Mariqoosi 14
14
Sullaata a Yesuusi qara Sulamte
Maati 26:1-5; Luqa 22:1-2; Yoha 11:45-53
1A xaysonessumaddasene a orra Yihuta a qaran tarpeeta isho a laaqqoota kayto'e kuyyaata lakkiw hase; saarra qeesewwa isho kollissampaya a seera akka tabaan Yesuusi qapan ka isha ishshane saanta faddini#sooka 12:1-27 . 2Ma xoori ikidene “Samayta horayta xaashaay kuyaata xayso nessuma oppa an koono.”
Iskatteetase Yesuusi shittootan daatite
Maati 26:6-13; Yoha 12:1-8
3Yesuusi piita Pittaaniyaatiiyyi, tika qoosholayta takka Simooni kidammooyye ca, ka eeyye damta dammi. Iskatteeta takka ka shuubba takkan daka Alpastiroosi oppa kodame a kara shittoota takka akata heeraan kokkoka ka ulfeessamte naartoosi kidammitto oppa immakaatte qapatte ka ishin deete; ka shubbasene paqisse ka shittootase matta Yesuusi qara tuqte. #ooreta 15:11 4Orra eeyye co oppaayye a demo ka wa kodde malla miiroode ka olli kide, “Shittootose maana malla asse patta patte? 5Helani tinaareta#14:5tinaareta takka xayya kuyyaata anama takkati dippa sessa qaropa katamta opan ka hiyyeessadda qoonni heeneneey; ka iskatteese kojeessen.”
6Yesuusi xoori ikide, “Diisha maana'e isheetta payyahinnittan? Wa fayyaxe ana kootey. 7Hiyyessadda qoota awta piisa ishin olli caan malla, eta heentaneeyye ishootta qaarqaara i'ettanissan; Anti xoori awta piisa ishin olli an kinnaado. 8Iskatteese wa ettanisse'e koote ka turanne qattisse ka dakintiiyyo shittootan daatite ka hawla harmisse. 9Anti dukaatannen ishina kiini, piisse qara pora oppa otootose a fayya torraammitto pisa oppaayye, wossene a ishetta koote, isheetta matte oorsatta'e torraaman.”
Akka Yihuta Yesuusi qapsissa owsade
Maati 26:14-16; Luqa 22:3-6
10Asqorottittase Yihuta isase tamaarewwasene a Yesuusi kudanka lakkippa takka kodde, Yesuusi qapsiisa'e saarra qeesewwa kapopa aane. 11Ishootta ka ete sede upnaadeneeyye xasooden; ka akka kaaja kuli ishi daashanexe olli kalen; isha ka Yesuusi qapsiisa'e aroota ettanto faddanni.
Yesuusi akka eetota a qaran tarpeeta tamaarewwaadi olli dame
Maati 26:17-25; Luqa 22:7-14, 21-23; Yoha 13:21-30
12Xayso nessumasene a laaqqoota oppa kuyyaata paayyotati kuyyaatase oppa laahase a qaran tarrpeeta qallaaneeyye, tamaarewwa Yesuusi kapopa de'en ka isha kaassaden ka kidene, “Akka eetotase a qaran tarpeeta damto'e; akkan ayshopa anno ka ke harminno heenta?”
13Isha ka tamaarewwaadippa nama lakki erke ka ishootta kide, “Katamaapa aana ka, nama okkotan pisha haano akkitaneeyi, kamma aana. 14Ka tika opa kullino opa kamma kulla; ka aappa tikati kida, ‘Kollissampayta ikiini, tika xaykitta a ana ettanto an kela tamaarewwaayyo olli eetota qaran tarrpeeta damo, a xaame?’ 15Isha nefo tika kuttayteeta a tula qara kitto a kela fayya harmisamte ishina akkishaay, eyye ino harmisha.”
16Tamaarewwasene lakki ka eeyye sooken ka katamasene opa aanen ka akka Yesuusi ishootta kide mina'e, akken ka eetotase a qaran tarpeeta eeyye harmishen.
17Ete halkeettaawteeyye, Yesuusi tamaarewwasene xaadi kudanka lakki olli de'e. 18Ete damta kute'en ka dammaaneeyye Yesuusi ishootta kide, “Anti dukaatannen ishinakiini, ishin oppaayye nama takka ana qapsiisa. Isha nefo amma ana olliiyyi damta dama qara ca.”
19Ishootta ka seppa nyarrahen ka tara taran isha kaassaden ka kidene, “Hela kati ana koddita?”
20Yesuusi ka ishootta kide, “Namoose ishin kudanka lakki oppaayye takka; ka amma ana olli tomoose karaayye wateeta poottanni. 21Inna a nama akkima turanneew qootaadi desa taafamte mina'e, tootopa anta isha qara in hasto ma xoori, namoose inna a nama toota qapsiiso oo isha kido! namase kati in dalannini ishi wayyi.”
Taanteta qulqulloota qurpaana
Maati 26:26-30; Luqa 22:14-20; Qoro 1ta 11:23-34
22A ishootta damta qara caaneeyye, Yesuusi ka Laaqqoota qeede ka qara Waaqa kalataysade ka oppa moosse ka tamaarewwaadi daashe ka kide, “Hinda, sede so'aayyooy.” #14:22 “eetota poqalla” kideeta
23Ka tiwwa qeedew ka qara Waaqa kalataysade ka ishootta daashe. Ikka piisantiiyyi tiwwase oppaayye ikken. 24Yesuusi ka ishootta kide, “Ini diikase xayyo a kodayteeta haaraya, a orra lekayta malla tuqamo. #sooka 24:8; Er 31:31-34 25Anti dukaatannen ishina kiini, hakan mankisteeta Waaqati wayneetase haaraya ikko kara'e, arepa desa luukase a wayneeta diipamteppaayye lammatta an ikko.”
26Sekkammaayye masmuureta dawaden ka irroota Taprasayti qaropa fayyaden.
Yesuusi akkima Peetiroosi isha marmado turanneew lele
Maati 26:31-35; Luqa 22:31-34; Yoha 13:36-38
27Yesuusi tamaarewwaadi'i kide, “Itaafamte ka kiini, ‘Anti sikmaytan daysha, kaharra ka pasaneey’ Piisanti ana marmattan ka alle ana diissan ka ana kapa qahattan#Maati 28:16 28ma xoori oton tootoppa xa'o kammaayye, piita Kelila opan ishina qatta.” #Maati 28:16
29Sitiiyyi Peetiroosi ka ishi kide, “Kadi punu orra piisa ke marmadaayye, anti an ke an marmado!”
30Yesuusi ka ishi kide, “Anti, dukaatannen ke kiini, awwe halkeesse are kitto oppaayye, a lukkalitta lakkin in iyyinin turanne, sessan ana marmatta.”
31Petiroosi xoori a qaran qapto'e kokkonnayshe ka kide, “Kadi punu toota koddita nefooyye, ke ollin to'a diisheey, pakkanna an ke an marmado.” tamaarewwa ata hase kulika asseew kiden.
Yesuusi akka Ketesemaaniiyyi Waaqa qinsade
Maati 26:36-46; Luqa 22:39-46
32Sekkammaayye ikka pora takka Ketesemaani kidammo opa aanen; Yesuusi ka tamaarewwaadi kide, “Anti eeyye'en qinsadaay, kello areppa tawa.” 33Ka Peetiroosi ka Yayqoopi isho Yohaannisi isi quda qeede ka aane ka harmo nyarraha ka qaapeeta paayye. 34Ka ishootta kide, “Haka tootati in akata nyarrahaniiy, areppa tawa ka japaada ka ana asa.”
35Ka shakkayteeta ishootta kapa desa sekaade ka kilpiippade ka fuula piitan kaye ka oton ikoddiniiyyi akka saatese isha qara tarpito waaqopa qinsade. 36Ka kide, “Aappo, we piisa ettaninniiy, tiwwoose a rakkoota alle ana qara tarpishe ma xoori a xaayti qara koddito diisheey, xayyo qara in koddinin.”
37Ete tamaarewwasene sessa kapopa ooreeyye, ishootta a muke'e akke ka Peetiroosi kide, “Simooni hela imukte? Hela saateta takka nefo tooyatta malaalte?” 38Ka ishootta kide, “Akka ekkaysumappopa a kallini'i, japaada ka qinsada; hapura iharmisade, so'a xoori nukkalayaay.”
39Ka lammatta aaneew ka waasene a paayyota qinsade'ew qinsade. 40Ka tiitaaweew ka qoota ildaasso mukittaan ulsaaden malla, ishootta a muke akkew; umma wa isha mina oorinnaane in upan.
41Ka a sessattati ishootta kapopa ooreew ka ishootta kide, “Hela ammikki mukten ka nessannittane? Ha ikoddite. Saatetase ikayte tin inna nama harka juppoolaya oppopa tuukkaman. 42Xa'a ka anna, tin isase ana qapsiiso idesa kayeey.”
Yesuusi akka qapame
Maati 26:47-56; Luqa 22:47-53; Yoha 18:3-12
43A Yesuusi sede afaappa in dikkinniniiyyi, Yihuta isase tamaarewwasene kudanka lakkippa takka kodde ka de'e. Orra a koraatewwa isho kumaya qapade kuttayta ka isha olli ca. Ishootta nefo saarra qeesewwa ka kollissampaya a seera isho qimoota piita kapa erkamen. 44Yihutase isha qapsiisno turanneew ishootta milikkita daashe ka kide, “Nama an dinko ka isha qara nakayta kaassado ishaay, qanqannissa qapa ka ishin aana.”
45Yihuta ka eennow de'e ka Yesuusi kapopa dehaade ka ishi kide, “Kollissampayto!” ka isha dinke. 46Sekkammaayye orrase ka Yesuusi qape. 47Orra Yesuusi kamma anno ka eeppa co oppa takka ka koraateta yukade ka orxayta takka a qeesitta kuttati dayshe ka qudaayye napahata kate. 48Yesuusi ka ishootta kide, “Hela wa malla koraatewwa isho kumaya qapatine ka deetene a tiyyoolayta mina ana qapeeta malla? 49An tika qulqulloota kela awta piisa kollinno ka eeyye ishin olli kalooyye, ishina ana a qapne; ma xoori sede wa malla asse koddite, akka qaaleta mataafa qulqulloota dikkatto malla.” #Luqa 19:47; 21:37
50Tamaarewwaadi piisa ka isha diishen ka alle isha kapa qahen.
51xayyoolayta takka ohaata a xaynaata a qora talpa oppa dawamte patta uwwisade xoori yesuusi kamma anni ka ete isha kuli qapa ekkaysheneeyye, 52ohaataadi alle kate ka kapa lulle xa'ade ka tawe.
Akka firtishoonkota turopa Yesuusi dehayshen
Maati 26:57-68; Luqa 22:54-55, 63-71; Yoha 18:13-14, 19-24
53Ikka Yesuusi qeeden ka, tika qeesitta kutta opa ishin aanen. Saarra qeesewwa ka qimoota piita isho kollissampaya a seera ka eeyyepa ollopa de'en. 54Peetiroosi haka tika qeesitta kuttati'i, lake desa Yesuusi kamma anni ka eeyye tooytampayaappa qaa'e ka apitta awsanni. 55Saarra a qeesewwa isho a firtishoonkota oppa ca piisa ka Yesuusi ikassa'e isha qara maakiyya faddini. Ma xoori in teyne. 56Lekaya ka isha qara darta maakkumen; ma xoori maakkumaaysho olqara in kalle.
57Orra demo ka xa'e ka darta isha qara maakkume ka kide, 58“namoose a haasawanno ka kiino, ‘Anti tikoose a qulqulloota harka namatin qupamten alle poota ka kuyyaata sessa kara a harka namatin in qupammin qupa’” dakayne#Yoha 2:19 59a koddito ma se ikkiti'i maakkumaysho ol qara in kalle.
60qeesittase kutta ka ishoottopeela qa'ade ka Yesuusi kaassade ka kide, “kisseese a orroose ke qara dehanno maana? Hela oppa we takkan nefo a oorisso?”
61Yesuusi xoori jawi kide diisheey, we takkan nefo oppa in oorinne. Qeesittase kutta ka oppa oorew ka Yesuusi kaassade ka kide, “Hela ken Kiristoosi innasene a Waaqa eepisame'e?”
62Yesuusi ka kide, “Aa ana, inna a nama a harka Waaqase we piisa ettaninnooti akkitta kuti'e'e akkitan; ka a tiitaawe ka moonte oraarappa deeno akkitan.” #Taani 7:13
63qeesittase kutta ka miiran mehaddaadi isi quda kaa'e ka kide, “Maakitta pila maana'en faaninna? 64Tin a qaalese a otitta Waaqa qara haasaawanno idakayteneey, ka kuli maana ishina pahata?” Ikka piisanti qaaleta takkan kidene, “Toota isha parpaaccisni!” Ka qara faraten#Lewi 24:16 .
65A demo ka isha qara tufatta paayyen ka japara ilda qara ishi qapni ka xottooman isha toommi ka ishi kiini “Oton a xuumampaytaayye ayno akkima ke toome upnaado.” Tooytampaya ka isha kakkandinni ka ishin tawen.
Akka Peetiroosi Yesuusi marmade
Maati 26:69-75; Luqa 22:56-62; Yoha 18:15-18, 25-27
66Peetiroosi a tikase a qeesittase kutta kamma xata, qoqqopa kara co ka eeyye orxaya a iskatteeta a saarase a qeesewwa oppa takka ideete 67ka a Peetiroosi apitta awsanno akkite ka isha quda ilda koote ka ishi kiite, “Atti kuli turan Yesuusise a Naasirati olliiwwi kitta.”
68Peetiroosi xoori ikide, “Anti an upo, umma wa a kiinitta ana kalli in can” Ka marmade. Ete asse kide ka xaropa xata sookeeyye, lukkalitta ka iyye.
69Orxayteetase ka Peetiroosi akkiteew ka a eeppa qa'annaati a lammattati haasawatta paayyiteew ka ishootta kiite, “Ha ini are co, ishoottoppa takka” 70Isha ka a lammatati marmadew.
Ete shakkayteeta jareeyyeew, orra eeyyeppa qa'anno ka ishi kideewwe; “Akka nama Kelila koddite damayaayti ke lelliiyi, atti dukaatanne ishootta oppa a takka.”
71Peetiroosi xoori ikide, “namoose a kiinittan anti an upo!” Ka isi jiijeta ka xaxatta paayye.
72Lukkalitta ka eennow a lammattati iyye. Peetiroosi ka qaalese a Yesuusi ishi kide, “A lukkalitta lakkinni in iyyinin turanne sessaan ana marmatta” matte oorsade ka a kuttati pooye.
Actualmente seleccionado:
Mariqoosi 14: MaQu
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión