മറ്‌ക്കോസ് 14
14
ഏസുണ കൊല്ല്യ ഓസണെ എ്ഡ്‌ക്കാര്
1പുളി ഇല്ലാത്ത അഡേദ് ണോമ്പിക്ക്‌മ് പെസഗെ ണോമ്പിക്ക്‌മ് ഇനി റണ്ട് ണാള്‌ത്തെ ഇര്‌ക്ക്‌ദ്. അയ്യി ഗള്യേലി എഗുദ പൂസാരി തലെവലാമ് ബേദ ബാത്ത്യലാമ് ഒന്റായി എ്ണേന്ത് ഏസുണ ഓസണോഡെ പ്‌ഡിത്ത് കൊല്ല്യ ണോഡികൊണ്ടിര്‌ന്താര്. 2ണോമ്പി സെയ്‌ര ഗള്യേലി അച്ചെ സെയ്‌ദാക്കി ആള്‌ഗ കലമ്പാല് ഉണ്ടാക്കുവാര് എന്ത് കോവെപട്ട് എഗുദ പൂസാരിഗാദ് തലെവലാമ് ബേദ ബാത്ത്യലാമ് അയ്യി ണാള് ബേ്ഡ എന്ത് തള്ളിനാര്.
ഒരുത്തി ഏസുദ് തലേക്ക് ബാഡെ എ്ണ്ണെന ഊറ്റുറ
3ഏസു ബെദനി ഊരിലി കുസ്‌ട്ട ണോയിലിര്‌ന്ത് തെ്ളിന്ത സീമോന്‌ദ് കൂരേലി സാപാഡ് തിന്ത്‌കൊണ്ടിര്‌ന്താ്. അക്കുളെ ഒരുത്തി ണല്ല ബെലെപെറ്റ ബെ്ള്ളെ കല്ല് കുഡുക്കേക്കെ തുമ്പ ണാറ്‌ദി എങ്ക ബാഡെ എ്ണ്ണെന എ്ഡ്‌ത്ത് ബന്ത. അയ്യി എ്ണ്ണേക്ക് ണല്ല ബെലേമ് കെ്ഡേക്കു. അവ കല്ല് കുഡുക്കേന ഒഡേത്ത് ബാഡെ എ്ണ്ണെന ഏസുദ് തലേക്കെ ഊറ്റിന.
4അക്കുളെ അര്‌ഗെ ഇര്‌ന്തവാര് മൊനെപട്ട് തമ്മ തമ്മ സൊന്നാര്: <<എന്ത്‌ക്ക് അയ്യി ബാഡെ എ്ണ്ണെന ബെ്റ്‌ദെ ഊറ്റ്യെക്ക്‌റാദ്? 5ഈ എ്ണ്ണെന മുന്നൂറ് ദിനാറ്‌ക്ക് അദിഗാക്ക് ബിറ്റ് കെ്ഡേക്ക പണാണ ഏ്ളെഗാക്ക് കൊഡുക്കിലാമല്ല?>> പ്‌റ അവാര് അവാണ ണല്ല സണ്ടെ കൊഡുത്താര്.
6ആന ഏസു അവാര്‌ക്കെ: <<അവ എന്തദൊ സെയ്‌ദ് പോഡൊ; ണിമ്മ അവാണ എന്ത്‌ക്ക് തൊന്തറെ പഡ്‌സ്‌റേര്? അവ എനാക്ക് ണല്ലാദ് താനെ സെയ്‌ര. 7ഏ്ളെഗ എപ്പ്‌മ് ണിമ്മ്‌ദൊപ്പ ഇര്‌ക്കുവാര്. ണിമ്മ അവാര്‌ക്ക് ണല്ലാദ് സെയ്യ ആസെപഡ്‌ഗാട്ട്യെല്ല അച്ചെ സെയ്‌ല. ആന ണാന് എപ്പ്‌മ് ണിമ്മ് പട്ടിലി ഇര്‌ക്കമാട്ടെ. 8അവ തനാക്ക് മുഡിരാദ് സെയ്‌ദ. എന്ന് സാവുണ പൊദേക്കാട്ടി എ്ണ്ണെ പൂസി ഒരിക്കി ബ്‌ഡ്‌റ കാര്യ അവ ണേരാത്തി താനെ സെയ്‌ര. 9ഉലഗൊട്ടുക്ക് ണല്ല സേദിന സൊല്ലുറ എ്ഡെഗ മുച്ചുഡാമ് അവാള്‌ണ ണെനേക്ക്യ ബേ്ണ്ടി അവ സെയ്‌ദാദ്‌ണാമ് സൊല്ലുവാര് എന്ത് ണേര്‌മായിമ് ണാന് ണിമാക്കെ സൊല്ലുറെ>> എന്ത് സൊന്നാ്.
ജൂദാ് ഏസുണ കാട്ടി കൊഡുക്കാ്
10ഏസുദ് സൊല്ലുപഡി ണഡാക്ക പന്നന്റ് ആളിലി കര്യോത്ത്‌ക്കാറാ് ജൂദാ് എങ്ക ഒരുത്താ് എഗുദ പൂസാരി തലെവലാക്കെ ഏസുണ കാട്ടി കൊഡുക്ക്യ എജ്ജിനാ്. 11അയാള് എജ്ജിന സേദിന കേ്ട്ട് അവാര്‌ക്ക് റമ്പ പിര്യ ബന്ത്‌ദ്. അവാര് അയാള്‌ക്ക് പണ തരേര് എന്ത് സൊല്ലി അയാള്‌ക്ക് ബാക്ക് കൊഡുത്താര്. അച്ചെ ജൂദാ് ഏസുണ കാട്ടി കൊഡുക്ക്യ ഉള്ള തഞ്ച കെ്ഡേക്ക്യ ബേ്ണ്ടി ണോഡികൊണ്ടിര്‌ന്താ്.
ഏസു തന്ന് സൊല്ലുപഡി ണഡാക്കവാര്‌ദ് ഒപ്പ പെസഗെ തീനി തിങ്കാ്
12പുളില്ലാത്ത അഡെ ണോമ്പിദ് മുദ ണാള്‌ത്തെ എഗുദാര്‌ഗ പെസഗെ സാപാഡ്‌ക്കുള്ള കൊറ്യാഡ്‌കുട്ടിന പലി കൊഡുക്കാദ്. അയ്യി ണാള് ഏസുദ് സൊല്ലുപഡി ണഡാക്കവാര് ഏസുണ പോയി കേ്ട്ടാര്: <<എമ്മ ഏദ്‌ക്കെ പോയി ണിനാക്ക് പെസഗെ സാപാഡ് ഒരുക്കുഡൊ?>>
13അക്കുളെ ഏസു തന്ന് സൊല്ലുപഡി ണഡാക്ക റണ്ട് ആള്‌ണ ഒളേത്ത് ഇച്ചെ സൊല്ലിബ്‌ട്ടാ്: <<ണിമ്മ പട്ടണാക്കെ പോയിരി. അദിലി ഒരുത്താ് ഒരു കുഡ തണ്ണി എ്ഡ്‌ത്ത് ബരാദ്‌ണ ണിമ്മ കാണുവേര്. ണിമ്മ അയാള് പിന്ന്‌ക്ക് പോയിരി. 14അയാള് ഏദ് കൂരേക്ക് പുക്ക്‌റാനൊ, അയ്യി കൂരെക്കാറാന്‌ക്കെ ഇച്ചെ സൊല്ലുഡൊ, <എനാക്ക്‌മ് എന്ന് സൊല്ലുപഡി ണഡാക്കവാര്‌ക്ക്‌മ് പെസഗെ സാപാഡ് തിന്ന്യ എ്ഡെ ഏദിലി എന്ത് ഗുരു കേ്ക്കാ്.> 15അക്കുളെ അയാള് ണലമായി ബിരിസി ഒരിക്കി ബെത്തിര്‌ക്ക ബെല്ല്യ മേല്‌മാളിഗെന ണിമാക്ക് കാട്ടി തരുവാ്. അദിലി ണമാക്ക് തീനി ഒരിക്കിരി.>>
16അച്ചെ സൊല്ലുപഡി ണഡാക്കവാര് അദിലിര്‌ന്ത് പട്ടണാക്ക് പോനാര്. അവാര് ആങ്ക് പോയി ണോഡുഗാട്ടി ഏസു സൊന്ന പാസെ കണ്ടാര്. അവാര് അദിലി പെസഗെ സാപാഡ് ഒരിക്കിനാര്.
17മജാക്കെ ആഗാട്ടി തന്ന് സൊല്ലുപഡി ണഡാക്ക പന്നന്റ് ആള്‌ഗാദൊപ്പ ഏസു അദ്‌ക്കെ എജ്ജിനാ്. 18അവാര് തിന്ത്‌കൊണ്ട് ഇര്‌ക്കാട്ടി ഏസു അവാര്‌ക്കെ ഇച്ചെ സൊന്നാ്: <<ണേര്‌മായിമ് ണാന് ണിമാക്കെ സൊല്ലുറെ, ണിമ്മ് കൂട്ടാത്തിലി ഒരുത്താ് എനാണ കാട്ടി കൊഡുക്കുവാ്; അവാ് എന്ന്‌ദ് ഒപ്പ ഇര്‌ന്ത് തിങ്കവാ്ത്തെ.>>
19അക്കുളെ അവാര്‌ക്ക് എച്ചെഗൊ ആറ്റ്. ഒരൊരു ആള്‌മ് ഏസുണ <<ണാനല്ലാത്തെ? ണാനല്ലാത്തെ?>> എന്ത് കേ്ക്ക്യ പ്‌ഡിത്താര്.
20അക്കുളെ ഏസു സൊന്നാ്: <<അവാ് ണിമ്മ് പന്നന്റ് ആളിലി ഒരുത്താ്ത്തെ. എന്ന്‌ദ് ഒപ്പ ക്‌ണ്ണാത്തിലിര്‌ന്ത് തിങ്കവാ്ത്തെ. 21മന്‌സാനായി പ്‌റാന്തവാ് എച്ചെ സാഡൊ എന്ത് സാമി ബുക്കിലി സൊല്ലിര്‌ക്ക പാസെതാനെ ണഡാക്കു. ആന മന്‌സാനായി പ്‌റാന്തവാന കാട്ടി കൊഡുക്കവാന്‌ക്ക് സെറ്റെ കജട്ട കജട്ടത്തെ. അവാ് പ്‌റാക്കാദെ ഇര്‌ന്തിര്‌ന്ത അദ് അവാന്‌ക്ക് ണല്ലാദായിര്‌ന്തദ്.>>
ഏസുദ് കഡേസി തീനി
22അവാര് തിന്ത്‌കൊണ്ട് ഇര്‌ക്കാട്ടി ഏസു അഡേന എ്ഡ്‌ത്ത് പരേസി സാമിക്ക് ണണ്ണി സൊല്ലി മുറുത്ത് തന്ന് സൊല്ലുപഡി ണഡാക്കവാര്‌ക്കെ കൊഡുത്തിര്‌ന്ത്: <<ഇദ്‌ണ ബാങ്കി തിന്നിരി; ഇദ് എന്ന്‌ദ് സരിഗല>> എന്ത് സൊന്നാ്.
23പ്‌റ താന് ഊറിന മുന്തിരി സാര ഇര്‌ക്ക സെമ്പ്‌ണ എ്ഡ്‌ത്ത് പരേസി സാമിക്ക് ണണ്ണി സൊല്ലി അവാര്‌ക്കെ കൊഡുത്താ്. അവാരെല്ലാര്‌മ് അയ്യി സെമ്പിലിര്‌ന്ത് കുഡിത്താര്.
24ഏസു അവാര്‌ക്കെ ഇച്ചെ സൊന്നാ്: <<ഇദ് എത്തിന്യൊ ആള്‌ഗാക്ക് ബേ്ണ്ടി സൂസ്‌റ എന്ന്‌ദ് സോരെ. സാമി മന്‌സാരോഡെ ബെത്തിര്‌ക്ക ഒപ്പ്‌കെ്ട്ട്‌ക്കുള്ള അഡ്യാളത്തെ ഈ ഊറിന മുന്തിരി സാര. 25ണേര്‌മായിമ് ണാന് ണിമാക്കെ സൊല്ലുറെ, സാമി ആള്‌റ ണാഡിലി ണാന് പുദ്യ മുന്തിരി സാര കുഡിക്കമാട്ട് ഇനി ഊറിന ഈ മുന്തിരി സാര കുഡിക്കമാട്ടെ.>>
26പ്‌റ അവാര് സാമി പാട്ട് പാഡിനാര്. അദ്‌ക്ക് പ്‌റ അവാര് ഒലിവ് മലേക്കെ പോനാര്.
പത്ത്‌റോസ് പ്‌റ്‌ത്ത് സൊല്ലുറാദ്‌ണ പറ്റി ഏസു സൊല്ലുറാ്
27ഏസു തന്ന് സൊല്ലുപഡി ണഡാക്കവാര്‌ക്കെ ഇച്ചെ സൊന്നാ്: <<ണിമ്മ എല്ലാര്‌മ് എനാണ തള്ളി പോവേര്. സാമി ബുക്കിലി ഇച്ചെ സൊല്ലിര്‌ക്ക്‌ദ്:
<സാമി മാട്ട്യാന കൊല്ലുവാ്.
കൊറ്യാഡ്‌ഗെല്ല സിന്തസിദാറ ആയെക്കു.>#സെക്കര്യാവു 13:7
28ആന ണാന് ഉജുറെ്ന്ത പ്‌റ ണിമാക്ക് മുദ ഗെലീലേക്ക് പോവെ.>>
29അക്കുളെ പത്ത്‌റോസ് സൊന്നാ്: <<എല്ലാര്‌മ് ണിനാണ ബ്‌ട്ട് പോനാല്‌മ് ണാന് ണിനാണ ബ്‌ട്ട് പോഗമാട്ടെ.>>
30അക്കുളെ ഏസു സൊന്നാ്: <<ഇന്റ്, ഇന്റ് അന്തിക്ക് താനെ റണ്ട് ജമ്പ് കോയി കൂഗുറാദ്‌ക്ക് മുദ ണീ എനാണ തെര്യാഗെ തെര്യ എന്ത് മൂണ് ജമ്പ് സൊല്ലുവെ എന്ത് ണേര്‌മായിമ് ണാന് ണിനാക്കെ സൊല്ലുറെ.>>
31പത്ത്‌റോസ് പിന്നേമ് സൊന്നാ്: <<ണിന്ന്‌ദ് ഒപ്പ ണാന് സത്താല്‌മ് സെരി ണിനാണ എനാക്ക് തെര്യ എന്ത് സൊല്ലാഗെമാട്ടെ.>> ഏസുദ് സൊല്ലുപഡി ണഡാക്ക ബാക്കി ആള്‌ഗാമ് അദേപാസെ താനെ സൊന്നാര്.
ഏസു ഗെ്ദ്‌സമാനേലി പരേസ്‌റാ്
32അദ്‌ക്ക് പ്‌റ ഏസുമ് ഏസുദ് സൊല്ലുപഡി ണഡാക്കവാര്‌മ് ഗെ്ദ്‌സമാനെ എങ്ക എ്ഡേക്ക് പോനാര്. അദ്‌ക്കെ എജ്ജിന പ്‌റ ഏസു തന്ന് സൊല്ലുപഡി ണഡാക്കവാര്‌ക്കെ സൊന്നാ്: <<ണാന് പരേസി തീരമാട്ട് ണിമ്മ ഇദിലി താനെ ഇരിരി.>> 33ഏസു പത്ത്‌റോസ്‌ണാമ് ഓഗന്നാനാമ് ആക്കോവുണാമ് തന്ന്‌ദ് ഒപ്പ കൂട്ടി പോനാ്; ഏസുക്ക് റമ്പ സങ്കഡാമ് അര്‌ക്കാമ് പ്‌ഡിത്ത്‌ദ്. 34തന്ന് സൊല്ലുപഡി ണഡാക്കവാര്‌ക്കെ ഏസു: <<എന്ന് മനേസ്സ്‌ക്ക് സങ്കഡ താങ്ക്യ മുഡ്യാദെ ഉജുറുക്ക് മുട്ടുസുദ്. ണിമ്മ ഇദിലി ഉറാങ്കാദെ സൂസാരിത്ത് ഇരിരി>> എന്ത് സൊന്നാ്.
35പ്‌റ ഏസു അവാര്‌ണ തള്ളി സെറ്റെ അക്കോസ പോയി മുഡിരദാനാക്കി ഈ കജട്ടമാന ഗള്യേന ഇല്ലാദാക്കുഡോമെ എന്ത് മണ്ണ്‌ക്ക് സഡാങ്ക ബ്‌ന്ത് പരേസിനാ്. 36<<അപ്പ! എന്ന് അപ്പ! ണിനാക്ക് മുഡ്യാത്താദ് ഒന്റുമില്ലെ. എനാക്ക് ബര്യ പോര കജട്ട എങ്ക ഈ സെമ്പ്‌ണ എന്നോഡിര്‌ന്ത് ബിലാക്കി തരുഡോമെ. ആന എന്ന് ആസെപഡി അല്ല, ണിന്ന് ആസെ എച്ചെഗൊ അദ് അച്ചെതാനെ ണഡാക്കുഡൊ>> എന്ത് അയാള് പരേസിനാ്.
37പ്‌റ ഏസു തന്ന് സൊല്ലുപഡി ണഡാക്കവാര് പട്ട്‌ക്കെ തിലിമ്പി ബന്ത് ണോഡുഗാട്ടി, അവാര് ഉറാങ്ക്‌റാദ്‌ണ കണ്ടാ്. അക്കുളെ ഏസു പത്ത്‌റോസ്‌ക്കെ: <<സീമോനെ ണീ ഉറാങ്ക്‌റേഗ? ഒരു മണികൂറ് എന്താല് ണിനാക്ക് ഉറാങ്കാദെ ഇര്‌ക്ക്യ മുഡ്യാഗ? 38സോദണേക്കെ സിക്കാദെ ഇര്‌ക്ക്യ ഉറാങ്കാദെ പരേസിരി. മനേസ്സ്‌ക്ക് ആസെ ഇര്‌ക്ക്‌ദ്, ആന സരിഗലാക്ക് മുഡിരാദില്ലെ>> എന്ത് സൊന്നാ്.
39ഏസു പിന്നേമ് അക്കോസ പോയി മുദ പരേസിന പാസെതാനെ പരേസിനാ്. 40അദ്‌ക്ക് പ്‌റ തന്ന് സൊല്ലുപഡി ണഡാക്കവാര്‌ദ് പട്ട്‌ക്കെ ഏസു തിലിമ്പി ബന്ത് ണോഡുഗാട്ടി അവാര് പിന്നേമ് ഉറാങ്ക്‌റാദ്‌ണ കണ്ടാ്. അവാര്‌ക്ക് ഉറാക്ക് സൊക്ക് മുഡ്യാദെ കണ്ണെല്ല മൂഡെമൂഡ്യ ആയെക്കിര്‌ന്ത്‌ദ്. ഏസുക്കെ എന്തണ സൊല്ലുഡൊ എന്ത്‌താനെ അവാര്‌ക്ക് തെര്യാദെ ഇര്‌ന്ത്‌ദ്.
41അച്ചെ ഏസു മൂണാവദ്‌മ് അവാര് പട്ട്‌ക്ക് തിലിമ്പി ബന്ത് അവാര്‌ക്കെ: <<ണിമ്മ ഇന്നിമ് സത്ത്‌സത്ത് ഉറാങ്കികൊണ്ട്‌ത്തെ ഇര്‌ക്കേര? മദി! മന്‌സാനായി പ്‌റാന്തവാന പാവ സെയ്‌രവാര്‌ദ് കയ്യിക്കെ ഒപ്പഡിക്ക്യ പോര ണേര ബന്ത്‌ദ്. 42എ്ന്തി, ണമ്മ പോയില. എനാണ കാട്ടി കൊഡുക്കവാ് ഇദാ എജ്ജിനാ്>> എന്ത് സൊന്നാ്.
ഏസുണ പ്‌ഡിക്കാര്
43അച്ചെ ഏസു ണായ പേസികൊണ്ടിര്‌ക്കാട്ടി താനെ ഏസുദ് സൊല്ലുപഡി ണഡാക്ക പന്നന്റ് ആളിലി ജൂദാ് എങ്കവാ് അദ്‌ക്കെ ബന്താ്. എഗുദ പൂസാരി തലെവലാമ് ബേദ ബാത്ത്യലഗാമ് മൂപ്പലഗാമ് അയാള്‌ദ് ഒപ്പ മൊത്തന ആള്‌ഗണ സൊല്ലിബ്‌ട്ടാര്. അവാര് തഡിമ് ബാള്‌മായി ബന്താര്.
44ഏസുണ കാട്ടി കൊഡുക്ക ജൂദാ് അയാള്‌ണ കാട്ടി കൊഡുക്കാദ്‌ക്കുള്ള ഒരു അഡ്യാള അവാര്‌ക്ക് കൊഡുത്തിര്‌ന്താ്: <<ണാന് ആര്‌ണ മുത്തമിക്ക്‌റേനൊ#14:44മുത്തമിക്ക്‌റേനൊ ണമ്മ് ആള്‌ഗ കാല്‌ക്ക് ബ്‌ന്ത് കുമ്മുഡ്‌റാദ്‌ക്ക് ബദ്‌ള എഗുദാര് തമ്മഗ ഏദാറ്റിലി കാണ്‌ഗാട്ടി പോദിക്ക് മുത്തമിക്കുവാര്., അവാ്ത്തെ ണിമാക്കുള്ള ആള്. അയാള്‌ണ ണിമ്മ സൊക്കാന പ്‌ഡിത്ത് എ്ഡ്‌ത്ത് പോഡൊ.>> 45അപ്പ്‌താനെ അവാ് ഏസു പട്ട്‌ക്കെ പോനാ്. അദ്‌ക്ക് പ്‌റ <<ഗുരുവെ!>> എന്ത് സൊല്ലി ഏസുണ മുത്തമിക്കിനാ്. 46അക്കുളെ അവാര് ഏസുണ മൊറുപ്പന പ്‌ഡിത്താര്. 47ഏസുദ് സൊല്ലുപഡി ണഡാക്കവാരിലി അര്‌ഗെ ണിന്റിര്‌ന്ത ഒരുത്താ് തന്ന് ബാള്‌ണ ഊരി എഗുദ ബെല്ല്യ പൂസാരിദ് ബേലെക്കാറാന്‌ദ് കാദ്‌ണ സെത്തി എ്ഡ്‌ത്തെക്കിനാ്.
48അക്കുളെ ഏസു സൊന്നാ്: <<ഒരു കുറ്റക്കാറാന പ്‌ഡിക്ക്യ ബര പാസെ തഡിമ് ബാള്‌മായി എനാണ പ്‌ഡിക്ക്യ ണിമ്മ ബന്തിര്‌ക്കേര? 49ണാന് ണാള്‌ക്ക്‌മ് സാമികൂരേക്കെ ബന്ത് ണിമാക്ക് പഡിസിര്‌ന്തെ? അക്കുളെല്ല ണിമ്മ എനാണ പ്‌ഡിക്കാലെ. ആന സാമി ബുക്കിലി സൊല്ലിര്‌ക്ക പാസെ ണഡാക്കുഡോമല്ല?>> 50അപ്പ്‌താനെ ഏസുദ് സൊല്ലുപഡി ണഡാക്കവാര് ഏസുണ തള്ള്യെക്കി ഓഡി പോനാര്.
51ബെ്റ് പൊദേപ്പ്‌ണ പൊദേത്ത് സിന്ന ഒരു ബാലിവെ അയിദാ് ഏസു പിന്ന്‌ക്ക് പോയിര്‌ന്താ്. ഇവാന പ്‌ഡിക്ക്യ അവാര് ണോഡിനാര്. 52ആന അവാ് പൊദേപ്പ്‌ണ എക്കി തള്ളി ബെ്റ്‌ദെകറി ഓഡി പോനാ്.
ഏസു എഗുദാര് ഗോഡ്‌ദിലി
53അവാര് ഏസുണ എഗുദ ബെല്ല്യ പൂസാരിദ് കൂരേക്കെ എ്ഡ്‌ത്ത് പോനാര്. അദിലി എഗുദ പൂസാരി തലെവലാമ് ബേദ ബാത്ത്യലാമ് മൂപ്പലാമ് അച്ചെ എല്ലാര്‌മ് ബന്ത് എജ്ജിര്‌ന്താര്. 54പത്ത്‌റോസ് ലേസ ബ്‌ട്ട് അവാന്‌ദ് പിന്ന്‌മേലെഗെ എഗുദ ബെല്ല്യ പൂസാരിദ് കൂരേദ് കളമാട്ട് പോയി എജ്ജിനാ്. അദിലി അയാള് കാവക്കാറാര്‌ദ് ഒപ്പ കുക്കാന്ത് തീ കായിന്ത് കൊണ്ടിര്‌ന്താ്.
55എഗുദ പൂസാരി തലെവലാമ് എഗുദ ഗോഡ്‌ദില്യ എല്ലാര്‌മ് ഏസുണ കൊല്ല്യ ബേ്ണ്ടി അവാന്‌ക്ക് ണേരെ തെ്ളുവു കെ്ഡേക്ക്യ ഓരാഡി ണോഡിനാര്. ആന അവാര്‌ക്ക് ഒരു തെ്ളുവുമ് കെ്ഡേസ്യ മുഡ്യാലെ. 56എത്തിന്യൊ ആള്‌ഗ പോയി ഏസുക്ക് ണേരെ ഉറുട്ടു സൊന്നാര്. ആന അവാര് സൊന്നാദ് ഒന്റുക്കൊന്റുമ് ഒത്തു ബരാലെ.
57അക്കുളെ ലേസ ആള്‌ഗ എ്ന്ത് ണിന്റ് അവാന്‌ക്ക് ണേരെ ഇച്ചെ ഉറുട്ടു സൊന്നാര്: 58<< <മന്‌സാര് കെ്ട്ടിന ഈ സാമികൂരേന ണാന് പൊളിത്തെക്കുവെ. അദ്‌ക്ക് പ്‌റ മൂണ് ണാളെങ്കാട്ടി മന്‌സാര് കെ്ട്ടാത്ത ബേ്റെ ഒന്റുണ കെ്ട്ടുവെ> എന്ത് ഇയാള് സൊന്നാദ്‌ണ എമ്മ കേ്ട്ടിര്‌ക്കേര്.>> 59അപ്പ്‌മ് അവാര് സൊന്നാദ് ഒത്തു ബരാലെ.
60അക്കുളെ എഗുദ ബെല്ല്യ പൂസാരി അവാര് മുന്തുക്ക് എ്ന്ത് ണിന്റ് ഏസുണ കേ്ട്ടാ്: <<ണിനാക്ക് ഒരു ബദ്‌ള്‌മ് സൊല്ല്യ ഇല്ലേഗ? ഇവാര് ണിനാക്ക് ണേരെ കുറ്റ സാട്ട്‌റാദ്‌ഗെല്ല എന്ത?>> 61ആന ഏസു ഒരു ണായ ബീസാക്ക് സൊല്ലാദെ മ്‌ണ്ടാദെ ഇര്‌ന്താ്.
പിന്നേമ് എഗുദ ബെല്ല്യ പൂസാരി ഏസുണ കേ്ട്ടാ്: <<ണമ്മ കുമ്മുഡ്‌റ സാമിദ് മഗാ് ക്‌റ്‌സ്‌ത്ത്‌ത്തേഗ ണീ?>>
62അക്കുളെ ഏസു: <<ഈ്, ണാന്‌ത്തെ. മന്‌സാനായി പ്‌റാന്തവാ് എല്ല ബിലാമ് ഇര്‌ക്ക സാമിദ് ബല സാരി കുക്കാന്ത് ആള്‌റാദ്‌ണാമ് ബാന്‌മേലെ മഞ്ച്‌ക്കെ ഏ്റി ബരാദ്‌ണാമ് ണിമ്മ കാണുവേര്>> എന്ത് സൊന്നാ്.
63അക്കുളെ എഗുദ ബെല്ല്യ പൂസാരി തന്ന് സീലെന കീ്റിര്‌ന്ത് ഇച്ചെ സൊന്നാ്: <<ഇനി എന്ത്‌ക്ക് തെ്ളുവുക്ക് ആള്? 64ഇദാ ഇയാള്‌ദ് ബായാലേഗെ സാമിക്ക് ണേരെ കുറ്റ സൊന്നാദ്‌ണ ണിമ്മ കേ്ട്ടേരല്ല? അദ്‌ക്ക് ണിമ്മ എന്ത ണെനേക്കേര്?>>
അക്കുളെ എല്ലാര്‌മ്: <<അയാള് കുറ്റക്കാറാ്ത്തെ. അയാള്‌ണ കൊല്ലുഡൊ>> എന്ത് സൊന്നാര്. 65പഗ്‌ദി ആള്‌ഗ അവാന്‌ക്കെ തുപ്പിനാര്. അവാര് അവാന്‌ദ് കണ്ണ്‌ണ കെ്ട്ടി കയ്യിന പ്‌ണ്ടിസി കുത്തിര്‌ന്ത്: <<ണീ ഒരു സാമിദാസ് താനെ, ആര് ണിനാണ അഡിത്താദ് എന്ത് സൊല്ലു>> എന്ത് കേ്ട്ടാര്. കാവക്കാറാര് ഏസുണ എ്ഡ്‌ത്ത് പോയി അഡിത്താര്.
പത്ത്‌റോസ് ഏസുണ തെര്യ എന്ത് സൊല്ലുറാ്
66അയ്യി ഗള്യേലി പത്ത്‌റോസ് അഡി കളാത്തിലി താനെ ഇര്‌ന്താ്. അക്കുളെ എഗുദ ബെല്ല്യ പൂസാരിദ് ബേലെക്കാറിസ്യാര്‌ദി ഒരുത്തി ബന്ത. 67അവ പത്ത്‌റോസ് തീ കായിന്ത് കൊണ്ട് ഇര്‌ന്താദ്‌ണ കണ്ട് അയാള്‌ണ സൊക്കാന ണോഡിര്‌ന്ത് സൊന്ന: <<ണീമ് ണസറത്ത് ഊര്‌ക്കാറാ് ഏസുദ് ഒപ്പ ഇര്‌ന്തവാനല്ല?>>
68അക്കുളെ പത്ത്‌റോസ്: <<ണീ സൊല്ലുറാദ് എന്തായെന്റ് എനാക്ക് തെരിരാദ്‌മില്ലെ ണെപ്പ്‌കെ്ഡേക്കാദ്‌മില്ലെ>> എന്ത് സൊന്നാദ്‌മ് കളാക്കെ ഏ്റി ബര മേലെ ബെ്ള്യെ പോനാ്. അപ്പ്‌താനെ കോയി കൂഗിറ്റ്#14:68മുദ എ്ള്‌ദി ബെത്തിര്‌ന്താദ്‌ണ ണോഡി എ്ള്‌ദിന പഗ്‌ദി കായിദാത്തിലി <<അപ്പ്‌താനെ കോയി കൂഗിറ്റ്>> എങ്ക സുലാക്ക ഇല്ലെ..
69അയ്യി ബേലെക്കാറിസി അയാള്‌ണ അദിലിമ് കണ്ട്, അവ അദിലിര്‌ന്തവാര്‌ക്കെ: <<ഇയാള് അവാര് കൂട്ടാത്തില്യ ഒരുത്താ്ത്തെ>> എന്ത് പിന്നേമ് സൊന്ന. 70ആന പത്ത്‌റോസ്: <<അദ് ണാനെ അല്ല>> എന്ത് സൊന്നാ്.
ഒരു സെറ്റെ ണേര ആനാദ്‌മ് അദിലി അര്‌ഗെ ണിന്തിര്‌ന്തവാര്: <<ണേര്‌മായി ണീ അവാര് കൂട്ടാത്തില്യ ഒരുത്താ്ത്തെ എന്ത് എമാക്ക് തെര്യു. എന്ത്‌ക്കെന്റ ണീമ് ഗെലീലെക്കാറാ്ത്തെ>> എന്ത് അയാള്‌ക്കെ സൊന്നാര്.
71അക്കുളെ പത്ത്‌റോസ്: <<സാമി സാക്കി ണാന് സൊല്ലുറാദ് ണേര്‌ത്തെ! ണാന് സൊല്ലുറാദ് ണേരല്ലാദെ പോന ണാന് തൊലേന്ത്‌കൊണ്ട് പോഡൊ! ണിമ്മ സൊല്ലുറ അയാള്‌ണ എനാക്ക് തെര്യാഗെ തെര്യ>> എന്ത് സൊന്നാ്.
72അപ്പ്‌താനെ റണ്ടാവദ്‌മ് കോയി കൂഗിറ്റ്. അക്കുളെ പത്ത്‌റോസ്, <<കോയി റണ്ട് ജമ്പ് കൂഗുറാദ്‌ക്ക് മുദ ണീ എനാണ തെര്യാഗെ തെര്യ എന്ത് മൂണ് ജമ്പ് സൊല്ലുവെ>> എന്ത് ഏസു സൊന്നാദ്‌ണ ണെനേത്താ്. അയാള് ഇദ്‌ണ ണെനേത്ത് സങ്കഡാക്ക് ബായിബ്‌ട്ട് അഗ്‌ദാ്.
Actualmente seleccionado:
മറ്‌ക്കോസ് 14: സാമിദ് സേദി
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
New Life Literature