यूहन्ना 21
21
झील रै कांठै चेलौ नै दरसण
1इण बातां रै पछै यीसु तिबिरीयास री झील रै कांठै चेलौ रै माथै परगट करया। ओ इण रीत ऊं परगट होया। 2समौन पतरस, अर थोमा जिकौ दिदुमुस कहीजै है, अर नतनएल गलील रै काना नगरी रौ रैवण वाळौ, जबदी रौ बेटौ, अर उणरै चेलौ में ऊं दो जन वळै भेळा हा।
3 #
लूक 5:5
समौन पतरस उण ऊं कयौ, “म्हैं मछली पकड़णै जावूं हूं।”
चेलौ कयौ, “म्हौ ई थारै साथै चालौ।” अतस वे निकळनै नाव में बैठ गिया, पण उण रात कीं नीं पकड़यौ।
4दिन उगतै ई यीसु नै झील रै कांठै माथै ऊभा देख्या, पण चेलौ उणौनै ओळखियौ कोनीं की ऐ यीसु है। 5तद यीसु उण ऊं कयौ, “हे भाइयो, थांरै खनै कीं मछलिया है कांई?”
वे जबाब दियौ, “कोनीं।”
6 #
लूक 5:6
तो यीसु उणौनै कयौ, “नाव री जीमणी तरफ जाळ फेकों, तो मिळैला।” चेलौ व्यौंही इज करयौ अर इती सारी मछलिया ही के जाळ खेचणौ भारी पड़ग्यौ।
7तद उण चेले नै जिकौ लाडलौ कैलातो हो, पतरस ऊं कयौ, “ऐ तो परभु है!” समौन पतरस ओ सुणन की ओ तो परभु है, कमर में ऊपर रा गाभा बांध लियौ, क्यूंकै वो कांम करणै रै खातर ऊपर रा गाभा निकाळया हा। अर हाथोहाथ किनारै पूगणै रै खातर झील में कूद पड़ियौ। 8पण लारला चेलौ नाव माये इज रिया अर मछलियो ऊं हेंठा भरयोड़ा जाळ नै लगोलग दो सौ हाथ खैंचनै किनारै माथै लाया। 9जद वे किनारै माथै उतरिया, तो उणौ कोयलो री अग्नि अर उण माथै मछली राख्योड़ी, अर रोटी देखी।
10यीसु उणौ ऊं कयौ, “जिकौ मछलिया थै अबार पकड़ी है, उणमे ऊं कीं अठै लावौ।” 11समौन पतरस नाव माथै चढ़नै एक सो तिरैपन मोटी मछलियो ऊं भरयोड़ौ जाळ खैचिंयो, अर इती सारी मछलिया ही तो ई जाळ नीं फाटयौ। 12यीसु उणौनै कयौ, “आओ खाणौ जीमलौ।” चेला मांय ऊं किणी नै आ पूछणै री छाती कोनीं होई के, “थै कुण हो?” क्यूंकै वे जांणता हा की ओ परभु इज है। 13तद यीसु रोटी लेन सबां नै दी, अर व्यौंही मछलिया ई दीनी। 14ओ तीजी बार हो की यीसु मरयोड़ौ में ऊं जी उठनै रै पछै चेलौ नै दरसण दीना।
यीसु अर पतरस
15खाणौ जीमणै रै पछै यीसु समौन पतरस नै कयौ, “हे समौन, यूहन्ना रा बेटा, कांई थूं इणौ ऊं बढ़न म्हारै ऊं परैम राखै?”
पतरस जबाब दियौ, “हां परभु, थै तो जांणौ हो के म्हैं आप ऊं हेत राखूं।”
यीसु उणनै कयौ, “म्हारै उनियां नै चरा।”
16यीसु पाछौ पूछयौ, “हे समौन, यूहन्ना रा बेटा, कांई थूं म्हारै ऊं परैम राखै है?”
पतरस कयौ, “हां परभु, थै तो जांणौ इज हो म्हैं थांरै ऊं हेत राखूं।”
यीसु कयौ, “म्हारी लरड़ियां री रूखाळी कर।”
17तीजी बार यीसु वळै उणनै पूछयौ, “हे समौन, यूहन्ना रा बेटा, थूं कांई म्हारै ऊं परैम राखै?”
पतरस मौळौ पड़ग्यौ के यीसु तीजी बार उणनै आ बात पूछी। वो कयौ, “हे परभु, थै तो सगळौ जांणौ हो, थांनै ठाह है म्हैं थांरै ऊं हेत राखूं।”
यीसु कयौ, “म्हारी लरड़ियां नै चरा।
18“म्हैं थांनै साची-साची कहूं, जद थूं जवान हो, तो थूं थारी कमर बांधनै जठै चावतौ हो उठै जा सकतौ हो, पण जद थूं बुढ़ौ होवैला, तो अपणा हाथ लांबा करैला, अर दूजा थांनै बांधनै जठै थूं जावणौ ई कोनीं चावै उठै थनै ले जावैला।” 19यीसु उणनै ओ कैवणौ चावतौ हो के परमेसर री महिमा रै खातर उणरी मौत कीकर व्हैला। तद यीसु उणनै कयौ, “म्हारै लारै वहीर व्है जा।”
यीसु अर उणरौ लाडलौ कैलाणै वाळौ चेलौ
20 #
यूह 13:25
पतरस मुड़न उण चेले नै लारै आवतौ देखियौ, जिकौ लाडलौ कैलातो हो। औ, वो इज चेलौ हो जिकौ खाणै री वेळा यीसु रै खनै झुकनै पूछयौ हो के, “हे परभु म्हौरै मांय ऊं कुण थांनै धोखे ऊं पकड़ावैला?” 21उणनै देखनै पतरस यीसु नै पूछयौ, “हे परभु, इणरौ कांई व्हैला?”
22यीसु जबाब दियौ, “जे म्हैं चावूं के वो म्हारै आवण तांई ठैरयो रै, तो थनै इण ऊं कांई करणौ? थूं म्हारै लारै चाल।” 23इण खातर सैंग मसीह भाइयो नै आ ठाह पड़गी के औ चेलौ कोनीं मरेला। पण यीसु आ बात कोनीं कही। वे सिरफ आ बात कही के, “जे म्हैं चावूं के म्हारै पाछौ आवण तांई औ ठैरयो रै, तो थनै इण ऊं कांई करणौ?”
उपसंहार
24ओ वोहीज चेलौ है जिकौ इण बातां री गवाई दैवै है अर जिणै ऐ बातां नै लिखी है। अर अपां सब जांणौ हो के उणरी गवाई साची है।
25यीसु वळै घणी ई चमतकार करिया। पण म्हैं सोच्यौ के यीसु रै जीवण री सैंग बातां लिखी वेती तो जिकौ किताबो लिखिजतीं वे पुरा संसार रै मांय कोनीं मावती।
Actualmente seleccionado:
यूहन्ना 21: RWR
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
© NLCI CC BY-NC-ND 4.0