मार्कुस 8
8
येसुङा ना माहोम्बोक याॽमिचि चामेतुचिहा
(मात्ति १५:३२-३९)
1एहिलेन हेक्साङ् फेरि चा प्याक याॽमिचि न्छुप्सा, ङ्खाॽनिङ्गो ङ्खाचिनुङ् इहाचा चाम्योङ्बा म्मायान॥ न्हाङ् येसुङा चेलाचि काचिहोङ् खाॽला लुचि, 2“खा याॽमिचि निसुङ्चिङ्होङ् तुक्नुङ् आलुङ्मा तुक्तुगेतुचिहा॥ खाचि कानुङ् ङ्वान्नेहा हेन सुम लेन न्लेक्साब्यामा, न्हाङ् खाचिनुङ् चामाहा-उङ्माहा चा इहाचा मान॥ 3खाचि इहाचा मेन्जाले पाङ्बे पाङ्माचिभोङ् गो लाम्बुबे साकङा न्सिमेहा लोप्पि, इजाङ्बाङ्निङ् इखिङ्गो माङ्दुन्धाङ् न्दायामा॥”
4चेलाचिङा न्लु, “खाॽला इसा चा मेॽनिङ्ना सुन्नेना ठोङ्बे खिङ्हा याॽमिचि खोॽमाहा चालेप्पा कानिङ् हेॽनाहाङ् ताॽमाहा?”
5येसुङा ङ्खाचि छिम्दुचि, “न्निङ्दानुङ् चालेप्पा इखिङ् ङ्वेॽहा?”
ङ्खाचिङा ङ्गाया, “ला ओटा॥”
6न्हाङा उङा याॽमिचि खामबे युङ्मेतुचि॥ न्हाङ् ला ओटा चालेप्पा उमुकपे याङुचिहोङ् निङ्वाफुमा नुनिङ्वा पि॥ न्हाङा चालेप्पा टुक्रा-टुक्रा चोगुहोङ् चेलाचि पिचि न्हाङा चेलाचिङा याॽमिचि ङ्हाप्सुबिचि॥ 7ङ्खाचिनुङ् एकोहिच्चि मिमिॽहा नासाचि चा ङ्वाया॥ येसुङा नासागा लागि चा निङ्वाफुमा नुनिङ्वा पिहोङ् चेलाचि हाम्मेतुचि॥ 8घाकङा खानुङ् न्जो, न्हाङ् ङोन्दाहा टुक्रा ङ्गोबुनिङ् ला डालो इप्तुचि॥ 9न्नाबे चाखुबा याॽमिचि ना माहोम्बोक हिङ् ङ्वाया॥ न्हाङ् येसुङा ङ्खा याॽमिचि बिदा पिहाक्सुचि॥ 10न्हाङा उङ् सोलोक चेलाचिनुङ् डुङ्गाबे थाङाहोङ् दाल्मानुथा लिङ्खामबे ख्या॥
फारिसिचिङा चिङ्गो न्नाक्तुना
(मात्ति १६:१-४)
11फारिसिचि येसु वायानाबे न्दायाहोङ् येसुनुङ् लुखुसा#८:११ बाद्बिबाद चोक्मा न्दारोक्तु चामा न्दारोक्तु॥ ङ्खाचिङा येसुगा जाच चोक्मागा खाॽला न्लु, “कानिङ् वालोकपाहाङ् एको चिङ्गो सोॽमेता॥”#मात्ति १२:३८; लुका ११:१६
12खा खेप्सुहोङ् येसुङा केङ्गेॽना ओसोक्मा सोसाङ् लुचि, “हेन्सेन्हा खा याॽमिचिङा इजाङ् चिङ्गो सोॽमा ङ्योग्वाहा? का जेप्पा लुमेॽनेनिन, खाॽलाहा याॽमिचिङा इहाचा चिङ्गो निमा न्दोक्त्वानिन्हा॥”#मात्ति १२:३९; लुका ११:२९ 13येसुङा खिङ् चेॽया लुइचिहोङ् ङ्खा याॽमिचि न्नाबे नाओचि, न्हाङ् उङ् च्हेन उका चेलाचिनुङ् डुङ्गाबे थाङाहोङ् फेरि योप्पारिक ख्या॥
फारिसि नुङ् हेरोदका खामिर
(मात्ति १६:५-१२)
14डुङ्गाबे तालगा योप्पारिक ङ्ख्यानिङ् चेलाचिङा चाम्योङ्बा खेॽमा म्मुन्दिक्सा॥ ङ्खाचिनुङ् एको से चालेप्पा वाया॥ 15न्हाङ् येसुङा ङ्खाचि चेतावानि पिसाङ् लुचि, “थाङ्थाङ् वायानि! फारिसिचिगा खामिर नुङ् हेरोदका खामिरभाङ् जोगाचोगानि॥”#लुका १२:१
16खा ङ्खेप्सुहोङ् चेलाचिङा उङ्चि-उङ्चि खाॽला कामा न्दारोक्तु, “कानिङ्नुङ् चालेप्पा मान्होङ् उङा खाॽला लुयाहा लोप्पि॥”
17उका चेलाचि खाॽला साला न्लेन्दाहा येसुङा था तोक्तुहोङ् ङ्खाचि छिम्दुचि, “न्निङ्दा चालेप्पा मान्होङ् खाॽला लुयाहा लोप्पिभोङ् इजाङ् काइवाघा? इना न्निङ्दा हाकुचा ङ्ङास्वाम्गान्हा? इना न्निङ्गा निङ्वा हाकुचा काठोरना? 18न्निङ्गा मिक ङ्वान्नेहोङ्चा न्निस्वाम्गान्हा? न्हाङ् नाभाक ङ्वान्नेहोङ्चा ङ्खेप्स्वाम्गान्हा?#यार्मिया ५:२१; इजिकिएल १२:२; मार्कुस ४:१२ 19फा ओटा चालेप्पा एगुङ्चिङ्होङ् फा माहोम्बोक याॽमि चामेतुङ्चिङ्हा न्निङ्दा मुन्दिम्घा? ङ्खिङ्बेला न्निङ्दा ङोन्दाहा चालेप्पा इखिङ् डालो छुप्सुक्साम्घा?”
ङ्खाचिङा पोलोवा म्बि, “एहिच डालो॥”
20येसुङा फेरि छिम्दुचि, “न्हाङ् ला ओटा चालेप्पाङा ना माहोम्बोक याॽमिचि चामेतुङ्चिङ्निङ् ङोन्दाहा टुक्रा इखिङ् डालो छुप्सुक्साम्घा?”
ङ्खाचिङा न्लु, “ला डालो॥”
21येसुङा फेरि ङ्खाचि छिम्दुचि, “ङ्खाॽलाभोङ् इना न्निङ्दा हाकुचा ङ्ङास्वाम्गान्हा?”
येसुङा मिक्सुरुम्बा नुमेतुना
22येसु उका चेलाचिनुङ् बेथ्सेदा साहारबे तायाब्या॥ न्नाबे याॽमिचिङा एको मिक्सुरुम्बा येसु वायानाबे न्दाहोङ् “ना याॽमि तोक्तिता” लुसाङ् उङ्चि मुक म्फाक्तुचि॥ 23न्हाङ् येसुङा न्ना मिक्सुरुम्बा याॽमि उमुकपे लाबुहोङ् तेनभाङ् पाखा खेतु॥ न्हाङा उङा मिक्सुरुम्बागा उमिकपे ओथोक्मा एन्दुबिहोङ् उङ् छोङ्बे उमुक युङ्साङ् छिम्दु, “मिमिक निमा यासुघा?”
24मिक्सुरुम्बाङा तोखाॽला सोसाङ् काया, “का याॽमिचि सिङ्गा उथाप लोॽवा न्लाम्मासिम्मेहा निमासिम्मेङ्ना॥” 25येसुङा फेरि न्नागा उमिक उमुकङा तोक्तितु॥ न्हाङ् न्ना याॽमिङा उचुन सोनिङ् घाक चेॽया उचुन निमा याखुबा लेक्सा॥ 26न्हाङ् येसुङा उङ् खाॽला लुहोङ् उपाङ्बे पाक्सु, “न्दा ना तेनबे फेरि मेउले सोरोसोर म्बाङ्बे ख्या॥”
येसुमाङ् खिरिस्ट ओम
(मात्ति १६:१३-२०; लुका ९:१८-२१)
27येसु नुङ् उका चेलाचि काइसारिया फिलिप्पि बाङ्ना साहार यो-खेहा तेनचिबे ङ्ख्या॥ लाम्बुबे उङा उका चेलाचि छिम्दुचि, “याॽमिचिङा का इसा ओम लुम्मेहा?”
28ङ्खाचिङा न्लु, “इखिङ्ङा बाप्तिस्मा पिखुबा युहान्ना न्लुम्मेका, इखिङ्ङा निङ्वाफुमाभाङ् चेक्खुबा एलिया, न्हाङ् इखिङ्ङा च्हेन निङ्वाफुमाभाङ् चेक्खुबाचि माध्येबे एको लोप्पि न्लुम्मेकाना॥”#मार्कुस ६:१४-१५; लुका ९:७-८
29येसुङा छिम्दुचि, “न्हाङ् न्निङ्दा लो का इसा ओम लुम्मेकाहा?”#मात्ति १०:३८; लुका १४:२७; युहान्ना ६:६८-६९; ८:३४
पात्तुरुसङा पोलोवा पि, “न्दा निङ्वाफुमाङा पाक्सागाना खिरिस्टकान॥”
30न्हाङा येसुङा ङ्खाचि “खा चेॽया न्निङ्दा इसा चा न्लुयानुम्चिम्निन” भोङ् आग्गे पिचि॥
येसुङा उङ् सिमाना चेॽयागा उतुम्बे लुचिहा
(मात्ति १६:२१-२३; लुका ९:२२)
31न्हाङा येसुङा उका चेलाचि उका उतुम्बे खाॽला लुचि, “याॽमिगा उच्याङा प्याक तुखि आङ्मा पोराचोङ्मे॥ याहुदि हाङ्गुम्बाचि, खाङ्खाङ् हाङ्खुबाचि नुङ् धार्मासाप्ला चिन्खुबाचिङा उङ् इन्कार न्जोग्वा, न्हाङ् न्सिस्वा॥ ङ्खाॽनिङ्गो सुम लेन हेक्साङ् उङ् स्यानाभाङ् फेरि हिङ्गिलिक लेङ्मेॽना॥” 32खाॽला येसुङा उका चेलाचि खा चेॽया उचुन योक्मेतुचि॥ न्हाङ् पात्तुरुसङा उङ् मियोरोक खेतुहोङ् थिन्मा तारोक्तु॥ 33ङ्खिङ्बेला येसुङा खिरिक हिक्साहोङ् उका चेलाचिपोटि सोसाङ् पात्तुरुस थिन्दु, “ओ साइतान, आयुम्भाङ् खेब्या! ङ्गा निङ्वा निङ्वाफुमा पोटिना मेन्ना, ङ्खाॽनिङ्गो याॽमि पोटिना ओम॥”
येसुगा जेप्पागा चेला
(मात्ति १६:२४-२८; लुका ९:२३-२७)
34न्हाङा येसुङा उका चेलाचि नुङ् न्नाबे ङ्वायाहा याॽमिचि काचिहोङ् लुचि, “सोयानुम, इसा आका चेला लेङ्मा मिमे न्नाङा उङ् आफाइ उलुङ्मा न्दुक्तुन्नि, उङ् सिमा चा त्यार लेङ्नि न्हाङ् उका कुरुस खुहोङ् आका हेक्साङ् लाचोक्नि॥#मात्ति १०:३८; लुका १४:२७ 35इजाङ्बाङ्निङ् इसाङा उका हिङ्लुङ् हिङ्मेॽमा योग्वा, न्नाङा मासिॽवा, ङ्खाॽनिङ्गो इसाङा उका हिङ्लुङ् आका लागि नुङ् नुसालागा लागि पिवा न्नाङा च्हेन हिङ्मेत्वा॥#मात्ति १०:३९; लुका १७:३३; युहान्ना १२:२५ 36याॽमिङा कायुङ्लेनबेॽहा घाकथोक तोक्तुहोङ् चा उका हिङ्लुङ् च्हेन नास चोगुभोङ् इहा फाइदा लेक्साहा? 37नास लेक्साब्याना हिङ्लुङ् फेरि इमिन तोङ्मेॽना? 38ना पापि नुङ् ब्याभिचारि पुस्ताबे इसा का नुङ् का चिन्नेनिन्हा चेॽयाभाङ् ङोन्सिमे, न्नानुङ् याॽमिगा उच्या चा उका उप्पागा माहिमाबे पाबित्तारा वालोक्दुतचिनुङ् तामेॽनिङ् ङोन्सिमेॽना॥”
Actualmente seleccionado:
मार्कुस 8: YAKH
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023, Wycliffe Bible Translators, Inc. and Nepal Bible Society