Marɨkusɨ 13
13
Yeso a Gham mbɨ́ʼ Adzaŋ za Bɨ Ghɨnɨ Tsənkɨ Ndáŋwi zɨ Ngwi ə
(Mat 24:1-2; Alu 21:5-6)
1Mbáʼ Yeso a kɨ́nə́ fúə a mu Ndáŋwi zɨ Ngwi lá, táʼ ngyɛʼ ɨyi a sóŋ wəmbo ngə́, “Ndiʼ aŋwaʼnɨ, ze azo, ngɔʼ tsa abɔʼnɨ ndá tsa bɔnkɨ be tɨsɨŋə!”
2Yeso a chwɨ́gɨ́ wəmbo ngə́, “O zě ndá tsə wiə-wi tsen le? Bɨ ghɨ kum a tsɛrə, á táʼ ngɔʼ a keʼ adiʼ zɨ bə nchyɛ.”
Ngɨ́ʼ Abɔʼnɨ Ndɨgə ghe
(Mat 24:3-14; Alu 21:7-19)
3Mbáʼ Yeso a shíʼtɨ́nɨ́ ntsí atú Mbám Olif za lá, mbáʼ ɨ kɨ́nə́ ndyǐŋ Ndáŋwi zɨ Ngwi lá, Bita, Jemsɨ, Yoane abɔʼnɨ Andɨrɨya bítɨ́ ayi mbáʼ bo tsínɨ́ tsɛʼ bo bo ngə́, 4“Soŋ awɨgɨ ə, ɨnu tsiŋ ɨtsum ghɨ fú lá a nkfu ake le? Zɨŋ alɨgɨ a ghɨ fú a ndiʼə ngə́ nkfu ɨ kuʼnə á ɨnu tsiŋ ɨtsum fu le?”
5Yeso a sóŋ a mbó bo ngə́, “A nɨ lə ɨtú ɨtsən á ŋwɔn tse a keʼ awən tamtə. 6Ɨbɛn bə ghaʼnɨ ghɨ yen, ɨ kaŋnə ngə́ bo ghamə nɨ ɨkum ɨghan, ɨ soŋnə ngə́, ‹Ma lá Wa Bɨ Zɔ́ʼnɨ́ ə!› A ntsǎ a ndzum ɨdzaŋ mɨgham mətsen, bo ghɨ támtɨ́ ɨbɛn bə ghaʼnɨ ə. 7Be nɨ zuʼ mbɨ́ʼ mɨntso abɔʼnɨ mɨnkən mbɨ́ʼ mɨntso, á keʼ ngɨ́ʼ a mbó bən ghaə; məzen a mɨ zagɨ lɔgɨ adiʼ lá ɨ keʼ diʼ ngə́ ndwitə ɨ yenə ghe. 8Ɨlaʼ ghɨ tókɨ́nə a tsɨ mɔʼɔ, á nɨfɔ ntǒkə́ a nə mɔʼɔ ghe. Ɨshe ghɨ nɛ́mnə ɨdiʼ ɨtsum, á mɨchwinɨ a kɨ nchyɛ. Ɨnu tsiŋ be lá tso ntsambyi ndzaŋə mbáʼ mangye a chiʼnə.
9A bɨŋ mboŋ lə ɨtú ɨtsɨŋ ə. Bɨ ghɨ kótɨ́nə awən, ɨ kə́ tɔ́ŋtɨ́nə abyɛn a nye bɨŋ ə. Bɨ ghɨ shwomnə awən a mu ndáŋwi bə Yuda; á tiʼ mbe abárɨ́ a mbó bən ɨ tɛm a ɨshi bɨta bɨ ɨlaʼ abɔʼnɨ bɨfɔ mbɨ́ʼ atú azan, ɨ soŋ Nkən wu Shiʼnɨ a mbó bo ghe. 10Lá bɔŋ á ndwitə za yen, bɨ tsi nɨ ɨ zagɨ soŋ nkən wu shiʼnɨ a mbó ɨlaʼ ɨtsum ə. 11A nkfu za bɨ konɨ awən ngɛn nɨ bən a ɨshi abyɛn, á nɨ keʼ ngwíʼə awən anu za nɨ mɨ soŋ bɔŋ á nyom abyɛn a kuʼə; nkfu za yen nkuʼ nɨ soŋ anu za bɨ ghanɨ a mbó bən mbɨ́ʼ ngə́ ka a ngámə́ ayi bɨŋ ə, a ghamə Azhwi zə Fɛmnɨ ə. 12Mɨma ŋwɔn wu mbáŋnɨ́ a mɨ tintɨ a wu mɔʼɔ ɨ gha a ntsu nɨvwo, á tarɨ a gha a mɔn ɨyi ɛ. Ɨbɔ mɨ kwənkɨnə bo bɨ bɨta ɨba, ɨ kɨ ghɨ á bɨ zhwitɨ awa ghe. 13Ɨbɛn bɨtsum ghɨ tiʼ ɨ bə̌nə awən mbɨ́ʼ aghə. Lá ŋwɔn tsum wa a korɨnɨ ntəm ngɛn fu a ndwitə, bɨ ghɨ loŋ ayi ɛ.”
Azúm a Tɨbɔŋ za a Tsənkɨnə ghe
(Mat 24:15-28; Alu 21:20-24)
14“Nɨ ghɨ́ zɛ́n ‹Azúm a Tɨbɔŋ za a Tsənkɨnə nkə́ ngyíŋə́ nɨ adɨrətú› á tɛm adiʼ wa ka a tsi ayi nɨ nchyɛ ghe, (á ŋwɔn wa a tɔ́ŋnə́ a zuʼ nkɨ nji a məziŋ ə). Nɨ ghɨ ndzɛ́n a zɛrə á ɨbɛn ba bɨ tsinɨ a Yudiya kɨə ngɛn nɨ ɨtú mɨntáʼ ə. 15Ŋwɔn wa a tsinɨ atú a ndá zɨ a mɨ zagɨ keʼ bə ntsəŋ nkfu a shíʼə ɨ kon ghɛn a mu ndá zɨ a ndɔgɨ azúm zə tsɛrə ɨ ghɛn nɨ zɛrə ghe. 16Ŋwɔn wa a tsinɨ afɔn a mɨ zagɨ ɨ keʼ bə nkwɛn ngɛn a ndá zɨ a ndɔgɨ atsɛʼ azhi ɛ. 17A ghɨ bɨ́gɨ́ be tɨ́sə́n a nye njwi mətsa a mbó bɨmabvu abɔʼnɨ bəngye ba bɨ kúgɨ́nɨ́ ɨbɔ bə bɔrɨ ə! 18A nɨ tsaʼtɨ a Ŋwi ngə́ á keʼ fu a nkfu ɨfɛgɨ wu tən wa! 19Mbɨ́ʼ ngə́ a nye njwi mətsa, ngɨ́ʼ za ɨ ghɨ tsí, ɨ ghɨ gháʼ ɨ tsa mbó ɨ tsa a za atuəshe a láʼnə ndzɛ́n nchwuʼnɨ mbáʼ Ŋwi a káʼnɨ́ mbyi zen ɨ yen gha tɨtsɔŋnɨ ə. Azúm zə tsɛrə tso zɛrə a láʼ keʼ bə nkwiʼ nchyɛ. 20Maʼmbyí a bé tú ghɨ á njwi mətsa ɨ vutɨ, muŋ bɨ ghɨ keʼ loŋ a ŋwɔn mɨsɔŋ a ntsu tsɛrə ghe. Lá mbɨ́ʼ atú a ɨbɛn ɨbyi ba wɛrə a tsɔ́ʼnɨ́, wɛrə a ghɨ́ njwi mətsa vutə.
21Ma lan, be ŋwɔn tse a soŋ a mbó bən ngə́, ‹Ze, Wa bɨ Zɔ́ʼnɨ́ a wɛnə!› kə ‹Ze, a yirɨ!› á nɨ keʼ nɨŋ mɨntəm ɨmən ɨwu ə. 22Bɨ Wa bɨ Zɔ́ʼnɨ́ bɨ ɨchwenu abɔʼnɨ ntóm Ŋwi ɨchwenu ghɨ fú a ɨshe ə. Bo ghɨ ghɨ ɨnu tsɨ yerɨnɨ-yerɨnɨ abɔʼnɨ ɨnu tsɨ tsanɨnɨ a ntámtɨ́ ɨbɛn, ɨ ghɛn kuʼ a nye ɨbɛn ba Ŋwi a tsɔ́ʼnɨ́ mbáʼ be a chi be mə lá. 23A nɨ lə ɨtú ɨtsɨŋ ə! Ma fɨʼtɨnə ɨnu ɨtsum bɔŋ á nkfu ntiʼə ngyíŋə́ ghe.”
Ngyiŋ Mɔn Ŋwɔn ə
(Mat 24:29-31; Alu 21:25-28)
24“A nye njwi mətsa, mbáʼ nkfu ngɨ́ʼ za ɨ minə,
nɨnyom a ghɨ bəŋ ɨ tiʼ bə fɨ́ŋ ɨ fɨ́ŋnɨ́, á saŋ a keʼ bə ntá,
25á mɨndzɔŋ tsɔʼkɨ a fɔməbvurə ngvokɨ a tɨshe, á
mɨdaʼ#13:25 Mɨdaʼ men a lá mɨndzɔŋ ə. A mbyi a mbyi, bənguʼ kwáʼtɨ́ ngə́ mɨndzɔŋ bé lá mɨdaʼ mɨ azhwi ə. ma mɨ tsinɨ a fɔməbvurə á mɨ nɛm nkeʼ adiʼ bo bə nchyɛ.
26Mɔn Ŋwɔn a mɨ tiʼ fu a ɨshe, ɨ yiŋnə a mu mbaʼ nɨ adaʼ zə wi abɔʼnɨ nɨfáŋ ə. 27Wɛrə a ghɨ tsagɨ bɨtsen bɨ ndá bɨ Ŋwi a nye bɨbagɨ bɨ mbyi ben bi nɨkwa ngə́ á bo ghotɨ ɨbɛn ba Ŋwi a tsɔ́ʼnɨ́, ɨ lɔgɨnɨ a nye táʼ nɨbú nɨ atuəshe ɨ ghɛn kuʼ a nye nə mɔʼɔ ghe.”
Anu zə Yɛʼnɨ a nye Atɨ a Figɨ za
(Mat 24:32-35; Alu 21:29-33)
28“Nɨ yɛʼ anu a nye atɨ a figɨ ə. Tsɛʼ mbáʼ mbó ɨmyi biʼnɨnɨ ntótə́, ɨzəŋ tsə fi chwuʼ ɨ fuə lá, nɨ tsi nɨ njiɛ ngə́ mɨgham a tiʼ tsɛʼ abó ə. 29Ndəŋndəŋ, be nɨ ze ɨnu mətsen tsɨ tɨ fuə, nɨ mɨ zhi ngə́ wɛrə a yenə ntiʼə nkúŋə́, ntiʼ tsɛʼ a nkom ntsundá ə. 30Tsɛʼ a nkənu, ma sóŋə́ awən ngə́ nɨwə niŋ ghɨ keʼ tsa tɨgha ɨnu tsiŋ ɨtsum fuə. 31Fɔməbvurə bo atuəshe ghɨ keʼ ghɔ́ŋ nɨnkoŋ ə, lá nɨgham ɨnə ghɨ ghɔ́ŋ nɨnkoŋ ə.”
Ka Ŋwɔn Tse a Zhi ayi Njwi zɨ wu Kə a Nyom wu wu ə
(Mat 24:36-44)
32“Ka ŋwɔn tse a zhi ayi njwi zɨ wu kə a nyom wu wu ə – kə́ be bɨtsen bɨ ndá bɨ Ŋwi ba bɨ tsinɨ a fɔməbvurə kə Mɔn Mbáŋnɨ́; a zhi tsɛʼ Tarɨ ə. 33A nɨ lə ɨtú tsɨŋ ə, á nkyérɨ́nə, mbɨ́ʼ ngə́ ka nɨ zhi awən nkfu za nkfu zɨ wu ghɨ kuʼə. 34A ghɨ bé lá tso ngə́ ŋwɔn a nyɛʼtɨ njwuʼ ɨzhi ngɛn a nɨghan ə. A tɨnə tɨ fuə lá, ɨ nyɛʼtɨ ɨnu ɨtsum a mbó ngaŋ afaʼ ɨchi, ŋwɔn tsum a tsi nɨ azhi atú afaʼ, a tiʼ nkɨ soŋ a mbó ntsiŋ ntsundá ngə́ á nkyérə tsɛʼ kyerɨnə. 35A nɨ tíʼ lá nkyérə́, mbɨ́ʼ ngə́ ka nɨ zhi awən nkfu za mboŋnjwuʼ a ghɨnɨ kwe – a chi be a nkwɛfɔ kə nɨ ntɨŋtfúʼ kə a ntɔ́ŋ ankɨʼə kə a tənjwi ɛ. 36Be a vwukɨ kwɛn, a mɨ keʼ zagɨ nkwatɨ awən a fɨlye ə. 37Anu za ma sóŋnə́ a mbó bən lá, ma kə́ sóŋə́ a zɛrə a mbó ŋwɔn tsum ə: a nkyérɨ́nə!”
Actualmente seleccionado:
Marɨkusɨ 13: MNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023, CABTAL