João 20
20
Ca e' mami' ca Jeju
Mateus 28.1-10; Marcos 16.1-8; Lucas 24.1-12
1Domingo pin iri na ne, pain iri' xo' xec ma', mao ac camain na manain pacun Maria Madalena. Om ca hwet querec ca xina, xim xim wet na, mao ac camain na manain pacun. Querec ac camain na ca wara joc panajao' pin xine pacun ca tao' pa' nain manain ma'. 2Mo hwet ac caparut na Maria Madalena. Simão Pedro, wata' pain ca iri' win ma' ne capa' Jeju ca', mo hwet naparut Maria. An hwet ca' nonon pain manain pacun Taramaxicon nexi' ta naparut. Om ca taxi' urut pain ca an terem' pe cocon quem naparut.
3Na ra ac urut na, mama' ac urut pain na manain pacun. 4Jein mama' pi' pin paxi' urut, ane mo hap ca' ton Pedro ne. Hwet cain' inain manain pacun. 5Xujuxuc pe ac ta' na, querec ac ton na wom co mam' wiric pa' cocon ma'. Xujuxuc pe e' ina, om ca corom mao ta'. 6Maqui' ac ca na Pedro co ja' ja' napa' ma'. Corom ac ca na, querec ac con na wom co mam' wiric pa' tocwa ma'. To nain i ma'. 7Querec ac con na wom co mam' tucu cacain winacon ma' quem. Om ca terem' pe ho' con xucun wom. Pe ni na, wara witop xo' na, an terem' xo' ac tocwa na pain cacarain. 8Corom ac ta' na quem. Querec iri inain ne, howa ac ta' na. Iri'o' na xin ca e' mami' nucun ta ac ta' na. 9(Pain ca om e' mami' querec nucun ma', om ca taraju pa' querec urut pain ca xirao' pe xine capijacon Iri' Jam ira, pain ca na e' na pain ca e' mami' ta' na ta ne ma'.)
Ca hwet pa' cam Maria Madalena Jeju
10In mama' ac urut pain na xuruxut. 11Maria Madalena ma' iri na ne, pe pe wet nain manain pacun. Hwet pe ca' nain manain ca corom ac xine ma'. Aca na. Aca aca, xuruxuc pe ac cama na. 12Querec ac cocon na jam co taramaja mi' nonon Iri' Jam ma'. Ma' 2 nana. To nonon wom co towo'. Xao to nanain i ma', pain ca an pe pe xine curucun Jeju ira. Xao pe pe nain ca wina mao ca xucun, xao pe pe ac cain na ca caxima mao ca xucun ma' quem.
13Para aca ma ma' quem narima' ac cacam na.
Om na, an mao nonon Taramaxicon ne. Om ca taxi' tain ca an terem' pe cocon ta ac cama na.
14Tomi' iri nain i ma' ne, noro in ac cama na, querec ac con na Jeju pain ca xat pe cain i ma'. Querec paxi' non, ane om querec pin' con ne.
15Tomi' querec ac cam na: Para aca ma ma' quem narima'? Ma' co pirao' ma ma' quem nam.
Wari' co querec wet nain oro panaji memem tara ma' non Jeju ira, ac i ma' na ca coromicat nequem Maria Madalena ma'. Je ca tomi' ca' con quem: Wum tara co an hwet ca' non pain manain pacun ca' quem? Main ca an terem' pe pin mon quem? Tomi' hwet ne pain, ma' ta an mao ton ta na ca tomi' con ma'.
16Maria ac cam na.
Noro in ac cama na, Rabôni ac con na. Ac i ma' na ca tomi' cama pain capijaxut pain ca judeu urut ca', pain aramaico. Taramaxicon co ca' na taxipa' capijacon Iri' Jam ta na ca tomi' mao nein.
17Ta quep mapa' me ta Maria ac cam na. Xi hwet querec ton Te ta. Mo hwet roron xere ma', co taxipa' ta' ma'. Tomi' ca' roron: Piri' hwet ton Te co Iri' Jam ne ta' ca', co Iri' Jam ne hwe ma' quem nuhu'. Wirico co Te ta' ca' quem, co Te hwe ma' quem nuhu', ac i ma' na ca tomi' cuhu' ta roron na ca tomi' cam ma'.
18Ma'e ac cama na, mo hwet ac caparut na pain ca taxipa' urut con Jeju. Querec inon Taramaxicon nexi' ta ac caparut na, tomi' hwet ac caparut na pain ca tomi' cam ma'.
Ca hwet pa' caparut pain ca taxipa' urut con Jeju
Lucas 24.36-49
19Wara irawin pin na pain iri' domingo nein ca e' mami' ca Jeju ma'. Cut in ac xujuxut na pain ca taxipa' urut con ca'. Corom to urut pain xirim, tao' pa' ac urut pain na oro man ca corom ac wa ma'. Xi jin' ara urut cocon oro taramaxicon nuxut pain ca judeu urut ta.
Corom ac ca na Jeju. Xat pe nain ximijaxut. Ta toron ne xumuhu' me ta ac caparut na. 20Tomi' iri nain i ma' ne, mam' pe mi' ac caparut na pain manain prego pain micon je manain quit pain quiricon ma' quem. Querec iri urut pain con ne, tomi' querec te tamana ac urut con na.
21Tomi' mami' ac caparut na: Ta toron ne xumuhu' me ta naparut. Pijim' hwet jujun pain capija oro wari' ta inuhu'. Win ne ca pijim' hwet roron pain capija oro wari' ta capa' Te pane naparut. 22Huco' mi' ac caparut na. Corom hwet turuhu' Tamataracon Te Iri' Jam ta ac caparut na. 23Mo ta tomi' ca' hun wari' ma': Xic am pin nain ca caracat nem Iri' Jam ta, mo ta tomi' ac i ma' hun. Wara xic am pin nain Cotere' Iri' Jam quem. Mo ta tomi' ca' hun quem: Om ca xic am pin cain ca caracat nem Iri' Jam ta, mo ta tomi' ac i ma' hun. Om ca xic am pin cain quem na ca tomi' caparut ma'.
Ca tomi' xo' con Tomé Jeju
24Hwet pa' iri naparut ne, wara om na Tomé co win ma' urut pain ca taxipa' urut con Jeju ca'. Om ca pe ho' caparut. (Tocwan na wixicon Tomé quem. Tomé co Horoman Pe na xijein wixicon.) 25Je ca tomi' hwet urut con ca': Querec urut con Taramaxicon nexi' ta Tomé na ca tomi' urut con ma'.
Tomi' ac caparut na: Mo ta om querec tain jami prego pain micon. Mo ta om quep tain pain mu ca'. Mo ta om quep ta' pain quiricon pain ca xucun' tape ac tocwa ma'. Om ta howa tain ca tomi' nuhu' ta na ca tomi' caparut ma'.
26Xijein domingo pin iri na ne, cut in mami' ac xujuxut na pain ca taxipa' urut con Jeju ca'. Pe ho' naparut Tomé quem. Tao' pa' paxi' urut pain oro manain ca corom ac wa ma', ane hwet pa' caparut Jeju ne. Xat pe ac cain na ximijaxut. Ta toron ne xumuhu' me ta ac caparut na.
27Tomi' pan ac con na Tomé Jeju: Noro rain mu ca' Tomé. Quep rain manain jami prego pain mu ca'. Quep rain curu pain ca xucun' tape ac cacapa' ca' quem. Tara pum ta'a maho' ra e'. Howa ra ta na ca tomi' con ma'.
28Taramaxicon ne! Iri' Jam ne! Ac i ma' na ca tomi' con ma'.
29Cain' cain' xima quem Tomé ac con na Jeju. Howa e' mapa' pain ca querec mapa' pain ca e' mami' ne ra? Oro wari' co howa nanapa' pain ca om querec cacapa' ma', om paxi' na ca querec cacapa' pain ca e' mami' ne ca'. Je i ma' ira nana, howa urut pum pain ca e' mami' nem ta nanapa'. Wiricoco nana co param mi' wawa pain ca awi wa ta na ca tomi' con ma'.
Para xirao' mi' xuhu' con Jeju quem
30Mija na oro xijein ca ara ca Jeju pane, ca in ac caca oro wari' pane. Warut pain ca taxipa' urut con ca', querec urut con pain ca ara cain quem. Mija paxi' na con, ane om xirao' to tain pain ca xirao' ne ca' ne. 31Oro ca xirao' mi' xuhu' ca', xirao' mi' e' inuhu' pain, ma' ta howa hun Jeju pain ca Cristo ca ma', pain ca Panxica Iri' Jam ca ma' quem inuhu'. Mo ta howa hun, om ta pi' ra ha' ne ca e' nuhu' ta.
Actualmente seleccionado:
João 20: TBPN
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Copyright 2023 Missão Novos Tribos do Brasil