संत.लुकास 5
5
पहिला चेलाकु के रा-राअः
(संत.मत्ती 4:18–22; संत.मरकुस 1:16–20)
1 #
सं.मत्ती 13:1,2; सं.मर 3:9,10; 4:1 मुसिङ ईसु गनेसरत डाहा दौंड़ी रे तिंगु ताहिनाय, हिमीन रे तुन्दरा होड़ परमेसर आला कंहड़ी आ-आयुम लःअय ईसु दुबाःड़े तुन्दरा योअ केनाकु 2हिमीन रे हुनी डाहा दौंड़ी रे बरिया डोंगा तिंगु लअः नेल लःअय; तेकर केंवटा होंड़े तरअः अड़गु केते जाल के धोवाय केनाकु।
3होना डोंगा मेसे मियांड रे जे सिमोन आला ताहिना, होना रे रकाःब केते हुनी सिमोन तरअः गोहराव नेनाय, ची ओत दौंड़ी तरअः कटिःग मड़ांग ईदी मे। तेकर हुनी डोंगा रे दुड़ूः केते होड़ के सिकछा एमोअ लगाव नाय। 4तेकर हुनी सिखाव चबा केते सिमोन के, “डोंगा के गहीड़ पखा ईदी मे, हेतरअ हाकु दाअः लःअय जाल ताम के लगाय मे” बेता लियाय।
5 #
सं.जोह 21:3
सिमोन हुनी के, “ए मलिक, आले भाईर निदा खाटाव नेनाले रे होः मियांड मीन होः काले दाअः लिकुआ, बकिर आम आला कंहड़ी रे जाल लगायींग” मेन केते कंहड़ी रूवाड़ोः लियाय। 6#सं.जोह 21:6तेकर हुंकू जाल लगाव लअकु दो ढेर बगरा हाकु दाअः लिकुआकु तेकर जाल ताकु फड़ायोः लकान ना। 7तेकर हुनी एटाअ डोंगा रिनकु गाती ताकु के आले के मदाईत लेपे मेन केते अड़िःग लिकुआकु, तेकर हीःग केते बनार डोंगा के नोकान हाकु रे पेरेःग केदाकु ची होना डुबाअ लकान ना। 8नोकान नेल केते सिमोन पतरस ईसु आला जांगा रे नुर केते, “ए परभु, ईङ दुबाःड़े तरअः सेनोः जुनोःमे, एता लःअय ची ईङ पापी होड़ हेके!” बेता लियाय।
9एता लःअय ची जाल रे ढेर बगरा हाकु दाअः नेनाकु चलते सिमोन तेकर हुनी आलकु गाती ताय छकित नाकु। 10तेकर हेंकान गी जबेदी आली होपोन याकुब हेतरअ जोहन के होः, जे सिमोन आलकिन सझेदार ताही नेनाकिन, छकित नेनाकिन। तेकर ईसु सिमोन के, “आलुम बोरोयोः; नहाअः तरअः आम होड़कु के परमेसर आला राईज रे आ-आगु वाला पाड़ी कोआम” बेता लियाय।
11तेकर हुंकू डोंगा के ओत दौंड़ी रे आगु लअकु, हेतरअ जामा जिनीस के बाईःग तु केते, ईसु के ओतोङ लियाकु।
छुँत घाव ऊनी के चचंगा
(संत.मत्ती 8:1–4; संत.मरकुस 1:40–45)
12ईसु मियांड डिही रे ताहिनाय हिमीन रे होनाःड़े मिहोंड़ छुँत घाव ऊनी ताही नेनाय, तेकर ईसु के नेल केते, ओम्बअ नेनाय, तेकर “ए परभु, जदि चहाअ आम होले, ईङ के सुध दाड़ी किङाम” मेन केते गोहराव नेनाय!
13हुनी तीः जिलींग केते छुवाँव लियाय। हेतरअ कंहड़ी लःअय “ईङ चहाअ तानिङ, आम सुध जुनोःमे!” तेकर हुनी आला छुँत घाव तुरते छुटाव ना। 14#लेवी 14:1–32तेकर ईसु हुनी के हुकूम एमा लियाय, “ओके के होओ आलुम कंहड़ी के, बकिर सेन केते अपने के पुरोहित के उदूःओई मे; तेकर छुँत घाव तरअः सुधोअ रअः बारे जे जिनीस भेंट रा-राकाःब लःअय, मुसा ठहराव तदाय होना के जेकर से होड़कु के आम आला छुँत घाव छुटअ रअः साबुत भेटाअः लःअय रकाबेमे।”
15बकिर ईसु आला चरचा आउर गी फैलाव सेन नेना, तेकर मुरुक तुन्दरा के तुन्दरा होड़ हुनी आला बात के आ-आयुम लःअय हेतरअ अपन बेमार तरअः बेसोः लःअय जवारोअ केनाकु 16बकिर हुनी रिड़िगया ठाँव रे एकला सेन केते, बिनती केनाय।
ईसु लकवा ऊनी के चंगा लियाय
(संत.मत्ती 9:1–8; संत.मरकुस 2:1–12)
17मुसिङ ईसु सिकछा एमाकु केनाय, तेकर बेमार होड़कु के चचंगा लःअय परभु परमेसर आला सवांग हुनी लोः ताहिना, आउर होनाःड़े फरीसी हेतरअ मुसा आला कनहुन सि-सिखावकु दुड़ूः ताहिनाकु जे गलील हेतरअ जाहुदिया तेकर जिरोसलेम राईज रेनअः जामा डिही तरअः हीःग ताही नेनाकु। 18हिमीन बेरा ढेर होड़ मियांड लकवा बेमार ऊनी होड़ के खटिया रे आगु लियाकु, तेकर हुंकू हुनी के ओड़ाअ भीतरी रे ईइदी हेतरअ ईसु दुबाःड़े दोदोहो लःअय उपाईये केनाकु 19बकिर तुन्दरा चलते हुनी के भीतरी काकु इदी दाड़ी लिया, दो हुंकू साड़ुम रे रकाःब नेनाकु। हेतरअ खापरा के ओचोः केते, हुनी के खटिया बाईर ईसु दुबाःड़े अड़गु लियाकु। 20ईसु हुंकू आला बिसवास के नेल केते, हुनी के “ए मनवा, आम आला पाप छमाः ना” बेता लियाय।
21तेकर धरम पुथी सि-सिखावकु हेतरअ फरीसीकु, “नुई ओके हेके जे परमेसर आला निन्दा सिकाईते आय! परमेसर के बाई केते ओके पाप छमा दाड़ी केआय मेनोः तानाकु!”
22ईसु हुंकू आला मन रेनअः बात के पाड़ी केते, “आपे अपन मन रे नोकान एतान उईहार दापे? बेता लिकुआय, 23सेबा एतान एदनाअ, ची ‘आम आला पाप छमाः ना,’ नोःआँ कंहड़ी चाहे, ‘बिरिःड मे हेतरअ दंड़ा-बंड़ान मे नोःआँ कंहड़ी?’ 24बकिर नोःआँ लःअय ची आपे पड़ीपे, ची होड़ होपोन के ओत रे पाप छमा रेनअः हक एदनाअ।” ईसु हुनी लकवा बेमार ऊनी के, “ईङ आम के, कंहड़ीओ दिमीईंङ बिरिःड मे, हेतरअ अपन खटिया के गोअ केते, अपन ओड़ाअ सेनोः जुनोःमे” बेता लियाय।
25हुनी हेने घड़ी जामेकु मड़ांग रे बिरिःड नेनाय, हेतरअ जे खटिया रे गितीःग ताहिनाय, होना के गोअ केते परमेसर आला बड़ाई याःते, अपन ओड़ाअ सेनोः नाय। 26तेकर जामाकु छकित नाकु! हेतरअ परमेसर आला बड़ाई दाकु, तेकर बोरते, “तिसिंग आबु आचरज बात नेल लआबु मेन लअकु!”
लेवी के राअः लियाय
(संत.मत्ती 9:9–13; संत.मरकुस 2:13–17)
27होना तयोम, ईसु बाहरी ते सेन नेनाय, तेकर लेवी नुमू रिनी मियांड मालगुजारी ताइसलावकु के मालगुजारी ताइसलाव ओड़ाअ रे दुड़ूः ऊनी नेल लियाय, हेतरअ हुनी के, “ईङ के ओतोंङिङ मे” बेता लियाय। 28तेकर हुनी जामा जाईत के बाई केते, बिरिःड नेनाय, हेतरअ ईसु के ओतोङ लियाय।
29तब लेवी अपन ओड़ाअ रे ईसु आला मरजाद रे मियांड बड़े भोज एमा लिकुआय, तेकर होना भोज रे मालगुजारी ताइसलावकु तेकर एटाअ होड़कु आला भीड़ ताही नेना जे ईसु लोः घोटो जोम दुड़ूः थिनाकु। 30#सं.लुका 15:1,2नोःआँ चलते फरीसीकु हेतरअ हुंकू आलकु धरम पुथी सि-सिखावकु हुनी आलकु चेला के “आपे मालगुजारी ताइसलावकु हेतरअ पापीकु लोः एतान लःअय जोम नु यापे?” मेन केते कुड़-कुड़ाअ तनाकु।
31ईसु नोकान कंहड़ी रूवाड़ोः लिकुआय, “बाईध बेसकु लःअय कोवान, बकिर बेमराहाकु लःअय दरकार एदानिया। 32ईङ धरमीकु आला मन के कोवान, बकिर पापीकु आला मन के पाप तरअः रूवाड़ केते परमेसर लोः जुजुटाव लःअय हीःग तानिङ।”
उपास रेनअः सवाल
(संत.मत्ती 9:14–17; संत.मरकुस 2:18–22)
33मिहोंड़ बारहोड़ ईसु के कंहड़ीओ लियाकु, “जोहन आलकु चेला दो बराबईर उपासेआकु तेकर बिनती याकु, हेतरअ हिना लकान फरीसीकु आलकु चेला होः, बकिर आम आलकु चेला दो जोम-नुयाकु।”
34ईसु हुंकू के बेता लिकुआय, “आपे बरातिया के बार-बाबु हुंकू लोः तहीनोः जगुत उपास चिकु केआपे एतान? 35बकिर होना दिन होः हीःग कोआ जेकर रे बार-बाबु के हुंकू तरअः आलगे कियाकु, होले हिमीन रे हुंकू उपास केआकु।”
36हुनी आउर मियांड गाम होः कंहड़ीओ लिकुआय, “जाहें होड़ नावाँ कुड़ता रअः गेन्दरअ के चिरा केते मारी कुड़ता रे काकु तुनाया जदि जाहें नोका नेआय दो, नावाँ कुड़ताः चिराकोगीआ, बकिर नावाँ तुना लआ लेधरअ होना मारी लोः मेल एरे जोमेआ। 37तेकर जाहें नावाँ अंगुर रस के हरता रेनअः मारी थाईलअ रे काकु पेरेगेआ, कोवान दो नावाँ अंगुर रस हरता थाईलअ के फाड़ा केते गिड़ी कोआ, तेकर हरता थाईलअ होः बेकार कोआ। 38हिना लःअय नावाँ अंगुर रस के नावाँ हरता रेनअः थाईलअ रे पेरेगेआकु! 39जाहें होड़ मारी अंगुर रस नु केते नावाँ के काय चहाअ, एतान लःअय ची हुनी मारी गी बेसा” मेन केते कंहड़ीयाय।
Actualmente seleccionado:
संत.लुकास 5: ASR
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
© 2023 NLCI CC BY-NC-ND 4.0