مَتَّى 15
15
النَّضيف و الما نَضيف
1بَعدين، فَرّيسيِّين و مُعَلِّمين القانون جو لِيَسُوع مِن أُورُشَلِيم، و قالو: 2”تَلاميذَك بِكَسِّرو #15:2 حَديث: التَّعليم الإتعَلَّموهو مِن ناس الزَّمَن القَديم. حَديث الشُّيوخ لِشِنو؟ عَشان ما بِغَسِّلو إيدينُم قُبّال ما ياكلو.“ 3يَسُوع رَدَّ و قال ليهُم: ”و إنتو، لِشِنو تَكَسِّرو أمر الله فِشان حَديثكُم؟ 4عَشان الله قال: إحتَرِم أبوك و أُمَّك، و كَمان: أي واحِد البقول لَعنَه عَلى أبوهو ولّا أُمّو، لازِم يَكتُلوهو. 5لَكِن إنتو تَقولو واحِد ما لازِم يَحتَرِم أبوهو إذا يَقول لِأبوهو ولّا أُمّو: المَساعَدَه الأنا كُنتَ ساعَدتَكُم بيها، هي هَدِيَّه لِلَّه. 6و كِدا، تَبَطِّلو كَلام الله عَلَشان حَديثكُم. 7يا مُنافِقين، إِشَعْيَاء إتنَبّأ تَمام عَنكُم لَمّا قال:
8النّاس ديل بِحتَرِموني بِخَشمُم،
و لَكِن قُلوبُم بَعيدَه جِدّاً مِنّي.
9يَحمَدوني ساكِت
و بِعَلِّمو أوامِر بِتاع النّاس بَس.“
10و نادى النّاس و قال ليهُم: ”أسمَعو و أفهَمو: 11البِدخُل الخَشم ما بِنَجِّس الزّول، لَكِن البِطلَع مِن الخَشم، دا بِنَجِّس الزّول.“ 12بَعدين التَّلاميذ قَرَّبو ليهو و قالو ليهو: ”بِتَعرِف الفَرِّيسِيِّين كانو زَعلانين لَمّا سِمِعو الكَلام دا؟“ 13و رَدَّ يَسُوع و قال: ”كُلّو نَبات، إذا أبوي الفي السَّما ما زَرَعَه، بِطَلِّعوها. 14خَلّوهُم. هُم ناس عَميانين بِسوقو عَميانين. و إذا عَميان بِسوق عَميان، هُم الإتنين يَقَعو في حُفرَه.“ 15و لَكِن بُطْرُس قال ليهو، ”وَرّينا مَعنى المَثَل.“ 16و يَسُوع قال: ”إنتو كَمان لِسَّع بِدون فَهم؟ 17ما تَفهَمو كُل البِدخُل الخَشم بِمشي لِلبَطُن، و بَعدين بِمرُق مِنّو؟ 18و لَكِن البِمرُق مِن الخَشم يَجي مِن القَلب، و دا بِنَجِّس الزّول. 19عَشان مِن القَلب يَجو الأفكار البَطّالَه، و الكَتل، و الزِّنا، و الأخلاق البَطّالَه، و السِّرقَه، و الشَّهادَه الكَضّابَه، و الشَّتيمَه. 20دي هي الحاجات البِنَجِّسو الزّول. و لَكِن البياكُل بِدون ما بِغَسِّل إيدينو دا ما يَنَجِّس الزّول.“
إيمان المَرَه مِن كَنعان
21و يَسُوع مَرَق مِن هِناك و مَشى بَراهو لِقِسم صُور و صَيدا. 22و شوف! مَرَه كَنعانيَه مِن المَحَل داك، طَلَعَت و كُورَكَت: ”يا سَيِّد، إبن دَاوُد، كون رَحيم لَي. شيطان #15:22 عَذَّب، يَعَذِّب: يَسَبِّب وَجَع شَديد. بِعَذِّب بِتّي شَديد جِدّاً.“ 23لَكِن ما رَدَّ عَليها بِكِلمَه. و تَلاميذو قَرَّبو ليهو و طَلَبو ليهو و قالو: ”خَلِيها تَمشي، عَشان هي بِتكورِك وَرانا.“ 24و رَدَّ عَليها و قال: ”أنا مَرَسَّل بَس لِلخِرفان المَوَدَّرين مِن بيت إِسْرَائِيل.“ 25لَكِن هي جات و رَكَعَت قِدّامو و قالَت: ”يا سَيِّد، ساعِدني.“ 26رَدَّ عَليها و قال: ”ما كوَيس ياخُد عيش الأولاد و يَرميهو لِلكِلاب الصُّغار.“ 27قالَت ليهو: ”أيوَه، يا سَيِّد، لَكِن الكِلاب الصُّغار بياكلو مِن الباقي البِقَع مِن طَرَبيزَة سَيِّدُم.“ 28بَعدين يَسُوع رَدَّ عَليها و قال: ”يا سِت، إيمانِك عَظيم. خَليهو بِكون ليكي زي ما إنتي عاوزَه.“ و بِتّا بِقَت تَمام مِن السّاعَه ديك.
يَسُوع يَدّي أكل لِلأربَعَة آلاف
29و يَسُوع مَرَق مِن هِناك، و مَشى عَلى طَرف بَحَر الجَّليل. و طَلَع لِلجَّبَل و قَعَد هِناك. 30و ناس كُتار قَرَّبو ليهو، و جابو مَعاهُم العُرُج، و النّاس اليَمشو بِعَصايَه، و العَميانين، و الما بِقدَرو يِتكَلَّمو، و تانيين كُتار. و سَلَّموهُم ليهو. و هو شَفاهُم، 31حَتّى النّاس إستَغرَبو لَمّا شافو النّاس الما بِتكَلَّمو، و النّاس الكانو بِيَمشو بِعَصايَه بِقو طَيبين، و العُرُج بِمشو، و العَميانين بِشوفو. و هُم مَجَّدو الله بِتاع إِسْرَائِيل.
32بَعدين يَسُوع نادى تَلاميذو و قال ليهُم: ”أنا عِندي رَحمَه عَلى النّاس، عَشانُم مَعاي تلاتَه أيام هَسَّع، و ما عِندَهُم أكل. و أنا ما عاوِز أرَسِّلُم جَعانين، عَشان يِمكِن يَقَعو في السِّكَّه.“ 33و التَّلاميذ قالو ليهو: ”مِن وين نَلقى في الخَلا عيش كِفايَه لِلنّاس ديل؟“ 34و يَسُوع قال ليهُم: ”عِندَكُم كَم رَغيف؟“ قالو: ”سَبعَه، و شوَيَه مِن سَمَك صَغَيِر.“ 35و يَسُوع أمَر النّاس يَقعُدو عَلى الأرض، 36و أخَد السَّبعَه رَغِفان و السَّمَك. و بَعَد ما شَكَر الله، كَسَّرَه، و أدّاها لِلتَّلاميذ. و التَّلاميذ أدّوهُم لِلنّاس. 37و كُلَّهُم أكَلو و شَبَعو. و رَفَعو مِن باقي الكِسرَه، سَبعَه قُفَف مَليانَه. 38النّاس الأكَلو كانو أربَعَة آلاف راجِل، و كَمان نِسوان و أولاد. 39و بَعَد ما رَسَّل النّاس، رِكِب المُركَب و مَشى لِمَحَل مَجدان.
Actualmente seleccionado:
مَتَّى 15: APD2024
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1978 SIM, adapted in 2024 by Pioneer Bible Translators