Muuduko 12
12
Gooti tool Eburamollu adomaroka tovinokwono
1 #
Krt. 7:2,3; Hib. 11:8 Toruda'ai Gooti Yawel Eburamollu aro kuudokaikono. “Gumoro kwako amwakudo tokwe gumi junumiyago toolluro iko tovasuda'ai toorogai tonyu wuugollu'movo'bi kwako aguduuwallumi pumuuno dovlavono. 2Toro plavo'bi toga gumoro jukweyago kwolaiyo tooro bwotonyago yawosunopi kantri aguto kuunodo puruv imo'nosupinorogano. Aki nuu gumi'aro a'mwo abolo punyu sugudo uubweyo'moneyokwe tov gumi sugudo pun nogubwemekugono. Aki guu a'mwo aguto yovokwe imo'nyo'mo gubwemekugono. 3#Gal. 3:8Toro agubwemi toga a'mwo pwol gumi kaiyako agujo'ji toollu nuu kaiyako nyugolmekono. Toro kuvi kuruv a'mwo pwol gumi ilaiyo amagujo'ji toolluno'gwowi nuu sugudo nuubwemekono. Toro te sugudo agubwemo akav yiuwi'nokai a'mwo abolo kwako akavi gomno gomno amwakopo kunyudaiyo'mo agubwemono.” Kuudokaikono.
4Toruda'ai Eburamol Gooti Yawelluro kuudoka kuvinono kuumjunokaikono. Toro te Eburamol 75 kworomokwe tool Looteke tonumdal Haran toru kuugollu'movolonumdakono. 5Toro te Eburamol nuugollu'meyo'mo toga gami abolo Saraiyokwe'aro gami gagwai'yago toolluro kwolaiyo Looteke'aro kemi yiuwi'nokai kuto ivito togai'aro aki Haranda'ai womdo wiyo'moneyokwe amaropo togai'aro tonyu Kenan'no amokavlavokaikono.
Toro ton plavo'mno kwako Kenan toru aulapogano. 6Toro kuulno sumaveyokwe toga kuuloonomollo'mno wagwolago Sekem toru ai'movopogano. Toro ton iko pwol da'mdowodo toru ki'mo'mno sumaveyokwe amwalopogano. Iko su toolluno yovo tov Mooreyolo dodupudekono. Aki toro towai a'mwo Kenanda'ai tooro kuuno mwalodopure toga Eburameke ton su towai amwalopogano.
7 #
Krt. 7:5; Gal. 3:16 Toruda'ai Gooti Yawel Eburamollu wiyalo'no'no aro kuudokaikono. “Kwako akav gumoro jukweyago kwolaiyo toorai wimokwono.” Kuudokaikono. Toro wuujuno sumaiyokwe Gooti Yawel kwiyalo'noka su toru Eburamol Gooti toollu wiroudapiyo'moneyokwe dukwagupto puruv sulo tokwe aluvagilovokaikono. 8Toro towai Eburameke ton wuugollu'mo'mno sumaveyokwe muumuudo tooraiyomno avlavopogano. Toro ton kuujo tool sulopiyamoka tomgu plaino sumaveyokwe wagwolago Betel tovi uuwolovo'mno muumuudo tooro wo'dupudo towai ai'movopogano. Toro ai'movopo toru kemi sel ago ton amodaropogano. Toro ton wagwolago puruvallu akuuto toru amodaropogano. Wagwolago su toval puruv Betel kuujo tool kwolmoka tomgu kwoso. Puruv Eyai kuujo tool sulopiyamoka tomgu kwoso. Toro tovalluro akuuto toru mwalno sumaveyokwe Eburamol Gooti Yawellu wiroudapiyo'moneyokwe dukwagupto puruv sulo tokwe aluvagilovokaikono. Toro luvagilo'mno sumaiyokwe Gooti Yawelluno sulomoropiyokaikono. 9Toro towai wuugollu'mo'mno sumaveyokwe Eburameke ton kwako Negev'no avlavopogano. Toro ton plaino plaino sumaveyokwe go'no go'nodo tomuu amjo'movlaiyajupogano.
Eburamol Ijup toru amwaloka tovinokwono
10Toro mujo'movla'mdopure tomuu muju'wuulo bwotonyo puruv abokakwono. Toro te Eburameke ton wosamujuko nonyo'mo pun nonaguto tovino tov wolomwollogalpino'moneyokwe kantri Ijup'no kwolapogano. 11Toro ton Ijup'no ki'meyo'mo wobo toru Eburamol gami abolo Saraiyovi kuuguudo aro amadokaikono. “Duu'nono. Moro abolo sugumaluko'guugono. 12Toro to'guuji Ijupda'ai tooro guuwonopi aro dupinorogano. “Abolo akav a'mwo akalluro abolo tokwono.” Toro dopi gumi gumallo'mo tooro mi noromiyanubwepinonyugono. Toro kuvi kuruv guvno'gwowi kuuno mwalbino'guugono. 13#Mdk. 20:2, 26:7Toro tovino tov guu mino tov aro neya wuudubino'guugono. “A'mwo akal mi nyo'mwekono.” Toro kuudubi tov maromiyanubweyopi ilaiyo to'no manyupinonyugono.” Eburamol gami abolo tovi toro amadokaikono.
14Toro majuno sumaiyokwe toga Eburameke ton kantri Ijup toru kuulno sumaveyokwe a'mwo Ijupda'ai tooro Saraiyovi ilaiyo sumdo ainuwiyoporogano. 15Toro kinuuwino sumaveyokwe Ijupda'ai mido mollomwalokwe Feroo toolluro a'mwo aguto pworo Saraiyovi wono'mno kemi aguto Feroo toollu abolo kwonopo su tovino kuudoporogano. Toro wuujuno sumaveyokwe Saraiyovi momworaro'mno Feroo toolluro ago tovi aulomorosopokwono. 16Toro aulomorosopo tovino a'mwo aguto Feroo tool ilaiyo wino'no Eburamollu ilaiyo to'no amollokaikono. Toro tool Eburamollu sipsip toorogai'aro buulmokau toorogai'aro doonki kwolabolo togai'aro kemel toorogai'aro aki ki'nato womdo wimwalpino'moneyokwe a'mwo abolo togai'aro ton kwiyokaikono.
17Toro kwiyoka kuvi kuruv Gooti Yawel a'mwo aguto Feroo tooke'aro gamoro ago te kuulomwalodupudo togai'aro tonyu nobolluwuulo bwotonyo pun kuubweyokaikono. Feroo tool Eburamolluro abolo Saraiyovi amaroka tovino tov toro kuubweyokaikono. 18Toruda'ai Feroo tool Eburamollu doma'no sumaiyokwe aro kuudokaikono. “Buro'nyo kavlo tovino toro anubwemodekudeyo? Guu Saraiyovino tov, “Moro abolokwono,” nokwo anyudo'bujuko kweku kuruv manyudodekugono. 19Mi nyo'mwokwono, anyudodo su tov buro'nyo kavlo tovino'mdeyo? Toro anyudodo tovida'ai nuu abolo su tovi amarokwono. Mekono. Gumi abolo tov nomwallo. Toro tovi guu momworaro'bi domollounomokwanono!” Amodapiyokaikono.
20Toro modapino sumaiyokwe Feroo tool gami womdokwe pworai aro amodapiyokaikono. “Kevu a'mwo akallu kantri akavida'ai bomokalokwilo.” Amodapiyokaikono. Toro amodapiyoka tooro Eburameke'aro gami abolo tokwe'aro gami yiuwi'nokai togai'aro tonyu bomokalokwo'mno puuto tomuu suwapiyoporogano.
Actualmente seleccionado:
Muuduko 12: SMB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022: Ethnos360 Sanford, Florida