लुका 14
14
येसुऎ नाचामॆ डिना नुबक्मिॽमिम्पा
1इॽया नाचामॆ डिना एक्क फारिसिचिम् टुङ्घङ्पाऎ येसु खोम् खिम्पि चामा चासि सेःरु हाङ् येसु आक्कमि खिम्पि चामा चासि खारा। आक्रल येसुऎ यायेॽमाऎ लोमिम्पा रक्न पाइनि हाङ् काइखॆमिॽमा हेऎरु कामानुङ् आक्खाचिऎ खो चोप्मॆ पाइटुचि। 2आक्कुबि लाङ् हुक् होम्बक्मिम्पा एक्क याॽमि येसुमि कॆक्पि टाआ। 3हाङ् येसुऎ खो चोप्खुबा आक्खा मोसामि यायेॽमा चिन्खुबाचि हाङ् फारिसिचि सिमुचि, “काङा लोङानॆ, नाचामॆ डिना टुक्मावा नुबक्मिॽमा नुऎ रु फॆन्नॆ?” 4टर आक्खाचि माङ्स मायामुमि। मसॆ येसुऎ आक्क टुक्खा डिन्चाउहाङ् नुबक्मिट्टु हाङ् पाङ्हाङ्सु। 5हाङ् येसु आक्खाचि पोट्टा एम्पकाहाङ् लोसुचि, “माल नाचामॆ डिना आन्नामि चाचा आठावा पिक्चि रुम्रुम्पाबि रुम्सिआमि हाङ्ग आक्रलॽन लाबकाम्निनॆ?” 6टर आक्खाचिऎ माङ्स खानावाँ माऎन्हिसुचि।
येसुऎ टुङ्घङ्पा हाङ् टाबाङ्चि चिम्मिम्पा
7आक्क भोजाबि टाखुबा होइढा टाबाङ्चिऎ उम्चि टाङ्पेॽन डिड्ढा डिड्ढा पेन्ठाम् ठाल सॆःक्से पेम्मिम्पा खाङ्टकुहाङ् येसुऎ आक्खाचिम् लागि एक्क काठा इःसु, 8“आन्ना भ्यामि भोजाबि खॆॽमार टाङ्पॆॽन सॆःक्से टुङ्घङ्पा पेन्ठाम् ठालबि आपेनानॆ। मान्ठाभनॆ आक्क ठालबि पेम्माम् लागि होइक आन्नाबाङ् सङ्क ढ्या टुङ्घङ्पा भाट्टेरबि सेःॽमिम्पा लि। 9टुङ्घङ्पा आक्क भोजाबि टाः हाङ् हिप्पान सेःखुबॆ आना गर लोक्, ‘आना पेन्डानॆ ठालबाङ् पःगॆ हाङ् ग याॽमिमि लागि ठाल याइपिटॆ।’ आक्रल आनॆ होइढा टाबाङ्चिम् ङारिङ्पि ङेसिसे हारारा लिमानुङ् आक्क ठाल याइमा लॆ हाङ् चोब्बाङ् मिःछुॽपा ठालबि पेम्मा सिःक्ना। 10टर आना भट्टेरबि खॆनार चोब्बाङ् मिःछुॽपा ठालबि पेनॆ, आना सेखुबा टाहाङ् आना मिःछुॽमा ठालबि पेम्मिम्पा खाङ्टहाङ् लोक्, ‘लाङ्काम् आनाम् लागि काम्नुऎ ठाल मुबिडाना, डाबॆहाङ् आक्कुबि पेनॆ।’ आक्रल चोब्न टाबाङ्चिम् ङारिङ्पि आनाम् निङ् ढ्या लिक्। 11मान्ठाभनॆ आसॆ चाइ टाङ्पा टुङ्घङ्पा मुकु खो निवाँहाङ्ऎ मिःछुॽमा मुकु, हाङ् आसॆ चाइ टाङ्पा मिःछुॽमा मुकु खो निवाँहाङ्ऎ ढ्या मुकु।”
12येसुऎ टाङ्पा सेखुबा लोसु, “आनॆ भोजा टिमार वेन्डा सिन्डा आना स सेहिखुबा टाङ्पाम् लाङ्काम्चि, बुबुनुसाचि, टाङ्पाम् याॽमि सिक्मिहाचि हाङ् गॆअङ्मॆअङ्हा चासुम्टाङ्पाचि टेःॽन सेःॽमा फॆन्नि। मान्ठाभनॆ आनाम् सिङि फङ्माम् लागि खोचिऎ सङ्क आना सेरुक्मि। 13टर भट्टेर टिमार माङ्स माआमिहाचि, लाङ् हुक् फॆम्मिनिहाचि हाङ् मिक् ऎखाङ्खुबाचि सेःरेचॆ। 14हाङ् आनॆ आसिका टक्चाकुना। मान्ठाभनॆ आक्खाचिनुङ् माङ्स माऎसॆ आनाम् सिङि फङ्हिसुचिनि। टर निवाँनेन् याॽमिचि सिखेम्पाबाङ् हिङ्पॽमार निवाँहाङ्ऎ आनाम् चोब्न सिङि ऎम्पि।”
भोजाबि सेःॽमार आटाखुबा टाबाङ्चि
(मट्टि २२:१-१०)
15येसुमि खानावाँ खेमुहाङ् खोनुङ्न चासि पेम्मिम्पा एक्कसॆ येसु लोसु, “निवाँहाङ्मि हाङ्डाम्पि भोजा चासि पेन्खुबाचि डिरिक् आसिका टक्चामिम्पाचिन।” 16येसुऎ ग काठा इसे खानावाँ ऎम्पिटु, “एक्क टुङ्घङ्पाऎ ढ्या भोजा लॆःॽमा परकु हाङ् आक्क भोजाबि डिरिक् टाबाङ्चि सेःहाङ्सुचि। 17भोजा चामॆ बेला साप्पु हाङ् टुङ्घङ्पाऎ खोम् योम्पक् मुखुबा टाबाङ्चि गर लोसॆचॆ कामानुङ् पाङ्हाङ्सु, ‘भोजा चामॆ बेला साप्पु, टाआनॆ।’ 18टर आक्खा सेःहाङ्पा चोब्न टाबाङ्चिऎ एक्क एक्क खानावाँ इःसे सोम् आखेरो काङा ऎटाहिखुबा लिसिङ् कामानुङ् खानावाँ फेम्पकुचि। याॽलऎसॆ लोसु, ‘काङॆ हहन एक्क रोपा इन्डुङ्, काङा आक्क खाङ्सि खॆॽमा लॆःॽङा, सोम् आखेरे, मसॆ काङा आनाम् भोजाबि टाहिङानि।’ 19होइकसॆ लोसु, ‘हहन ङाचि हाल पिक् लाटॆडुङ्चि हाङ् आक्खाचि ऎॽवाकॆ काम्नुॽमिहा कामानुङ् चेॽमाहाङ् खाङ्माम् लागि काङा खॆॽमा ठाबाक्डिङ् मसॆ सोम् आखेरे काङा टाहिङानि।’ 20होइकसॆ स लोसु, ‘कॆ हहन खिम्टाङ्मा लाटॆडिङ। मसॆ काङा खॆॽहिङानि।’ 21योम्पक् मुखुबा ऎन्टाआहाङ् टाबाङ्चिऎ इमिम्पा चोब्न खानावाँ उम् टुङ्घङ्पा इटु। हाङ् आक्क टुङ्घङ्पा खोसॆ सेःहाङ्पा टाबाङ्चिनुङ् सोम् खेस्से उम् योम्पक् मुखुबा लोसु, ‘सॆॽल खारॆहाङ् इग हाटाबिऎ लाम्फुबि चुखुबा माङ्स माआमिहाचि, टुक्खाचि, लाङ् हुक् फॆम्मिनिहाचि हाङ् मिक् आखाङ्खुबाचि सेःॽलाऎचॆ।’
22“योम्पक् मुखुबॆ योम्पक् लुक्पिटुहाङ् टुङ्घङ्पा लोसु, ‘आनॆ लोसिन्टॽन चोब्न सेःटॆटुङ्चि टर ह सङ्क पेन्ठाम् ठाल चुढ्याङ।’
23“मसॆ होइखेपा सङ्क टुङ्घङ्पाऎ योम्पक् मुखुबा लोसु ‘हाटाबाङ् होइढा गॆअङ्मॆअङ्हा लाम्फुबि खारॆहाङ् चुॽमिम्पा चोब्न याॽमिचि भोजाबि खॆॽमा कामानुङ् लेम्से लाटॆटॆचॆ। हाङ् काम भाट्टेरबिऎ चोब्न पेन्ठाम् ठाल चेप्खॆटुर। 24कॆ आन्ना लोकानि, याॽल सेःॽमार ऎटाखुबा आसॆस काम् भोजा सेप्टकुचिनि’।”
टिङ्खुबाचिऎ मुमा लॆऎ योम्पक्
(मट्टि १०:३७-३८)
25इॽया डिरिक् याॽमिचिऎ येसु टिङ्मे सिसुचि। येसु आक्खाचि चुक्मिहाबि ऎम्पकाहाङ् लोसुचि, 26“आसा कामि टिङ्खुबा लिमा मिनुकु, खोसॆ टाङ्पामि आपा आमा, पासाचि, बुबुनुसाचि, नानानुसाचि हाङ् टाङ्पाबाङ् सङ्क डिरिक् काङा नाम्नाम् पिसिॽमा लॆःॽङानि हाङ्टेःॽन खो काम् टिङ्खुबा लिमा हेकु। 27हाङ् टाङ्पामि कुरुसा टाङ्पॆॽन खिन्से काम् डॆङ्डॆङ् लाम्ढुखुबा टेःॽन काम् टिङ्खुबा लिहि।
28“आन्नॆ एक्क टक्भॆऎ खिम् हेॽमा ठाबाकाम्नि हाङ्ग आक्क खिम् हेॽमार पाबुऎ याङ् टाङ्पाबि चुऎ रु माऎ कामानुङ् याॽलन काम्नुःर मिॽलामा लॆ, हॆॽनॆ? 29हॆॽनॆ हाङ्ग खोसॆ हेॽमा ग हेप्पकु टर मायॆॽहिसु हाङ्ग, खाङ्खुबा चोब्न याॽमिचिऎ खो गरहाङ् इचाकुचि, 30‘ग याॽमिऎ हेॽमा ग हेप्पकु टर मायॆॽहिसु।’ 31अठावा एपङ्बङ् टिलिङ्गा चुखुबा एक्क हाङ्ऎ होइक हिपङ्बङ् टिलिङ्गा चुखुबा हाङ् नुङ् चुङ्मा सिट्टा हाङ्ग काम् एपङ्बङ् टिलिङ्गाऎ आक्खा हिपङ्बङ् टिलिङ्गाचि हेचोहिकुचॆ रु हेचोहिसुचिनॆ कामानुङ् याॽलन काम्नुःर मिॽमा लॆ हॆॽनॆ? 32खो चुङ्हिनि हाङ्ग खोनुङ् चुङ्मा ठाबाक्डॆ हाङ्बि कानि टङियॆ कामानुङ् खोम् खानावाँ टाङ्पाम् पाङ्कुचाबाङ् चुङ्बक्माबाङ् याॽलन पाङ्हाङ्कु। 33आक्रक्न आन्ना चोप्पसॆ काम् टिङ्खुबाचि लिमा परक्डानिहा रु हॆॽनॆ कामानुङ् काम्नुःर मिम्मा लॆ, मान्ठाभनॆ आसॆ काम् लागि चोब्न ठका याइहिसुनि आक्क काम् टिङ्खुबा लिहिनि।”
युम्मि काठा
(मट्टि ५:१३; मारकुस ९:५०)
34हाङ् येसुऎ आक्खाचि ग काठा लोसुचि, “युम् काम्नुऎन, हाङ् युम्मि युम्पान माखारा हाङ्ग माङ्ऎ आक्क युम्पा मुमॆ? 35आक्कसॆ बाखाबि सङ्क योम्पक् पिॽनि हाङ् मोल्लबि सङ्क योम्पक् पिॽनि। हाङ् याॽमिचिऎ आक्क मरॽन कहाङ्कुचि। आसाम् नाबाक् चुः खोसॆ खेमुर!”
Actualmente seleccionado:
लुका 14: LBR
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023, Wycliffe Bible Translators, Inc. and Nepal Bible Society