Marɨkusɨ 16
16
Adzaŋ za Yeso a Zhwémnɨ́nɨ́ a mbó Nɨvwo
(Mat 28:1-8; Alu 24:1-12; Yoa 20:1-10)
1Njwi Alaʼ Ŋwi ɨ tsanə, Mɛrɨ Matarɨna, Mɛrɨ nɨmi bɨ Jemsɨ abɔʼnɨ Salome zuŋ bɨnyuʼtə taŋ á bo chi ghɛn nyɔŋ a nye ɨnye Yeso ghe. 2A tənjwi a mbáʼəmbáʼə a nye ntsambyi njwi a mu ngabɨ, tsɛʼ mbáʼ nɨnyom a fúnə, bo ghɛ́n atú a nɨshe wa. 3A ndómnji bo bítɨ́ a ŋwɔn nɨ ŋwɔn ngə́, “Ɨwa mɨ bɨŋsɨ ngɔʼ za ɨ lo nɨ zɛrə a ntsu nɨshe wa a mbó bɨgɨnə le?” 4Lá, bo léntɨ́ ndzɛ́n ngə́, ngɔʼ za mbáʼ ɨ fáŋnɨ́ tsɛʼ a nkan lá, bɨ bɨ́ŋsɨ́nə a zɛrə ngɛntɨ nɨ zɛrə a ntsu nɨshe wa. 5Adzaŋ za mbáʼ bo kónɨ́ a mu nɨshe na lá, bo zɛ́n mbáŋnɨ́ zɨ tsɛrə mbáʼ ɨ wə́gɨ́nɨ́ ɨtsɛʼ tsɨ fú, ɨ shiʼtɨ ntsi a bagɨ abó zə maʼə ghe. A kɨ́ʼnɨ́ awa be tɨsɨŋə. 6Mbáŋnɨ́ za sóŋ a mbó bo ngə́, “A keʼ awən kɨʼnə. Ma zhi ngə́ nɨ lǒ lá a Yeso ŋwɔn bə Nazarɛ, wa bɨ kɨ kwemtɨnɨ atɨ abaŋnɨ-baŋnɨ lá. Ka a be ayi ɨghə — bɨ zhwemnɨ ayi ɛ! Nɨ ze, adiʼ za bɨ kɨ nyɔŋnɨ ayi ɨwu a zɛnə. 7Tɨtsɔŋnɨ, nɨ ghɛn nchwitɨ nkən məwen a mbó bɨyɛʼ ɨbyi, tɨ́sə́n tɨ́sə́n a mbó Bita ngə́, ‹Wɛrə a tsi a ndómnji ngěn a mbyi bən a Galili ə. Ɨwu, nɨ mɨ zɛn ayi, tsɛʼ adzaŋ za wɛrə a sóŋnɨ́ a mbó bən lá.›”
8Ma lan, bəngye ba fú a mu nɨshe na, ntiʼə nkɨə tsɛʼ kɨənɨ, mbɨ́ŋnə́, ntiʼə mbɔ́gə́ ghe. Bo sé anu zə tsɛrə sóŋ a mbó ŋwɔn tse mbɨ́ʼ ngə́ bo tsí nɨ nɨbɔgɨ ə.
Ndwɨgɨnə Nkən wu Shiʼnɨ a Ŋwaʼnɨ Marɨkusɨ zɨ Sa ghe#16:9 Ɨŋwaʼnɨ tsɨ mɔʼɔ tsa bɨ tsánɨ́ mbyi ɨ ŋwaʼnɨ se nɨ ndwɨgɨnə zen chyɛ, nkaŋ 9 ɨ kɔʼ kuʼ a nye nkaŋ 20 ghe.
Yeso a Fu a Ɨshe a Ɨshi Mɛrɨ Matarɨna ghe
(Mat 28:9-10; Yoa 20:11-18)
9Mbáʼ Yeso a zhwémnɨ́nɨ́ a tənjwi a mbáʼəmbáʼə a nye ntsambyi njwi a mu ngabɨ lá, a fóm fú a ɨshe lá a ɨshi Mɛrɨ Matarɨna, wa wɛrə a fɨ́gɨ́nɨ́ bɨdzɨŋ bi samba wə ɨnye lá. 10Wɛrə a ghɛ́n sóŋ a mbó ngaŋ aku Yeso ghe. Bo kə́ ndzə́ŋnə́ nkə́ mbúgə́; 11bo ghɨnə ndzúʼ ngə́ Yeso a tsi ntən, ngə́ wɛrə a zɛ́nə ayi lá, bo sé nɨŋ mɨntəm ɨma a nye anu za a sóŋnə́.
Yeso a Fu a Ɨshe a Ɨshi Bɨyɛʼ ɨbyi bi Bɨbá ghe
(Alu 24:13-35)
12Mbáʼ məzen a tsánə, Yeso a fú a ɨshe a nye ndóm wə daŋ a ɨshi bo bɨbá mbáʼ bo kɨ́nə́ ntɛ́mə́ nɨ mɨku ngěn a mu alaʼ ə. 13Bo bə́ nkwɛ́n ɨ sóŋ a mbó abvuʼ aza; lá bo bvúrɨ́ mɨntəm ɨma ɨwu tɨ nɨŋə.
Yeso a Fu a Ɨshe a Ɨshi ba Nɨghúm ntsɔb mɔ́ʼɔ́ ghe
(Mat 28:16-20; Alu 24:36-49; Yoa 20:19-23; Ɨfa 1:6-8)
14A ntsɨrɨndzum, Yeso a fú a ɨshe a ɨshi bɨyɛʼ ba nɨghúm ntsɔb mɔ́ʼɔ́ mbáʼ bo kɨ́nə́ ndzɨ́ə ghe. Wɛrə a ghámtɨ́ awa mbɨ́ʼ ngə́ bo sé nɨ abeməntəm tsi abɔʼnɨ adzaŋ za bo kɨ́nə́ ntɨŋə atú a nɨŋ mɨntəm ɨma a nye ba bɨ zɛ́nɨ́ ayi mbáʼ wɛrə a zhwémnɨ́nə ghe. 15Wɛrə a sóŋ a mbó bo ngə́, “Ghɛnə a mu mbyi zen tsum, ntiʼə soŋnɨ nkən wu shiʼnɨ a mbó ngwəgɨ ŋwɔn mɨsɔŋ a ntsu tsum ə. 16Ŋwɔn tsum wa a nɨŋnɨ ntəm ɨyi ɨwu nkɨ nkwarɨ nkyi, bɨ ghɨ loŋ ayi ɛ, lá ŋwɔn tsum wa a sé nɨŋ ntəm ɨyi ɨwu, bɨ ghɨ tsənkɨ ayi a Njwi Nɨsáʼ ə. 17Bɨ ghɨ ghá mɨtən a mbó ɨbɛn ba bɨ nɨŋnɨ mɨntəm ɨma ɨwu a ngɨ ɨnu tsɨ yerɨnɨ-yerɨnɨ: bo ghɨ fɨ́gɨ́ bɨdzɨŋ nɨ ɨkum ɨghan; bo ghɨ ghamnɨ mɨgham mə fi; 18be bo bye mɨnyo nɨ mbó, kə ɨ no ndyíʼ, ɨ mɨ keʼ anu zə tse a nye bo ghɨə; bo ghɨ nyɔŋnɨ mbó ɨma a nye ngaŋ mɨghɔ, á bo ɨ shwétə́ ghe.”
Bɨ Lɔgɨ a Yeso Nkɔʼ nɨ Wɛrə a Fɔməbvurə ghe
(Alu 24:50-53; Ɨfa 1:9-11)
19Mbáʼ Maʼmbyí Yeso a mɛ́tɨ́nɨ́ a sóŋ ɨnu tsen ɨtsum a mbó bo, bɨ lɔ́gɨ́ ayi nkɔ́ʼ ngɛ́n nɨ zɨ a fɔməbvurə, a tiʼ shiʼtɨ ntsi a bagɨ abó Ŋwi zə maʼə ghe. 20Bɨyɛʼ ɨbyi tíʼ fú ngɛ́n ntíʼə sǒŋ anu a Ŋwi tsɛʼ ɨdiʼ ɨtsum, Maʼmbyí a tiʼə nkə́ fáʼə bo bo, ntiʼə nkə́ ndiʼə ngə́ anu a Ŋwi za bo kɨ́nə́ sóŋə́ a bé nkənu a ntsǎ a ndzum ɨnu tsɨ yerɨnɨ-yerɨnɨ tsa bɨ kɨ́nə́ ngɨə ghe. A be lá.
Ndwɨgɨnə Nkən wu Shiʼnɨ a Ŋwaʼnɨ Marɨkusɨ zɨ Ngvutɨnə
(16:9-10)
9Bəngye ba ghɛ́n a mbó Bita abɔʼnɨ bɨson ɨbyi ɨ sóŋ ɨnu ɨtsum tsa ntsendá Ŋwi za sóŋnɨ́ a mbó bo, lá ɨ soŋ tsɛʼ akumtɨ akumtɨ ə. 10Mbáʼ zen a tsánə Yeso zɨmboŋ a tságɨ́ ɨbɛn a mu mbyi tsum a sóŋ Nkən wu Shiʼnɨ ə. Nkən wu Shiʼnɨ məwen ɨ fɛm, nkeʼ nkwébtə́, ɨ ghɨ ghɔŋ nɨnkoŋ ə.
Actualmente seleccionado:
Marɨkusɨ 16: MNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023, CABTAL