Lukas 14
14
Yeso baŋŋə wù n tsuʼ inaʼ u Təjûu
1N tsuʼ inaʼ u ghə̂ a təjuu u loʼ wə, Yeso n bweyyə ndòw n ndaw Falasi u nii u loʼ wə ni ndòw zə, ghə̂ ghə n tɔʼɔ tsìi laalə wi. 2Wù loʼ n loʼ fu n sə kə Yeso nə tə dzaŋa dzaŋ i mowwə zə. 3Yeso n bəb ndòw tə ghə̂ a tə Falasi ghə nsə ghə̂ a dii ghə ulaŋ ghə nə̀, “Laŋ kə saa kə bəghəmnu nə̀ saa i baŋə wù n tsuʼ inaʼ u saa ə nkee kə dii way sey ə?” 4Ghə n ləghə way ni beeli, sey, Yeso n mɔm ndòw wù dzaŋa wey, tə n taw doʼo bə, tə n zəghə ndòw wi nə tə nuu ndòw. 5Tə n bəb tə ghə nə̀, “À loʼ wù ghaa u ghaa wə abə waa wi nkee mbɔŋ ə wi bwù nyi tsunə n buʼ kə mmuu, tə i doʼlənə nə̀ tə ka shiələ nuu tən kɔʼ n tsuʼ fə tii fə, abə à tsəm loʼ kə n tsuʼ inaʼ a?” 6Ghə n ka nam beeli wi.
Ingɔɔmə n luʼu tə̀ u dzəŋi
7Yeso n koʼ tsu nə̀ ghə̂ ghey ghə â naʼanə ghə nə̀ kədzəŋi, ghə sày ndòw kuu u nii wə ni doʼo, sey, tə n dza ndow ghə n zəzəə fə fənkəfən fə nə̀, 8“Abə wù naʼa wɔ n zə̂ kə ney zə iwû, kə wə̀ nə say ndòw dzə nə kuu kə nii kə, bòʼ nə̀, i loʼ ni doʼo nə̀ ghə n wù loʼ naʼa soʼo tə tsəghəshinə wɔ. 9Sey, wù wey tə mə naʼanə ghaa i bə n səə wɔ, tə i dza, ‘fu tsu kuu kə tə wù wən.’ Sey, wə̀ i khə ni ndòw doʼo n kuu kə təghə kə, n tow kə dədlə kə. 10Abə wù naʼanə wɔ, fəd ndòw doʼo tsu n kuu kə təghə kə, sey nə̀, abə wù wey tə mə naʼanə wɔ koʼ tsunə sey, tə i dza nə̀, ‘Nu kɔʼ fey n fə̂, wə doʼo bə fa n kuu kə nii kə.’ Sey, a i ngii loʼ nkɔʼlə tə wɔ n fəŋŋə kə aghə̂. 11Təŋkey, wù wey tə kɔʼlənə wû u wi wə, tə i fədlə keeli ulən, abə wù wey tə kɔʼlə way wû u wi wə, ghə i kɔʼlə naŋa kɔʼ wi.” 12Sey, tə n dza ndòw tə̀ wù wey tə mə naʼanə wi nə̀, “Abə wə̀ khənə zə̂ kə, ka kali naʼa kə fə ghə ghə̀, waazə ghə ghə̀, tyimghə ghə, nsə ghə̂ a kuum ghey ghə muu nə n kɔli wə, bòʼ nə abə wə ghəŋənə sey, ghə i mbɔŋɔ naʼa dzəŋŋə bə soʼonu wɔ, sey zə i loʼ nə ghə n wɔ tsə dzəŋŋə. 13Fət tɔŋɔ bə ghə̂ a laa ghə, ukəŋŋə nsə ghə̂ a fəbə ghə, 14kùmnə ghə i way ni tsə dzəŋŋə wɔ, sey, wə nə keeli ibuulə, abə ghə̂ ghey ghə loʼ tsətsəghə nə zhəm dzəŋŋə bənə nə ivə.”
Zəzəə fə fənkəfən kùm zə̂ kə nii kə
(Mat 22.1-10)
15Ambə ghə zow tsu nə sey, wù loʼ n fəŋŋə kə ghə̂ ghey ghaa zəənə fu n dza tə Yeso nə̀, “I sey dii nə̀ buulə zə î ngii loʼ tə wù wey tə loʼnə n zə̂ key n fɔɔ u Kəzə̀.” 16Yeso n dza tə wi nə̀, “Wu loʼ â khə Kəzə̀, tə n naʼa ndow ndəmə aghə̂. 17Ambə nəŋə i kpii tsu nə̀, tə n tûm shi ndòw wù kəfwaʼ a wi nə tə tɔŋŋə bə ghə̂ ghey tə â naʼanə nə̀, ‘Bəghə na, a n bayyə naŋa may ghəə ghə.’ 18Ghə̂ ghey adzəm ghə n fəd kaʼ ni tiilə dza zuŋ key ghə way ni ndow fu. Wù sə isə wey n dza, ‘N sa kuʼlə zuu kɔʼ kəluʼu, n dza n ndòw koʼ, kələ wɔ, zowkeeli tsu mə.’ 19Wù loʼ wey n dza, ‘N sa kuʼlə zuu kɔʼ mbɔŋ tə vəllə tə ighəm n sa dza n soʼ mɔm koʼ. Kələ wɔ, zowkeeli tsu mə.’ 20Wù loʼ wey n dza, ‘N sa kuʼlə ney kɔʼ wey, a wey loʼ ghə i tii zə n way dzə ni bə.’ 21Sey wù kəfwaʼ wey n dzəŋŋə ndow, bə dza bə ghəə a tii ghə adzəm tə̀ mûkəbii a wi. Fəŋ n ngii fə̂ mûkəbii wey, tə n tûm shi ndow wù kəfwaʼ wey dza, ‘Ndow n faabə tə jii nsə n jii tə ukɔli tə inaʼ, wə tɔŋɔ kaabə bə ghə̂ a laa ghə, ghə̂ a fəbə ghə nsə kəŋŋə wə.’ 22Ghab kə n ka shi, wù kəfwaʼ wey n dzəŋŋə bə, dza tə̀ mûkəbii nə̀, ‘Mûkəbii, mə n fwaʼ ghəə, ghey wə mə dza nə̀, a kee loʼ kə nə̀, buʼ kə nam loʼnu n ndaw.’ 23Mûkəbii wey n dza tə̀ wù kəfwaʼ a wi wey nə̀, ‘Ndòw tɔŋɔ kaabə bə ghə̂ ghə n jii nsə n jii tə mbvən, nə ghə bə, tə̀ ndaw zuŋ luu kɔʼ. 24N dza bə tə̀ wɔ nə̀, wù umɔʼ n ghə̂ ghey mə â naʼanə î gaʼ way fə kə fa n ndaw.’”
Ghə zey wù loʼ ni ghəŋŋə ni doʼo dzûmə ə Yeso
(Mat 10.37-38)
25Nɔɔ wə aghə̂ wə â bwey bə n baa Yeso, tə n khəəmə dza tə̀ ghə nə̀, 26“Abə wù dza i doʼo dzûmə wuŋ, tə khə ni ləghə mə tsəghəshi jìi zey tə ləghənə bày wi ghi này wi, wey wi ghi waa a wi ghə, nsə waazə a wi ghə, tə buʼ ləghə mə tsəghəshi jìi zey tə ləghənə wû u wi wə tii. Nə a way sey, tə way ni doʼo dzûmə wùŋ. 27Wù wey tə ka bəghəm ni boʼo zat kə fəkaʼ kə wi, tə dzûmə mə n ghii kə, tə way dzə ni doʼo dzûmə wùŋ. 28Abə wù dza i bəghə ndaw zey i doʼo kuulə kɔʼ n tow kə ndaw, n dza tə bəghə tə n kəŋ keeli shi kɔʼ dzə nə fə key tə khənə, kə î kɔʼɔ kpiinu ni mayyə fwaʼ kə tii kə ə? 29Təŋkey abə tə maŋ kaʼ ndòw nə fwaʼ kə, sət tsu tsə̂ kə ndaw, kəm way ni mayyə ndaw, ghə̂ ghey ghə koʼonə ghəə ghey tə ghəŋənə, ghə i kaʼ ni tsoʼ wi, 30dza, ‘Wù wən â kaʼ ni bəghə ndaw, tə n kəm way ni mayyə fwaʼ kə tii kə.’ 31Nkee abə də̀ŋ kə dza i soʼ tsam ghi də̀ŋ kə loʼ kə, ndza tə doʼlə tsunu tə n mòʼlə tsu nə̀, abə tə khənə sawgoʼ tə təkam ighəm, tə loʼnu ni təm baalə tsam ghi də̀ŋ kə loʼ key n sawgoʼ tə wi tə təkam wû u wû ə? 32Abə tə koʼ tsu nə tə way ni təm baalə tsam i tii zə, tə î daŋa tûm ndòw aghə̂ isə nə də̀ŋ kə loʼ key nam loʼ naynu, nə ghə ndòw bayyə tsu ghəə a tii ghə ghi wi. 33Yeso sey dza ndownu tə ghə nə̀, Abə ghaa way ni tuu maʼa fə u ghaa udzəm, ghaa way ni doʼo soʼo dzûmə tuŋ.”
Tsoʼ mey n kuŋ shi dzənə
(Mat 5.13; Mak 9.50)
34“Ntsoʼ n dzɔbənu abə n tɔbənə, a kee loʼ kə nə̀, abə n kuŋ shi tsunə, mə kəm khə way fwaʼ kə. 35N kəm dzɔbə way ni kuu nə təzub n kee nə kəduŋ, N nya loʼ kə ni feeli maʼa. Abə wù khənə tuŋŋə wə ni zow, tə zow.”
Actualmente seleccionado:
Lukas 14: WEH
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022 CABTAL