Mag 2
2
Yeso ya ghù wə̀d ne ya buʼrə
(Mat 9:1-8; Lug 5:17-26)
1Ane ineg mɔ̀ʼɔ ya che, Yeso ya bə̀ndì ghò a Kàpenàwum. Bəd ya zug isiŋi ijìm gha wì fə se yi ibo achan. 2Bəd nɔʼ nɔʼ ya ghò fète ibo inga nəb. Nəb ze ya sweg ne chəyi ya ywìrè yi apan inga nəb kə̀ imbìghè nəb ne tì bəd ya təm angu. Yeso ya ko ni ghàm Ìngam Ŋwiye inɔb. 3Mbaŋà mɔ̀ʼɔ tikwè ya bèʼì wə̀d mɔ̀ʼɔ ne ya buʼrə ghò abə Yeso. 4Icheg ne chəyi tì mbaŋà te ya tindi iban Yeso imbə̀ʼ inɔ̰ bəd we, mbi ya tòʼ idɔm nəb#2:4 Idɔm nəb gho̰ ya iku mɔ̀ʼɔ ne mbi bɔmi wi mbàtà ne tì bəd chughi igun. igun asiŋi ze ne Yeso ya yaʼi angu. Anyumə̀ ne mbi ya tòʼi ibighi, mbi ya swi mbaŋà ze ne ya buʼrə igun tìsa#2:4 Tìsa ya mbe bə̀ kàrà ane Məkəʼ kə̀ kyè. ze ne mbi ya bèʼi aməd igun. 5Anyumə̀ ne Yeso ya bàri icheg ne bəd mbe ya beri ibḛfiŋ, wì ya ghà abə mbaŋà ze ne ya buʼrə gha, “Ìmə Ŋwan, mə fə waʼ ìmbe inug tibɔ̀ŋ.”
6Anyumə̀ ne Yeso ya gha ane, mə̀chwitì mə̀nɔ̀ʼɔ̀ mɔ̀ʼɔ ne ya yaʼi angu ichughi, ya biri inga ìtɔb fìŋ gha, 7“Aton ne Mbaŋà ìzo̰ ze ghàmà anìŋ àkə gha? Wì ya anìŋ zɔ̀mbɔ Ŋwiye! Àkə we ne tì wì waʼ inug tibɔ̀ŋ bəd chèyi ane Ŋwiye?”
8Yeso ya kyeri ìtɔb tikɔndi kwàʼ ati. Ane, wì ya biri inɔb gha, “Aton ne mbə̰ mbe kɔ̀ndɔ tiku inug ìto̰ inga ìtən fìŋ àkə gha? 9Àkə anug azeg ne zami ni ghà? Àkə ni ghà abə mbaŋà ìzo̰ ne buʼrə gha, ‹Mə fə waʼ ìmbe inug tibɔ̀ŋ.› Kə̀ àkə ni ghà ibo gha, ‹Nɔ̀ʼɔ titighe, kad àze tìsa yèn?› 10Mə biri ghì mbə kyeri gha Ŋwan Wə̀d bèrì ika igun isəg ni waʼ inug tibɔ̀ŋ bəd.” Anyumə̀ ne wì ya ghàmi ane, wì ya si ghàbri ghà abə mbaŋà ze ne ya buʼrə gha, 11“À ya mo we ghà ine, nɔ̀ʼɔ titighe, kad àze tìsa, ghò awe ine achan.”
12Mbaŋà ze ya nɔ̀ʼ kwàʼ ati, kad àze tìsa, dù ghò yi kwàʼ inɔb imbìghè mbɔb məjìm. Anug ze ya chè ibo abə bəd mbe məjìm. Ane, mbi ya se ghùmnə Ŋwiye gha, “Chəyi tì kweʼì bàd anug icheg azo̰!”
Yeso ya kàrì Levì
(Mat 9:9-13; Lug 5:27-32)
13Yeso ya ywìrì bə̀ndì ghò iban atəŋ ze a Galìli. Inɔ̰ bəd ya ghò abɔ̀ʼ məd. Ane, wì ya ko se chwìte inug inɔb. 14Icheg ne wì yaya yḛ̀ nè chwìte inug, wì ya bàd Levì ne ya ŋwan Afòs. Levì ya chughi inga nəb mə̀tag#2:14 Nəb ze ne wì yaya fète mə̀tag. Anyumə̀ ne Yeso ya bàri aməd, wì ya ghà ibo gha, “Beni abɔ̀ʼ inum.” Levì ya nɔ̀ʼ bèni abɔ̀ʼ məd.
15Yeso tì mə̀mə̀nənùg məd ya chughi aseg inga nəb Levì se jə̀ghə. Anyumə̀ we, bəd nɔʼ nɔʼ ne fète mə̀tag tì bəd nɔʼ nɔʼ ne ghìyə̀ inug tibɔ̀ŋ ya bə̀ chùghi aseg abɔ̀ʼ inɔb se jə̀ghə imbə̀ʼ icheg ne inɔ̰ bəd ya beni abɔ̀ʼ Yeso. 16Mə̀chwitì mə̀nɔ̀ʼɔ̀ mɔ̀ʼɔ ne ya bə̀ yaʼ mə̀Farìsi ya bàd icheg ne Yeso yaya jə̀ghə tì bəd ne ghìyə̀ inug tibɔ̀ŋ bə̀ jə̀ghə tì bəd ne fète mə̀tag. Ane, mbi ya biri abə mə̀mə̀nənùg məd gha, “Aton ne Yeso we jə̀ghə tì tiku bəd ìto̰ àkə gha?”
17Anyumə̀ ne Yeso ya zughi anug azo̰, wì ya ghà inɔb gha, “Chəyi bəd ne yaʼi ika ika mbe kə̀bə̀ dɔgtà. Bəd ne kə̀bə̀ dɔgtà ya bəd ne ghɔ̰̀. Chəyi mə̀ yeʼe ni kàrì bəd mbe ne ghìyə̀ inug ne koʼi. Mə yèʼe ni kàrì yaʼ bəd mbe ne ghìyə̀ inug tibɔ̀ŋ, ni gha mbe kɔpi ìwɔb ikuchèg.”
Ibiri imbə̀ʼ anug ni chughi njèg
(Mat 9:14-17; Lug 5:33-39)
18Mə̀mə̀nənùg ìmbi Jɔn tì ìmbi mə̀Farìsi yaya chùghə njèg ni chàʼra Ŋwiye. Ane, bəd mɔ̀ʼɔ ya ghò bìri abə Yeso gha, “Aton ne mə̀mə̀nənùg ìmbi Jɔn fɔrɔ ìmbi mə̀Farìsi mbe chùghə njèg, chəyi ìmbe mbe chùghə njèg àkə gha?”
19Yeso ya ywìtì inɔb gha, “Chəyi bəd mbe ne gho ane igən mbe chùghə njèg anyumə̀ ne mbaʼ igən kiri yaʼi abɔ̀ʼ inɔb. Mbaʼ igən mə kiri biri yi tì inɔb, nji chəyi mbi biri chughi njèg. 20Ineg mbe yèʼe ne mbi biri niŋ mbaʼ igən we chì abɔ̀ʼ inɔb. Ineg mbe mə pè, mbi biri se chùghə njèg.”
21“Chəyi wə̀d we bànda asiŋi ndwi feg igun ndwi anun. Wì mə ghì ane, nji asiŋi ndwi feg ze biri sètì ndwi anun ze, ghì ibighi we ywìrì taŋ faŋ. 22Chəyi wə̀d we zìyè mənoʼ zù inga aghi mənoʼ anun. Wì mə ghì ane, nji mənoʼ mbe biri zweg aghi mənoʼ ze, wì nim mənoʼ bə̀ nim aghi mənoʼ. Mbi ya zìyè mənoʼ zù inga aghi mənoʼ chɔm.”
Ibiri imbə̀ʼ aneg àzwètì mə̀Ju
23À ya yaʼ igun aneg mɔ̀ʼɔ ne ya aneg àzwètì mə̀Ju, Yeso tì ìmbi mə̀mə̀nənùg yaya chè inga mben kyìkɔ̀ʼ. Anyumə̀ ne mbi yaya yḛ̀ ghò, mə̀mə̀nənùg məd ya ko se pàrà aghə kyì mɔ̀ʼɔ fìre kùrə.
24Mə̀Farìsi ya biri ibo gha, “Nḛ! Aton ne ìmbe mə̀mə̀nənùg mbe ghìyə̀ anug ne chəyi ìmba mə̀nɔ̀ʼɔ̀ chwiti gha mbe ghiyə igun àza aneg àzwètì àkə gha?”
25Yeso ya ywìtì inɔb gha, “Chəyi mbə̀ kweʼì fɔŋ anug ze ne ifɔn Dèvid tì bəd mbe ne ya yaʼi abɔ̀ʼ məd ya ghi anyumə̀ ne njèg yaya zàŋa awɔb ne chəyi mbi ya bə bèrì aghi ni jəg? 26Anyumə̀ we ne Àbìyatà ya yaʼi atog wə̀d igun bəd mbàn Ŋwiye, Dèvid ya ghò nyi inga nəb Ŋwiye, jəg ngə̀ŋ mə̀kara ze ne mbi ya nɔŋi ane aghi àfàtì imbìghè abə Ŋwiye, bə̀ nàʼ zi mɔ̀ʼɔ abə bəd mbe ne ya yaʼi tì məd, ne ìmba mə̀nɔ̀ʼɔ̀ chwi gha məyi bəd mbàn Ŋwiye koʼi ni jəg ngə̀ŋ mə̀kara ze.”
27Wì ya ghà ane, si ghà inɔb gha, “Ŋwiye ya nɔ̀ŋì aneg àzwètì mə̀Ju abə bəd. Chəyi wì ya nɔŋi yaʼ bəd abə aneg àzwètì mə̀Ju. 28Ane, Ŋwan Wə̀d, bèrì ika ka bèyi igun aneg àzwètì.”
Actualmente seleccionado:
Mag 2: MBTP
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2019 CABTAL