اِنجیلِ مَتّی 2

عالمینِ سِتارِه شِناس عیسایی بَئیَنی سِه اِنِنِه

1عیسی هیرودیسِ پادشاهی حِکمرونی ای دورِه بیت لِحِمی شهری دِلِه یَهودیه ای مَنطقِه ای جا دِنیا بیمو، بعد از وی دِنیا بیموئَن سِتاره شِناسِن مَشرِق زَمینی جا اورشلیمی سِه بیمونِه 2و گِتِنِه: «هون زِلاغ وَچِه گه یَهودی پادشاهِ کِجِه دَرِه؟ چون وی سِتارِه رِه مَشرِقی جا بَئیمی و وی پَرَسِشی سِه بیمومی.» 3وختی هیرودیسِ پادشاه هَینِه بِشنُسِه خِیلی پَریشون بَوِه و دِشتِه اورشلیمی مَردِن هَم وی هَمرا پَریشون بَوِنِه. 4هیرودیس، مَعبَدی گَت گَتِه کاهنِن و مَلِّمِنی گه مَردِنِ تورات تعلیم داوِنِه رِه یَجا جَم هاکِردِه و وِشونی جا بَپُرسیِه: «مَسیحِ موعود کِجِه وِنِه دِنیا بیئِه؟» 5وِشون هیرودیسی جِواب بُتِنِه: «یَهودیه ای بیت لِحِمی دِلِه، چون میکای پِیغَمبَری طریق مِقَدّسِ نوشته هایی دِلِه اَتی بَنوِشت بَوِه:

6«”اِی بیت‌لِحِم، یَهودایی مِلکی دِلِه،

تو اَصلا یَهودایی دییَر حاکِمِنی جا كَمتَر نیئی،

چون تیجا یَتِه حاکِم ظِهور کِنِّه

گه می قوم اسرائیلِ رَهبَری کِنِّه.“»

7اَزما هیرودیس یَواشَک عالِمینِ سِتارِه شِناسِ شی حضور بَخونِسِه و وِشونی جا بَپُرسیِه هون سِتارِه کِی ظاهِر بَوِه. 8اَزما وِشونِه بیت‌لِحِمی سِه راهی هاکِردِه و بُتِه: «بورین و خِب هون وَچِه ای دِمال بَگِردین و هَمینگِه وِرِه بَنگیتِنی مِنِه خَوَر هادین تا مِنَم بیئِم و وِرِه پَرَسِش هاکِنَم.» 9وِشون بعد از هَینگه پادِشاهی گَبِ بِشنُسِنِه راه دَکِتِنِه و هون سِتارِه ای گه وی دَر بیموئَنِ بَئیوِنِه، وِشونی پِشاپِش شیِه تا سَرآخَر اوجِه گه وَچِه دَوِه هِرِسا. 10وختی سِتارِه رِه بَئینِه خِیلی خِشال بَوِنِه. 11پَس هون خِنِه ای دِلِه بوردِنِه، وَچِه رِه وی مار مریمی هَمرا بَئینِه و زِنی بَزونِه و وِرِه پَرَسِش هاکِردِنِه. اَزما شی صِنِخیشونِه وا هاکِردِنِه و طِلا و عطریجات وِرِه هَدیِه هادانِه. 12چون خُویی دِلِه وِشونِه گوشزَد بَوِه وِه گه هیرودیسی وَر نَگِردِن، یَت دییَر راهی جا شی زادگاهی سِه دَگِرِسِنِه.

سَفر مصری سِه

13بعد از هینگِه عالِمینِ سِتارِه شِناس بوردِنِه، خِداوندی یَتِه از فِرِشتگون خُویی دِلِه یوسِفِ ظاهِر بَوِه و بُتِه: «پِرِس، وَچِه و وی مارِ بَئیر و هَمین اَمشو مِصری سِه فِرار هاکِن و تا وختی گه تِرِه نُتِمِه اوجِه بَمون، چون هیرودیس نِنِه وَچِه رِه بَنگیرِه و وِرِه بَکوشِه.» 14پَس یوسِف پِرِسا و مار و زِلاغ وَچِه رِه بَیتِه و هَمون شُو مِصری سِه راه دَکِتِه، 15و تا هیرودیسی بَمِردَنی موقِه اوجِه بَمونِسِه. هَمون گَبی گه خِداوَند هوشعِ پِیغَمبَری زِوونی جا بُت وِه اَنجام بَرِسیِه: «شی ریکارِه مِصری جا شی کَفا بَخونِسِمِه.»

هیرودیس، ریکا وَچِه ایشونِه کِشِنِه

16وختی هیرودیس سَریساب بَوِه عالِمینِ سِتارِه شِناس وِرِه گول بَزونِه، خِیلی عَصبانی بَوِه و طِبقِ تاریخی گه سِتارِه شِناسِنی جا خَوَردار بَوِه وِه، آدَم بَرِسانیِه دِشتِه ریکا وَچِه ایشونِه گه دِ سال و دِ سال کَمتر وِنِه رِه، بیت‌لِحِم و دِشتِه هون مَنطقِه ای دِلِه بَکوشِن. 17هَین کاری هَمرا هون گَبی گه اِرمیای پِیغَمبَر بَزو وِه، اَنجام بَرِسیِه:

18«رامَه ای جا یَتِه صِدا گوش رَسِنِه،

بِرمِه و موری ای صِدا.

راحیل شی وَچیلِه ای سِه بِرمِه کِنِّه

و نَخواینِه آروم بَوو،

چون وِشون دِ دَنیوِنِه.»

ناصِرِه ای شهری سِه گِردِنِنِه

19ولی وختی هیرودیس بَمِردِه، خِداوندی یَتِه از فِرِشتگون مِصری دِلِه یوسفی خُویی دِلِه ظاهِر بَوِه، 20وِرِه بُتِه: «پِرِس، وَچِه و وی مارِه بَئیر و اسرائیلی مِلکی دِلِه بور، چون اونانیگِه خوایسِنِه وَچِه رِه بَکوشِن، بَمِردِنِه.» 21پَس یوسِف پِرِسا، وَچِه و وی مارِ بَیتِه و اسرائیلی مِلکی دِلِه بوردِه. 22ولی وختی بِشنُسِه گه آركِلائوس شی پیر هیرودیسی جا، یَهودیِه ای دِلِه پادشاه بَوِه، بَتِرسیِه اوجِه بورِه، چون خُویی دِلِه وِرِه بُتِنِه جَلیلی مَنطَقِه ای سِه بورِه. 23یوسِف بوردِه و یَتِه شهری دِلِه گه وی اِسم ناصِرِه وِه زندِگی هاکِردِه. هَینجوری هون پِشگویی گه پِیغَمبَرِن هاکِرد وِنِه اَنجام بَرِسیِه گه: وی ’ناصِری‘ بَخونِس وونِه.

Actualmente seleccionado:

اِنجیلِ مَتّی 2: WMB

Destacar

Copiar

¿Quieres tener guardados todos tus destacados en todos tus dispositivos? Regístrate o inicia sesión

@ 2024 Korpu Company

Aprende más sobre کتاب مقدس به زبان مازندرانی - گویش غربی

اِنجیلِ مَتّی 2

Versículos bíblicos populares de
اِنجیلِ مَتّی 2

Biblia:

Mazanderani

Versión: کتاب مقدس به زبان مازندرانی - گویش غربی - WMB