Jɔn 5
5
Yeso baŋŋə wù n tsəm kə mmuu kə Bezada
1Ambə ghəə ghən a tsəghə tsunə, zə̂ kə ghə̂ a Təjuu kə loʼ kə n loʼ n Yerosalem, sey, Yeso n kɔʼ ndòw fu. 2Tsəm kə mmuu kə loʼ kə n loʼ fu n Yerosalem n səə fuʼ u mbàa wey ghə tɔŋɔnə nə̀ a loʼ fuʼ u mbàa u tənjì. Ghə â tɔŋŋə tsəm kə tii kə n ghɔɔmə i Hibru nə̀ a loʼ Bezada. Tsəm kə tii kə khə uzeeli utaa. 3Ndəmə ghə̂ a dzaŋa ghə n nyə̀ŋ fu nə uzeeli, tɔŋŋə ghə̂ a fəbə ghə, ukə̀ŋŋə, nsə ghə̂ ghey wû i ghə i kpuu doʼonə. [Ghə â ləmmə nə̀ muu n fə̀n kɔʼ, 4boʼnə tsəndəghə ə Kəzə̀ â bəghə zə n bə fə̀nnə kɔʼ tsəm key. Wù dzaŋa wey tə nyi tsunə fu n tsəm key isə abə kə fə̀nnə kɔʼ nə̀, dzaŋ i wi zə n daŋŋə may abə tə mə dzaŋa kənə kee kə.]#5.4 Maʼlə u loʼ u khə way ghəllə zən. 5Wù loʼ n loʼ fu nə̀ tə n dzaŋ nə tənum nghəm ntəghə nsə num tə ifam. 6Nghee tə̀ Yeso koʼ tsunə wi, tə n koʼ keeli tsu nə̀ tə n dzaŋ n ndəmə tənum, tə n bəb ndòw tə̀ wi nə̀, “Wə ləghənu ni taw ə?”
7Wù dzaŋa wey n beeli ndòw wi nə̀, “Mûkəbii, n khə way wù tə loʼnə ni ney nyi ndòw mə nə kətsəm abə tsətəndəghə tə Kəzə̀ tə fə̀n kɔʼnə tsəm kə. Abə n nam ndownə, wù loʼ n bə nyi tsu isə n kow mə.”
8Yeso n dza ndòw tə̀ wi nə̀, “Nuu kɔʼ, wə ney kɔʼ gham fə, wə bwey ndòw.” 9Wù tii n daŋŋə taw kɔʼ, tsu ney kɔʼ gham fə wi, bwey nuu i ndòw.
Tsuʼ fey ghəə ghən â shinə tii â loʼ tsuʼ inaʼ u Təjuu. 10Sey, ngəd tə Təjuu tə nii tə n dza tə̀ wù wey Yeso â baŋŋənə nə̀, “À na loʼ tsuʼ inaʼ u saa, laŋ kə ka bəghəm dzə nə̀ wə i boʼlə bwey ghi gham fə.”
11Tə n fəd dza ndow tə ghə nə̀, “Wù wey tə mə baŋŋənə mə mə̀ dza tə̀ mə̀ nə̀ n ney kɔʼ gham fuŋ n bwey ndòw.”
12Ghə n bəb tə̀ wi nə̀, “À loʼ wù ghaa wə tə mə dzanə tə̀ wɔ nə̀, wə ney kɔʼ gham fə wə bwey ndòw ə?” 13Wù wey Yeso â baŋŋənə wi n buʼ khə daŋŋə soʼo way wù wey tə mə baŋŋənə wi, n təŋkey, Yeso mâ nii nuu nyi ndow n fəŋŋə kə aghə̂ key kə â loʼnə fu.
14Yeso n kəm koʼ tsu wù tii n Ndaw Kəzə̀ i nii zey n Yerosalem, dza ndòw tə̀ wi nə̀, “Koʼo, nya wən wə taw doʼo bənə, kə wə nə̀ kəm ghəŋŋənə ghəə a bəbə ghə, kə̂ ghəə i loʼ zə i bəb tsəghəshinə i zən i nə̂ shiənə n kow wɔ.”
15Wù tii sey koʼ keeli ndownu Yeso, daŋŋə nuu ndòw, ndòw dza ndòw tə̀ ghə̂ a Təjuu ghə nə̀ a loʼ Yeso tə mə baŋŋənə wi. 16À wən loʼ i ghi ghə̂ a Təjuu ghə â kaʼ ni fuu kaabə Yeso n chɔd wə, bòʼ nə̀, tə â baŋŋə wù n tsuʼ inaʼ. 17Yeso n fəd beeli ndòw ghə nə̀, “Bày wuŋ fwaʼa nəŋə tədzəm, n khə ni teeli fwaʼ soʼo nəŋə tədzəm.”
18À wən loʼ ghɔɔmə zən zə â faalə ghəŋə may soʼonə ghə̂ a Təjuu ghə nə̀ ghə nuu təmi kɔʼ nə̀ ghə khə ni wey wi, kuum nə̀, tə â ka kad zaʼ kə laŋ kə tsuʼ inaʼ u ghə wə, tə â dza soʼo nə̀ Zə̀ kə loʼ Bày wi, dii tsunə wi ghi Zə̀ kə ghə loʼ ighələ.
Daʼa key Waa Kəzə̀ khənə
19Yeso n dza ndòw tə̀ ngəd tə Təjuu tey nə̀, “N kûm dza bə isəŋə tə̀ ghaa nə̀, Waa way dzə ni ghəŋə dzə ghə i loʼ zə n daʼa kə wi. Tə ghəŋŋə ndòw kə ghəə zey tə koʼ neynə n wɔ Bày. N təŋkey, ghəə zey Bày ghəŋŋənə, Waa bɔɔmə ghəŋŋə ndòw kə i ghi. 20I loʼ sey bòʼ nə̀, Bày ləghə Waa, tə u diinə ghəə ghey adzəm tə ghəŋŋənə tə̀ wi. Tə î buʼu dii wi n ghəə ghə nə̀ a tsəghəshi a ghən, dzuu zə i zum ghaa tii. 21Bày zhəm dzəŋŋə bə aghə̂ nə̀ ivə, fuu ghə n muu zə, a loʼ ighələ, Waa fuu soʼonə muu zə tə̀ wù wey tə ləghənə ni fu tə̀ wi. 22Bày saʼa dzə way wù n wû u wi wə, tə fuu n naŋa daʼa kə saʼa kə kədzəm tə̀ Waa. 23Tə ghəŋə sey nə̀ ghə̂ adzəm ghə i ngɔɔmə Waa, ighələ tə̀ ghə ngɔɔmənə Bày. Wù wey tə ngɔɔmə way Waa sey ngɔɔmə soʼo way Bày wey tə tûmnə wi. 24N dza bə isəŋə tə̀ ghaa nə̀, wù wey tə zownə ghɔɔmə zuŋ zə, bəghəm fu bə tə wù wey tə tûmnə mə, î keeli muu zə itsali. Zə̀ kə kəm way ni saʼ ghə boʼnə ghə n nuu shi bə nə ivə, ghə nya khə muu i fəghə zə.
25N dza bə isəŋə tə̀ ghaa nə̀ nəŋə i bəghənu, nəŋə i tii zə n buʼ kpi. Ghə̂ a kpuu a nə̂ zow dzə̂ ə Waa Kəzə̀, a ghey ghə nə zownə, bəghəm ghə i tii zə, ghə nə keeli bə imuu. 26Nghee tə̀ Bày n wû u wi wə, fuunə muu zə tə̀ ghə̂ ghə, tə n ghəŋə nə̀ Waa i loʼ soʼo ni fuu imuu tə ghə̂ ghə. 27Tə n fu daʼa kə saʼa kə tə̀ Waa, n təŋkey, tə loʼ Waa wù sɔŋtsuʼ. 28Kə̂ dzuu i nə zumnə ghaa n ghɔɔmə zən, n təŋkey, nəŋə i bəghənu ghə̂ a kpuu ghey nə təsay a nə̂ zownə dzə̂ ə Waa Kəzə̀. 29Abə ghə nə zownə dzə̂ ə Waa Kəzə̀ zən, ghə i zhəm dzəŋŋə bə. Ghə̂ ghey ghə â ghəŋŋənə ndzuŋ, ghə i keeli imuu, abə ghə̂ ghey ghə â ghəŋŋənə ghəə a bəbə ghə, ghə i saʼ ghə, ghə tûm ndow ghə n luʼu key ghə chɔdlɔnə ghə̂ ghə a fu.”
Ghə̂ ghey ghə tiilə dzanə ghəə ghə kuum Yeso
30Yeso n dza kpiʼi ndow tə ngəd tə Təjuu tey nə̀, “N way ni ghəŋə dzə ghə i loʼ zə n daʼa kuŋ. N saʼa kə saʼ nghee tə̀ Zə̀ kə dza bənə tə̀ mə, a wən loʼ ghə i tii zə n saʼanə n jìi zey i loʼnə tsətsəghə, boʼ nə̀ n ghəŋŋə dzə way ghəə zey i kpiilənə tə̀ mə, n kee ghəŋŋə kə ghəə zey i kpiilənə tə̀ wù wey tə tûmnə mə. 31Abə n tiilə dzanə ghəə ghə bòʼ wû wuŋ, ghə way ni tɔʼ ney dzə ghəə zey n tiilə dzanə nə̀ à loʼ isəŋə. 32Wù loʼ kee lòʼnu tə tiilə dzanə ghəə ghə bòʼ mə̀, N khənu nə̀ ghəə ghey tə tiilə dzanə bòʼ mə, loʼ isəŋə. 33Ghaa â tûm aghə̂ n səə Jɔn wù fuu u mmuu Kəzə̀ mə, tə n tiilə dza bə ghəə ghey a loʼnə isəŋə bòʼ mə. 34N ghəə ghən dza dzə way nə̀ n teeli khə ni keeli wù ni təmi tiilə bòʼ mə, n ghəə ghən dza nə̀ ghaa keeli ibəghəshi. 35Jɔn â loʼ tə̀ a loʼ kədaa kə baŋanə, ghaa n saŋŋə n ghɔɔmə i wi zən zə â loʼnə tə a loʼ kədaa tə̀ ghaa n tɔŋɔ fə inəŋə. 36N kee khə ghəə a nuu ghə a tiilə dza bənə ndzoʼo wù wey n loʼnə nə̀ a tsəghəshi a ghən Jɔn â tiilə dzanə bòʼ mə. Imɔʼ loʼ fwaʼ kən n fwaʼanə, tɔŋŋə fwaʼ kən Bày fu naŋanə tə̀ mə nə̀ n fwaʼ. Fwaʼ kən n fwaʼa nə̀, tiilə dza bə aghəə bòʼ mə nə̀ à loʼ Bày tə tûmnə mə̀. 37Bày wən tə tûmnə mə̀ təmi tiilə soʼo bòʼ mə. Ghaa ka kam koʼ koʼ tsə wi, ghaa ka kam zow koʼ soʼo dzə̂ ə wi. 38Ghaa ka ney naŋa dzə ghɔɔmə i wi zə n fə̀ŋ tə ghaa n təŋkey ghaa ka bəghəm dzə tə̀ wù wey tə tûm bənə. 39Ghaa ndəmi iwû ni tɔŋɔ màʼlə K-a-zə̀ n təŋkey, ghaa moʼlə nə̀ abə ghaa ndəŋ tɔŋɔ kɔʼnə sey ghaa i keeli ghəə zey ghaa khə ni teeli ghəŋə ni keeli muu zə itsali zə, loʼ sey nə̀ màʼlə K-a-zə̀ kən ghaa tɔŋŋənə baa tiilə dza bə aghəə bòʼ mə. 40Ghaa khə may ghəə ghən, nam tuu ni bəghəm tə̀ mə nə̀ ghaa keeli imuu.
41N ləghə dzə way nə̀ ghə̂ a fuu mə n kɔʼlə mə. 42N kee khənu fə key ghaa loʼnə ghii kə, n khənu nə̀ ghaa ləghə way Zə̀ kə n fə̀ŋ tə ghaa. 43Mə n bə n zəd i Bày wuŋ, ghaa ka mə kpii ney. Abə wù nuu bənə n ngəŋ ə wi, ghaa i kpii ney wi. 44Ghaa sə̂ loʼ ni bəghəm ngee abə ghaa ləghənə nə̀ ghə̂ ghə i fuu bə kɔʼlə mə tə̀ ghaa, kəŋə ndòw way kɔʼlə mey n nuu bənə n wɔ Zə̀ kə n nəŋə wi. 45Kə̂ ghaa nə̂ moʼlənə nə̀ a i loʼ mə, mə i dzanə tə̀ Bày nə̀ ghaa n bwu laŋ kə. Wù wey tə i dzanə tə̀ Bày nə̀ ghaa n bwu laŋ kə, loʼ Mushi wən ghaa â gaʼ fə̀ŋ tə ghaa tə n kow wi. 46Abə ghaa mə ndzəmə bəghəmnə tə̀ Mushi, ghaa mə bəghəm soʼo tə̀ mə̀, kuumnə ghəə ghey Mushi â tɔ̀ɔ naŋanə, tə â tɔ̀ɔ naŋa ghəə ghuŋ. 47Abə ghaa â way ni bəghəm ghəə ghey tə tɔɔ naŋanə, ghaa sə̂ loʼ ngee ni bəghəm ghɔɔmə zuŋ ə?”
Actualmente seleccionado:
Jɔn 5: WEH
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022 CABTAL