Alukasɨ 13
13
Nyɛʼ Mɨbvu ɨmən kə nɨ Kfokə
1A bé a nyom məwa lá, ɨbɛn bə tsɛrə bɨ tsí ɨwu ba bɨ fɨ́ʼtɨ́nɨ́ a mbó Yeso anu a ɨbɛn bɨ Galili ba Branto a láʼnɨ́ njwítɨ́ mbáʼ bɨ kɨ́nə́ ngǎ mɨtsuʼnɨ mɨ atú a mbó Ŋwi ə. 2Yeso a chwɨ́gɨ́ a mbó bo ngə́, “Mbɨ́ʼ ngə́ bɨ zhwítɨ́ ɨbɛn bɨ Galili məba a nye ndóm məwa, nɨ kwaʼtɨ ngə́ a nɨ alɨgɨ ngə́ bo bé ngaŋ ngɨ mɨbvu ntsa abvuʼ a ɨbɛn bɨ Galili le? 3Ngáŋ tsɛʼ a nkənu ə! Ma tiʼə soŋə a mbó bən ngə́ be nɨ tú bəŋ mɨntəm ɨmən a nye mɨbvu ɨmən ɨ tsi a bagɨ Ŋwi, muŋ nɨ ghɨ kfókɨ́ bɨtsum tso bo ghe. 4Nɨ mɨ soŋ ngə́ ke mbɨ́ʼ ɨbɛn ba nɨghúm ntsɔb nɨfə̧ a Silom mbáʼ kɔ́ʼtɨ́ wa a kúmnɨ́nɨ́ ɨ shiʼ njiʼ lá le? Nɨ kwaʼtɨ ngə́ məzen a nɨ alɨgɨ ngə́ bo məba bɨ bɨ́gɨ́ ntsa abvuʼ a ɨbɛn ba bɨ tsínɨ́ a Yerosalɛm le? 5Ngáŋ tsɛʼ a nkənu ə! Ma tiʼə soŋə a mbó bən ngə́ be nɨ tú bəŋ mɨntəm ɨmən a nye mɨbvu ɨmən ɨ tsi a bagɨ Ŋwi, muŋ nɨ ghɨ kfókɨ́ bɨtsum tso bo ghe.”
Nɨgham nə Nanɨ Mbɨ́ʼ Atɨ a Figɨ tɨ Konɨ Mɨntam ə
6Yeso a tíʼ ná nɨgham nen a mbó bo ngə́, “A bé a nkfu tse, ŋwɔn tse a tsí ɨwu nɨ atɨ a figɨ a mu ɨshwom mɨntam mɨ atɨ ɨyi ɛ. A kə́ ngěn ntsaʼə a figɨ lá ndáʼ keʼ mɨntam mə tse a mbyě ghe. 7A tíʼ sóŋ a mbó ndəŋtɨ ɨshwom ɨyi wa ngə́, ‹Ze azo, atú ɨlom tsi tárə́ ma yiŋə ntsaʼə a figɨ a shwúrɨ́ atɨ a figɨ zen lá ndáʼ kaʼ mɨntam mə tse ɨwu ze. Warɨ a zɛrə maʼ a ɨshe! A tsi nɨ ntɛmə ɨ dzɨənə ɨshe zen adaŋədaŋə lá ngə́ ke le?› 8Lá ndəŋtɨ ɨshwom wa a chwɨ́gɨ́ ngə́, ‹Nyɛʼtɨ ɨwu ə, a tə̧, tsɛʼ atú táʼ alom ə; ma mɨ toŋ ɨ karɨsɨ a zɛrə, ɨ nɨŋ anyagɨ ɨwu ə. 9A bé ngə́ mɨntam konɨ ɨwu nguʼ, a bɔŋ be tɨsɨŋə; a tú lá be, a nyom məwa o tiʼ ngwarɨ ɨ maʼ a ɨshe.›”
Yeso a Tsuʼ a Mangye Mbyinkɨnɨ a Njwi Alaʼ Ŋwi ə
10A Njwi Alaʼ Ŋwi zɨ tse, Yeso a kə́ sóŋə́ anu a Ŋwi a mu ndáŋwi bə Yuda ghe. 11Mangye tse ɨwu a tsí nɨ azhwi zə tɔmnɨnɨ za a ghɨ́nɨ́ a ghǒnə atú ɨlom nɨghúm ntsɔb nɨfə̧; ndzum ŋəmnɨ a chi keʼ shiŋ ayi ntɛm ngə́ tsáŋ ə. 12Yeso a zɛnə ayi lá, ɨ soŋ wəmbo ngə́, “Mangye, awa o shwetɨnə a mbó nɨghɔ ɨno!” 13Yeso a nyɔ́ŋ mbó ɨmyi wə ɨnye, nkfu zi mɔ́ʼɔ́ mangye wa a shiŋ ayi ntɛm ngə́ tsáŋ ntiʼ mbontɨ a Ŋwi ə.
14Ntɔŋ atú a ndáŋwi bə Yuda za ɨ lwí ngə́ Yeso a tsúʼ a ŋwɔn a Njwi Alaʼ Ŋwi, a tiʼ soŋ a mbó ɨbɛn ba ngə́, “Nɨ tsi nɨ ɨfaʼ lá atú njwi tsi ntugə ghe. A nɨ ngyíŋə́ a mu njwi mətsa á bɨ ntsúʼə awɨŋ ə, lá keʼ Njwi Alaʼ Ŋwi be!”#13:14 Ɛksədɔsɨ 20:9-10
15Maʼmbyí a chwɨ́gɨ́ wəmbo ngə́, “Bɨŋ ngaŋ ngɨ ɨtsi! Nɨ se ndɔ́gɨ́ mbɔŋ ɨtsən abɔʼnɨ bɨjakashi ɨbən á bɨ ngěn nǒ nkyi a Njwi Alaʼ Ŋwi le? 16Lə nɨ mɔn ɨlə̌ Abraʼm mbáʼ Satan a korɨnɨ ndɛn a mu nɨghɔ atú ɨlom nɨghúm ntsɔb nɨfə̧; bɨ lɛn tɨ kyɛtɨ mɨnkɨ men wə ɨnye a Njwi Alaʼ Ŋwi le?” 17Achwɨgə zen a nɨ́ŋ adɨrətú a nye ngaŋ kɨban ɨchi ɛ, lá abvuʼ a ɨbɛn a tíʼə ndórɨ́kə́ mbɨ́ʼ ɨnu tsɨ tsanɨnɨ tsa a ghɨ́nə́.
Nɨgham nə Nanɨ Mbɨ́ʼ Ndzaŋ Ɨsa ghe
(Mat 13:31-32; Mar 4:30-32)
18Yeso a bítɨ́ ngə́, “Nɨfɔ nɨ Ŋwi fi lá ake le? Be ma fɨʼnɨ a nɛrə lá a nye ake le? 19Nɨ be lá tso ngə́ ŋwɔn a lɔgɨ ndzaŋ ɨsa mbi a mu ɨshwom zɨə. Ɨ kwi nkɔʼ ntiʼ mbe atɨ, bɨsɨ́ŋ tiʼə ngwvǔ nkə ɨtsa a mu mbó ɨmyi ɛ.”
Nɨgham nə Nanɨ Mbɨ́ʼ Mbɛgə ghe
(Mat 13:33)
20Yeso a bə́ nkwiʼ mbitɨ ngə́, “Ma mɨ fɨʼnɨ nɨfɔ nɨ Ŋwi bo ake le? 21Nɨ be lá tso ngə́ mangye a lɔgɨ mbɛgə ntɔbɨ a mu ɨtú ɨkáŋ abán tsi tárə́, abán za a tɛm ɨ fugɨ nkɔʼə.”
Ntsundá wu Shwɛrɨkɨnɨ ə
(Mat 7:13-14, 21-23)
22Yeso a kə́ ngěn a Yerosalɛm lá, ntsǎ a mu ntáʼmbagə ɨnɔ ɨnɔ bo bɨ ɨtóm tsɨ ghaʼtɨnɨ ɨ soŋə anu a Ŋwi a mbó ɨbɛn ə. 23Ŋwɔn tse a bítɨ́ ayi ngə́, “Tə̧, njingə ɨloŋ wa a ghɨ dzɨ́ tsɛʼ ɨbɛn a nɨ́sháŋnɨ́ le?”
Yeso a chwɨ́gɨ́ wəmbo ngə́, 24“Kɨ́rɨ́ adaʼ azo a ntsǎ a ntsundá wu shwɛrɨkɨnɨ; mbɨ́ʼ ngə́ ɨbɛn bə ghaʼnɨ, bɨ ghɨ lonɨ ntsǎ ɨwu, lá ɨ ghuʼ kɨ́káŋ ə. 25Mboŋndá a ghɨ lo atɨ́ ɨ vwuʼnɨ ntsundá; a nkfu məwa á nɨ tiʼ ntɛm abyɛn nkwɛntɨ ntsundá, ɨ sóŋə́ ngə́, ‹Ŋaʼ ntsundá a mbó bɨgɨ, a tə̧!› A mɨ chwɨgɨ a mbó bən ngə́, ‹Ka ma zhi aghan ndóm wa nɨ lonɨ ɨwu ə!› 26A nyom məwa á nɨ tiʼ mbyigɨ ngə́, ‹Bɨgɨnə kə́ ndzɨ́nə́ nkə́ nǒ ghe; o sóŋ anu a Ŋwi a ntáʼmbagə bɨgɨ ə!› 27Lá a mɨ kwiʼ kwatɨ chwɨgɨ ngə́, ‹Ka ma zhi aghan ndóm wa nɨ lonɨ ɨwu ə. Nɨ lotɨ a mbyɛn me, bɨŋ ngaŋ ɨbɨgɨntəm!› 28Nɨ ghɨ búgɨ́ be tɨ́sə́n ɨ kfúrɨ́nə mɨsɔŋ ɨmən mbáʼ nɨ zɛnɨ Abraʼm, Isak abɔʼnɨ Yakɔb nɨ ntóm Ŋwi ɨtsum a mu nɨfɔ nɨ Ŋwi, lá á bɨ baŋnɨ ngwaŋ awən abyɛn ə!#13:28 Matyo 8:11-12 29Ɨbɛn ghɨ lo a sáʼnyom bo ntsonyom, ɨ lo a mbuʼətú bo mbuʼntɨŋ, ɨ shiʼtɨ tsi a ɨshe a nɨdorɨ a mu nɨfɔ nɨ Ŋwi ə. 30A nyom məwa, á ɨbɛn ba, tɨtsɔŋnɨ, bɨ tsanɨ mbyi tiʼ bɨtsɨrɨ bɨ ndzum, á bɨtsɨrɨ bɨ ndzum tiʼ bɨtsabɨmbyi ɛ.”#13:30 Marɨkusɨ 10:31
Akɔŋnɨ a Yeso a nye Yerosalɛm a Ghɨ Wɛrə Bugə
(Mat 23:37-39)
31Tsɛʼ a nyom məwa bə Farisao bə tse yén a mbó Yeso ɨ soŋ wəmbo ngə́, “O tsi nɨ ndǒ adiʼ wen ɨ ghɛn adiʼ adaŋ, mbɨ́ʼ ngə́ Ɛrɔd a lǒ njwitɨ gho ghe.” 32Yeso a chwɨ́gɨ́ a mbó bo ngə́, “Ghɛnə ngɛn ɨ soŋ a mbó nɨmaŋ na ngə́: ‹Ma fɨ́gɨ́ bɨdzɨŋ nkə́ ntsǔʼ ɨbɛn ɨ sɨŋə bo ɨzo, a lo mbe njwi ɨyi á ma mɛtɨ ɨfaʼ ɨghə.› 33Lá ma mɨ zagɨ tsi a ndóm ɨ sɨŋə, ɨzo, abɔʼnɨ njwi ɨyi; ka a kuʼnɨ ayi ngə́ á bɨ zhwitɨ ntom Ŋwi adiʼ adaŋ ntsa a Yerosalɛm ə.
34Yerosalɛm, Yerosalɛm! O zhwítɨ́ ntóm Ŋwi, ntumtɨ bɨlo bɨ ntom ba Ŋwi a tsagɨnɨ a mbó bən nɨ mɨngɔʼ njwítə́ ghe! A nɨ nkfu tsi sɛʼ tsa ma lɔnə a nkyɛ́m ɨbɔ ɨbən a mu mbó me, tsɛʼ tso mbáʼ má ngúbɨ́ a ghótɨ́nɨ́ ɨbɔ ɨbyi a mu mɨbabɨnɨ ɨmyi, lá nɨ keʼ bemə! 35Ma lan, njwuʼ zɨŋ mɨ tiʼ tɛm tɨ bɨnkyɛ́m ə. Ma sóŋə́ a mbó bən tsɛʼ a nkənu ngə́ nɨ mɨ keʼ aghan bə ndzɛn ɨ kuʼnɨ nkfu za ɨ ghɨ yen mbáʼ nɨ mɨ soŋ ngə́, ‹A Ŋwi a fɔgɨ ayi wa a yenɨ nɨ ɨkum Maʼmbyí ɛ.›”#13:35 Salms 118:26; Wemɨyɛrə 22:5
Actualmente seleccionado:
Alukasɨ 13: MNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023, CABTAL