संत.लुकास 13
13
मान के रूवाड़ेपे चाहे नसोःपे
1हिमीन रे मिहोंड़-बनहोंड़ होड़, गलीली रआ बारे ईसु के उउदूः हीःग नेनाकु, पिलातुस जे बेरा हुंकू परमेसर के बलिदान रकाबे केनाकु हिमीन रे, होड़कु के गो-गोएःग लःअय हुकूम एमा लिकुआय। 2तेकर हुनी हुंकू के कंहड़ी रूवाड़ोः लिकुआय, “नुकू गलीली एटाअ गलीली रिनकु तरअः जादे पापी ताही नेनाकु, हिना लःअय हुंकू के गोएःग ची लिकुआय निआँ पे समझाव नेना एतान? 3कोवान! बकिर ईङ आपे के बेताः दिपीईङ, आपे होः पाप तरअः मन कापे रूवाड़ेआ होले, निआँ लकान आपे जामाकु होः नास कोआपे। 4चाहे सिलोह रेनअः गुम्मट हुंकू अठारा झन होड़ रे उयुअ नेना, हेतरअ हुंकू तेन गोएःग नेनाकु हुंकू गोटा जिरोसलेम रिनकु होड़ तरअः जादे गुनाहगार ताही नेनाकु मेन केते समझाव नेना पे एतान? 5कोवान! आपे के बेताः दिपीईङ, जदि आपे होः पाप तरअः मन कापे रूवाड़ेआ होले, आपे जामाकु निआँ लकान नास कोआपे।”
बेगर जोअ ओना अंजीर सिंङ रेनअः गाम
6तेकर ईसु नोःआँ गाम कंहड़ी लःअय, “जाहें आला अंगुर बाखड़ी ताही नेना होना बाखड़ी रे मियांड अंजीर सिंङ होः बीःड लआ ताही नेना, हेतरअ हुनी होना रे जोअ नाम हीःग नेनाय। बकिर होना सिंङ रे मियांड-मिन होः जोअ काय नाम दाड़ी लआ। 7तेकर हुनी, ‘नेलेमे पे बरीस तरअः नोःआँ अंजीर सिंङ रे जोअ नाम हिजोईंग, बकिर काईङ नाम दड़ीआ, होना के मागेमे! होना एता लःअय ओत के टाँड़ाव ताकेआय।’ मेन केते बाखड़ी होरहोई के कंहड़ीओ लियाय। 8तेकर बखड़ी होरहोई बेता लियाय, ‘ए गोमके, नोःआँ के नोःआँ बरीस होः बाई गोअ तामे, नोःआँ रे चाऊकिरदा ला केते; माईन्द लगायींग। 9दराआ दिन जोयोआ होले बेसा, कोवान दो, होना के मांअ गुलतामे’” बेता लियाय।
सथाअ हिला कुबड़ी आउराईत के छोड़ाव लियाय
10ईसु सथाअ हिला मियांड बिनती ओड़ाअ रे सिखाव कुकेनाय। 11तेकर होंड़े मियांड आउराईत अठारा बरीस तरअः पयहाः ची खाता मुवाँ आतमा लगाव ताहिनाय; हेतरअ हुनी कुबड़ी ताहिनाय, तेकर एता लकान रे होः काय सोझोः दाड़ी केना। 12ईसु हुनी के नेल केते, रअः लियाय, हेतरअ “ए कुबड़ी आउराईत, आम पयहायोः खाता बिपाईत तरअः बेस नाम” बेता लियाय। 13तेकर हुनी, हुनी के छुवाँव लियाय, हेतरअ हुनी तुरते सोझनाय तेकर परमेसर के बड़ाई लियाय।
14 #
उइठ 20:9,10; कन 5:13,14 बकिर ईसु सथाअ हिला बेस लियाय, हिना लःअय बिनती ओड़ाअ रिनी अगुवा खीस केते, “कामी लःअय छाव रोज एदनाअ होना रे कामी चाही; हेनेन हिला बेसोः लःअय हिजोःपे बकिर सथाअ हिला दो बेसोः लःअय आलपे हीःग कोओ,” मेन केते होड़कु के कंहड़ीओ लिकुआय!
15बकिर परभु बेता लिकुआय, “ए ढोंगी होड़कु! आपे जामेकु सथाअ हिला आपे आलकु उरीःग चाहे गधा गोहाड़ तरअः अड़ाअ केते दाअः पियाव कापे ईदी कुआ? 16दो नुई कुड़ी दो अब्राहम आली माई हेके जेके आठारा बरीस तरअः सैतान नुई के तोल केते दोहो ताही लियाय; नुई के सथाअ हिला नोःआँ तोल लआ के राराड़ा उचित का ताहीना एतान?” कंहड़ी रूवाड़ोः लिकुआय। 17तेकर हुनी नोकान कंहड़ी लःअय हिमीन रे हुनी आलकु जामा मुदाई कु लाज नाकु, तेकर जामे तुन्दरा होड़ हुनी कामी केनाय जामा महिमा रेनअः काम के नेल केते रिझ नेनाकु।
राई रेनअः गोटा
(संत.मत्ती 13:31–32; संत.मरकुस 4:30–32)
18तेकर ईसु कंहड़ी लःअय, “परमेसर आला राईज एतान लकाना? हेतरअ होना के ईङ एतान लोः जोखायीङ? 19होना मियांड राई गोटा लकाना। होना के जाहें होड़ ईदी केते बाखड़ी ताय रे हेर लःअय। हेतरअ होना हरा केते सिंङ पाड़ी नेना, तेकर सिरमा रिनकु ओड़े होना रेनअः डाईड़ तेरे डेरा लअकु।”
खमीर रेनअः गाम
20तेकर ईसु आउर कंहड़ी लःअय, “परमेसर आला राईज के एतान लोः जोखायीङ? 21होना थोड़ेक खमीर लकान एदनाअ। जेके जाहें आउराईत थोड़ेक खमीर के ईदी केते लगभग बीस किलो आँटा होलोंङ रे सुवेःड लःअय तेकर नेल-नेल तेगी सुवेःड लआ आँटा फुलाव ना।”
सुंड़कू दुवार
(संत.मत्ती 7:13–14,21–22)
22तेकर ईसु सहर-सहर हेतरअ डिही-डिही सिखाव याःते जिरोसलेम सेनोः केनाय। 23तेकर जाहें मिहोंड़ बेता लियाय, “ए परभु, थोड़हे होड़ किगी बंचाव किकुआकु एतान?”
24ईसु हुंकू के कंहड़ीओ लिकुआय, “सुंड़कू दुवार तरअः परोम केते परमेसर आला राईज रे बोलोयोः लःअय मेहनाईतेपे; ढेर होड़ बोलोयोः नाम कोआकु हेतरअ एरकु बोल दाड़ीआ निआँ ईङ बेताः देपेआ। 25जे बेरा ओड़ाअ मुंवार बिरिःड केते दुवार सिंङ गुल तआय तयोम राच रे तिंगु केते दुवार के ठोक-ठोकायापे, हेतरअ ‘ए मलिक आले लःअय उघड़ायमे’ मेन केते, गोहराव कोआपे! तेकर हुनी, ‘आपे ओके हेके आउर आपे ओका रेनपे हेके ईङ आपे के काईङ पड़ीआ’ बेता केपेआय! 26तेकर आपे, ‘आले आम मड़ांग रे जोम नु लआले; हेतरअ आम आले आला खुड़ रे सिखाव लेकेनाम, मेन केआपे!’ 27#सिरिंग 6:8बकिर हुनी ‘आपे ओके हेके, ओका रेनपे हेके, होना के काईङ पड़ीआ। ए बेलुरा काम कामीकु, आपे जामा ईङ दुबाःड़े तरअः ओचोगोःपे’ बेता केपेआय! 28#सं.मत्ती 22:13; 25:30#सं.मत्ती 8:11,12आपे अब्राहम, हेतरअ इसाहक, आउर याकुब, तेकर जामे आगमजानीकु के परमेसर आला राईज रे दुड़ूः उनकु तेकर अपने के बाहरी रे उडुंग उनकु नाम केआपे, तेकर होंड़े ईईयाम हेतरअ डाटा रिरिड़िंग पड़ाव कोआ! 29तेकर होड़ पुरूब, पछिम हेतरअ उतर दखिन तरअः हीःग केते, परमेसर आला राईज रआ भोज रे दुड़ूः कोआकु। 30#सं.मत्ती 19:30; 20:16; सं.मर 10:31तेकर नेलेपे तयोम रिनकु मड़ांग कोआकु, हेतरअ मड़ांग रिनकु तयोम कोआकु।”
ईसु हेरोद के चेताव लियाय
31हिमने रे थोड़ेक फरीसीकु हीःग केते, “नोआँड़े तरअः उडुंग सेनोः जुनोःमे, हेरोद आम के गोगोएःग नाम तनाय” बेता लियाकु।
32तेकर हुनी कंहड़ीओ लिकुआय, “जु नेलेमे, ‘ईङ तिसिंग हेतरअ गापा मुवाँ आतमा के उडुंग कुईंग, तेकर बेमारिया के चंगा कुईंग तेकर तीसरा रोज अपन काम के पुरायीङ नोःआँ के हुनी हुंर्ड़रा के कंहड़ीओई पे,’ बेता लिकुआय। 33रे होः तिसिंग गापा आउर मियांङ ईङ के; डिड़ोगोः दरकार एदनाअ, एता लःअय ची नोःआँ एरे हुयाव सकअ, जाहें आगमजानी जिरोसलेम तरअः बाहरी इरकु गोजोआ।
जिरोसालेम लःअय सोक
(संत.मत्ती 23:37–39)
34“ए जिरोसालेम, ए जिरोसलेम! आम आगमजानीकु के गोएःग कुआम, तेकर आम दुबाःड़े कुलगोःड लिनकु के छेछोम गोएःग कुआम! ईङ उकिन खेप नोःआँ चहाव निनिंग जे लकान एंगा सीम आएंग आलकु छउना के अफड़ाअः लतार रे अबरूम ताकुआय, हिना लकान उकिन खेप ईङ आम आलकु होड़कु के जवार कुईंग, बकिर नोःआँ आम काम चहाव नेना! 35#सिरिंग 118:26नेलेपे आपे आला बड़े बिनती ओड़ाअ, आपे लःअय उजाड़ बाईःग तुकेआकु, हेतरअ ईङ कंहड़ीओ दिपीईङ ‘परभु आला नुमू रे जे हिजोआय हुनी धनया एदानिया, आपे अनौरी कंहड़ी जगुत ईङ के आपे एरपे नेलिङा।’”
Actualmente seleccionado:
संत.लुकास 13: ASR
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
© 2023 NLCI CC BY-NC-ND 4.0