Jɔn 1
1
Ghɔɔmə zey i fuunə muu zə
1Tə Zə̀ kə ni kaʼ mbi, wù wey ghə tɔŋŋə nə̀ a loʼ Ighɔɔmə tə â loʼnu, Ghɔɔmə zə n loʼ ghi Zə̀ kə, Ghɔɔmə i tii zə n loʼ Kəzə̀. 2Tə n loʼ ghi Zə̀ kə tə̀ mbi ni kaʼ. 3Zə̀ kə â bɔm ufə̂ udzəm nə̀ tə tsəghə n kow wi, fə̂ kə loʼ kə way fa n mbi nə̀ a ka wi bɔm. 4Ghɔɔmə zən n fuu imuu, muu i tii zə n fuu kədaa tə ghə̂ ghə adzəm. 5Daa kə tii kə baŋa nə kələm, ləm kə tii kə u way ni nəm maʼa wi.
6Zə̀ kə â tûm bə wù loʼ, zəd i wi zə â loʼ nə̀ a loʼ Jɔn. 7Tə a bə ni bə təmi tiilə aghəə bòʼ daa kə tii kə, sey nə̀, ghə̂ adzəm a loʼ ni zow, ghə bəghəm tə̀ daa kə tii kə. 8Wù wən n wû u wi wə â way dzə daa kə tii kə, tə â bə kə ni bə təmi tiilə bòʼ daa kə tii kə. 9Wù wən tə loʼnə ndzəm ndzəm k-a-daa kə, loʼ tə wən tə bəghənə, bàŋa n kow ghə̂ ghə adzəm fa n mbi.
10À mbi â mgbaŋ bɔm wi, ambə tə bənə n mbi, ghə̂ a mbi ghə n ka koʼ keeli wi. 11Tə n bə n səə ghə̂ a wi, ghə̂ a wi ghə n ka kpii ney dzə wi. 12Ni ney nuu tsu n ghə̂ ghey adzəm ghə â kee kpii neynə wi, ndow kuum ndow n ghə̂ ghey ghə â bəghəmnə n zəd i wi, tə n fuu ghə n daʼa kə nə̀ ghə doʼo bə Waa a Kəzə̀. 13Ghə ka doʼo bə dzə waa a Kəzə̀ ghə, nə̀ Zə̀ kə ji bə ghə tə wù sɔŋtsuʼ nə jiənə waa, â ləghə tsu Kəzə̀ ni fuu ghə n muu i fəghə zə nə̀ ghə doʼo waa a wi.
14Sey Ghɔɔmə zə n doʼo bə wù sɔŋtsuʼ, bə muu bə n fəŋŋə kə saa. Tə n dii bə ndzuŋ nsə isəŋə bòʼ Kəzə̀. Saa n koʼ ghaʼ i wi, ghaʼ zən i dii bənə nə̀ a loʼ wi sɔʼi fə Waa fə, Bày khənə.
15Jɔn â təmi tiilə bòʼ wi, naʼlə shiə kɔʼɔ n dzə̀ i taw zə nə̀, “À wən loʼ wù wən mə â dzanə nə̀, ‘Wù loʼ bəghə n baa mə nə̀ tə n mə tsəghəshi, n təŋkey tə mâ doʼo zey, nə̀ ghə ka mə kam ji.’” 16Saa n keeli ndzuŋ kəm keeli kuulə bòʼ ləghə i wi zən tə khənə n kow saa naʼ idzəm. 17Zə̀ kə â fu bə kəlaŋ fa n mbi nə̀ kə tsəghə n kow Mushi, Zə̀ kə n kee fu bə ndzuŋ nsə isəŋə nə̀ kə tsəghə n kow Yeso Klisto. 18Wù loʼ ka kam kòʼ koʼ Zə̀ kə, a loʼ kə sɔʼi fə Waa wi wən tə loʼnə n səə Bày, tə dii bənə wi tə̀ saa.
Tûm ə Jɔn wù fuu n mmuu Kəzə̀ mə
(Mat 3.1-12; Mak 1.1-8; Luk 3.1-18)
19Ngəd tə ghə̂ a Təjuu a loʼ ghə n Yerosalem n tûm tsu ghə Fɔɔngili a loʼ ghə nsə ghə̂ ghey ghə fwaʼanə n ndaw Kəzə̀ i nii zə Yerosalem tə̀ Jɔn, nə̀ ghə ndòw bəb tə̀ wi nə̀, “Wə loʼ ndee?” 20Ghə n ndòw bəb ndòw, Jɔn n ka nyì naŋa dzə ghə i loʼ zə ni dza tə̀ ghə. Tə n ghɔɔmə shi ndòw tə ghə n mgbaŋ dza tə̀ ghə nə̀, “N way dzə wù wey Zə̀ kə â dza naŋa nə̀ i tûm bənu.”
21Ghə n bəb tə wi nə̀, “Wə nya loʼ ndee? Wə loʼ Elayja ə?” Tə n dza, “Ngaŋ n way dzə wi.” Ghə n dza, “Wə loʼ Wù tûm Kəzə̀ ə?” Tə n beeli ndòw ghə nə̀, “Ngaŋ.”
22Sey ghə n bəb ndòw tə wi nə̀, “Wə kee baa loʼ ndee? Dza bə wù wey wə loʼnə ghii wə, tə̀ a keeli kɔʼ fəd kə idzuu ni ndòw fuu dzəŋŋə ndow tə̀ ghə̂ ghey ghə tûmnə ghey.”
23Tə n beeli ndòw tə ghə n ghɔɔmə zey Wù tûm Kəzə̀ Ayzaya â tɔ̀ɔ naŋanə nə̀,
“N loʼ Wù wən tə buʼu bɔŋ kə n mbvən ə ntsaŋ dza nə̀,
‘Naalə na jii ə Mûkəbii nə̀ zə i loʼ tsətsəghə.’”
24À ghə̂ ghən â tûm bə ghə̂ tə Falasi. 25Sey, Ghə n bəb ndòw tə̀ wi nə̀, “Wə dza nə̀ wə way wù wey Zə̀ kə â dza naŋa nə̀ i tûm bənu, wə way Elayja, wə way soʼo wù tûm Kəzə̀, à kee loʼ kee wə fuunə ghə̂ ghə n mmuu n Kəzə̀ mə ə?” 26Jɔn n beeli ndòw ghə dza nə̀, “N fuu mmuu n Kəzə̀ nə mmuu, wù loʼ kee loʼ n fəŋŋə kə ghaa nə̀ ghaa khə way wi. 27Wù tii bəghə n baa mə̀, n ka kɔʼ kpii dzə̀ ni zii baʼ u təgow u wi.”
28Ghəə ghən adzəm â shi n Betani n nguŋ ə dzuu Jodan i loʼ zey, tɔŋŋə n luʼu key Jɔn â fuunə mmuu n Kəzə̀ mə tii.
Yeso loʼ Waa njì ə Kəzə̀
29Tsətsə wey, Jɔn n koʼ ndòw Yeso tə bəghənə n səə wi, tə n dza, “Koʼo na! À wən loʼ Waa njì ə Kəzə̀, tə ney nuulənə bəb i ghə̂ a mbi zə. 30À wən loʼ wù wən mə â dzanə nə̀, ‘Wù loʼ bəghə n baa mə̀ nə̀ tə n mə̀ tsəghəshi, n təŋkey tə mâ doʼo zey, nə̀ ghə ka mə kam ji.’ 31Wû wuŋ, mə â khə soʼo way nə̀ à loʼ wi Zə̀ kə â dza naŋa nə̀ i tûm bənu, mə â bə ni bə fuu mmuu n Kəzə̀ nə mmuu ni chi naŋa kɔʼ sə̂ a ghə̂ ghə Izree nə̀ ghə i loʼ ni koʼ keeli wi.”
32Jɔn n təmi tiilə bòʼ wi dza nə̀, “Mə â koʼ Zay kə Zow kə, kə tsuu bənə n bikighow tə̀ a loʼ kəfə̀, bə mwaa bə n kow wi. 33Wû wuŋ, mə â khə way nə̀ à loʼ wi Zə̀ kə â dza naŋa nə̀ i tûm bənu, â loʼ Zə̀ kən kə â tûmnə mə nə̀ n bə fuu mmuu n Kəzə̀ nə n mmuu, kə â dzanə tə̀ mə nə̀, ‘Wù wey wə i koʼnə Zay kə Zow kə, kə tsuu mwaa tsunə n kow wi, a loʼ wi tə i fuunə Zay kə Zow kə.’” 34Jɔn n dza guŋŋə kɔʼ tə̀ ghə nə̀, “Mə n ndzəm koʼ ghəə a tii ghə, n fa ndzəmə dza bə tə ghaa nə̀, a wən loʼ Waa Kəzə̀.”
Ngəd tə Yeso tə sə i sə tə
35Tsətsə wey, Jɔn n tey ghi ngəd tə wi tə təbəghə. 36Ambə tə koʼ tsunə Yeso tə tsəghənə, tə n dza tə̀ ghə nə̀, “Koʼo na! À wən loʼ Njì ə Kəzə̀.”
37Ngəd tə wi tey təbəghə n zow tsu ghəə ghey tə̀ dzanə, ghə n dzûmə ndòw Yeso. 38Yeso n khə̂mə kɔʼ, koʼ ndòw ghə, ghə dzûmə bənə wi, tə n bəb tə̀ ghə nə̀, “Ghaa kəŋə bə kee.”
Ghə n beeli ndòw wi dza nə̀, “Wə muu ghee a Wù dii?”
39Tə n dza tə̀ ghə nə̀, “Bə̀ na tə̀ n ndow dii bə luʼu key n muunə tii.” À n loʼ nə̀ a nya loʼ tənəŋə təkaykə n nəŋə i fənə tə. Sey ghə nuu ndòw n baa wi, ndòw koʼ tsu luʼu key tə muunə tii, doʼo zeeli ndòw fu ghi wi. 40Wù umɔʼ n ghə̂ ghey ghə â dzûmənə Yeso nghee tə̀ Jɔn dza tsu ghəə ghən â loʼ Andria, waazə Shimun Pita. 41Ambə Andria zəghə tsunə Yeso, ghə i sə̂ isə zey tə â ghəŋənə â loʼ ni ndow kəŋ ndòw waazə ə wi Shimun. Tə n dza tə̀ wi nə̀, “Ghey n koʼo wù wey Zə̀ kə â dza naŋa nə̀ i tûm bənu.” (Wù wən Zə̀ kə â dza nə̀ i tûm bənu n ghɔɔmə i Grik loʼ Klisto).
42Sey tə n ney bə Shimun n səə Yeso. Yeso n laalə ndòw Shimun dza tsu nə̀, “Wə loʼ Shimun waa Jɔn, mə i tsə̀ə tsuu zəd zə nə̀ a loʼ Sefas.” (Ghə tɔŋŋə soʼo Sefas nə̀ a loʼ Pita i diinə n ghɔɔmə i Grik nə a loʼ Kənaa).
Yeso tɔŋɔ bə Filip ghi Natanyə
43Tsətsə wey, Yeso n ghəŋə kɔʼ fə̀ŋ ə wi ni ndòw n Galili. Tə n ndòw koʼ tsu Filip dza tə̀ wi nə̀, “Dzûmə bə mə.” 44Filip â nuu bə n Bedsayda, Bedsayda â loʼ naʼ i Andria ghi Pita. 45Filip n bə koʼ bə Natanyə, dza tə̀ wi nə̀, “Ghey n koʼ wù wey Mushi â tɔɔnə bòʼ wi n màʼlə K-a-laŋ, wù wey Tûm tə Kəzə̀ tə â tɔ̀ɔ soʼonə bòʼ wi. A loʼ Yeso wù Nazaled wən ghə tɔŋŋənə bày nə̀ a loʼ Yosef.”
46Natanyə n bəb ndòw tə̀ wi nə̀, “Fə̂ kə dzuŋu kə loʼ kə loʼ ni kpaʼi shi n naʼ i Nazaled ə?”
Filip n beeli ndòw wi nə̀, “Bə̀ koʼo n wû wə wə̀.”
47Nghee tə̀ Yeso koʼ tsunə Natanyə tə bəghənə n səə wi, tə n dza nə̀, “À wən ndzəm loʼ wù Izree, tə badla koʼo tsə way ghəə ghə.” 48Natanyə n bəb ndòw tə̀ Yeso nə̀, “Wə kaʼ n ngee ni keeli mə ə?”
Yeso n beeli ndòw wi dza nə̀, “Tə̀ Filip ni bə tɔŋɔ wɔ, à mə loʼ nə̀ mə n wɔ koʼ n tənə kaʼ fə fig.”
49Natanyə n beeli ndòw wi dza nə̀, “Wù dii wə, wə̀ ndzəm loʼ Waa Kəzə̀! Wə̀ loʼ də̀ŋ kə naʼ zə Izree!” 50Yeso n bəb tə̀ wi nə̀, “Wə sey bəghəm kɔʼ kə nghee n dza bənə tə̀ wɔ nə̀ n mə koʼ wɔ n tənə kaʼ fə fig ə? Wə î nam koʼo aghəə nə̀ ghə n tsəghəshi i zən.” 51Tə n kəm dza ndòw tə̀ wi nə̀, “N dza bə isəŋə tə̀ ghaa nə̀, ghaa i koʼo bikighow kə chi shi ndownə, tsətəndəghə tə Kəzə̀ tə i kɔʼɔ, tsuu n kow Waa Weynum.”
Actualmente seleccionado:
Jɔn 1: WEH
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022 CABTAL