Alukasɨ 8
8
Bəngye ba bɨ Kɨ́nə́ Ndzɔŋə a Yeso lá
1Abaŋ a ghɨnə mbé ɨwu, Yeso a yiŋənə ntsǎ a mu ntáʼmbagə abɔʼnɨ ɨtóm ɨ sǒŋ Nkən wu Shiʼnɨ mbɨ́ʼ nɨfɔ nɨ Ŋwi ə. Bɨyɛʼ ɨbyi ba nɨghúm ntsɔb bá tsí bo zɨ, 2nkwiʼtɨ bəngye bə tse ba bɨ tsúʼnɨ́ awa a mbó ɨzhwi tsɨ tɔmnɨnɨ abɔʼnɨ mɨghɔ: Mɛrɨ (wa mɨkyɛgɨnɨ ɨmyi bénɨ́ Matarɨna), wa bɨ fɨ́gɨ́nɨ́ bɨdzɨŋ bi samba wə ɨnye; 3Yoana, ngwe Chuza, mangye wa a kɨ́nə́ faʼə a mbó Ɨfɔ Ɛrɔd; Susana abɔʼnɨ bəngye bə mɔʼɔ bə ghaʼtɨnɨ ba bɨ kɨ́nə́ nkwátə́ a Yeso bo bɨ bɨyɛʼ ɨbyi a mu ɨdzúm tsa bo tsínɨ́ nɨ tsɛrə ghe.
Nɨgham nə Nanɨ mbɨ́ʼ a Ŋwɔn Ngwarɨ Mɨdzɨ ə
(Mat 13:1-9; Mar 4:1-9)
4Ɨbɛn kə́ ntyínə́ ngyíŋə́ a mbó Yeso ndǒ a mu ntáʼmbagə nkúŋə́ a mu wu mɔʼɔ; ɨnɔ ɨbɛn ghɨnə ngótɨ́ táʼ adiʼ Yeso a ná nɨgham nɛnə ngə́:
5“A nkfu tse ŋwɔn tse a fú ngɛn a mbi nchwi ɨzhi ɛ. Adzaŋ za a kɨ́nə́ mbǐ nchwi za a mu ɨshwom ɨyi lá, tsə tse vwókɨ́ alaŋ a ndóm, ɨbɛn tsa nyəŋtɨ, bɨsɨ́ŋ sɛʼ nkfurə. 6Tsə mɔʼɔ vwókɨ́ atú aláŋsə́ ngɔʼ, ntomnkɨ, lá mbə́ ndzomnkɨ mbɨ́ʼ ngə́ nkyi sé ɨwu be ə. 7Nchwi za zɨ mɔʼɔ ɨ vwókɨ́ a tɨtərɨ kyɛrə-kyɛrə, nkwi ndzɔ́ŋ ndzɔ́ŋ zhiʼ mbyigɨ a ɨshe ə. 8Mbum tsə mɔʼɔ vwókɨ́ atú ɨshe nɨkomə; ntomnkɨ nkwi ɨ fɨgɨ nchwi nkfu táʼ nkɨ ə.”
Yeso a lwɨ́gɨ́nɨ́ ɨ soŋ ngə́, “Be nɨ tsi nɨ ɨtoŋnɨ nɨ zuʼə!”
Anu za Mɨgham mə Nanɨ Men a mɨ Diʼnə
(Mat 13:10-17; Mar 4:10-12)
9Bɨyɛʼ ɨbyi tíʼ mbítɨ́ ayi ngə́, “O na nɨgham nen ndiʼ lá ngə́ ke le?” 10Wɛrə a tíʼ nchwɨ́gɨ́ ngə́, “Bɨ kyaŋ awən nɨ azhyɛ za a tsinɨ a nkubə mbɨ́ʼ nɨfɔ nɨ Ŋwi, lá a mbó abvuʼ a ɨbɛn a mɨ yen a mbó bo a nye nɨgham nə nanɨ, taŋ á bɨ ndyíŋə́ nkeʼ ndzě, njwíʼtə́ nkeʼ ndzúʼə nkə́ njíɛ ghe.”
Yeso a Fɨʼtɨ adzaŋ za Nɨgham nə Nanɨ mbɨ́ʼ a Ŋwɔn Ngwarɨ Mɨdzɨ a nɨ Diʼnə
(Mat 13:18-23; Mar 4:13-20)
11“Nɨgham nə nanɨ nen diʼ lá ngə́: nchwi za be lá anu a Ŋwi ə. 12Mbum nchwi tsa tsɨ vwókɨ́nɨ́ a ndómnji lá, diʼ lá ɨbɛn ba bɨ zuʼnɨ anu a Ŋwi; lá Dəbɨrɨ a yen ɨ shwerɨ nkən wa ɨ fu nɨ wɛrə a mu mɨntəm ɨma, taŋ á bo tsi tɨ nɨŋ mɨntəm ɨma a nye Ŋwi taŋ á bɨ loŋ awa ghe. 13Mbum tsa tsɨ vwókɨ́nɨ́ atú aláŋsə́ ngɔʼ diʼ lá ɨbɛn ba bɨ zuʼnɨ anu a Ŋwi, nkɨ ndanɨ nkwarɨ a zɛrə tsɛʼ nɨ nɨdorɨ ə. Lá nɨ ghɔŋ be atú a ntəm bo nkeʼ kunkɨ a mu ɨnye bo; bo nɨŋ mɨntəm ɨma ɨwu tsɛʼ a nye mə baŋtɨ, lá a nkfu za azhwəŋtɨ a yenɨ, bo bəŋ mɨntəm ɨma ghe. 14Mbum tsa tsɨ vwókɨ́nɨ́ a tɨtərɨ kyɛrə-kyɛrə lá, tsɨ diʼ lá ɨbɛn ba bɨ zuʼnɨ; lá ɨnu atuəshe, afuʼ aza abɔʼnɨ ndzɨ mbyi juŋnɨ ɨ sɔbtɨ a zɛrə, nchwi za bán lá ndáʼ keʼ tɨŋə. 15Mbum tsa tsɨ vwókɨ́nɨ́ atú ɨshe nɨkomə lá, tsɨ diʼ lá ɨbɛn ba bɨ zuʼnɨ anu a Ŋwi ndɛn a zɛrə a mu ntəm wu shiʼnɨ nkə́ nchigɨ mɨntəm ɨma ɨ kɔʼ kuʼ nkfu za a ghɨ yen nɨ anu zə shiʼnɨ ə.”
Bɨ Chwuʼ Nkaʼ lá bɨ keʼ Tɛgɨ a Shwúrɨ́ Ɨkon ə
(Mar 4:21-25)
16“Ka ŋwɔn tsɛrə a nchwuʼə ayi nkaʼ ntságə́ ntɛ́gə́ a shwúrɨ́ ɨkon ə. A baŋnə ntɛ́gə́ atú atɛkɨ a nkaʼ, taŋ ɨbɛn kon a ndá bɨ ze ɨdiʼ ə.#8:16 Matyo 5:15; Alukasɨ 11:33
17Azúm atsum za bɨ lwɛʼnɨ, a ghɨ fú yen asaŋəsaŋ, azúm atsum za bɨ bɔmtɨnɨ, bɨ ghɨ zɛ́n ɨ fɨgɨ ɨ fú nɨ zɛrə a ɨfúgɨ́ ɨdiʼ ə.#8:17 Matyo 10:26; Alukasɨ 12:2
18A nɨ lə ɨtú ɨtsən adzaŋ za nɨ zhwíʼtɨ́nə́ anu a Ŋwi; mbɨ́ʼ ngə́ ŋwɔn tsum wa a tsinɨ nɨ zɛrə; bɨ ghɨ kwiʼtə, lá ŋwɔn wa a tsinɨ mbômbô; tsɛʼ mɨnyiə wa a kwaʼtɨnɨ ngə́ zɨə tsi nɨ wɛrə lá, bɨ ghɨ kwárə́.”#8:18 Matyo 25:29; Alukasɨ 19:26
Nɨmi bɨ Yeso bo bɨ Ɨbɔmbɨma bɨ Yeso bə Mbáŋnɨ́ ə
(Mat 12:46-50; Mar 3:31-35)
19Nɨmi bɨ Yeso bo bɨ ɨbɔmbɨma bɨ Yeso bə mbáŋnɨ́ yén a ndzé Yeso, lá nchi keʼ ayi zɛn mbɨ́ʼ ngə́ ɨnɔ ɨbɛn ɨ ghaʼ ɨwu ə. 20Ŋwɔn tse a sóŋ a mbó Yeso ngə́, “Nɨmo ɨgho bo bɨ ɨbɔmbɨma ɨbo bə mbáŋnɨ́ bɨ tɛm abyɛn ndǒ ndze gho ghe.”
21Lá Yeso a chwɨ́gɨ́ a mbó bo bɨtsum ngə́, “Nɨmi ɨghan bo bɨ ɨbɔmbɨma ɨban bə mbáŋnɨ́ a nɨ ɨbɛn ba bɨ zúʼnə́ nɨgham nɨ Ŋwi nkə́ ndě a nɛrə ghe.”
Yeso a Bɔrɨsɨ a Kɨfɛrɨ wu Ntɨŋ ə
(Mat 8:23-27; Mar 4:35-41)
22Njwi tsɛrə Yeso a kón a mu abáŋ a nkyi bo bɨ bɨyɛʼ ɨbyi ɨ soŋ a mbó bo ngə́, “Bɨgɨnə daŋ ntom ngɛn a ndzɨŋ sagɨrə wen zɨ mɔʼɔ ghe.” Bo bíʼnɨ́ ntiʼə ngěn ghe. 23Bo tsinə a mu nkyi ntiʼə ngěn, fɨlye chwa a Yeso ghe. Kɨfɛrɨ wu ntən wu tsɛrə a vwúkɨ́ ntsa a mu sagɨrə wa, nkyi chwuʼ ntiʼə nkúŋə́ a mu abáŋ a nkyi za, bo tsi nɨ nɨbɔgɨ ngə́ zə tɨbɔŋ a chi fuə. 24Bɨyɛʼ ɨbyi ghɛ́n ndzɛm ayi, ɨ sóŋə́ ngə́, “Tafaʼ, Tafaʼ! Bɨgɨ mɨ kfókə́!”
Yeso a ló atɨ́ ngámtɨ́ a kɨfɛrɨ wa bo nkyi wa ɨ kɨ́nə́ nɛ́mə́ lá; bɨ bɔrɨ ɨdiʼ ɨ mbɔnɨ ngə́ tum ə. 25Wɛrə a tíʼ mbítɨ́ bɨyɛʼ ɨbyi ngə́, “Abeməntəm azən a mé le?”
Lá a kɨ́ʼnɨ́ awa, bo tsi nɨ nɨbɔgɨ, mbitɨ awa bo nɨbo ngə́, “Ŋwɔn wen a lá ɨwa le? A ghǎ ntɨgə, titi nkɨ nga a mbó bɨkɨfɛrɨ abɔʼnɨ nkyiɛ yiŋənɛmə, tsɨ zuʼnɨnə ayi ɛ!”
Yeso a Tsuʼ a Ŋwɔn Tse wa Bɨdzɨŋ Lɔ́gɨ́nɨ́ ayi ɛ
(Mat 8:28-34; Mar 5:1-20)
26Yeso bo bɨ bɨyɛʼ ɨbyi tíʼ ndɔgɨ nɨyen a mu sagɨrə wa ndaŋ ntom ngɛn a Gɛrasa#8:26 Ɨŋwaʼnɨ tsə mɔʼɔ tsi nɨ Gadara (ze Matyo 8:28); tsə mɔʼɔ tsi nɨ Gɛgesa ghe., a ndaŋ ndzɨŋə Galili ə. 27Tsɛʼ mbáʼ Yeso a fúnɨ́ a ngə́rɨ́ nkyi wa lá, ŋwɔn tse wa a lónɨ́ a Ntáʼmbagə Gɛrasa wa bɨdzɨŋ lɔ́gɨ́nɨ́ a yén ɨ fú wə ɨnye ə. A nye nkfu zɨ sa a kə́ ngyǐŋ ntyigɨnɨ, nkeʼ a ndá a ndyě lá nchyɛ̌ ayi be nɨ ɨtú mɨshe ghe. 28Mbáʼ a zɛ́nɨ́ a Yeso lá, ntɔnkɨ mbugɨ, ntso ayi nchwirɨ a ɨshe wə mɨku, ntɔnkɨ ngə́, “Yeso, Mɔn Ŋwi Akɔ́ʼɔ́ntsɨrə! O lǒ lá ngɨə ake nɨ me le? Ma buʼ mbó, koʼ nɨŋ ngɨ́ʼ a nye me ghe!” 29A sóŋ a məzen lá mbɨ́ʼ ngə́ Yeso a kɨ́ŋnə ɨzhwi tsɨ tɔmnɨnɨ tsa ngə́ á tsɨ fu a mu ɨnye zɨə. Dzɨŋ wa kə́ fě ayi ntyíŋə́ ntságə́ a mu mɨkɨghonɨ mbáʼ bɨ kɨ́nə́ nkórɨ́ mbó ɨmyi nɨ mɨnkɨ mɨ atɨŋə nkə́ nɨ̌ŋ bɨkɨbuʼ a mɨku zɨə.
30Yeso a bítɨ́ ayi ngə́, “Ɨkum ɨgho nɨ ɨwa le?”
A chwɨ́gɨ́ ngə́, “Ɨkum ɨghə nɨ ‹Akarɨ›” mbɨ́ʼ ngə́ bɨdzɨŋ bə ghaʼnɨ tsí wə mu ɨnye ə. 31Bɨdzɨŋ ba búʼ mbó a mbó Yeso ngə́ á keʼ awa fɨgɨ ntsagɨ abɨ́ a kfúrɨ́mándzó ghe.
32Akarɨ a bəkfunyam a tsí ɨ fátɨ́ adiʼ za ndzɨə awa a mbəm ntáʼ ə. Bɨdzɨŋ ba tíʼ mbúʼ mbó a mbó Yeso ngə́ á nyɛʼtɨ awa á bo fu nkon a mu bəkfunyam ba, Yeso a bemtə. 33Bo tíʼ fú a ɨnye ŋwɔn wa nkon ngɛn a nye bəkfunyam ba. Akarɨ za atsum a zhwúʼ ɨ shiʼ mbəm abaŋ za ɨ naŋ a mu sagɨrə wa ɨ shwimkə.
34Ɨbɛn ba bɨ kɨ́nə́ ntsǐŋ bəkfunyam ba zɛ́n anu za a fúnɨ́ lá, nkɨənɨ, ndzagɨ nkərɨ məzen a mu ntáʼmbagə za abɔʼnɨ ɨnyanya mɨkfú ma mɨ tsínɨ́ a ngɔbə ghe. 35Ɨbɛn fú ngɛn a ndzé anu za a fúnə́. Bo yenə nkuʼ a mbyɛn Yeso, ndzɛn a ŋwɔn wa bɨdzɨŋ ba fúnɨ́ wə mu ɨnye lá a shiʼtɨ ntsi a ɨshi mɨku Yeso, ngwəgɨ ɨtsɛʼ nkɨ shwetɨ, ayigɨnɨ azhi a bə mbɨŋə; bo bɨtsum tíʼ ntsí nɨ nɨbɔgɨ ə. 36Ɨbɛn ba bɨ zɛ́nɨ́ adzaŋ za Yeso a tsúʼnɨ́ a ŋwɔn wa lá tíʼ fɨʼtɨ a mbó ɨnɔ wa adzaŋ za a tsánə́. 37Ɨbɛn bɨtsum ba bɨ lónɨ́ a kárɨ́kɨ́ mbuʼ Gɛrasa za tíʼ nkɨŋ a Yeso ngə́ á ghɛn ayi mbɨ́ʼ ngə́ bo tsí nɨ nɨbɔgɨ be tɨsɨŋə. Yeso a tíʼ nkón a mu abáŋ a nkyi za ngɛn ayi ɛ. 38Ŋwɔn wa bɨ tsúʼnɨ́ ayi a mbó bɨdzɨŋ ba lá a búʼ mbó a mbó Yeso ngə́, “Ma lǒ ndzɔŋ gho ghe.” Lá Yeso a kə́ntɨ́ ayi ɨ soŋ ngə́, 39“Bə nkwɛn ngɛn a ntsu ndá ɨ fɨʼtɨ anu za Ŋwi a ghɨnɨ a mbó gho ghe.” Ŋwɔn wa a tósɨ́ ntsa a mu ntáʼmbagə za tsum ɨ fɨʼtə anu za Yeso a ghɨ́nɨ́ a mbó zɨə.
Mɔn Yaro wu Mangye abɔʼnɨ Mangye wa a Mɔ́mtɨ́nɨ́ Atsə́ŋ Atsɛʼ a Yeso ghe
(Mat 9:18-26; Mar 5:21-43)
40Mbáʼ Yeso a bə́nɨ́ mbən a ndaŋ ndzɨŋə sagɨrə wa lá, ɨbɛn kwárɨ́ a wɛrə tsɛʼ ɨ shiʼnɨ, mbɨ́ʼ ngə́ bo kɨ chínə ndɔ́gɨ́nɨ́ ntsíŋə́ a wɛrə ghe. 41Tsɛʼ a nyom məwa, ŋwɔn tse wa bɨ kɨ́nə́ ntɔ́ŋə́ ngə́ Yaro a zɔ́ŋ ngyiŋə; a bé ŋwɔn wu ndɨtɨnɨ a ndáŋwi bə Yuda ghe. A vwó a mɨku Yeso mbuʼ mbó ngə́ á yen a ndá zɨ, 42mbɨ́ʼ ngə́ mɨndɔŋ mɔn ɨyi wu mangye, mbe tso ɨlom nɨghúm ntsɔb bá, a tíʼ tsɛʼ a nkfó ghe.
Adzaŋ za Yeso a kɨ́nə́ ngěn lá, ɨnɔ ɨbɛn kə́ fágɨ́tə́ ayi bɨbagɨ bɨtsum ə. 43Mangye tsɛrə wa alɛm a kɨ́nə́ fúə wə ɨnye atú ɨlom nɨghúm ntsɔb bá; a tsí a tɨtərɨ ɨbɛn ba; a kɨ tɔ́nɨ́ nkáb ɨzhi tsum a ndá ngaŋ, lá ŋwɔn ngaŋ wa wu tse a kɨ chi keʼ ayi tsuʼə. 44Mangye wa a kóŋ ndzɔŋ a ndzum Yeso a tɨtərɨ ɨnɔ ɨbɛn wa ɨ mɔmtɨ atsə́ŋ atsɛʼ a Yeso, alɛm azhi za a kɨ́nə́ fúə lá a byi nchwanə. 45Yeso a bítɨ́ ngə́, “Aghan lá a mɔmtɨ ɨwa le?”
Ŋwɔn tsum a tón ayi ɛ. Bita a sóŋ ngə́, “Tafaʼ, ɨbɛn karɨsɨ agho ntyínə́ ngyíŋə́ a ɨnye gho ghe.”
46Lá Yeso a sóŋ ngə́, “Ŋwɔn tse a mɔmtɨ aghə, ma zhyɛ, mbɨ́ʼ ngə́ adaʼ a ló fú a ɨnye me ghe.” 47Mangye wa a zhí ngə́ zɨə ló nchi keʼ lyɛmtɨ, ntiʼ fu a ɨshe ngyíŋə́ mbɨ́ŋnə́, ngvo a ɨshe a mbyi Yeso ɨ fɨʼtɨ asaŋəsaŋ anu za a ghɨ́nɨ́ zɨə mɔmtɨ a wɛrə abɔʼnɨ adzaŋ za wɛrə a kɨ́nɨ́ ntiʼ mbyi shwétə́. 48Yeso a sóŋ wəmbo ngə́, “Mɔn ɨghan, abeməntəm azo a tsuʼ agho ə. Ghɛn nɨ mbɔnɨ ə.”
49Yeso a chyɛ́ mbvúrə́ sóŋə́ a məzen mbáʼ ntom zɨ tse ɨ lónɨ́ a ndá adɨtɨ a ŋwɔn za ngyen ɨ soŋ a mbó Yaro ngə́, “Mɔn ɨgho wa a kfonə ghe; koʼ mbɨ́ŋə́ ngágə́ a ndiʼ aŋwaʼnɨ wiŋ ə.”
50Lá Yeso a zúʼ ɨ soŋ a mbó Yaro ngə́, “Koʼ bɔgə; nɨŋ tsɛʼ ntəm ɨgho a nye Ŋwi ə, mɔn wa a mɨ shwetə.”
51Yeso a yenə nkuʼ a ndá Yaro lá, nton ngə́ ŋwɔn adaŋ a keʼ kuŋə, lá ndɔgɨ a Bita, Yoane bo Jemsɨ nkɨ mbən mbe ta bɨ mɔn wa bo nɨmi ɨyi ɛ. 52Ŋwɔn tsum adiʼ wa kə́ mbúgɨ́ nɨvwo nɨ mɔn wa ə. Yeso a sóŋ ngə́, “Nɨ keʼ mbúgə́ ghe; ka mɔn wen a kfo ayi ɛ – a lyě ayi ɛ!”
53Ŋwɔn tsum a kúmnɨ́ ngwe a Yeso, mbɨ́ʼ ngə́ bo zhí ngə́ mɔn wa a kfóə. 54Lá Yeso a tságɨ́ abó azhi nchwa a zə mɔn wa ɨwu ɨ soŋ ngə́, “Lo atɨ́ a mɔn ɨghan!” 55Azhwi a mɔn wa a bə́n wədiʼ, a byi ndo atɨ́, Yeso a soŋ ngə́ á bɨ gha mɨdzɨ wəmbo ə. 56A kɨ́ʼnɨ́ a ta ɨyi bo nɨmi ɨyi, lá Yeso a kwántɨ́ ngə́ njimbɨʼ nɨ soŋ anu za a funɨ lá a mbó ŋwɔn tse ghe.
Actualmente seleccionado:
Alukasɨ 8: MNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023, CABTAL