Lûqa 11
11
Dua senî yena kerdiş
(Metta 6:9-13; 7:7-11)
1Îsayî cayêk de dua kerdêne. Gama ke duaya xwu qedêna şagirdanê ci ra yewî Ey ra va “Wayirê ma, senî ke Yehyayî mûsna şagirdanê xwu, ti zî bimûsne ma ke ma do senî dua bikerê.”
2Îsayî înan rê enê çî vatî: “Wexto ke şima dua kenê wina vajê:
‘Babîyo Semawî, wa nameyê to miqedes bimano.
Hukimranîya to bêro.
3Her roje rizqê ma bide ma.
4Êyê ke ma rê xirabî kenê, senî ke ma înan efû kenê,
Ti zî guneyanê ma efû bike.
Destûr mede xapêyayişê ma.’”
5Dima înan rê wina va: “Ma ferz bikerê ke şima nîmeyê şewe şî keyeyê yew hevalê xwu û ey ra va ‘Dostê mi, hîrê nanan deyn bide mi; 6yew hevalê mi rayir ra ameyo, çiyêkê mi çinê yo ke ez ci rê îkram bikerî.’ 7Hevalê şima qey do zere ra vajo ‘Mi aciz meke! Ez nêeşkena ber akerî. Ez û tutê xwu nika rakewte yê. Ez nêeşkena nika wurzî û çiyêk bidî to’? 8Ez şima rê enê vajî, beno ke mêrik semedê xatirê hevaltîya şima sere de nan nêdo, feqet şima waştiş de israr bikerê, qetîyen do wurzo û îhtîyacê şima biyaro ca. 9Eno semed ra ez şima rê enê vajî, bi israr biwazê, Homa do bido. Bigeyrê, şima do bivînê. Ber bicenê, do abo. 10Waştox gêno. Geyrayox vîneno. O ke ber ceneno rê ber abeno. 11Kamcîn babî kerra dano lajê xwu yê ke nan wazeno? Yan zî mase biwazo, mar bido? 12Yan zî hak biwazo, eqreb bido? 13Senî ke şima yê zerrîxirabî zanê hedîyeyanê rindekan bidê tutanê xwu, Babîyo Semawî zî miheqeq do Ruho Miqedes bido înanê ke ci ra wazenê.”
Qudretê Îsayî Homayî ra yo
(Metta 12:22-30; Marqos 3:20-27)
14Rojêk Îsayî yew mêrikê ke riyê cinî ra nêeşkayne qalî bikero ra cin qewirna. Cin ke vejîya mêrikî dest bi qalîkerdiş kerd. Qelebalixê ke ena biyene dî, heyret de mendî. 15Labelê tayê kesan va “Cinan, bi ardimê sermiyanê cinan Balzebûlî#11:15 Balzebûl: Manaya “wayirê mêsan” de leqebo tinazkî ke diyayo Îblîsî. yanî bi ardimê Îblîsî qewirneno.”
16Tayê kesan zî bi niyetê ke Îsayî îmtîhan bikerê, waşt ke asmîn ra yew elamet nîşan bido. 17Îsayî çiyê ke hişê înan ra vîyartêne zanayne. Wina va: “Çi welato ke tede nîfaq bibo, rijîyeno. Şarê keyeyê ke xwu miyan de abirîyayo zî vila beno. 18Eger Îblîs xwu zere de abirîyayo, hukimranîya ci senî payanî ra manena? Şima hema zî vanê ez bi ardimê Îblîsî cinan qewirnena. 19Eger ez cinan bi ardimê Balzebûlî qewirnena, eyla merdimê şima bi ardimê kamî qewirnenê? Hukmê derheqê şima de, wa merdimê şima bidê. 20Ez bi destê Homayî cinan qewirnena. Eno zî nîşan dano ke Hukimranîya Homayî resaya şima.
21“Yew mêriko sere ra hetanî lingan çekdar û hêzdar, heta ke keyeyê xwu muhafeze bikero, malê ci emnîyet de yo. 22Feqet ma vajê ke yew mêrikê ey ra hêzdarêr êrîş kerd û zorê ey berd, o wext heme zirx û çekê ke pê bawer o, gêno û beno. Xenîmetî zî hevalanê xwu dir bare keno.
23“O ke hetê mi nîyo vera min o, o ke mi dir arênêdo, yeno a mana ke vila keno.”
24“Cin gama ke zereyê merdimî ra vejîyeno cayanê wuşka de fetelîyeno û hizûr geyreno#11:24 cayo wuşka: Zemanê Îsayî de, bawerîya cihûdan gore ruhê xirabî şiyêne cayo wuşka, şiyêne çolan. labelê nêvîneno. O wext vano ‘Qet nêbo ez ageyrî keyeyê xwu yê verînî.’ 25Gama ke ageyreno, vîneno ke keyeyê ci ameyo rutiş, weçînîyayo û arêdiyayo. 26Enê ser o şino, bi hewt cinanê xwu ra xirabêrî piya ageyreno. Pêro dest pê kenê, ê kesî de cûyenê. Bi eno qeyde halê peyîn yê ê kesî verî ra bêterêr beno.”
27Gama ke Îsayî enê vatêne, qelebalix ra yew cîneke veng kerd û Ey ra va “Werre bi a cînî ke ti ardê dinya û lewnayê!”
28Îsayî zî va: “Esas werre bi înan ke kelamê Homayî şinawenê û îtaet kenê.”
Neslo ke mucîzeyî dima yo
(Metta 12:38-42)
29Her ke şiyêne qelebalix zêdiyayne. Îsayî wina veng ro înan kerd: “Neslê nikayî neslêko xirab o. Homayî ra yew elameto mucîzewî paweno. La înan rê elametê Yûnisî ra teber sewbîna çî do nîşan nêdîyo.#11:29 Yûnis: Yew pêxembero ke ÎV seserra 8. de cûyayo. Badê ke pîzeyê yew maseyê pîlî de hîrê rojî vîyarnayê, eynî seke Îsa roja hîrêyine mezel ra biyo gane, o zî weş û war vejîyayo. 30Senî ke Yûnis semedê şarê Nînewa bibi yew elamet, Benîademo Semawî zî do semedê enê neslî bibo elamet.
31“Roja hesabî, şahbanûya Saba#11:31 Şahbanûya Saba: Yan zî “Şahbanûya Başûrî”. Cînîya hukimdare ke seba hîkmetê Homayî fekê Silêmanî ra bişinawo teqrîben 1600 kîlometreyî rayir şiya. (Biewnîyê Qralî-I, 10:1-13) do enê neslî dir wurzo û enê neslî mehkûm bikero. Çimkî şahbanû, seba ke goşdarîya qalanê hîkmetane yê Silêmanî bikero, ta hetê wetê dinya ra ameybî. La nika yewo Silêmanî ra berzêr şima miyan de yo. 32Roja hesabî, şarê Nînewa do enê neslî dir wurzo û enê neslî mehkûm bikero. Çimkî wexto ke Nînewayijan waezê Yûnisî şinawit, tewbe kerd. La nika yewo Yûnisî ra berzêr şima miyan de yo.”
Dinya rê Bibê Roşin
(Metta 5:15; 6:22-23)
33“Kes qendîle tanêfîneno û aye kîler yan zî binê mekube de nênimneno. Qendîldane de nano ro ke, êyê ke dekewenê keye roşin bibê. 34Çim nûrê bedenî yo. Eke çimê şima weş biewnîyo, pêro bedenê şima zî beno nûrin. Feqet eke çimê şima weş nêewnîyo, pêro bedenê şima beno tarî. 35Eke winî yo, dîqet bikerê! Roşno ke şima de esto, wa tarî nêbo. 36Eger pêro bedenê şima nûrin bo û tu cayê ci tarî nêbo, senî ke qendîle şima bi şewqê xwu roşin kena, şima tim roşnayî de benê.”
Îsa Sermiyananê Dînî Tenkîd Keno
(Metta 23:1-36; 12:38-40)
37Badê ke Îsayî qiseykerdişê xwu qedêna, yew fêrisî O dawetê werdî kerd. Îsa şi werd û sifreyî ser o ronişt. 38Fêrisî wexto ke dî Îsayî werd ra ver destê xwu edetan gore nêşutî, ecêb mend. 39Enê ser o Îsayî ey rê wina va: “Ey Fêrisîyên, şutişê şima yê destî maneno pakkerdişê teberê fincane yan zî tebaxe. Feqet zereyê şima bi xirs û xirabî dekerde yo. 40Ey bêaqilan! Eyê ke teber viraşto û zere viraşto eynî nîyo? 41Şima verî çiyo ke zereyê firaqanê şima de yo, sey sedeqe bidê feqîran, a o wext heme çî şima rê beno pak.
42“Wey halê şima rê, ey Fêrisîyan! Şima nehne, vaşê sedefî û her tewir mehsûl zî tede, sey malê Homayî des ra yewê her çî danê, feqet şima adil biyayiş û Homayî ra heskerdişî îhmal kenê. Dayişê des ra yewî îhmal mekerê, la gereka verî şima nînan bikerê.
43“Ey Fêrisîyên, wey halê şima rê! Şima xavrayan de roniştişê cayê berzî û meydanan de seba şima bihurmet selamdayişê însanan rê xeriqîyenê. 44Wey halê şima rê! Şima manenê mezelanê bênameyan ke însanî bêke ferq bikerê ser o geyrenê.”
45Alimanê Tewratî ra yewî Îsayî ra va “Seyda, ti bi enê vatişan ma rê zî heqaret kenê.”
46Îsayî ey ra wina va: “Wey halê şima rê zî, ey alimê Tewratî! Barê ke kiriştişê înan zehmet o, şima wenanê însanan, feqet seba ke şima enê baran bikirişê şima gişta xwu bîle nêleqnenê. 47Wey halê şima rê! Şima seba pêxemberan tirban virazenê. Eslê xwu de verînanê şima ê pêxemberî qetil kerdê. 48Bi eno qeyde şima kerdenanê verînanê xwu rê şahidî kenê û kerdenanê înan tesdîq kenê. Çimkî verînanê şima pêxemberî kiştî, şima tirba înan virazenê. 49Eno semed ra, Homayî hîkmetê xwu nîşan da, va: ‘Ez do înan rê pêxemberan û resûlan bişirawî; ê do tayêne bikişê, tayêne rê zî zilim bikerê.’
50-51“Gunîya #Xeliqnayiş 4:8; Tarîxî-II 24:20-21Habîlî ra hetanî gunîya Zekerîyayê#11:50-51 Habîl, Zekerîya: Nameyê înan Tewrat de vîyareno, pêxamberê verîn û peyîn ê ke ameyê kiştiş. ke mabeynê sekûya qurbanî û mabedî de amebi kiştiş, şima do seba înan hesab bidê. Bi eno qeyde xeliqnayişê dinya ra nat do hesabê gunîya heme pêxemberan enê neslî ra bêro persayiş. Belê, ez şima rê vana, eno nesil do pêroyê nînan ra mesûl bêro girewtiş.
52“Wey halê şima rê, ey alimê Tewratî! Şima kilîtê berê îlm û îrfanî kerdo xwu dest; senî ke şima eno ber ro nêşinê zere, êyê ke wazenê dekewê zere zî şima nêverdenê.”
53Badê ke Îsa uca ra aqitîya alimanê Tewratî û Fêrisîyan Ey rê dest bi dişmenî kerd û zafê meselayan de fekê ci sehna. 54Seba ke bi vatişanê ci Ey bifînê dame firsend geyrayne.
Actualmente seleccionado:
Lûqa 11: diqSZZ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.