Matìyò 24
24
Yeso mə̀tì ineni ane ìnwḭ iseg.
(Mag 13:1-2; Lug 21:5-6)
1Anyumə̀ ne Yeso ya dù inga mbàn Ŋwiye se yḛ̀ ghò yi, mə̀mə̀nənùg məd ya ghò ghà ibo gha, wì nḛ ikuchèg ne mbi kɔri nəb te inga mbàn Ŋwiye kwàʼ icheg chɔm. 2Wì ya ghà inɔb gha, “Mbə bàd ighi mbo̰ ijìm anìŋ? Mə gha tesiʼ inən gha, chəyi iteg mɔ̀ʼɔ imɔʼ biri chughi igun ìywin. Mbi biri buʼ ighi ijìm sàkì aseg.”
Ngəʼ ne Mə̀mə̀nənùg Yeso biri zə̰ tì icheg ne mbi biri chɔʼ ìmbɔb ibɔʼì ighog
(Mag 13:3-13; Lug 21:7-19)
3Anyumə̀ ne Yeso ya chughi ikaŋ iwum mə̀olìf, mə̀mə̀nənùg məd ya ghò ibo məyi mbɔb mbɔb pè ghà ibo gha, “Masà, gha nyumə̀ ne inug mbo̰ biri dù ina. Mə̀tə aneni ane nyumə̀ ne àghò biri bə̀ndì fɔrɔ aneni ane nyumə̀ ne isəg biri nwḭ̀yḛ̀.”
4Yeso ya ywìtì abə mə̀mə̀nənùg məd gha, “Mbə̀ chughi ikyèʼi bə̀ ghi we awən imbə̀ʼ wə̀d mɔ̀ʼɔ nɔ̀ʼ tàmbi awən. 5Mbə̀ ghi swe awən imbə̀ʼ icheg ne bəd nɔʼ nɔʼ biri yeʼe pè niŋ ìmə ikum se ghà gha, ‹Mo ya wə̀d we ne Ŋwiye zɔ̀ʼi.› Mbɔb biri ghà ane tàmbi bəd nɔʼ nɔʼ. 6Mbə̰ biri zug gha iben mbe màʼà ibid, bə̀ ywìrì zug gha iben mbe kə̀bə̀ ni màʼ ibid. Imbə̀ʼ mbə̰ bɔ awən. Inug icheg mbe biri dù, si ya gha, kayi kiri nyumə̀ ne isəg biri nwìyḛ̀ we. 7Aben biri nɔ̀ʼ màʼ ibid tì aben ndəŋ. Aben ne ifɔn we sàʼa biri bə màʼ ibid tì aben ndəŋ ne ifɔn we sàʼa. Njèg ka ka biri nyi iben iben. Ìseg biri ghùd isiŋi isiŋi. 8Inug mbo̰ ijìm biri yaʼ icheg ne àyi we ko ni zug tibuʼ anyumə̀ ne we nɔ̀mbɔ.
9Nyùmə̀ we mə̀ kòʼ, bəd ìpàb biri ya chɔ̀ʼɔ ìmbən ibɔʼì ighog, gwìtè awən nàʼà mbi zwete. Bəd inga iben ijìm biri pàb awən imbə̀ʼ amə. 10Ibḛfiŋ abə bəd nɔʼ nɔʼ biri bɔd. Mbɔb biri se tàŋa mənaŋ igun mə̀mbin bə̀ pàbà mə̀mbin. 11Nyùmə̀ we mə̀ kòʼ, bədkə̀n nɔʼ nɔʼ ne ghà inug ako biri dù. Mbɔb biri tambi bəd nɔʼ nɔʼ. 12Icheg ne inug izəg biri taŋ nɔʼ ane nyumə̀ we, chəyi bəd nɔʼ nɔʼ biri ywìri ya kɔ̀ŋɔ̀ mə̀mbin icheg ne mbɔb yaya bè kɔ̀ŋɔ̀. 13Si ya gha, wə̀d ne nyìʼi ghò pè ane ìnwḭ, Ŋwiye biri pumni aməd. 14Mbi biri chètì ikən chɔm imbə̀ʼ anug ìfɔ̀n ikaŋ inga isəg ijìm, ni gha bəd məjìm zug. Anyumə̀ ne mbi fə chètì ikən chɔm gho̰ inga isəg ijìm, nyumə̀ ne isəg biri nwḭ̀yḛ̀ biri pè.”
Ngəʼ kyen ne taŋ bə
(Mag 13:14-23; Lug 21:20-24)
15Yeso ya chè imbìghè ghà abə mə̀mə̀nənùg məd gha, “Ane, mbə biri bàd ‹Anug tibɔ̀ŋ ze ne ghìyə̀ gha bəd se nyète mbàn Ŋwiye› ne ya anug ze ne wə̀dkə̀n Ŋwiye Daniyè ya fə ŋwàʼri. (Wə̀d ne fɔ̀ŋɔ anug azo̰, atog məd zen!) 16Anyumə̀ we, bəd ne yaʼi inga aba aben Jùdeyà, mbe noro kɔʼ ikaŋ tiwum. 17Imbə̀ʼ wə̀d ne yaʼi igun idɔm nəb swìʼe yi ni nyi inga nəb niŋ aghi mɔ̀ʼɔ. 18Imbə̀ʼ wə̀d ne yaʼi a mben bə̀ndə yi ghò a achan ni niŋ ndwigun. 19Nyùmə̀ ngəʼ kyen ze biri taŋ bə ako abə mə̀yi ne biri yaʼ ti tì ibum fɔrɔ abə mə̀yi ne biri ya nyɔ̀ŋɔ bɔn. 20Mbə̀ chaʼra Ŋwiye gha imbə̀ʼ wì ghiyə yi gha nyùmə̀ we ne mbə̀ biri se ŋa nòrò yaʼ inga nyùmə̀ we ne ifə we taŋ ko kə̀ igun aneg àzwètì. 21Aton ya gha, bəd biri taŋ zə̰ ngəʼ ane nyumə̀ we chè aku ngəʼ ijìm ne mbɔb kə kweʼì zən nɔ̀ʼ ane nyumə̀ ne Ŋwiye ya tangi isəg. Chəyi iku ngəʼ we biri bə ywiri yaʼ igun isəg. 22Tesiʼ ya gha, Ŋwiye fə bì sɔ̀bri ineg mbe, nji chəyi wə̀d mɔ̀ʼɔ ne biri tèn. Wì biri sɔbri inun ineg mbe imbə̀ʼ bəd məd mbe ne wì ya fə chɔʼi.
23Anyumə̀ we, wə̀d mɔ̀ʼɔ mə̀ ghà inən gha, ‹Mbə̀ nḛ Wə̀d we ne Ŋwiye zɔ̀ʼi gho̰!› Kə̀ gha, ‹Məd we ayin!› Imbə̀ʼ mbə̰ bḛ awən ka. 24À ya icheg ne ze biri yaʼ imbə̀ʼ icheg ne mə̀kristo ako biri yeʼe, wə̀d imɔʼ imɔʼ abɔ̀ʼ inɔb biri se ghà gha, ‹Mo ya wə̀d we ne Ŋwiye zɔ̀ʼi.› Bədkə̀n ne ghà inug ako biri bə yeʼe. Mbi biri ghì iyeti inug kyen kyen ni tambi bəd. Mbɔb biri kə̀b ni gha ze mə̀ chwi mbi tambi fɔrɔ bèyi bəd mbe ne Ŋwiye ya fə chɔʼi. 25Mbə̀ nḛ, mə fə ghà inug mbo̰ inən bɔŋ mbi se dùwə̀.
26Ane, wə̀d mɔ̀ʼɔ mə̀ ghà inən gha, ‹Mbə̀ nḛ məd ywḭyḛ̀ inga ibad zɔbi.› Imbə̀ʼ mbə̰ gho awən angu. Kə̀ mbi mə ghà inən gha, ‹Məd we aŋa, inga atog nəb ze inga.› Imbə̀ʼ mbə̰ bḛ awən. 27Icheg ne àŋwàŋwaŋ ze wàrà ikaʼi ikaŋ àbɔ̀ŋɔ aba ze ne achwi ze dùwə̀ angu mbi bàrà ghò fɔrɔ aba ze ne achwi ya fḛ angu, à ya bə̀ kwàʼ ane ne Ŋwan Wə̀d biri yeʼe . 28Izam ya fete asiŋi ne nyam ku yaʼi angu.”
Inug imbə̀ʼ nyumə̀ ne Ŋwan Wə̀d biri ywiri yeʼe
(Mag 13:24-27; Lug 21:25-28)
29Yeso ya chè imbìghè ghà abə mə̀mə̀nənùg məd gha, “Kwàʼ anyumə̀ ne ineg ngəʼ mbo̰ fə mèghi,
‹nyùmə̀ biri fin.
Chəyi iməg biri ya bə̀ zùʼə.
Titəm iməg biri nɔ̀ʼ inga àbɔ̀ŋɔ fèndi aseg.
Ŋwiye biri chì ighi mbe ne yaʼi ikaŋ àbɔ̀ŋɔ igun ìmbɔb iti.›#24:29 Isaiah 13:10; 34:4
30Nyùmə̀ we mə̀ kòʼ, aneni ni chwi gha Ŋwan Wə̀d fə se yèʼe biri dù aton àbɔ̀ŋɔ. Bəd məjìm igun iseg biri zə̀ʼ anyumə̀ ne mbi biri bàd aməd ne we yèʼe inga pàʼ tì ika fɔrɔ ighumni kyen məd. 31Anyumə̀ ne tàŋ kyen biri ghàm, Ŋwan Wə̀d biri chà ìmbi mbè angirə̀. Mbè angirə̀ mbe biri feti bəd mbe ne Ŋwiye ya fə chɔʼi inga iben ijìm igun isəg.”
Anug ni mə̀nì imbə̀ʼ azed fig
(Mag 13:28-31; Lug 21:29-33)
32Yeso ya chè imbìghè ghà abə mə̀mə̀nənùg məd gha, “Mbə̀ mənə anug azo̰ abə azed fig: Mbə̰ ya mə̀ bàd tifuʼ feg te dùwə̀ ane tìtab bɔd, mbə kyeri gha ichi fə tinde. 33À ya bə̀ ane ne, mbə̰ mə̀ bàd ineni mbo̰ ijìm, mbə̀ kyeri gha nyùmə̀ fə tinde, si kwàʼ ikye abo. 34Mə gha tesiʼ inən gha, chəyi iwaŋ bəd gho̰ biri chè witì inug mbo̰ ijìm dù. 35Ikaŋ àbɔ̀ŋɔ tì isəg biri chè, si ya gha, chəyi ìmə ìngam biri nɔ̀ʼɔ chè ako.”
Chəyi wə̀d mɔ̀ʼɔ kyeri aneg ze kə̀ nyùmə̀ we
(Mag 13:32-37; Lug 17:26-30; 17:34-36)
36Yeso ya chè imbìghè ghà abə mə̀mə̀nənùg məd gha, “Chəyi wə̀d mɔ̀ʼɔ ne kyeri aneg ze kə̀ nyùmə̀ we ne inug mbo̰ biri dù, ka bèyi mbè angirə̀ ikaŋ àbɔ̀ŋɔ kə̀ Ŋwan. À ya məyi Mbaʼ məd kyeri aneg ze. 37Ikuchèg ne inug yaya dùwə̀ inga ineg mbe abə Nwa̰, à ya bə̀ ane ne ze biri yaʼ ane nyùmə̀ we ne Ŋwan Wə̀d biri yeʼe . 38Mbə̀ŋ ya no inga nyùmə̀ we abə Nwa̰, mənib sweg jəg isəg ijìm. Inga ineg mbe ne mbə̀ŋ ze ya se zàmbi no, bəd yaya jə̀ghə, no, nàma, bə̀ nàʼà bɔn ane inam anene pè ane aneg ze ne Nwa̰ ya nyi inga abaŋ igyi. 39Chəyi bəd mbe ya kyeri anug ne biri dù pè ane nyumə̀ ne mbə̀ŋ ya no, mənib sweg bèʼì awɔb mbɔb məjìm. Aŋa ya icheg ne bəd igun isəg biri bə yaʼ anyumə̀ ne Ŋwan Wə̀d biri yeʼe . 40Anyumə̀ we, mbaŋà tibe biri yaʼ a mben, Ŋwiye niŋ ifibì, sàŋì ìywin. 41Mə̀yi məbe biri ya ghɔ̀ʼɔ̀ kyì, Ŋwiye niŋ ifibì, sàŋì ìywin.
42Ane, mbə̀ pati awən bə̀ chùghi ikyèʼi imbə̀ʼ icheg ne chəyi mbə̀ kyeri aneg ne ìwən Anɔŋisəg biri yeʼe . 43Mbə̀ kyeri gha, wə̀d nəb mə̀ kyèri nyumə̀ ne iji biri yeʼe ni ji ighi məd, wì biri chughi ikyèʼi imbə̀ʼ wì nɔ̀ʼ sàŋì iji tòʼ nəb məd nyi inga. 44Icheg ne ze yaʼi anìŋ, mbə̰ mənyìʼ chùʼri nyɔd imbə̀ʼ icheg ne Ŋwan Wə̀d biri yeʼe ane nyùmə̀ ne chəyi mbə̰ mbe ghɔ̀mɔ̀ aməd.”
Wə̀d ne fàʼà ane fìŋ ijìm tì wə̀d ne chəyi we fàʼà ane fìŋ ijìm
(Lug 12:41-48)
45Yeso ya chè imbìghè ghà abə mə̀mə̀nənùg məd gha, “Wə̀d àfàʼì ne fàʼà ane ìzi fìŋ ijìm, ne bə̀ bèrì iwe, ne mbaʼ àfàʼì məd fə nɔŋi aməd gha wì ya nḛ̀ bəd àfàʼì məd bə̀ nàʼà ighijəg inɔb igun nyumə̀, àkə awe? 46Ze biri bɔ̀ŋ abə wə̀d àfàʼì we anyumə̀ ne mbaʼ àfàʼì məd bə̀ndi pè kɔ̀ti aməd ne we fàʼà àzi àfàʼì. 47Mə gha tesiʼ inən gha, mbaʼ àfàʼì we biri si zì ìmbi ighi ijìm yaʼ ibo ikye abo. 48Mbə̀ niŋ gha, wə̀d àfàʼì we bèrì fìŋ izəg, si kɔ̀ndi gha, ‹Mbaʼ àfàʼì biri tàn ni yèʼe.› 49Ane, ko se sɔ̀mɔ mbin tì bəd àfàʼì, bə se jə̀ghə no yi tì itəd mənoʼ. 50Mbaʼ àfàʼì ìwi wə̀d àfàʼì wì biri yeʼe igun aneg ne chəyi wì ya kə̀ ghɔ̀mɔ̀ aməd, fɔrɔ ane nyumə̀ ne chəyi wì kyèri. 51Mbaʼ àfàʼì we biri pè taŋ chə wə̀d àfàʼì we, màʼ aməd inga asiŋi ne bəd mbe ne bèmnè inug yaʼi angu, ne ya asiŋi ze ne mbi biri se dèghè kùrə asɔŋ.”
Actualmente seleccionado:
Matìyò 24: MBTP
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2019 CABTAL