mende, tikar ndalek paga windik kigik, ar ogariyak nen Yesus oba wolok wagugwa. Wagugwama, Ar Yesus nen il dalok, we ir akuni yi mende, ir iniliti ebebar anda tagwi kwak eti nggok mondok arar o. Yoralok Ar nen ap inggi iyok warek mende enogo yoga dogolir, “Komaduk arar dek erogo bagagi o. Ma, Nakbur a! Kar kiliti ebebar andega dogon o, yiluk yorige.” 3Ir ap guru agama inebe mende negen yanogo inakla andugu dogolir, “Akuni yi Ar Allah yiduk maduk erogo birtaga o!”
4Ar Yesus nen ir inakla andarugwa mende eti, Ar obok ilu atuk yoraga dogolir, “Kir maduk mende eti nenaluk kinakla andar tagwi? 5Pano anggin dek erurak kwak: ‘Komaduk dek erogo bigi o,’ yiluk yorurak a, ‘Kiluk atuk lan o,’ yiluk yorurak a? 6Eti ar ma yogondak An eka paga, kinilu aruwak o, agar paga yoma Ar Akuni Inakbur eti, akuni inomaduk dek erogo baurak paga An Nobatne werek ar o.” Yoralok Ar Yesus nen ap inggi iyok warek mende enogo yoga dogolir, “Kiluk arin, katikar kodalok kuma ibar lan!” yiluk yorige.
7Yorigemo ar ap inggi iyok warek mende ernogo, arar menatuk uma lagage o. 8Ir akuni wene ekige enogo inil welagugwa mende nen, ir mondok inobade atuk, Allah wee au, yiluk wogok dirugwa. Nenaluk, Ar Allah mende obarne nggok enogo, akuni arar inoba begemo o, yiluk inakla andarugwa.
Ar Yesus nen Matius wai yorige wene
(Mrk. 2:13-17; Luk. 5:27-32)
9Ar Yesus o etoma nen togokdalok tuwan paga laganem, ar Matius pajak nandokwa enogo, ebe kantor pajak etomala korek welaganem, Ar il karige. Ar Yesus il kalok yoga dogolir, “An mutnarek eme o!” yiluk arar yorigemo.
Ar Matius menatuk Ar Yesus mutok arar lagage.
10 #
Luk. 15:1-2
Ar Yesus ar Matius uma dago inom nunggu dogolir, Ar Yesus mutok lagwi mende inom, ap pajak kuwak ekwa amberak pakalok ar inom, nen ir akuni inaka nen akuni maduk mende yiluk andagwi mende yemenogo inom, inoba wagugwarik dago Ar inom arar narugwa. 11Nen dago nunggwi ir akuni Farisi mende nen inil dalok, Ar Yesus mutok lagwi mende kinok yoragu dogolir, “Ar Kinangguru ap penagih pajak o, akuni maduk mende o, obogar inom uma dago nertagwi eti nenaluk?” yiluk kinok yorarugwa.
12Ar Yesus nen, ir wene kinok yirugwa enogo aruk kolal diluk, onggo yoraga dogolir, “Akuni u inoba dek mende nen dokter korane arukbuk o, ogwe ir akuni u inoba werek mende kalok mban, dokter korane arurak o. 13#Hos. 6:6; Mat. 12:7Wene Alkitab akla nen yege yi mbenarni nda, ‘An wadok eti, inakba ketagwi eti kwak o, nen binatang kurban#9:13: Kurban eti: Ar Allah ake ye mende nde mende amep werek mende kau sapi, domba, kambing, tewe etegerogon mende warogo bugu lagugwa. paga nake ekwi kwak eti, dek o.’ Nenaluk, An wagagi eti, ir akuni pano ekwa mende wai yorak nen yiluk warukdek o. Ogwe akuni maduk ekwa eti ar wai yorak nen yiluk wagagi o.”
Puasa ekwi wene
(Mrk. 2:18-22; Luk. 5:33-39)
14Etegerogon yugu lagugwarik, Ar Yohanes Pembaptis mutok lagwi mende, Ar Yesus oba wagugwarik, ir nen kinok yogu dogolir, “Nir inom, akuni Farisi mende inom kalok, puasa ekwi, nen Ninombae kar mukarek lagwi mende kalok puasa ekikdek eti nenaluk?” yiluk kinok yorugwa.
15Ar Yesus nen wene onggo yoraga dogolir, “Kir kinakla nena andatagwi? Ir akuni kwe yikunem waru mende nen, ar ap kwe kodau werek ebe inom werek kigik, ir nen inakla yiduk maduk de yugwi dogu eti ndak a, ndak dek a? Eti ndak dek o. Ogwe o telek ar kwe kodau werek enogo ir akuni nen waganurak paga ari warigin o. Ma o eta paga perak, ir nen puasa eru eti etari warigin o.
16Ir akuni nen tu likbilik pagane mende ake, tu ngger mende oba lambologo biluk nggwari tagodek. Nenaluk, tu likbilik alep mende enogo maduk aga dogolir arar likbi larigin o. Nen tu likbilik enogo elo nggok atuk maduk arigin o. 17Eta etegerogon ar, akuni nen anggur ngger mbalek, tu agakdo pagane mende yugu akla todi tagodek o. Nenaluk, anggur ngger mende todek eti anggin nen, tu eti likbik yiluk ndiyalogo wuragin o. Tu ngger mende yugu akla, anggur ngger mbalek ar todurak o. Nen tokdumo, tu inom anggur inom imbirak pano mondok dogogun o.”
Ap tamban erir tagama inggi pago mende akbur ekige wene
Kwe Yesus iyom pata lagage wene
(Mrk. 5:21-43; Luk. 8:40-56)
18Ar Yesus nen, Yohanes ima wukbataga mende aworomi wene yoraga kigik, ar ap tamban eri tagama inggi pago mende eti wagage. Ar Yesus ika paga endop yunggu yi waga lagagerek yoga dogolir, “An nakbur kodak ngger yi arar wartaga o. Ogwe, kinggi pakta warumo, ar iyok paga iluk arigin o,” yiluk yirige.
19Yorigemo, Ar Yesus menaga lagagerek, Ar mutok lagwi mende inom, ar ap enogo inom lagugwa.
20-21Tuwan paga lagunem, kwe ambi u mep eka kigik dua belas tahun ekigerek ma, Ar Yesus amborna nggwe oba panggo yi wagage. Ar nen andega dogolir, “An we Ar iyom jubah ar pakta lamu, noba u yi arar dek arigin o,” yiluk andega lagagerek, Ar Yesus iyom irep pakta lagagemo, ar oba u dek arar etagage.
22Ar Yesus ambor meda yiluk, kwe enogo waga il kalok yoga dogolir, “Nakbur o, kiliti ebebar andega dogono o yiluk yorige. Nen kar kiliti An Noba ebebar andagen paga, koba u arar dek aga o, yiluk yorigemo!” Kwe enogo oba u etanogo ar dek agage o. 23Tuguluk, Ar Yesus ap tamban eri tagama inggi pago enogo uma arar wagage. Wagagerek, akuni warekma gitar erir taga mende inom, akuni amberak pakalok amberak inom inane pakalok kagalkwi il dalok, yoraga dogolir, 24“Elege yi ebe kanggikdek o! Ar wedek noge yitaga o. Ma kir obogar wundi lani! yiluk yorarige.”
Yorarige mende, ir yemenogo nen agakndok kanggugwa. 25Akuni yemenogo obogar wuldalok, Ar Yesus elege enogo werekma kamar onggega lagagerek, inggi patarige. Inggi patarigemo kodak enogo arar iluk atuk menagige o. 26O etomala elege ekige enogo abok arar wiga lagage.
Yesus nen ap mbere inil mbuk mende pano ekbarige wene
27Ar Yesus o etoma nen laganem, ap mbere inil mbuk mende tuwan paga, Ar mutok lagu dogolir, ir imbirak inane wai nggogar yogu dogolir, “Daud akbur yi wae, ninakba kante, lak, yiluk yorugwa!”
28Ar Yesus uma unggiluk werekma, ap mbere inil mbuk mende enogo Ar oba wagugwa. Wagugwama, Ar Yesus nen kinok yoraga dogolir, “Kir kinakla nen An u dek erogo binagagin yiluk ebebar anda tagwi?”
Ir nen onggo yogu dogolir, “Ambo, nir ebebar andago o.”
29Ar Yesus nen inil paganaka dogolir, “Kir ebebar andagop paga, kir ekbinagu andagop eti arar etaga o.” 30Etegerogon ekbarigemo, ir inil kau pano agage. Nen Ar Yesus ane obarne togon yoraga dogolir, yegerogon erninake o, yiluk akuni mondok yoragup o, yiluk yorarige.
31Ogwe Ar Yesus nen nir yegerogon erninake o, yiluk o daerah etoma paga obogar akuni yorar lagugwa.
Yesus nen ap ane unggukdek mende pano ekige wene
32Akuni inebe mbere yanogo lagu nggodek, ap ane nggukdek u kugi obabur maduk mende ilitimu werek ambi, Ar Yesus oba wolok lagugwa. 33Ar Yesus nen kugi obabur maduk mende enogo nggigilogo wuldirigemo, ap enogo ane wene yu ndak erogo birigemo. Akuni pakalok yemenogo nen, we yiluk bi waku dogolir, “O Israel paga yoma yegerogon ekwi mondok ninil daktagodek ma, eke a!” yiluk bi wakugwa.
34 #
Mat. 10:25, 12:24; Mrk. 3:22; Luk. 11:15 Ogwe, ir akuni Farisi mende nen yugu dogolir, “Ar irimbo kepala eti obarne wogogemo, eti paga ir irimbo amberak, Ar nen murogo wuldaktaga o,” yiluk yirugwa.
Yesus nen akuni il dalok inakba karige wene
35 #
Mat. 4:23; Mrk. 1:39; Luk. 4:44 Eterogon ma, Ar Yesus dagak-dagak o kota nggokma inom, bugudakma inom, unggir laga dogolir, akuni ye u nde u kunik mende inom, ininggi iniyok maduk mende inom, dek erogo barige. Nen uma tamban erir tagama nggwe etoma, Pano Wene, Ar Allah raja ndak-ndak apma binani warurak mende wene yorar nega lagage. 36#Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mrk. 6:34Ar Yesus nen, ir akuni domba inombae dekma, ir nen eru ndak dek nen nugatuk dogi tagwi ndak-ndak welagwi pakalok il daga lagagerek, Ar akla inakba andarige. 37#Luk. 10:2Ar Yesus nen ir Ar mutok lagwi mende yoraga dogolir, “Enggen yugu pakalok ogwe, akuni enggen yugu eti mbalu akuni inebe mberear o. 38Etiar ma, yabu onde werek eti enggen mbalu mendek lakba waruwak nen, nggino yorni o.”
Actualmente seleccionado:
MATIUS 9: WLW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión