Alukasɨ 3
3
Yoane Ngaŋ Nga Nkyi a Kə́ Sǒŋ Anu a Ŋwi ə
(Mat 3:1-12; Mar 1:1-8; Yoa 1:19-28)
1A kɔ́ʼnə nkuʼ ɨlom nɨghúm ntsɔb tə̧̂ mbáʼ Tɨberio Kaisa a tsínɨ́ a nɨfɔ; Bonto Branto a bé Gobɨna mbuʼ Yudiya, Ɛrɔd a kə́ sáʼə mbuʼ Galili, mɨma ɨyi wu mbáŋnɨ́ Firɨbɔ a saʼnə mbuʼ Ituruya bo Trakonatɨ; Laisanaya a saʼnə Abilin, 2Anasɨ bo Kayafasɨ bo bé bɨntumshe bə wi ə. A bé a nkfu məwa nɨgham nɨ Ŋwi yén a mbó Yoane mɔn Zakaria a mu mɨkɨghon ə. 3Yoane a tíʼə nkárɨ́ Mbuʼ za tsum za ɨ kárɨ́sɨ́nɨ́ a Mɨzam Yorɨdan ɨ sóŋə́ anu a Ŋwi ngə́, “A nɨ bəŋ mɨntəm ɨmən a nye mɨbvu ɨmən nkwarɨ nkyi, á Ŋwi a tiʼ nkɨ ndɨgɨnɨ mɨbvu ɨmɨŋ ə.”
4Adzaŋ za bɨ ŋwáʼnɨ́nɨ́ a mu aŋwaʼnɨ a Ntom Ŋwi Asaya ngə́:#3:4 Asaya 40:3-5
“Ŋwɔn tse a tɔ́nkə́ a mu mɨkɨghonɨ ngə́:
‹Kyaŋtɨnə ndómnji Maʼmbyí; chisɨnə ɨbɔʼ ndómnji ɨchi ɛ!
5Nɨbɔrɨ nɨtsum bɨ ghɨ lwɨ́gɨ́, á bɨ chɛrɨ mbám mɨtsum abɔʼnɨ mɨntáʼ ɨ shiʼsɨ a ɨshe.
Bɨ tsi nɨ ngɨ mɨndómɨnji mə ŋɔrɨkɨnɨ á mɨ chinɨ, ɨ lɛgɨtɨ ɨkɔʼrɨ ɨbɔʼ á tsɨ lánə́.
6Ŋwɔn mɨsɔŋ a ntsu tsum a lo ze ɨloŋ Ŋwi ə!›”
7Ɨnɔ ɨbɛn ɨ yén a mbó Yoane ngə́ á wɛrə a gha nkyi a mbó bo ghe. A tíʼ sóŋ a mbó bo ngə́, “Bɨŋ mɨnyo! A kwɛ soŋ ɨwa a mbó bən ngə́ nɨ chi lɛʼ alwɛntɔŋ a Ŋwi zə wi za a tsinɨ nɨ ngyiŋə lá le?#3:7 Matyo 12:34, 23:33 8A nɨ ngɨ̌ ɨnu tsa tsɨ diʼnɨ ngə́ nɨ bəŋnə mɨntəm ɨmən a nye mɨbvu ɨmɨŋ ə. A nɨ keʼ tsi ɨ sóŋə́ a tɨtərɨ bən nɨbən ngə́ Abraʼm a nɨ ta ɨwən wu kɔ́ʼɔ́nguʼ ə. Ma soŋ awən ngə́ Ŋwi a chi lɔgɨ mɨngɔʼ mɛnə ɨ káʼ ɨbɔ bɨ Abraʼm ɨwu bə daŋ ə!#3:8 Yoane 8:33
9Ndzam ɨ byinə ntsi a ngwarɨ ɨtɨ a nye mɨngaŋ ɨmyi; ma lan, atɨ atsum za mbáʼ ka a nkónə́ ayi mɨntam mə shiʼnɨ, bɨ ghɨ warɨ a zɛrə ɨ ton.”#3:9 Matyo 7:19
10Ɨbɛn ba tíʼ mbítɨ́ ngə́, “Bɨgɨ mɨ tiʼ ghɨ lá ɨ nə́ le?”
11Yoane a chwɨ́gɨ́ ngə́, “Ŋwɔn tsum wa a tsinɨ nɨ ɨtsɛʼ tsɨ maʼnɨ tsi bá, a tsi nɨ nga táʼ a mbó ŋwɔn wa ka a tsi ayi nɨ zɛrə ghe, á ŋwɔn tsum wa a tsinɨ nɨ mɨdzɨ a zagɨ ngyɛbtɨ a mɛrə ghe.”
12Ngaŋ nkwarɨ ashɛbɨ tsɨ tse tsɨ yén a nkwárɨ́ nkyi, ntiʼ mbitɨ a wɛrə ngə́, “Ndiʼ aŋwaʼnɨ bɨgɨ mɨ tiʼ ghɨ lá ɨ nə́ le?”
13A chwɨ́gɨ́ awa ngə́, “Njimbɨʼ nɨ kwarɨ ntsa ndvuŋ wa ntɨgə ɨ diʼnə.”
14Bɨgwe bə tse kɨ́ ntíʼ mbítɨ́ a wɛrə ngə́, “Ɨzɨgɨ nkfu ɨ be lə́? Bɨgɨ mɨ tiʼ ghɨ lá ɨ nə́ le?” A chwɨ́gɨ́ a mbó bo ngə́, “Nɨ keʼ nkámə́ ɨbɛn nkwárɨ́ nkáb a mbó bo ghe, kə nkɨ nkaŋ a ŋwɔn adaŋədaŋə ghe. Nkáb afaʼ za bɨ tfúnə́ awən ɨwu, ɨ kuʼnɨ a mbó bɨŋ ə.”
15Adzaŋ za bo kɨ́nə́ ntsiŋə a Wa bɨ Zɔ́ʼnɨ́ wa lá, bo tíʼə mbítə́ a mu mɨntəm ɨma ngə́ Yoane wen a mɨ ghɨ keʼ wɛrə be le? 16Yoane a byígɨ́ a mbó bo ngə́, “Ma ghǎ nkyi a mbó bən lá nɨ wu ngəŋ lá ŋwɔn tse a zɔŋə mbáʼ a tsanɨ aghan tsɛʼ nkə. Ka ma nyaʼ nkuʼ aghə a nkyɛgɨ nkɨ ngobɨ ɨyi ɛ. A mɨ gha nkyi a mbó bən nɨ Azhwi zə Fɛmnɨ abɔʼnɨ ɨmugɨ ə. 17A tsi nɨ asəŋ a fɛgɨ ɨdzúm ɨchi adzaŋ za wɛrə a mɨ fɛgɨ nchwi ɨwu, ɨ zarɨ a zɨ shiʼnɨ ɨ lɛn a nɨkaŋ zɨ, ɨ tiʼ tɔn ntsaʼ ɨchi a mu ɨmugɨ nɨnkoŋ ə.”
18Yoane a sóŋ Nkən wu Shiʼnɨ a mbó ɨbɛn a nye mɨndómɨnji mə ghaʼnɨ, ɨ nyíʼtə́ awa ngə́ á bo kwebtɨ ngɨnɨ mɨnu ɨma ghe. 19Lá Yoane a kágɨ́ a Ɛrɔd, wa a bénɨ́ Gobɨna, mbɨ́ʼ ngə́ a zɔ́ʼ a Ɛrodiasɨ, ngwe mɨma ɨyi wu mbáŋnɨ́, nkɨ nkwɛ ngɨ ɨnu tsɨ tɔmnɨnɨ tsə ghaʼnɨ ə.#3:19 Matyo 14:3-4, Marɨkusɨ 6:17-18
20Ɛrɔd a bə nkwiʼ ngɨ anu zə tɔmnɨnɨ za a bɨ́gɨ́nɨ́ ntsa mbó, ɨ farɨ a Yoane atsáŋ ə.
Yeso a Kwarɨ Nkyi ɛ
(Mat 3:13-17; Mar 1:9-11)
21Mbáʼ ɨbɛn ba bɨtsum kwárɨ́nɨ́ nkyi lá, Yeso a kɨ́ nkwárɨ́ ɨyi ɛ. A ghɨnə ntíʼə ntsáʼtə́ a Ŋwi, bɨ ŋaʼ fɔməbvurə, 22Azhwi zə Fɛmnɨ a tiʼ shiʼ nɨ ɨnyam ɨnye tso bvugɨrə-fɨkon ntɛm wu atú ə. Nji zɨ tse ɨ tíʼ fú a fɔməbvurə ɨ soŋ ngə́, “O lanɨ mbe Mɔn ɨghan wa ma kɔŋnɨ tsɛʼ nkə. Ntəm ɨghə dórə́ a nye gho tsɛʼ nkə.”#3:22 Salms 2:7, Asaya 42:1
Bɨtarɨ bə Kɔ́ʼɔ́nguʼ bə Yeso ghe
(Mat 1:1-17)
23Yeso kə́ mbiʼnɨ ɨfaʼ ɨyi lá mbe tso ɨlom mɨghúm mɨntárə́, mbe mɔn (adzaŋ za ɨbɛn kɨ́nə́ nkwaʼtə) Yosɛb wa a bénɨ́ mɔn Ɛli, 24mbáʼ a bénɨ́ mɔn Matatɨ, mbáʼ a bénɨ́ mɔn Levi, mbáʼ a bénɨ́ mɔn Mɛlkai, mbáʼ a bénɨ́ mɔn Yanai, mbáʼ a bénɨ́ mɔn Yosɛb, 25mbáʼ a bénɨ́ mɔn Matatiasɨ, mbáʼ a bénɨ́ mɔn Ɛmɔsɨ, mbáʼ a bénɨ́ mɔn Naum, mbáʼ a bénɨ́ mɔn Ɛsli, mbáʼ a bénɨ́ mɔn Nagai, 26mbáʼ a bénɨ́ mɔn Matɨ, mbáʼ a bénɨ́ mɔn Matatiasɨ, mbáʼ a bénɨ́ mɔn Semenɨ, mbáʼ a bénɨ́ mɔn Yosɛchɨ, mbáʼ a bénɨ́ mɔn Yoda, 27mbáʼ a bénɨ́ mɔn Yoananɨ, mbáʼ a bénɨ́ mɔn Rɛsa, mbáʼ a bénɨ́ mɔn Zerubabɛlɨ, mbáʼ a bénɨ́ mɔn Shiltiɛ, mbáʼ a bénɨ́ mɔn Nɛri, 28mbáʼ a bénɨ́ mɔn Mɛlkai, mbáʼ a bénɨ́ mɔn Adi, mbáʼ a bénɨ́ mɔn Kosamɨ, mbáʼ a bénɨ́ mɔn Ɛlmadamɨ, mbáʼ a bénɨ́ mɔn Ɛr, 29mbáʼ a bénɨ́ mɔn Yoshua, mbáʼ a bénɨ́ mɔn Elizə, mbáʼ a bénɨ́ mɔn Yorim, mbáʼ a bénɨ́ mɔn Matatɨ, mbáʼ a bénɨ́ mɔn Levi, 30mbáʼ a bénɨ́ mɔn Simiɔn, mbáʼ a bénɨ́ mɔn Yudaʼ, mbáʼ a bénɨ́ mɔn Yosɛb, mbáʼ a bénɨ́ mɔn Yonam, mbáʼ a bénɨ́ mɔn Elayakim 31mbáʼ a bénɨ́ mɔn Mili, mbáʼ a bénɨ́ mɔn Mɛna, mbáʼ a bénɨ́ mɔn Matata, mbáʼ a bénɨ́ mɔn Natan, mbáʼ a bénɨ́ mɔn Devidɨ, 32mbáʼ a bénɨ́ mɔn Yesi, mbáʼ a bénɨ́ mɔn Obɛdɨ, mbáʼ a bénɨ́ mɔn Boazɨ, mbáʼ a bénɨ́ mɔn Salmɔn, mbáʼ a bénɨ́ mɔn Nashɔn, 33mbáʼ a bénɨ́ mɔn Aminadabɨ, mbáʼ a bénɨ́ mɔn Amin, mbáʼ a bénɨ́ mɔn Ani, mbáʼ a bénɨ́ mɔn Ɛzrɔn, mbáʼ a bénɨ́ mɔn Bɛrɛ, mbáʼ a bénɨ́ mɔn Yudaʼ, 34mbáʼ a bénɨ́ mɔn Yakɔbɨ, mbáʼ a bénɨ́ mɔn Isak, mbáʼ a bénɨ́ mɔn Abraʼm, mbáʼ a bénɨ́ mɔn Tɛra, mbáʼ a bénɨ́ mɔn Naɔ 35mbáʼ a bénɨ́ mɔn Sɛrugɨ, mbáʼ a bénɨ́ mɔn Ru, mbáʼ a bénɨ́ mɔn Bɛlɛgɨ, mbáʼ a bénɨ́ mɔn Ɛbə, mbáʼ a bénɨ́ mɔn Shɛla, 36mbáʼ a bénɨ́ mɔn Kaina, mbáʼ a bénɨ́ mɔn Afazadɨ, mbáʼ a bénɨ́ mɔn Shɛm, mbáʼ a bénɨ́ mɔn Nua, mbáʼ a bénɨ́ mɔn Lamɛkɨ, 37mbáʼ a bénɨ́ mɔn Metusela, mbáʼ a bénɨ́ mɔn Ɛnɔkɨ, mbáʼ a bénɨ́ mɔn Yarɛdɨ, mbáʼ a bénɨ́ mɔn Maʼlali, mbáʼ a bénɨ́ mɔn Kainan, 38mbáʼ a benɨ mɔn Ɛnɔsɨ, mbáʼ a bénɨ́ mɔn Sɛtɨ, mbáʼ a bénɨ́ mɔn Adam, mbáʼ a bénɨ́ mɔn Ŋwi ə.
Actualmente seleccionado:
Alukasɨ 3: MNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023, CABTAL