Màtíyò 16
16
Fàrísààb ɓe Sàdúsààb á ɓwèìnɨ lìím
(Góòmɓwê Mk 8.11-13; Lk 12.54-56)
1 Fàrísààb ɓe Sàdúsààb ya gainwoó Yésù. Hȩ ŋgáb ya ɗú ŋgə́ kə̀hɨ̀niì, ŋgáb ɨ́ tà ŋgə́ túùmnà vúm lìím kù ɓa túùmnɨ ɓè nyòm ŋgéé gomeɓa yɨ́ Mèèín. 2Ɨ́dù Yésù ɨ́ tàcùnà ŋgáb ɨnè: «Lɨ́tɔ̧ɔ̧́, ɓwâ mvii njaneè rɨ, nyí á tà: ‹Nà̧á̧ tɨ̀ nɨ nàr, ɓetí ɓɨɨr á wááŋ.› 3Yekɨ́rɨ̀b cè, ɓwâ ɓɨɨr du ndùúŋ ndɨ, nyí a tà: ‹Nà̧á̧ ɓa nànɨ á, ɓetí ɓɨɨr sɨ́ɨmtɨ́.› Nyí ɗəəŋtɨ́ cànɨ lìím bɨ du ɓɨllɨnne, nyí a dù nɨ́ ɗə̀ə̀ŋwá cànɨ lɨ̀m nɨ́m ɓa ndɨ̀ŋnɨ jíìb mwánnè noò à? 4Nùb ɓáŋhɨ́b jíìb mwánnè Mèín jə̀ŋnde á ɓwèìnɨ lìím ɨ́dù kùb tɨ̀ bɨ ŋgáb lìím mwi̧ nɨ̀ mwi̧ rɨ́ túùmnàɓàr, jɔ̀sé kɨ́ ŋgáb ya pə́ Jónàs, tɨ́kìn Mèèín ya rɨ.»#16.4 Lìím kɨ́ du jíì taarɨ́b Jónàs yi jə́b həréé ɓɔ̧ɔ̧ ɗà hei kɨ́ ɨ́ gì ŋgə́ túŋcùhó̧nɨ Nìnîvə̀ rɨ á. Kí yi du túúm cwá Yésù yi ɓa kúnɨ ɗà ŋgə́ a sə̀ə̀mcùhô̧ cùr jíì taarɨ́bí rè á. Kí á ŋgə́ ya mbɨ́kkɨ́so ŋgáb ɓè yɨrɨ́b, ŋgə́ ɨ́ gì nɨ́.
Mvùŋ Fàrísàbì ɓe kɨ́ Sàdúsàbì
(Góòmɓwê Mk 8.12-21)
5 Nɨ̀fuùb ɨ́ pè ɓáá cəə́r, ŋgáb ɨ́ cə̀mláŋkɨ́sò bɨ̀rê. 6Kí á Yésù tana ŋgáb: «I̧i̧, gə́tɨnáam ɓe mvùŋ Fàrísàbì ɓe kɨ́ Sàdúsàbì yoo!» 7Nɨ̀fuùb ɨ́ yà nyì̧ì̧nɨ mvókín ŋgábè no ɨnè: «Ŋgə́ nyin u̧nè àm nɨ́m du bɨ̀rê áwòwáá á.» 8Hȩ Yésù ɗə̀ə̀ŋnɨ nɨ́ɨ́b ŋgáb ya nyinkom kíì, ŋgə́ ɨ́ fɔ̂: «Àm níì á nyí du nyì̧ì̧tèènɨ mvókín nyínè nyí a tace: Àm nɨ́m du ɓe bɨ̀rê ɗàwáá á? Pə́náye hȩ ə́ə́m nyínè du ŋgóbtií! 9Nyí nɨ ókháyèwá à? Nyí nɨ lə́ə̀mcùnɨ bɨ̀rê ŋgiì mɨ ya kuume ɓe ɨ́r nɨ̀ŋgwáàb tɔ́sìn ŋgiì, ɓe vùùm lɨ̀ŋtɨ̀ɨ̀ŋ nyí ya ha̧a̧ne kumsiì noò ɗàwá à? 10Kèè nyí nɨ lə́ə̀mcùnɨ bɨ̀rê tɨ́ɓaám mɨ ya kuume ɓe ɨ́r nɨ̀ŋgwáàb tɔ́sìn nààsɨ̀b, ɓe vùùm lɨ̀ŋtɨ̀ɨ̀ŋ nyí ya yúkle ɓe kumsiì ya meré ɗàwá? 11Àm níì á nyí du ókwa ɨnayâna nɨ ɓe ɨ́r bɨ̀rê sé á mɨ nyinna nyí? Mɨ ta nyí gə́tɨ̀ ɓe mvùŋ Fàrísàbì ɓe kɨ́ Sàdúsàbì.»
12Á nɨ̀fuùb noò ya óknyaaŋgi ɓè ŋgə́ ya du nɨ́ tàwá ŋgáb gə́tɨ̀ ɓe mvùŋ wúte bɨ̀réè, ɨ́dù ŋgáb gə́tɨ̀ ɓe tɔ̀ɔ́ Fàrísààb ɓe Sàdúsàbì.
Píyéèr wáaɓatɨ́ Yésù nɨ Mèsî á
(Góòmɓwê Mk 8.27-30; Lk 9.18-21)
13Yésù ɨ́ gì ɗɔ̀ɔ́b ya du gín Sèsàrê du Fìlíìb lɨ no. Ŋgə́ ɨ́ fɔ̂ nɨ̀fuùb noò ɨnè: «Ní á cè kùb du nyìnnɨ ɓe ɨ́r mwin nɨ̀rì?» 14Á ŋgáb pihe ɨnè: «Nùb kù á tànɨ wu du Jâŋ nò kɔhɨ kùb kɔ ə́mní á, nùb kù cè, wu Èlî á; nùb kù ndóŋ kwà á tànɨ wu du Jèrèmî á, kɨ́ kù tɨ́kìn Mèèín kù ndóŋ.» 15Yésù ɨ́ fɔ́kwà ŋgáb ɨnè: «Kɨ́ nyínè, nyí tace mɨ macè na?» 16Sìmóŋ Píyéèr ɨ́ pìhè ɨnè: «Wu Mèsî á, mwin Mèín nò du jááŋ.» 17Kí á Yésù tana ŋgə́: «Wu á ɓe mɨ̀tù, Sìmôŋ mwin Jáàŋ, ɓetí nɨ nɨ̀vɨ́tè kù sé ɨ́ viina wu àm àmɨɨr ɗàrɨ́, tá moò du ɓɨllɨnne ɨ́ viina nɨ́ wu ru. 18Kɨ́ moò mɨ wáanaá wu, wu Píyéèr á, (kí ta sɨɨ na á); sɨɨ kɨ́ ya á mɨ ɓa óŋnɨ dúú ə́mní moò ru, cwé nɨ̀mɨr sàmàìn kwá ndɨŋ ŋgə́ nɨ́m kù ɗàà. 19Mɨ kwá na wu kpər Haam Mèèín. Nɨ́m wu kwá kaŋhɨ ɗàá, kùb kwá kaaŋɓwée nɨ́m kɨ́ còóm. Nɨ́m wu kwá ə́mne kùb ndɨ̀ŋ ɗàá, kùb kwá ə́əmɓwée nɨ́m kɨ́ còóm.» 20Á Yésù ya tana nɨ̀fuùb noò kpáb! Ŋgáb nò kù ní Mèsî á na tànàwá.
Yésù takɨ́yayeé àm cwá ní ɓa kúnɨ, Mèín a tì sə̀ə̀mcùhô̧ níì
(Góòmɓwê Mk 8.31, 9.1; Lk 9.22-27)
21Yànɨ ɓwâ kɨ́, Yésù ɨ́ nyìnnàɓà nɨ̀fuùb noò wááŋ ŋgə́ á tace: «Ɗúú nɨ́ mɨ gɨ̀ Yèrúsàlèm á, ɗà kɨ̀jííb, ɓe mvènnɨ́b nùb na satɨgàà ɨ́ nɨ̀gááŋ káàtàbì a túùmnà mɨ jábɨ́r cei. Kùb ɓa mɨ kwíìnɨ á, cùr jíì taarɨ́bí, Mèín a tì sə̀ə̀mcùhô̧ mɨ.» 22Kí á Píyéèr ya ɗamhó̧ ŋgə́ gə́nȩ̀ȩ́, ɗà ŋgə́ ɨ́ yà ŋgə́ yètɨ̀nɨ, ŋgə́ ɨ́ tà: «Ɗàwá, Kéké! Nɨ́m kù tɨ̀ nɨ wu féínnàr, Mèín gə́tɨ̀ wu!» 23Ɨ́dù Yésù ɨ́ ɓàndɨ̀cùrê Píyéèr no, ŋgə́ ɨ́ tà: «Éí ɓè, Sátàìn ndè! Wu duna mɨ nɨ́m gusɨ̀rì á, ɓetí mɨ̀lə́m wó sumíì nɨ hȩ kɨ́ Mèèín ɗàà, nɨ kɨ́ nɨ̀vɨ́tɨ̀bì á.»
24Kí á Yésù ya tana nɨ̀fuùb noò: «Nò ɗú mɨ tùniì, nò kɨ́ mvúyàyè síí ŋgə́ nɨ̀mɨrí, ŋgə́ a â bàŋ noò, ŋgə́ a tùwò mɨ. 25Ɓetí nò ɗú ɓátɨ̀nɨ mè noò, ɓa mə̀mnɨ mè no kɨ́ á; ɨ́dù nò ɓa mə̀mnɨ mè noò ɓe ɨ́r moò, ɓa cénnɨ mè no kɨ́ á. 26Nɨ̀vɨ́tè ɨ́ kɨ́ nɨ́ɨ́b ɗɔ̀ɔ́b lè noò lâs ɗà ŋgə́ ɨ́ mə̀m mè noò, ní ɨ́ kpɔ́khó̧ce ŋgə́ no? Nɨ́m kù nɨ̀vɨ́tè fɨ́tɨ nànɨ àm ŋgə́ céín mè noò ɓe kíí á ku à? 27Mwin Nɨ̀rì ɓa gònɨ mgbíí tá noò no á, ɓe dùgallɨb* noò; ɓwâ kɨ́ á ŋgə́ ɓa njáàbnɨ nò lâs ɗóhîn ɓe ə́r nò kɨ́ ya ə́llé. 28Mɨ tanaɓa nyí àmɨɨr wááŋ á: ɓwâ Mwin Nɨ̀rì ɓa gònɨ hȩ mvèèìn, nùb kù tɨŋtɨ̀ŋ nùb du hò̧neè ɓaye bɨ dùnɨ jáŋ á.»
Actualmente seleccionado:
Màtíyò 16: NTV
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2007 Alliance Biblique du Cameroun, B.P. 1133, Cameroon